Софи Вилмес – Kurir.mk

Поради болеста на својот сопруг: Белгиската министерка за надворешни работи Софи Вилмес поднесе оставка

Ивана Ефремовски — Thu, 14 Jul 2022 18:00:55 +0000

Белгискиот крал Филип ја прифати оставката на вицепремиерката и министерка за надворешни работи Софи Вилмес, објавија локалните медиуми. Како што наведуваат, Вилмес не ја напушта политиката, туку ќе се врати како пратеник во сојузниот Парламент. Кон крајот на април, таа привремено се повлече од државната работа за да се грижи за нејзиниот сопруг Кристофер Стоун, кој боледува од рак на мозокот. Во својата оставка, Вилмес наведува дека болеста на нејзиниот сопруг ќе биде тешка битка и дека таа сака да биде со него и нивните деца, а нејзината владина работа нема да го дозволи тоа. Премиерот Александар де Кро рече дека Вилмес направила храбар избор и дека нејзиниот чин е повод да се цени смислата на животот и она што е најважно во него. Вилмес влезе во политиката во 2014 година, а една година подоцна беше назначена за министерка за буџет. Учествувала во две влади на тогашниот премиер Шарл Мишел. Кон крајот на 2019 година, Вилмес беше именувана за привремена премиерка. (МИА)

Белгиската министерка за надворешни на интензивна нега поради Ковид-19

Ивона Петрова — Thu, 22 Oct 2020 09:37:32 +0000

Министерката за надворешни работи и поранешна премиерка на Белгија, Софи Вилмес, е хоспитализирана на интензивна нега откако беше заразена со Ковид-19, јави дописничката на МИА од Брисел. Четириесет и пет годишната Вилмес пред една недела на социјалните мрежи извести дека е позитивна на вирусот, во меѓувреме состојбата и се влошила и е префрлена на интензивна нега, соопштија од нејзиниот кабинет. Од болницата смируваат дека нејзината состојба е стабилизирана, но дека има потреба од постојана нега. Во Белгија во изминатите 24 часа забележани се рекордни 13.227 новозаболени лица и 50 смртни случаи.

Белгиската министерка за надворешни работи позитивна на коронавирусот

Ивана Ефремовски — Sat, 17 Oct 2020 16:21:41 +0000

Белгиската министерка за надворешни работи Софи Вилмес денес соопшти дека е позитивна на коронавирусот. -Мојот тест за Ковид-19 е позитивен. Заразата најверојатно се случи во кругот на семејството, имајќи ги предвид превентивните мерки што ги презедов надвор од дома, напиша Вилмес на Твитер. Вилмес во петокот рече дека оди во самоизолација затоа што има симптоми на коронавирус. На 12 октомври, таа присуствуваше на состанок со другите министри за надворешни работи на земјите-членки на ЕУ во Луксембург. (МИА)