сопственик – Kurir.mk

Јунајтед доби историска понуда, еве што нуди новиот потенцијален сопственик од Катар

Ивона Петрова — Fri, 17 Feb 2023 21:37:28 +0000

Долгонајавуваната продажба на Манчестер Јунајтед влегува во завршна фаза откако една од четирите заинтересирани страни ја достави својата официјална понуда. Катарскиот шеик Јасим Бин Хамад ал Тани преку фондацијата „Шаик Јасим“ ја достави својата понуда до американските сопственици Глејзери, за откуп на сите акции на клубот. -Понудата има за цел да го врати стариот сјај на клубот, на теренот и надвор од него. Ќе се фокусираме да ги вратиме навивачите во срцето и живеењето на Манчестер Јунајтед. Понудата ќе биде целосна, без долгови, со план за инвестирање во првата и останатите екипи, тренинг центарот, стадионот, инфраструктурата и заедниците кои го поддржуваат клубот, се наведува во соопштението на фондацијата. Неофицијално, англиските медиуми пренесуваат дека станува збор за понуда помеѓу шест и седум милијарди фунти. Актуелните сопственици бараа за продажба на клубот шест милијарди фунти, а притоа да не го покријат долгот од 500 милиони фунти. Британските власти веќе дадоа зелено светло за официјални преговори со заинтересирани страни кои доаѓаат од Катар.

Сопственик на угостителски објект нападнат пред својот локал во центарот на Скопје

Тале Кристо — Tue, 07 Feb 2023 16:31:38 +0000

На 06.02.2023 во 19.55 часот во СВР Скопје било пријавено дека пред угостителски објект на ул.„Аминта Трети“, едно лице физички го нападнало сопственикот на објектот С.Т.(56) од Скопје, при што употребило и тврд предмет. Се преземаат мерки за расчистување на случајот.

СОПСТВЕНИКОТ НА „БЕСА ТРАНС“ НЕ СЕ ЧУВСТВУВА ВИНОВЕН – судењето продолжува на 23 декември

Дарко Андоновски — Tue, 15 Nov 2022 13:29:41 +0000

Обвинетиот Беким Хаџиу, сопственик и управител на „Беса Tранс“, во Основниот кривичен суд Скопје денеска изјави дека не се чувствува за виновен за „фалсификување исправа“. Застапникот на правното лице „Беса Транс“, Шабан Хоџа, исто така, изјави дека не се чувствува виновен за истото дело кое му се става на товар. Откако јавниот обвинител го прочита Обвинителниот предлог во кој стои дека обвинетиот 41-годишник, Беким Хаџиу, како управител на правното лице „Беса Транс БТБ“ од Рашче, искористувајќи ист траен однос, исти прилики и слични околности, преку возачите кои управувале автобус во сопственост на фирмата, извршил повеќе временски поврзани дејствија и употребувал како вистинска лажна јавна исправа Извод од лиценца за вршење на јавен превоз во меѓународниот патен сообраќај. – Ваквата лиценца за наведениот автобус воопшто не била издадена од Министерството за транспорт и врски, а управителот изготвената лажна јавна исправа им ја давал на возачите кои го управувале автобусот и со неа тие ја преминувале државната граница. Во текот на постапката, надлежниот јавен обвинител обезбеди докази дека во периодот од 10.01.2021 до 21.11.2021 година автобусот на тој начин 20 пати ја преминал државната граница на различни гранични премини, се наведува во обвинителниот предлог. На денешното рочиште сведочеше претставник на Министерство за транспорт и врски, Драганче Јовев, кој зборуваше за лиценците и изводите од лиценци кои што министерството ги издало на „Беса Транс БТБ“. На прашање од обвинителот, дали од страна на Министерството за транспорт и врски на правниот субјект Беса Транс му е издадена лиценца за вршење на јавен превоз во меѓународниот патен сообраќај, тој одговори дека врз основа на евиденцијата за лиценцирани превозници, кои вршат јавен превоз за патници, министерството има издадено лиценца за вршење меѓународен слободен превоз на патници со број 007017, со важност од 8.8.2018 до 8.8.2022 година. Прашан дали врз основа на оваа лиценца, министерството издава извод за лиценца за секое од возилата одделно, тој одговори да. – Да, врз основа на оваа лиценца за вршење меѓународен слободен превоз на патници министерството издава изводи од лиценца за секое од возилата за кои што превозникот има доставено копија од сообраќајни дозволи во самото барање за издавање на лиценца на меѓународен слободен превоз на патници, при што согласно евиденцијата имаме издадено изводи за лиценци за следните возила СК 4436 АИ, СК 8004 АН, СК 0886 АК, СК 8583 АП и СК 0583 АР, значи имаме издадено лиценца за пет возила на име на превозникот Беса Транс БТБ, рече тој. На прашање дали дополнително имаат издадено извод од лиценца за вршење на јавен превоз во меѓународниот патен сообраќај за возило со регистерска ознака СК 0284 БА, тој одговори дека согласно евиденцијата за ова возило нема издадено извод од лиценца за вршење меѓународен слободен превоз на патници во меѓународниот патен сообраќај ниту за друг вид на превоз. Асмир Алиспахиќ, бранителот на обвинетиот, потоа пристапи кон вкрстено испрашување во кое подробно го испрашуваше сведокот околу издадените лиценци и изводи од лиценци. Прашан дали со самото издавање на лиценцата се евидентираат и возилата, тој одговори да. – Да, веќе споменав на почетокот, во процедурата за добивање на лиценца за вршење на меѓународен слободен превоз на патници една од документацијата е достава на сообраќајни дозволи кои што ги поседува превозникот за возилата за кои што превозникот поднесува барање, рече тој. Прашан дали може да заклучиме дека изводот од лиценца број 22679 постои во евиденцијата на министерството како издадена лиценца за второбвинетото правно лице „Беса Транс БТБ“, тој одговори дека постои за вршење на посебен линиски превоз на патници во внатрешниот патеn сообраќај. Прашан дали е запознаени кога „Беса Транс БТБ“ станала сопственик на возилото СК 0284 БА, тој одговори дека Министерството за транспорт и врски не е запознаено кога правното лице станалo сопственик на наведеното возило. – Но, сакам да појаснам зошто, затоа што кое било правно лице кое поседува лиценца за вршење јавен превоз на патници е должно согласно Законот за превоз да нè известува за секоја настаната промена веднаш, а најдоцна во рок од 15 дена, треба да не извести за секој вид на промена вклучувајќи и купување и продавање на возила, рече тој. Бранителот потоа праша дали можеме ли да заклучиме дека од сите претходни одговори во поглед на наведените лиценци, министерството ги има физички издадено истите и ги поседува кај нив во оригинал, сведокот одговори дека по однос на ова прашање, министерството ниту за правното лице „Беса Транс БТБ, ниту за кое било друго правно лице за кое што има издадено лиценца и изводи од лиценца за возилото не ги поседува лиценците и изводите од лиценца во оригинал. – Оригиналот се издава на барателот, рече тој. Процесот го води судијата Ивица Стефановски, застапник на обвинението е јавниот обвинител Владимир Милошевски. Судењето продолжува на 23 декември.

Сопственикот на автобусот кој се преврте во Бугарија доби 99 прекршоци и казна од 30.000 евра

Дарко Андоновски — Wed, 17 Aug 2022 18:32:37 +0000

Во врска со сообраќајната несреќа што се случи на автопат во Бугарија на 14 август, во која учествуваше автобус од Србија и кога беа повредени 28 српски државјани, припадници на сообраќајната полиција на МВР, по наредба на министерот за внатрешни работи Александар Вулин извршиле надзор над правното лице – сопственик на возилото, како и претприемачот кој е корисник на автобусот според договорот за закуп, јавува „Танјуг“. Прекршоци од Законот за работно време на екипите на возилата во патниот превоз и тахографите се констатирани кај правното лице – сопственик на возилото, за што се изготвени 99 прекршочни налози за што е изречена глоба во вкупен износ од 3.510.000 динари (околу 30.000 евра), а едно барање за поведување прекршочна постапка согласно Законот за безбедност на сообраќајот на патиштата. При надзор на корисникот на возилото по договор за изнајмување, кој вообичаено има важечка лиценца за превоз на патници, утврдени се прекршоци од Законот за работното време на екипите на возилата во патниот превоз и тахографите, па се донесени четири прекршочни наредби за кои е предвидена вкупна глоба од 420.000 динари, а поднесено е и барање за поведување прекршочна постапка по Законот за безбедност на сообраќајот на патиштата.

Тод Боли и официјално нов сопственик на Челзи

Тале Кристо — Mon, 30 May 2022 19:18:58 +0000

Откако сите детали беа усогласени минатата недела, англискиот фудбалски гигант Челзи денеска и официјално премина во сопственост на американски конзорциум на чело со бизнисменот Тод Боли. Челзи ја најави продажбата минатата недела, а попладнево преку клупско соопштение ја официјализираше трансакцијата. – Чест ни е што сме нови сопственици на Челзи. Сто проценти сме во оваа нова работа. Нашата визија е јасна, секоја минута и во секој натпревар ќе работиме за нашите навивачи да бидат горди на клубот, изјави Боли, кој, воедно, е сопственик и на американската професионална безбол екипа Лос Анџелес доџерс. Челзи е продаден за 4.25 милијарди фунти, со што заврши ерата на рускиот олигарх Роман Абрамович во чија сопственост клубот од Лондон беше 19 години и освои вкупно 21 трофеи.

Велешанец се заканувал дека ќе убие сопственик на месарница и две други лица, а потоа не ја почитувал и забраната за приближување

Магдалена Андонова — Tue, 10 May 2022 12:56:23 +0000

Основното јавно обвинителство Велес поведе постапка против едно лице за кое постои основано сомнение дека ги сторило кривичните дела – Загрозување на сигурноста од член 144 став 3 во врска со став 1 и Неизвршување судска одлука од член 377 став 5 од Кривичниот законик. На 12 април, осомничениот, пред месарница на улицата „Алексо Демниевски Бауман“ во Велес ја загрозил сигурноста на сопственикот на месарницата и уште две присутни лица, навредувајќи ги и заканувајќи им се дека ќе ги убие. Откако во постапка му биле определени мерки на претпазливост, меѓу кои и забрана за напуштање на живеалиште/престојувалиште и забрана за приближување односно воспоставување и одржување контакти или врски со определени лица, осомничениот ваквото судско Решение не го почитувал, па на 4 мај повторно се приближил кон еден од оштетените и започнал да му се заканува. Бидејќи постои опасност од бегство и поради фактот што определените мерки за претпазливост осомничениот не ги почитувал, јавниот обвинител му предложи на Основниот суд во Велес да ги укине мерките и на осомничениот да му определи мерка притвор. Судот го прифати предлогот и на осомниченото лице му определи притвор.

Илон Маск наскоро би можел да стане единствен сопственик на Твитер

Тале Кристо — Mon, 25 Apr 2022 11:53:46 +0000

Претставниците на компанијата „Твитер“ одлучија да преговараат со извршниот директор на „Тесла“ откако Илон Маск ги соопшти деталите за неговата понуда за преземање на компанијата. Понудата изнесува четириесет и три милијарди долари. „Твитер“ вчера започна преговори со Маск, откако на акционерите им објасни одредени детали од понудата. Одлуката на компанијата да контактира со Маск не значи дека ќе ја прифати неговата понуда од 54,20 долари по акција, велат изворите. Но, тоа сепак значи дека „Твитер“ истражува дали продажбата на Маск е можна поради атрактивните услови за акционерите. Најбогатиот човек на светот купи речиси 73,5 милиони акции на компанијата „Твитер“, кои на берзата пораснаа за 26 отсто, речиси веднаш откако објави, токму на Твитер, дека „сериозно размислува“ за лансирање на нова социјална мрежа. Маск во изминатите неколку дена имаше средби со акционерите на Твитер, барајќи поддршка за неговата понуда. Тој порача дека „Твитер“ треба да биде приватен за да се развива и да стане вистинска платформа за слобода на говорот. Акционерите ги принудија претставниците на компанијата на разговори откако Маск во четвртокот го претстави деталниот план за финансирање на неговата понуда, обидувајќи се да „не дозволи можноста за договор да исчезне“. Инсистирањето на Маск дека веќе ја дал „најдобрата и последна“ понуда беше пречка во преговорите, велат изворите, но одборот одлучил да преговара со него, за потенцијално да добие подобри услови. „Твитер“ сакаше да дознае повеќе за сите активни истраги на регулаторите против Маск, вклучително и Американската комисија за хартии од вредност (SEC), што би претставувало ризик за договорот, велат лица запознати со случајот. Твитер, исто така, испитува дали регулаторите имаат забелешки за водење бизнис на некој од пазарите каде што работат компаниите на Маск. Доколку се утврди дека продажбата на Маск би била ризична, компанијата би можела да бара значителна компензација за раскинувањето на договорот за преземање. Компанијата, инаку, првично беше против предлогот Маск да го зголеми својот удел во „Твитер“ на повеќе од девет отсто, без преговори со главниот одбор.

ДКСК: Незаконски доделени грантови на трговско друштво, чиј сопственик е вработен во АЕК

Тале Кристо — Thu, 21 Apr 2022 12:59:47 +0000

По доставена анонимна пријава до Државната комисија за спречување на корупција (ДКСК), оформен е предмет за постоење незаконитост при доделување средства на грант на трговско друштво „ИНТЕЛИГЕНТА ДОО Скопје“, чиј основач е член на Комисијата за електронски комуникации при Агенцијата за електронски комуникации. На денешната седница на ДКСК, овој случај беше разгледан при што беше истакнато дека бил доделен гранд од 30 илјади евра во денарска противвредност. Заради проверка на изнесените наводи во пријава и утврдување на целосната фактичка состојба во предметниот случај, ДКСК побарале информации и податоци од АЕК, Фондот за иновации и технолошки развој, извршен е увид во тековната состојба и историјатот на промени за посоченото трговско друштво во регистарот. – По разгледување на добиените информации и податоци како и на целокупната релевантна документација, ја утврдивме следнава фактичка состојба, друштвото за наука и инженерство „ИНТЕЛИГЕНТА ДОО“ Скопје е основано на 3.12.2018 година, еден од основачите е Горан Велинов од Скопје. Горан Велинов е член на Комисијата за електронски комуникации при АЕК, во два мандата од 15.06.2009 до 15.12.2014 година и во период од 16.02.2015 до 16.08.2020 година. Во текот на вториот мандат на лицето, трговското друштво, чиј сопственик е истото лице на 06.06.2019 склучил договор со ФИТР, а за доделување средства преку инструментот за поддршка кофинансирани грантови и новоосновани друштво – стартап со кој му се одобрени финансиски средства во форма на кофинансиран гранд во износ од 30.000 евра во денарска противвредност, истакна Нури Бајрами, член на ДКСК. Од утврдената фактичка состојба, на 47-та седница на ДКСК одржана на 31.03.2021 година констатирано е дека е доделен гранд на посоченото друштво, што е спротивно на членот 52 од Законот за спречување корупција и судир на интереси и истото е казниво. – Поради непостапување на сторителите на прекршокот во издадениот прекршочен платен налог, ДКСК против посоченото правно лице и физичкото лице на 18.05.2021 поднесе барање за поведување прекршочна постапка, но до надлежниот орган Прекршочна комисија на ДКСК, а воедно побара и иницираше спроведување надзор од МОН, како и надзор од Државниот завод за ревизија на финансиското работење на ФИТР од делот на средствата од буџетот, посочи Бајрами. По поднесеното барање за поведување на прекршочна постапка, Прекршочната комисија при ДКСК спровела соодветна постапка така што донела решение со кое сторителот Горан Велинов, сопственик на правното друштво е огласен за одговорен за сторен прекршок при што изречена му е прекршочна санкција во износ од 500 евра во денарска вредност. Донесено е и решение со кое сторителот, односно правното лице е огласено за сторен прекршок согласно законот при што изречена е глоба во износ од 1000 евра во денарска противвредност. ДКСК по разгледување на сите горенаведени факти констатира дека нема елементи за понатамошно постапување по предметот, при што одлучи дека по конечниот исход ќе издејствува самата Прекршочна комисија при ДКСК.

Украински државјанин по претходно недоразбирање претепал сопственик на хостел во Кисела Вода

Магдалена Андонова — Wed, 02 Feb 2022 15:30:22 +0000

На 01.02.2022 во 19.00 часот на подрачје на Кисела Вода, полициски службеници од СВР Скопје го привеле K.A.(30) од Украина, затоа што во 17.30 часот во хостел на подрачјето на Кисела Вода, по претходно недоразбирање, физички го нападнал сопственикот Б.С.(64) од Скопје. Сочинет е записник за констатиран прекршок по член 6 и член 12 од Законот за прекршоците против јавниот ред и мир.

Сопственикот на „Беса Транс“ недостапен за органите, не може да се изврши вонреден инспекциски надзор

Магдалена Андонова — Tue, 07 Dec 2021 19:24:46 +0000

Kанцелариите на БЕСА ТРАНС се уште се заклучени за инспекторите на Државниот инспекторат за транспорт и по две недели од кобната автобуска несреќа во Бугарија во која живтот трагично го загубија 45 лица, Директорот Руфат Хусеини вели дека управителот на компанијата е недостапен за органите. Доколку управителот на компанијата не одговори и на писменото барање, на помош ќе биде повикано и МВР. -Управителот на компанијата не е достапен, ние пробавме да извршиме вонреден инспекциски надзор но не успеавме. Службените канцеларии на Беса Транс беа затворени, не беше никој тука и сега доставивме известување, вели Руфат Хусеини. В.д директорката на Царинската управа Славица Кутиров вели дека се потребни итни реакции за целосно расчистување на случајот но и дека не постои раководител кој нема да сноси одговорност за овој случај. -Ова бара итни,брзи, ефикасни реакции и како што реков и на почетокот дека оваа дебата треба да биде во тој придонес. Јас лично немам никаков проблем ако тоа на било каков начин придонесе во расчистување и подобрување на овие состојби да поднесам оставка , вели Славица Кутиров. Бугарските истражители излегоа со неколку верзии за тоа која е точната причина за несреќата. Според нив, се разгледуваат неколку опции, односно техничката исправност на автобусот, лошата патна сигнализација но како верзија не се исклучува и грешка на возачот.