Сојуз на синдикатите на Македонија – Kurir.mk

ССМ ќе бара во недела да работат пратениците кои најавија измени на Законот за трговија

Дарко Андоновски — Wed, 20 Apr 2022 11:22:31 +0000

Сојузот на синдикати на Македонија денеска соопшти дека ќе поднесе иницијатива до Собранието да се донесе законско решение со кое ќе им овозможи на пратениците, кои најавија дека ќе поднесат измени на Законот за трговија, да работат во недела. – Ќе побараме од пријателот на работниците, претседателот на Собранието Талат Џафери да го стави таквиот предлог по скратена постапка на собраниска седница и ќе ги повикаме сите пратеници да им го овозможат правото на дополнителна работа во недела на пратениците од политичката партија која размислува да поднесе Предлог – закон со кој сака да им го скрати тоа право на работниците, наведува ССМ во денешната реакција. Со ова, велат од ССМ, ќе им се овозможи на пратениците кои сакаат да поднесат измени на Законот за тровија, да видат како е да се работи во недела. – На таков начин ќе им се овозможи на пратениците подносители на Предлог – законот за изменување и дополнување на Законот за трговија, да работат во недела во туристичките центри и на своја кожа да почувствуваат како им е било на работниците од трговијата, кои не знаеја ниту за викенд, ниту за празник ниту за неработен ден. А, работниците кои одмараат во недела, со задоволство ќе ги посетат пратениците кои ќе работат трговија во туристичките центри да пазарат кај нив, стои во реакцијата. Од ССМ потсетуваат дека измените на Законот за трговија, со кои недела се прогласи за неработен ден, се донесени врз основа на темелна анализа. – Притоа со законските измени, Сојузот на синдикатите на Македонија и социјалните партнери обезбедија можност специјализираните продавници или киосци во туристичките места под услови со закон да работат, предвидена е и можноста за работа на моловите, штандови и киосци за време на спортски настани, фестивали, саеми, манифестации и слично, како и предвидена е можноста во продавници за трговија на мало со храна, пијалоци и слично, работата да ја вршат лично сопствениците на продавниците. На овој начин сметаме дека се покриени сите потреби на туристите во туристичките места од аспект на трговските услуги, со тоа што потсетуваме дека овие работници кои ќе бидат ангажирани за работа во недела имаат право на додаток на плата за работа во недела и за празници најмалку во висина од 100 проценти за секој час поминат на работа, како и право на неделен одмор во друг ден од неделата, нагласуваат од синдикатот. Пратениците од ВМРО-ДПМНЕ најавија дека ќе поднесат Предлог-закон за измени на Законот за трговија бидејќи според нив со постоечките измени и е нанесен тежок удар на туристичката и трговската дејност, а во недела и за празник има најголема фреквенција на купувачи во туристичките места.

ССМ по повод 8 Март: Еднаквост и рамноправна положба во општеството, без стереотипи и предрасуди

Дарко Андоновски — Tue, 08 Mar 2022 09:12:31 +0000

Сојузот на синдикати на Македонија честитајќи го Меѓународниот ден на жената бара еднаквост без родова или која било друга дискриминација. – Стереотипите и ретроградните традиционални сфаќања се уште се присутни и без оправдани причини жените се помалку посакувана работна сила на пазарот на труд, помалку жени се на раководни функции и во преставничките органи, тоа секако негативно се одразува на севкупниот развој на државата затоа што ние жените сме речиси половина од популацијата, на која овие дискриминаторски ставови се однесуваат. Одлучно се залагаме за еднаквост и рамноправна положба во општеството, без стереотипи и предрасуди само така ќе постигнеме побрз развој и достоинствени односи во државата со целосно почитување на човековите права, се вели во честитката од ССМ.

Протест на ССМ пред собранието во четврток!

Дарко Андоновски — Sat, 05 Feb 2022 16:56:47 +0000

Сојузот на синдикатите на Македонија (ССМ) на својата страница на социјалната мрежа „Фејсбук“ објави дека 300 членови на штрајкувачите одбори едногласно донеле одлука за собир пред Собранието во четврток, кога на дневен ред е предлог законот за зголемување на минималната плата. -Донесена е одлука за организирање на собир пред Собранието на Македонија на 10 февруари 2022 година со почеток во 11 часот со општ повик до сите граѓани, работници и синдикати за поддршка на пратениците веднаш да го изгласаат законот за минимална плата од 18.000 денари и спирално зголемување на останатите плати – наведуваат од ССМ. Во објавата се наведува дека е донесена и одлука за организирање други облици на притисок, блокирање на фабрики, институции и патишта со предходна најава и организација. Вчера не беше постигнат договор за зголемување на минималната на состанокот меѓу синдикатите, работодавачите и Владата. По средбата која се одржа во Владата, претседателот на ССМ, Дарко Димовски рече дека било очигледно дека работодавачите си гледаат само за себе. Во Владата во понеделник ќе има седница на Економскиот совет на која ќе се дискутира за сите предлози изнесени за минималната плата. Од Бизнис конфедерација на Македонија бил доставен предлог и за обезбедување на финансиска помош за исплата на минимална плата од буџетот на државата.

Синдикален марш во Скопје на 1-ви Мај: ССМ под мотото„Здружени со иста цел“ ќе го одбележи Меѓународниот ден на трудот

Магдалена Андонова — Tue, 27 Apr 2021 14:21:22 +0000

„Здружени со иста цел“ е мотото на синдикалниот марш во Скопје со којшто Сојузот на синдикати на Македонија (ССМ) годинава ќе го одбележи Меѓународниот ден на трудот – 1 Мај во услови на здравствената криза од вирусот Ковид-19. Маршот ќе почне пред зградата на ССМ во 10.30 часот, како што најавуваат од ССМ, со запазување на сите мерки и препораки за заштита од Ковид -19. – Празникот на работниците, 1-ви Мај, го одбележуваме загрижени за своето и здравјето на нашите семејства, за голем број од нас во услови на намалени плати, откази на договорите за вработување и грижа за нашата елементарна егзистенција. Ги повикуваме сите работници, кои ги препознаат нашите вредности и заложби, да се приклучат во семејството на ССМ, семејство на рамноправни членови, работници и граѓани, кои не сакаат само да критикуваат, туку сакаат дирекно да се вклучат со сиот свој капацитет и потенцијал, во креирањето и градењето на државата, наведуваат во соопштение од ССМ. (МИА)

ССМ: Договорот за недела неработен ден е при крај

Ивана Ефремовски — Thu, 25 Feb 2021 15:33:40 +0000

Сојуз на синдикатите на Македонија (ССМ) информира дека неговата повеќегодишна иницијатива, недела да биде неработна, 90 отсто е прифатена од социјалните партнери. -Тоа за македонскиот работник ќе значи дека недела ќе биде ден на неделен одмор. За мал број на дејности, кај кои процесот на работа е од таква природа што не може да се прекине, работниците кои ќе бидат ангажирани во недела ќе добијат зголемена дневница за најмалку 50 проценти, како што тоа е утврдено во Закон или колективен договор, како и право на слободен друг ден во неделата. Останува само да се утврди дали тоа ќе биде денот пред или денот по недела, како што бара ССМ, истакнуваат од сојузот. Оттаму потенцираат дека на барање на ССМ се воведуваат и строги казни за оние работодавци кои ќе го прекршат законот, чии дејности не спаѓаат во исклучоци, со забрана за работа од 15 до 30 дена и висока парична казна. -Останува уште технички службите да го финализираат предлог текстот на Законот, а не истиот да се дополнува со желби на поединци на штета на работниците, велат од ССМ. Од ССМ потенцираат дека Законот за работни односи е (lex generalis), важи за сите вработени и за сите правни субјекти и не може со други закони да се дерогираат правата на работниците кои се веќе стекнати со овој закон. Од ССМ потенцираат дека се единствениот синдикат, кој ги претставува работниците во процесот на преговори за изнаоѓање на законско решение за прогласување на недела за неработен ден, односно ден на неделен одмор. (МИА)