смоквица – Kurir.mk

Од утре почнува наплатата на најскапата патарина во Македонија

Катерина Бојаџиева — Sun, 25 Aug 2019 19:00:03 +0000

Од утре, 26.08.2019 со почеток во 7 часот ќе започне со работа наплатна станица Гевгелија, соопшти вечерва АМСМ. На патарината кај Смоквица ќе има 10 наплатни рампи, пет кон Гевгелија и соседна Грција и исто толку кон Скопје. Ставањето во функција на ова патарина се случува откако ЈП „Државни патишта“ го изгради споредниот пат до Гевгелија за жителите од околните села. Од утре се очекува на патарината „Смоквица“ да се наплаќа по 100 денари за патничко возило, што значи дека ова ќе биде најскапата патарина во Македонија.

Полицијата откри 12 мигранти кај Смоквица и во Скопје

Дарко Андоновски — Fri, 05 Oct 2018 08:11:58 +0000

Дванаесет мигранти од кои шест од Авганистан и еден од Шри Ланка вчера биле откриени во возило со скопски регистарски ознаки на клучката во село Смоквица, а пет на меѓуградската автобуска станица во Скопје. Како што е наведено во полицискиот билтен, синоќа во 20:30 часот на клучката во село Смоквица полициски службеници запреле патничко возило „Фолксваген голф“ со скопски регистарски ознаки, управувано од Н.Р.(45) од с.Арачиново, скопско. Притоа, во возилото биле затекнати седум мигранти, од кои шест од Авганистан и еден од Шри Ланка. Н.Р. бил приведен и предаден на полициски службеници од Полициската станица Гевгелија за понатамошна постапка. Се преземаат мерки за расчистување на случајот. На меѓуградската автобуска станица во Скопје вчера во 13:00 часот биле забележани пет мигранти кои допатувале со автобус од Куманово. По пристигнувањето, тие влегле во такси возило, но набргу било пресретнато, по што возачот и патниците биле задржани во Полициската станица Карпош. Со лицата бил извршен разговор, по што биле предадени во Прифатниот центар за странци. Се преземаат мерки за расчистување на случајот.

Во четврток асфалтирање на патот од Смоквица до Прдејци, сообраќајот ќе се пренасочува по автопатот

Дарко Андоновски — Mon, 01 Oct 2018 09:53:44 +0000

Во четврток на 4 октомври ЈП Македонија пат, подружница Велес, ќе изведува асфалтерски работи на регионалниот пат Р-1102 на потегот од село Смоквица до село Прдејци во период од 9:00 до 17:00 часот. Во периодот на работа сообраќајот ќе се одвива по автопатот А1Смоквица-Гевгелија во двата правци. На местото на изведување на работите ќе биде поставена соодветна сообраќајна сигнализација.

МВР утринава пронајде 83 илегални мигранти кај село Смоквица

Матеја Петровски — Sun, 23 Sep 2018 13:08:36 +0000

Македонската полиција денеска кај село Смоквица пронајде 83 илегални игранти, од кои 11 малолетни лица, во возило влекач сопственост на фирма и управувано од гевгеличанец. МВР соопшти дека утрово во 8:10 часот во близина на село Смоквица полицајци од Полициската станица за граничен надзор и гранична контрола „Богородица“ спречиле криумчарење мигранти во товарно моторно возило влекач со гевгелиски регистарски ознаки сопственост на фирма, а управувано од возач Р.Р. од Гевгелија. Во товарниот простор од возилото пронајдени се 83 илегални мигранти од кои 11 малолетни лица. Десет од малолетните лица се од Пакистан и еден од Авганистан, додека меѓу 72-та полнолетни мигранти четворица се од Ирак, еден од Индија, еден од Авганистан и 66 од Пакистан. Возачот е обезбеден за понатамошна постапка, а лицата во моментов се ноаѓаат во Прифатниот Центар во Гевгелија, соопшти МВР.

Кај село Смоквица пронајдени 50 мигранти во товарно возило „Ивеко“

Дарко Андоновски — Tue, 11 Sep 2018 12:13:49 +0000

На автопатот Гевгелија - Скопје во близина на село Смоквица, вчера во 11.00 часот, полициски службеници во товарно возило „Ивеко“ со скопски регистарски ознаки пронашле 50 мигранти од Пакистан и од Авганистан, од кои четири се деца. Од МВР во соопштението денеска појаснуваат дека полициските службеници дале знак за запирање на товарното возило „Ивеко“ по што возачот го запрел возилото 50 метри после патролата и избегал од лице место. - При контрола над возилото, во просторот за товар, биле пронајдени 50 мигранти од Пакистан и Авганистан, од кои четири се деца. Мигрантите се однесени во Прифатниот транзитен центар Гевгелија за понатамошна постапка. Се преземаат мерки за пронаоѓање на возачот и за целосно расчистување на случајот, стои во соопштението од МВР.

По Демир Капија- Смоквица ќе се вози од следната недела, за почеток без патарини

Катерина Бојаџиева — Mon, 16 Apr 2018 13:02:13 +0000

На почетокот на следната недела се очекува да биде пуштена во употреба новата автопатска делница Демир Капија - Смоквица и по тој дел од автопатот „Пријателство“ првично ќе се вози без плаќање патарина. Засега нема нова официјална најава за пуштањето на патот освен претходната дека тоа ќе се случи по 15-ти месецов, а директорот на Јавното претпријатие за државни патишта Зоран Китанов денеска најави дека деновиве ќе ги покани медиумите на таков настан. За двете планирани наплатни станици на автопатот кај Гевгелија и кај Демир Капија, градежната дозвола е издадена пред три недели, а за завршување, како што изјави Китанов, се потребни околу осум месеци. - Во моментов се градат новите патарини кои нема да бидат како постоечките, на нив ќе нема никави застои, ќе бидат електронски, со припеид, со тагови. Ќе има патарини и на тој дел од автопатот, а цената се утврдува согласно Правилник, изјави Китанов, одговарајќи на новинарски прашања. Тој не кажа кога очекува да профункцираат патарините. - Неможе да се каже дека ќе биде бесплатно, патарините ќе си функционираат, за новиот дел на автопатот дозволата за градба е дадена пред неполн месец, па пресметајте, наведе Китанов. Новите 28,2 километри автопат од Демир Капија до Смоквица ја чинат државата 270 милиони евра. Патот се пушта во употреба по шест години изградба и со него се заокружува со целосно автопатско решение Коридорот 10 на територијата на Македонија. Новата автопатска делница се протега од излезот на Демир Капија преку селото Миравци, до Смоквица, каде што се поврзува со веќе постојниот автопат. Поминува надвор од демиркаписката клисура од десната страна на реката Вардар, низ благи кривини и угорнини. Новиот автопат има две клучки кај Миравци и Смоквица, два тунела долги по 1.200 метри, шест моста со должина од 100 до 500 метри, шест потпатници и два натпатника. Ширината на сообраќајницата е 25,6 метри, со две ленти за возење, една за застанување и средишен зелен појас широк три метри. Владата во октомври минатата година со анекс на договорот за изградба, го продлжи рокот за завршување на автопатот до февруари годинава, откако беше утврдено дека не е изграден контролен центар и не е дислоциран далекувод на автопатот. Тие активности веќе се завршени, а за пуштањето на автопатот беа направени и други законски измени. Специјалното јавно обвинителство (СЈО) минатиот месец објави дека отвора истрага под име „Актор“ за изградбата на автопатот Демир Капија - Смоквица. Предметот, според СЈО, се однесува за фаворирање на грчката компанија „Актор“ за изградба на автопатот Демир Капија - Смоквица, иако подобра понуда имала италијанската компанија „Тото“. Покрај тоа, во „Актор“ има сомненија и за перење пари. (МИА)