Објавен четвртиот број на книжевното списание „Современост“ за 2022 година

Ивана Ефремовски — Tue, 29 Nov 2022 07:33:21 +0000

Излезе од печат четвртиот број на списанието за литература, култура и уметност „Современост” за 2022 година. Во составот на последниот број на списанието за тековната година влегуваат 40 статии на 224 страници, вклучувајќи: интервју, 5 прилози проза, 11 прилози поезија, 2 приопштувања, 9 интерпретации, 8 рецензии, 1 прилог со афоризми, како и 3 текста од млади автори во новооформената рубрика Ѕвезди и протези. Бројот е отворен со интервју со поранешниот главен и одговорен уредник на ова списание и еден од најплодните македонски автори, проф. д-р Васил Тоциновски по повод 50-годишнината од објавувањето на неговото прво книжевно дело, поетската збирка „Тајна во сонот“ (1972). Потоа следи избор проза од: Станка Бајлозова Барламова, Милена Силјаноска, Билјана Станковска, Јордан Коцевски и Елисавета Станкоска. Поетите Васил Тоциновски, Љубица Шопова, Трајче Кацаров, Митко Апостолов, Долорес Атанасова – Лори и други се застапени со поезија. Во бројот се застапени преведените прилози, во делот Приопштувања од: Милица Миленковиќ и Наталија Недјалкова. Во рубриката Интерпретации застапени се прилози од повеќе македонски книжевници, меѓу кои: Славчо Ковилоски, Никола Алтиев, Васил Михаил, Елена Станкоска, Марија Цветкоска, Мишо Китаноски и други. Во бројот се застапени 8 рецензии кон книжевни дела кои ја сочинуваат рубриката Вреднувања: Жаклина Атанасова, Снежана Стојчевска, Васил Дрвошанов, Лидија Капушевска – Дракулевска, Сашо Огненовски, Атина Цветаноска и др. Со афоризми е застапен Љупчо Силјановски. Крајот е отстапен за рубриката Ѕвезди и протези во која се вклучени прилози од: Пепи Стамков, Светла Јакшиќ и Софија Тодороска. Илустрациите во последниот број за 2022 год. се фотографии од дела на академскиот вајар Александар Јанев, а истиот е достапен во книжарниците низ Скопје.

Првиот број на списанието за литература, култура и уметност „Современост“ за 2022 година излезе од печат

Ивана Ефремовски — Wed, 27 Apr 2022 06:58:15 +0000

Првиот број на списанието за литература, култура и уметност „Современост“ за 2022 година опфаќа 42 прилози на 162 страници, вклучувајќи: 6 прилози проза, 6 прилози поезија, драмски текст, 6 приопштувања, 5 интерпретации, 12 вреднувања, интервју, истражување, како и 4 одбележувачки текстови посветени на четворицата знаменити македонски авторски имиња кои нè напуштија оваа година во периодот јануари/февруари: Радован П. Цветковски (1931 - 2022), Драги Михајловски (1951 - 2022), Радован Павловски (1937 - 2022) и Луан Старова (1941 - 2022). Бројот е отворен со истражување околу потенцијалот и можностите за отворање Агенција за книга која би имала задача да помогне во претставувањето и афирмацијата на македонската литература во светот во авторство на Верица Мукоска, потоа следи избор проза од: Стефан Марковски, Сашко Насев, Митко Маџунков, Митко Бојаџиски, Владо Јаневски и Софија Тодороска. Авторите Димитар Пандев, Милчо Мисоски, Гордана Каракашевска, Кристијан Блажевски, Загорка Поп-Антоска Андовска и Пепи Стамков се застапени со поезија. Во бројот е застапена и драмата „Среќен мртовец“ на Марјан Анѓеловски. Во прилозите приопштувања застапени се препеви на македонски јазик од: Јури Талвет, Душан Гојков, Амина Булиќ, Станка Раџеновиќ - Станојевиќ, Анѓелка Корчуланиќ и Валентина Бактијаревиќ. Во рубриката Интерпретации, каде се застапени есеи и трудови посветени на литературата, доминираат прилози на автори од помладата генерацијa: Исток Улчар, Симона Китановска, Марија Цветкоска, Софија Тодороска. Уредничкиот тим на списанието предводен од Стефан Марковски, Снежана Стојчевска, Никола Алтиев, Мишо Китаноски и Верица Мукоска и во овој број застапи интервју и 12 прилози со рецензии за дела од современата македонска книжевност во делот Вреднувања, вклучувајќи прилози од: Вера Стојчевска – Антиќ, Васил Тоциновски, Снежана Стојчевска, Никола Алтиев, Владимир Мартиновски, Бобан Ристевски, Марина Мијаковска и Долорес Атанасова Лори. Застапено е интервју со српскиот писател Миодраг Мајиќ кое го водеше Тони Димитров. Крајот e проследен со информација за четирите значајни македонски авторски имиња кои нè напуштија оваа година во периодот јануари/февруари: Радован П. Цветковски (1931 - 2022), Драги Михајловски (1951 - 2022), Радован Павловски (1937 - 2022) и Луан Старова (1941 - 2022). Илустрациите во првиот број за 2022 година се дело на Буба М. Солак, а истиот наскоро ќе биде достапен во книжарниците на: „Антолог“, „Литература.мк“, „Три“ и други.

„Современост“ – Kurir.mk

Објавен четвртиот број на книжевното списание „Современост“ за 2022 година

Првиот број на списанието за литература, култура и уметност „Современост“ за 2022 година излезе од печат