службеници – Kurir.mk

Одговорноста за 45 загинати падна на административен службеник, никој од владата не превзема одговорност

Тале Кристо — Thu, 25 Nov 2021 11:12:09 +0000

Денеска е трет ден на жалост по трагичната сообраќајна несреќа во Бугарија во која загинаа 45 лица додека седуммина беа повредени, главно македонски државјани. Сите надлежни во државата велат по медиуми дека одговорност за оваа трагедија ќе има, но граѓаните се уште не гледаат некоја разврска. Имено, министерството за транспорт и врски вчера ѝ ја одзеде лиценцата на компанијата „Беса транс“ откако беше утврдено дека автобусот кој изгоре во Бугарија не бил пријавен за меѓународен, ниту пак за друг вид јавен превоз на патници. Од ресорното министерство посочија дека фирмата е должна веднаш да ги депонира лиценцата за вршење на меѓународен слободен превоз на патници и изводите од лиценцата за вршење на меѓународен слободен превоз на патници. Туристичката агенција „Беса транс“ вчера на социјалните мрежи демантираше дека во автобусот, во кој загинаа 45 луѓе, била шверцувана нафта, бензин или пиротехнички материјал. Во објава на профилот на Фејсбук, туристичката агенција апелира до медиумите да не се шират шпекулации коишто ќе ѝ наштетат на истрагата. -Како агенција ги информираме семејствата на починатите и повредените во трагедијата дека автобусот во никој случај немал багаж за шверц на нафта, бензин или пиротехнички средства, се вели во вчерашната објава на социјалните мрежи од „Беса транс.“ Двајца царински службеници ќе бидат суспендирани, а нивниот непосреден раководител ќе биде санкциониран, информираа вчера од Царинската управа. Ваквата одлука доаѓа откако првичните наоди од внатрешната контрола покажале дека на 18-ти ноември, цариниците не го евидентирале електронски излезот на автобусот на „Беса транс“, односно само извршиле заверка на евидентен лист за превоз на патници. Дополнително, од Царинската управа велат дека за возилото со регистарски таблички СК 0284 БА на „Беса транс“ во кое пред два дена загинаа 45 лица во Бугарија има евидентирано повеќе преминувања во периодот од 15-ти октомври до 11-ти ноември. -Во интервјуата за хрватската РТЛ и црногорската РТЦГ истакнав дека за утрешниот ден бугарските истражни органи најавија обраќање со првични резултати од истрагата за автобуската несреќа, објави ввчера министерот за внатрешни работи Оливер Спасовски на неговиот фејсбук-профил. -Врз основа на резултатите од истрагата ќе постапиме, гарантирам дека органите ќе реагираат брзо и ефикасно. Идентификацијата на загинатите е започната, а на истата работат заеднички тимови од институтите за судска медицина од двете земји, при што македонската страна учествува во обезбедување на ДНК материјал од роднините на загинатите, објави Спасовски. Министерот Бочварски во вчерашната изјава за телевизија Телма потсети дека Владата на седница донесе два заклучока од кои едниот е Државниот инспекторат за транспорт веднаш да направи контрола во „Беса транс”. -Истрагата е во тек, Царинската управа има свои ингеренции и надлежности. Веројатно ќе се направи внатрешна контрола, ќе се провери дали, каде и каков пропуст имало. Не би сакал да прејудицирам, посебно не за друга институција – како постапувала, дали постапувала по закон, дали постапувала по закон, каде е пропустот и дали имало пропуст. Кога ќе излезат со нивните сознанија за овие прашања, има надлежен раководител и ќе ги кажат сите детали за постапувањето по овој предмет. Очекувам Царинската управа да излезе со конкретни информации за возилото. Моите очекувања се дека во текот на денот Управата треба да излезе со целата документација околу ова прашање, рече Бочварски. Освен двајца царински службеници кои ќе бидат суспендирани, а нивниот непосреден раководител ќе биде санкциониран, друга казна за владините институции нема за пропустот кој што е случен во врска автобусот кој патувал без соодветна лиценца. Нема се уште одговорност од страна на министерството за транспорт и врски, министерството за внатрешни работи и државниот инспекторат за транспорт.

Околу 200 службеници на ОН во Сирија заразени со Ковид-19

Дарко Андоновски — Mon, 07 Sep 2020 06:12:14 +0000

Повеќе од 200 претставници на ОН во Сирија се заразени со Ковид-19, соопштија вработени во организацијата. Британските медиуми потсетуваат дека здравствената структура на земјата е веќе уништена од војната, а ОН се обидува да ги зајакне своите капацитети за борба против вирусот. „Меѓу персоналот на ОН пријавени се повеќе од 200 случаи на Ковид-19, од кои некои се хоспитализирани, а тројца се медицински евакуирани“, наведува висок претставник на ОН во писмото што агенцијата Ројтерс го добила од заразено лице од локалниот персонал. Како што се наведува во писмото, реалниот број на пациенти е веројатно уште поголем, вклучително и на членовите на невладини организации што соработуваат со ОН.

Банкарските службеници потврдија дека уплатите за кампањата на ВМРО-ДПМНЕ биле законски

Ивана Ефремовски — Thu, 20 Feb 2020 11:35:43 +0000

Уште едно од апсурдните тврдења на обвинителката Лиле Стефанова и нејзината конструкција на случајот „Титаник“ денес исплива на површина. Банкарски службеници денес во својство на сведоци на Стефанова во целост ги разбија тврдењата за наводни незаконски уплати на кампањата на ВМРО-ДПМНЕ. Двајцата како шалтерски службеници за уплата и исплата на готовина во 2011 во НЛБ банка пред судот истакнаа дека согласно процедурите на банката и законот, уплати до 60.000 денари од други лица биле дозволени и секојдневни. Токму главната теза на СЈО кога го отвори овој случај беше тоа дека партијата организирала и примала средства во име на други лица над дозволениот износ. Денешните сведоци го разбија ова тврдење со фактот дека тие како шалтерски работници секојдневно примале уплатници од повеќе физички лица донесени од едно лице со цел уплата на средства кон правни лица. Со оглед на тоа дека уплатниците биле во рамки на дозволениот износ во 2011 од 60.000 денари истите биле нормално процесирани. Оваа пракса била вообичаена за банката и не постоеле ограничувања на бројот на уплати кое едно лице може да ги уплати за други лица доколку не е надминат лимитот од 60.000 денари, нешто што не било во овој случај надминато. Со овие сведочења по којзнае кој пат паѓаат во вода тезите на Стефанова и СЈО за организирано перење пари и злосторничко здружување со цел ВМРО-ДПМНЕ да победи на изборите.