социјални мрежи – Kurir.mk

ДОЈДЕ ДЕНОТ: Се воведуваат претплати за Инстаграм, ТикТок и Фејсбук?

Ивона Петрова — Tue, 03 Oct 2023 19:51:31 +0000

И покрај тоа што некогаш одамна Фејсбук имаше слогани дека е бесплатен и ќе остане бесплатен засекогаш, се чини од компанијата не одолеаја на шансата да заработат дополнителни пари од корисниците. Мета воведува претплати за Инстаграм и Фејсбук. ТикТок сигурно ќе го следи нивниот пример до крајот на годината. Што значи ова? Најпопуларните социјални мрежи ќе бараат од вас да плаќате одредена сума месечно за да не бидете принудени да гледате реклами додека ги користите. Мета неодамна зборуваше за оваа опција за Фејсбук и Инстаграм. Доколку сте активни на социјалната мрежа преку компјутер, претплатата би чинела 10 евра месечно, плус 6 евра за дополнителна поврзана сметка. На мобилните телефони претплатата би изнесувала 13 евра месечно. Ако сè уште сакате да ги користите овие апликации бесплатно, ќе можете. Но, тогаш подгответе се за она што веројатно ќе биде уште поголем бран реклами. Според Android Authority, некои корисници почнале да гледаат известувања за претплата, но засега само во САД. Претплатата на ТикТок, која изгледа веќе почна некаде, ќе биде попристапна во споредба со платформите на Мета - пет долари месечно. Некои социјални мрежи, како X (поранешен Твитер), веќе воведоа претплати, но тие не се за бришење реклами туку за добивање некои привилегии, иако Елон Маск неодамна навести дека претплатите може да се воведат за секого.

Макрон размислува за контрола на социјалните мрежи

Тале Кристо — Wed, 05 Jul 2023 05:43:39 +0000

Францускиот претседател Емануел Макрон размислува да ги блокира онлајн медиумите за да се бори против понатамошните немири во Франција. -Неопходно е да се размислува за тоа како младите луѓе кои протестираат ги користат социјалните мрежи и за можните забрани, изјави вчера Макрон на состанокот со градоначалниците во Париз. Според него, ако работите излезат од контрола, можеби ќе треба да се регулираат социјалните мрежи или да се затворат. Во петокот, претседателот ги обвини социјалните мрежи за ескалацијата на насилството за време на протестите против полициската бруталност. -Преку социјалните мрежи се организираа насилни собири, рече тој, додавајќи дека мора смирено да се размислува за управувањето со социјалните медиуми „затоа што кога ќе стане инструмент за собирање или обид за убиство, тоа е вистински проблем“. Во меѓувреме, во северна Франција, граничните контроли со Белгија беа засилени за да се запре увозот на пиротехнички средства, објавија француските медиуми. Целта е да се спречат бунтовниците да се снабдуваат со пиротехнички средства.

Ковачевски: Ќе анализираме како ќе се регулира користењето на социјалните мрежи во училиштата

Ивона Петрова — Thu, 11 May 2023 13:49:10 +0000

Училиште од Пехчево не дозволува телефони за време на настава. Ова како пракса совршено функционира со години, но се популаризираше деновиве, кога јавноста се разбранува со бројни закани на социјалните мрежи од страна на ученици, по трагедијата која се случи во Србија. Прашањето дали носењето телефони ќе се регулира и во останатите училишта на територија на државата денеска беше упатено од новинарите до премиерот Димитар Ковачевски, кој присуствуваше на стартот на новата инвестиција во ТИР зоната. Ковачевски посочи дека наставниот процес го организира Министерството за образование и наука, но пред сите е период на бројни анализи за мерки кои евентуално би се презеле. -На пример јас сум професор и кај мене на предавања многу често се случува да не може да се користи мобилен телефон и студентите честопати ги оставаат мобилните телефони настрана додека траат предавањата. Што се однесува до регулацијата на користење комуникациска опрема и на апликации за време на настава или паузи во настава, тоа е предмет којшто во моментов предизвикува голем број на коментари, на анализи, не само кај нас, туку и во регионот и во светот. Затоа пред нас и пред другите држави претстои период на анализи и подготовка на регулативи, вели Ковачевски. Посочи дека пред 12 години во САД, како дел од комуникациската индустрија, бил вклучен во дискусијата дека иако социјалните мрежи се добар ресурс за промоција, сепак се користат за објавување содржини кои некогаш и не соодвестуваат на моралните и етичките стандарди кои сакаме да ги имаме во општеството. Токму затоа, вели тој, дошол денот кога тешко ќе се врши контрола врз социјалните мрежи. -Пред 12 години, на еден разговор со врвни академици и практичари, кога сите беа среќни и задоволни што постојат социјални мрежи на коишто ќе може да се промовираат ставови, уште тогаш почнаа да се појавуваат коментари дека ќе дојде ден, а, еве, денот е дојден, кога ваков тип мрежи тешко ќе бидат контролирани од соодветните органи, додава Ковачевски. Сепак, начинот на регулирање на користењето социјални мрежи дополнително ќе се увидува и утврдува, како предизвик кој стои пред сите земји од регионов, рече Ковачевски.

Социјалните мрежи поттикнуваат врсничко насилство, сметаат надлежните, МОН предлага да се направи итна проценка на безбедносните ризици

Катерина Бојаџиева — Sun, 07 May 2023 08:08:47 +0000

По последните случувања во соседна Србија каде беа убиени 17 деца и возрасни и ранети околу 20 лица, надлежните институции во земјава веќе преземаат мерки со цел превенција на вакви несакани настани. Откако во петокот беа отворени електронски адреси за пријавување врсничко насилство, вчера Министерството за образование и наука соопшти дека ќе и предложи на Владата итна проценка на состојбите и безбедносните ризици, што во голема мера се потхрануваат од одредени социјални мрежи, како ТикТок. Според министерот Шаќири, имајќи предвид дека тие социјални мрежи не треба да се користат во училишна средина, МОН веќе изработува протоколи и насоки за стручните служби на училиштата и наставниците, како тие ризици би се минимизирале, а нивната употреба да се ограничи или целосно да се оневозможи. Министерот ги повика сите наставници и родители на поотворен дијалог, надминување на шокот и неверувањето, промоцијата на разбирањето и позитивните согледувања, со цел да се помогне на своето дете, како и на децата околу нас, бидејќи тие се најзагрозената категорија во моментот. Во консултација со експертската заедница од повеќе институции и факултети, пак, ќе се зајакнат дополнително превентивните програми за борба против булингот, промоција на ненасилството и дијалогот, како клучни елементи за образование и развој на нашите ученици. На средба со министерот за образование и наука Јетон Шаќири, беа и претставници на Сојузот на средношколци кој е на став дека мора да се делува брзо и ефикасно за да се превенираат и избегнат негативните ефекти, а истовремено спроведените мерки да дадат конкретни и видливи резултати на терен. На средбата на која учествуваа и универзитетски професори од областа на педагогијата, психологијата, социологијата, правото и безбедносните науки е прва фаза од консултациите за креирање мерки и надополнување на постоечките механизми за детекција и спречување на меѓуврсничкото насилство во училиштата. Имено, Сојузот на средношколци има четири предлози, кои на средбата ги образложи нивниот претседател Лука Павиќевиќ. Првиот предлог е МОН да стапи во меѓуинституционална соработка со Министерството за внатрешни работи со цел засилено обезбедување на училиштата најдоцна до крајот на оваа учебна година. Сојузот исто така предлага нов модел на работа на училишните психолози. Оттаму сметаат дека нивните канцеларии треба да бидат отворени за средношколците, а тие треба да го имаат правото да закажат тет-а-тет средба со својот училиштен психолог. За ваква промена, според Сојузот, ќе бидат потребни обуки и доквалифакации за стручните служби и сметаат дека тие треба да се спроведат што поскоро, односно штом биде изготвен протоколот кој ќе го дефинира новиот модел. За да се избегне докажаната неуспешност на обуките, Сојузот предложи и спроведување на тестирања кои ќе ги мерат знаењата стекнати од овие обуки. Според нив, покрај е-адресите треба да се размисли и за отворање на бесплатна телефонска линија и профили на социјалните медиуми, со цел пријавувањето на врсничкото насилство да биде поблиску до целната група – средношколците и учениците воопшто. На 16. Конгрес на Либерално-демократската младина, пак, претседателката на ЛДП и пратеничка Моника Зајкова нагласи дека време е да се реагира и дејствува со конкретни превентивни мерки и акции, наместо да коментираме на социјалните мрежи. Според Зајкова, оваа спирала на насилство извршена од млади лица мора да го вклучи црвениот аларм и кај нас и потребно е преземање на итни и ефикасни превентивни мерки за да се спречи врсничкото насилство, грозоморните слики од убиени и повредени. ЛДП има низа предлози кои ќе ги достави и до Владата, а иницијативите се однесуваат на најостра контрола на издавањето и поседувањето на огнено оружје, проверка кој се поседува оружје, контрола и забрана малолетни лица да вежбаат во стрелишта и казни за родителите кои ги мотивираат децата да ракуваат со вакви убиствени направи. Оттаму сметаат дека Министерство за правда треба да ја разгледа состојбата и предложи заострување на казнената политика со намалување на возраста за кривична одговорност согласно европското законодавство и практики, како и поголема контрола во училиштата и ангажирање на психолози и педагози за превенирање на булингот во образовниот процес. Зајкова нагласи оти особено е потребна забрана на „Тик-ток“ како и останатите социјални мрежи кои поттикнуваат насилство бидејќи и во нашата земја сведочевме на жртви од користењето на овие мрежи. Понатаму, забрана и контрола на симнување на игри, содржини и апликации кои експлицитно покажуваат и поттикнуваат насилство, а исто така и преглед и контрола на филмови кои можат особено кај помладите луѓе да поттикнат насилство, манипулативно да бидат употребени во пропагандистички цели со величење на насилството. Според Зајкова, ова нема да значи цензура на уметноста. Е-адресите „[email protected]“ и „[email protected]“ се достапни од петокот на иницијатива на МОН, а нивната цел е да се превенираат несакани настани како оние што ја потресоа соседна Србија во изминатите два дена. По секоја пријава на овие е-адреси веднаш ќе се постапува. Министерот завчера најави дека ќе се направат и законски измени во системот за образование доколку за тоа се увиди потреба. Во Србија во основно училиште во Белград малолетник со пиштол уби осум ученици и припадник на училишното обезбедување и рани седум ученици, а во селото Дубона кај Младеновац, 21-годишно момче уби осум лица и рани 14 луѓе. Во скопски Чаир завчера малолетник извадил пластичен пиштол (играчка) и го вперил кон соучениците. Полициски службеници во присуство на родители, педагог, психолог и директорката на училиштето извршиле службен разговор со малолетникот. Полицијата вчера приведе и 16-годишен малолетник - ученик, постапувајќи по пријава од директорот на училиштето поради објава на социјална мрежа чија содржина е со закани по живот кон професори.

Анксиозност, депресија, несоница, но и позитивни ефекти имаат социјалните медиуми врз менталното здравје на младите

Ивана Ефремовски — Thu, 20 Apr 2023 12:26:00 +0000

Дискусија за менталното здравје на младите и социјалните медиуми се реализира денеска во организација на Центарот за менаџмент на човечки ресурси при Филозофскиот факултет во Скопје. На дискусијата на која учествуваа експерти за теорија и пракса беше констатирано дека е забележано дека социјалните медиуми предизвикуваат низа негативни појави кај младите, но и дека од нив има придобивки, без кои не може да се замисли денешното функционирање на општеството, особено во однос на комуникацијата и олеснувањето на спроведувањето на наставата. Деканот, Ратко Дуев, рече дека науката се уште нема доволно истражено какво е влијанието на социјалните медиуми врз менталното здравје на младите, но додаде дека тоа е клучна и многу актуелна тема, бидејќи се забележува промена во однесувањето. Има проблеми, како анксиозност, депресија, несоница, но и позитивни работи. Се работи за недоистражена тема. Се собираат искуствата од земјава и странство. Не се знае како ќе биде во иднина, дали со повеќе позитивни или со повеќе негативни ефекти. Мораме да напоменеме, да не беа тие социјални медиуми, многу од работите ќе беа и потешки, потешка ќе беше комуникацијата, одвивање на настава, нагласи Дуев. Професор доктор Софија Георгиевска, рече дека од една страна социјалните медиуми успеаја во голема мера да ни го приближат и олеснат светот, со алатки и технологии, но од друга страна е негативната страна на паричката, бидејќи многу често младите поради социјалните медиуми трпат секојдневни последици поврзани со нивното ментално здравје и самодовербата, несоницата. Таа откри дека она што неодамна го истражувале покажало дека најголем процент од младите спијат со пуштени телефони до нив, а тоа ги води до несоница, што пак предизвикува дополнителни проблеми по здравјето. Бојан Кордалов, комуниколог, осврнувајќи се на прифаќањето на новата дигитална реалност нагласи дека светот се повеќе ќе станува дигитален. Треба да се внимава, додаде, за да не се изгубат децата, младите, општеството и здравјето. Кордалов се осврна и на негативните трендови на интернет со разни предизвици како возење над двеста километри на час, трчање преку пруги, да се претрча пред кола во движење, што се лоши и страшни работи за кои се потребни конкретни мерки, но ги спомена и младите што се прославиле со учество на натпревари, токму преку социјалните медиуми. Професор доктор Стојан Бајрактаров, директор на Клиниката за психијатрија, исто така се осврна на позитивното и негативното влијание на социјалните медиуми. -Мислам дека социјалните медиуми имаат и позитивно и негативно влијание. Го видовме нивното позитивно влијание во време на пандемија, главен начин на комуникација беа социјалните медиуми. Меѓутоа мислам дека по пандемијата, тој тренд почна и пред неа, гледам едно доста негативно влијание бидејќи медиумите го заменија она однесување што треба да е карактеристично, посебно за младите луѓе, развивање на социјалната сфера и социјалните релации вистински, она што се вика во живо, а не виртуелни, како што се преку социјалните мрежи, рече Бајрактаров. Наташа Димеска, шефица на кабинетот на министерката за труд и социјална политика, се обрати на панел дискусијата, во име на министерката Јованка Тренчевска. - Една од целите за 2023 година, кои ги поставивме во фокусот на нашата работа како Министерство е и менталното здравје. Поаѓајќи од тоа дека според досегашната воспоставена пракса, кога зборуваме за здравје, првата асоцијација не упатува на физичката состојба на телото односно физичкото здравје, доаѓаме до заклучок дека на менталната состојба на човекот односно неговото ментално здравје, се посветува многу малку внимание или пак целосно се игнорира, рече Димеска. Оттука и неопходноста за подигање на свеста за неговата важност. Таа нагласи дека грижата за менталното здравје започнува од најмала возраст. Ако семејството е стартната точка за свесноста на менталната состојба на детето, на изразувањето и разбирањето на неговите емоции, потреби, втората точка, додаде, се јавните установи за згрижување и воспитување на деца до шест годишна возраст-детските градинки. - И можам да кажам дека последниве години особено се внимава на социо-емоционалното учење како дел од предучилишниот процес. Социо-емоционалните проекти се особено значајни за децата затоа што вклучуваат игри за рефлексии, социјални активности каде децата ги изразуваат чувствата, но и когнитивните кои го поттикнуваат размислувањето, нагласи Димеска. Таа појасни дека овие проекти се реализираат со партнерите, УНИЦЕФ и Амбасадата на Обединетото Кралство, кои овозможија поддршка за воспитувачите во предучилишните установи и социо-емоционалното учење. Затоа, додаде, детските градинки се особено важни за правилен раст и развој на децата и претставуваат основа за понатамошен правилен развој на детето во годините на неговото образование, студирање, усовршување. (МИА)

Фејсбук, Инстаграм и Твитер почнуваат да наплаќаат за услуги кои претходно беа бесплатни

Ристе Здравков — Tue, 07 Mar 2023 11:58:36 +0000

Некои популарни мрежи се одлучија за потези кои многумина нема да ги дочекаат со ентузијазам. Имено, се чини дека големите социјални мрежи би можеле бесплатно да почнат да ги наплаќаат услугите кои нивните корисници до сега ги користеле. Сајтот Komando идентификуваше што може да се наплаќа и на кои мрежи. Твитер По преземањето на компанијата од страна на Илон Маск, Твитер објави дека ќе го промени својот план за претплата на сините значки. Синиот знак за проверка што означува дека сметката е потврдена е фијаско бидејќи луѓето имитираат познати брендови и познати личности, вклучувајќи го и самиот Маск. Ако сега аплицирате за сина значка, нема да можете веднаш да ја добиете. Вашиот профил прво ќе треба да исполни одредени барања. Значи, што друго доаѓа со претплата на Твитер? Корисниците ќе можат да уредуваат твитови, односно ќе имаат 30 минути да ги уредуваат објавените твитови. Корисниците ќе имаат и приспособени икони и може да ја менуваат темата за нивната апликација со избирање од списокот на достапни теми. Има некои други придобивки како што е можноста за објавување подолги видеа, подолги твитови, поништување твитови итн. Што е со цената? Корисниците на апликации ќе плаќаат повеќе во споредба со оние што ја користат веб-верзијата. Сината значка на Твитер за iOS и Android чини 11 долари месечно или 114,99 долари годишно и 8 долари месечно или 84 долари годишно за веб.

Мета Марк Цукерберг, сопственикот на Мета (Фејсбук, Инстаграм) минатиот месец објави дека ќе почнат да наплаќаат за сината значка за корисниците на овие социјални мрежи. Корисниците ќе имаат некои други бенефиции, како што се специјални налепници и ѕвезди кои ќе можат да ги испратат до нивните омилени креатори на содржина на платформата. Видливоста исто така ќе биде зголемена, што значи дека повеќе луѓе ќе ги гледаат нивните објави и коментари. Мета ветува дека проактивното следење на сметката ќе го заштити корисникот од имитирање. Една од најголемите предности е што претплатниците ќе имаат директна поддршка бидејќи во спротивно е доста тешко да стапите во контакт со Мета (на пример кога вашиот профил е хакиран). Колку ќе чини? Т.н Meta Verified ќе се наплаќа 11,99 долари месечно за веб верзијата (само за Facebook) и 14,99 долари месечно за апликацијата на iOS и Android, пренесува N1.

Иран се заканува: Трајно ќе ги блокира Вотсап и Инстаграм

Катерина Бојаџиева — Sun, 18 Dec 2022 17:37:51 +0000

Иран се заканува дека трајно ќе ги блокира комуникациската платформа Вотсап (WhatsApp) и социјалната мрежа Инстаграм, кои се многу популарни во земјата, пишува германската агенција ДПА. Американската интернет компанија Мета, сопственик на Фејсбук, Вотсап и Инстаграм, сè уште не одговорила на писмото што иранските власти и го испратиле на почетокот на декември, во кое бараат да отвори претставништво во земјата и да ги прилагоди своите насоки на прописите на Исламската Република. – Ако Мета не одговори на нашето писмо, тоа би можело да биде увертира за трајна блокада, рече шефот на иранскиот национален сајбер центар, Аболхасан Фирузабади, пренесе ДПА. Иранските безбедносни сили веќе ги блокираа Инстаграм и Вотсап како дел од протестите, кои сега траат веќе три месеци. Според Техеран, овие апликации се вклучени во „заговор против Иран, предводен од странски непријатели“. Вака иранското раководство ги опишува повеќемесечните антивладини протести ширум земјата, во кои загинаа неколку стотици луѓе. Иран има намера да преземе правни чекори против Мета. Критичарите на иранскиот систем, масовните ограничувања на пристапот до интернет и блокирањето на апликациите ги сметаат за обиди да се спречи ширење на информации, фотографии и видеа за протестите. На новинарите не им е дозволено независно да известуваат за протестите. Новинарите кои ја игнорираа цензурата беа уапсени, а десетици се уште се во затвор.

Граѓаните со позитивни реакции од присуството на Мицкоски во Благоевград порачаа: „ВАКА СЕ САКА МАКЕДОНИЈА, СЕКОЈА ЧЕСТ“ (ФОТО)

Магдалена Андонова — Sun, 30 Oct 2022 12:51:00 +0000

Денеска и официјално во Благоевград, Бугарија беше отворен македонскиот културен центар „Никола Вапцаров“. На ова отварање присуствуваше лидерот на ВМРО-ДПМНЕ, Христијан Мицкоски заедно со пратениците Рашела Мизрахи и Драган Ковачки. Тој денеска за медиумите порача дека се горди што се со Македонците од Бугарија и упати јасна порака:

– Денес сме тука да ги поддржиме Македонците од оваа страна на границата. И да испратиме јасна порака дека ние сме Македонци коишто зборуваат македонски јазик и доаѓаат од Македонија.

За разлика од опозицискиот лидер, Ковачевски како премиер на Република Македонија чиј културен центар се отвора во соседна Бугарија не присуствуваше на овој настан. Ист пример е и кај претседателот Пендаровски, кој пак во негово име го испрати генералниот секретар Миле Бошњаковски. Позитивните коментари за посетата на Христијан Мицкоски на ова отварање не стивнуваат. Граѓаните упатија подршка до лидерот на ВМРО-ДПМНЕ и порачаа дека вака се сака Македонија! „Така се сака својот народ каде и да е по светот. Секоја чест“, „Поклон до земја“, „Колку се среќни што ја споделувате најголемата радост со Македонците од Пиринска Македонија, благословени да сте“ се само неколку од многуте коментари од социјалните мрежи.

Во Шкотска пронајдено починато момче во соба – мајката вели дека е жртва на смртоносен предизвик од социјалните мрежи

Магдалена Андонова — Thu, 01 Sep 2022 17:36:06 +0000

Лорин Китинг (30) од Шкотска минатата недела го пронашла телото на својот син тинејџер во неговата спална соба. Таа тврди дека учествувал во т.н предизвик за затемнување. Во истиот предизвик учествувал и Арчи Батерсби, кој се здобил со фатална повреда на мозокот од која подоцна починал. Имено, во овој предизвик учесниците не дишат додека не се онесвестат, што може да доведе до ниско ниво на кислород во мозокот предизвикувајќи напади, сериозни повреди и смрт. Лорин Китинг затоа издаде предупредување до другите семејства. - Еден од пријателите на Леон ми кажа дека учествувал во тој предизвик на FaceTime, откако го видел на Tik-Tok. Леон сакаше да биде првиот што ќе го проба. Тој и неговите пријатели мислеле дека тоа е смешно и забавно. Мислеа дека ќе се разбуди, но Леон не се врати. Сè тргна наопаку, рече Лорин. - Ве молиме предупредете ги, овие онлајн предизвици не вредат за нивниот живот. Не вредат ниту лајкови, ниту за што го прават тоа, истакнала очајната мајка. Смртта на Леон дојде неколку недели по смртта на Арчи Батерсби, кој исто така беше пронајден од неговата мајка. Арчи се здобил со повреда на мозокот поради која бил ставен на апарати за одржување во живот, од која бил изваден на почетокот на август. Мајката на Арчи, Холи Денс, претходно изјави дека дури 82 лица се сомневаат дека починале како резултат на учеството во предизвик и дека многу повеќе деца се повредени во 14-те години колку што постои предизвикот.

Паузата од социјалните мрежи носи повеќе придобивки за психичкото здравје

Магдалена Андонова — Mon, 22 Aug 2022 08:07:38 +0000

Долг е списокот на познати личности кои направија долга пауза од социјалните мрежи последниве години, вклучувајќи ги Ед Ширан, Бритни Спирс, Мајли Сајрус, Селена Гомез и Џастин Бибер – сите тие беа во фаза на тн. „дигитална детоксикација“. Како што пишува Дојче веле, причините за тоа се различни – премногу коментари со омраза, премногу време пред мониторот, умор од „глумата“ на социјалните мрежи… Интернет-просторот предизвикува контроверзии и во политиката. Германскиот министер за економија, Роберт Хабек, на пр., го напушти Твитер во 2019 година и не се врати оттогаш, иако некои други политичари ја користат платформата барем еднаш на еден час – за да го кажат своето мислење. Хабек на својот блог тогаш напиша: „Твитер е агресивен како ниедна друга социјална мрежа, и ниеден друг медиум нема толку омраза, злоба и говор на омраза“. – Тоа беше една од најмудрите одлуки што ги донесов во мојот живот!, рече потоа тој. Според истражување на дигиталното здружение „Битком“, оваа година 10 насто од луѓето во Германија сакаат повторно да бидат „офлајн“, а околу 43 отсто веќе го сториле тоа, за повторно да се чувствуваат подобро. Бројни трудови ги разгледуваат последиците на Инстаграм, Твитер и другите социјални медиуми. Според Универзитетот на Бат во Велика Британија, дигитална пауза од само една недела ја подобрува општата благосостојба и ја намалува анксиозноста и депресијата. Фактот дека резултатите се вакви може да се потврди со истражувањата. Други трудови, исто така, гледаат врска меѓу времето минато на интернет и депресијата. Сепак, се вели дека е тешко да се докаже што доаѓа прво. Можно е и луѓето со склоност кон депресија да ги користат социјалните мрежи почесто од другите. Испитување на Универзитетот на Абу Даби од 2019 година, пак, ги покажува и негативните последици од дигиталната детоксикација. Некои корисници пријавиле стрес и осаменост за време на апстиненцијата од социјалните мрежи. – Важно е сами да одлучиме колку време сме на мрежите и што правиме таму… Влијанието на социјалните мрежи секогаш зависи од личноста на корисникот, изјави активистката Кристин Лангер. Друг фактор за лошите влијанија е тоа што социјалните мрежи, додека едни заработуваат од сѐ тоа, други чувствуваат притисок и завист кон останатите корисници на кои наводно им оди подобро во животот. (МИА)