сп русија 2018 – Kurir.mk

Идеалниот тим кој нема да патува за Русија

Дарко Андоновски — Fri, 08 Jun 2018 07:42:43 +0000

Останува една недела до најочекуваниот спортски настан на планетата - светското фудбалско првенство во Русија. Националните селекции на 32 земји веќе недела водат напорни подготовки за првите натпревари. И додека повеќето ѕвезди на модерниот фудбал ги спакуваа куферите за Русија, има еден сериозен дел од топ фудбалерите кои ќе го пропушти Мундијалот поради една или друга причина. Ви го презентираме идеалниот тим на играчи, чие отсуство сигурно ќе се почуствува на терените ширум Русија: Голман: Џанлуиџи Буфон; Дефанзивци: Вирџил Ван Дијк, Маркос Алонсо, Дани Алвеш, Лорен Кошчелни; Среден ред: Лерој Сане, Раџа Нинголан, Артуро Видал, Герет Бејл; Напаѓачи: Алексис Санчез, Мауро Икарди.

Во случај на манифестации на расизам на СП 2018, судијата има право да го прекине натпреварот

Дарко Андоновски — Thu, 07 Jun 2018 08:20:00 +0000

Претседателот на Светската фудбалска федерација (ФИФА), Џани Инфантино, соопшти дека организацијата сериозно ќе ги потисне обидите за манифестации на расизам за време на Мундијалот во Русија. - Имаме јасни препораки во случај на манифестации на расизам. Судијата има право привремено да го прекине натпреварот, па дури и да донесе одлука да не се доигра. Благодарение на системот за следење, ќе следат непосредни санкции. Се разбира, ние не сакаме да се случи тоа. За сериозните последици сите се предупредени, изјави Инфантино. Светското првенство во Русија ќе се одржи од 14 јуни до 15 јули

За кого ќе навива политичката елита: Заев за Хрватска и Србија, Мицкоски за Германија

Дарко Андоновски — Thu, 07 Jun 2018 07:17:39 +0000

Двете најмоќни политички фигури во земјава имаат различно мислење и кога е во прашање фудбалот - најважната споредна работа на светот. Првите луѓе на СДСМ и на ВМРО-ДПМНЕ ќе навиваат за различни репрезентации на претстојното Светското првенство во фудбал, кое од 14 јуни до 15 јули ќе се одржи во Русија. И двајцата жалат што Македонија ќе го пропушти и овој континентален самит, но и Зоран Заев и Христијан Мицкоски имаат свои резервни фаворити и миленици, пренесува Независен весник. -Секако дека ќе ги следам натпреварите, онолку колку што ќе дозволуваат обврските. Тоа е повеќе од фудбал, можност за разонода и во друштво со пријателите да се погледнат најквалитетните репрезентации во светот. Јас сум повеќе регионален играч, така што ќе навивам за двете земји од поранешните југословенски простори: Хрватска и Србија. Хрватите имаат одлична репрезентација и според мене можат далеку да стигнат. Србите важат за аутсајдери, но верувам дека се способни позитивно да изненадат. Доколку ме прашувате кои се главните фаворити, тогаш се знае: Бразил, Аргентина, Германија, Шпанија, Франција..., вели Заев за „Независен весник“. И лидерот на опозицијата вели дека едвај чека да започнат натпреварите од Светскиот куп, иако поради работните обврски не е сигурен колку ќе има време до крај да ужива во мајсториите на фудбалските мајстори. За негов, но и за фаворит број еден на Мундијалот го смета актуелниот бранител на трофејот освоен пред четири години во Јужна Африка – тимот на Германија. -Пред се поради нивната упорност, тактичност и германска прецизност. Но, сепак, конкуренцијата е силна и нека победи подобриот. Се надевам дека ќе проследам дел од натпреварите, односно онолку колку што ќе дозволи времето, со оглед на тоа што во тој период ќе започнам со работното лето, ќе бидам по градовите и селата низ Македонија, ќе имам средби со граѓаните. Во зависност од агендата, ќе се обидам со соработниците да проследам барем неколку мечеви од шампионатот. Се надевам дека во годините што следуваат ќе дојде време кога и македонската репрезентација ќе имаме можност да ја бодриме и заеднички да се радуваме на нејзините успеси на некој од големите фудбалски натпреварувања, ни изјави Мицкоски. Фудбалската треска што до средината на јули ќе го тресе светот не ја одминува ниту Македонија. Политичкиот џет-сет во државава, во паузите од преговорите за името, економските проблеми и меѓусебните обвинувања, едвај чека да започнат преносите од вкупно 64 натпревари, колку што ќе треба да се одиграат за да дознаеме кој е најдобар на светот во фудбал. Целата сторија прочитајте ја ТУКА.

СП Русија: Англичаните ќе кренат ограда од шест метри околу својата база

Дарко Андоновски — Wed, 06 Jun 2018 14:17:28 +0000

Ограда од шест метри ќе го штити националниот тим на Англија од љубопитни погледи за време на Светското првенство 2018 година во Русија. Таа ќе биде подигната околу базата на „Трите лава“ во Зелегорск, дел од Санкт Петербург. Барањето до локалните власти дојде од раководството на англиската делегација, која посака да го скрие процесот на обука на тимот. Таквото барање не е регулирано во правилата на Меѓународната фудбалска федерација (ФИФА).

Деле Али: Англија оди во Русија да го освои СП

Дарко Андоновски — Wed, 06 Jun 2018 13:18:23 +0000

Англискиот репрезентативец Деле Али изјави дека тимот ќе биде разочаран од кое било место на претстојното Светското првенство во Русија, освен првото, објави „Скај Спортс“. - Ќе одиме на Светското првенство за да го освоиме. Ова е нашата цел, па дури и второто место ќе не разочара. Мислам дека ни треба таков победнички дух, бидејќи не сакаме само да учествуваме на турнирот. Играчите совршено ги знаат квалитетите и талентот на овој состав. Ако секој од нас го покаже нашиот максимум, тогаш можеме да успееме, изјави Деле Али. Англија ја освои светската титула само еднаш, во 1966 година. На Светското првенство, Англичаните ќе играат во групата Г со репрезентациите на Тунис (18 јуни), Панама (24 јуни) и Белгија (28 јуни).

Де Геа: Сега сум фокусиран на СП, не размислувам за трансфер

Дарко Андоновски — Tue, 05 Jun 2018 11:46:11 +0000

Голманот на шпанската фудбалска репрезентација и член на Манчестер Јунајтед, Давид де Геа, изјави дека сега не размислува за негов можен трансфер од клубот, туку се фокусира на подготовките за Светското првенство во Русија. Претходно беше објавено дека ова лето, 27-годишниот голман има намера да потпише за Реал Мадрид. - Сега најважниот датум за мене е 15 јуни. Светското првенство е многу важно за шпанскиот тим, мора да покажеме добра игра за да одиме колку што е можно подалеку. Што се однесува до мене, среќен сум во Манчестер Јунајтед, но во исто време сум фокусиран на работите на националниот тим. На Светското првенство Шпанците ќе играат во групата Б заедно со Португалија (15 јуни), Иран (20) и Мароко (25).

Погба: Зошто не го критикуваат Меси кога шета по теренот?

Дарко Андоновски — Tue, 05 Jun 2018 09:16:36 +0000

Францускиот фудбалски репрезентативец Пол Погба е многу критикуван од навивачите во пресрет на Светското првенство во Русија. Тој на пријателскиот натпревар со Италија одигран пред неколку дена беше исвиркан од навивачите поради слабата игра. Набргу потоа во анкетата на навивачите беше заклучено дека играчот на Манчестер Јунајтед не заслужува да патува на Мундијалот. На ваквите коментари и однесување на навивачите Погба одговори со прашање: - Не знам зошто не го критикувате Лионел Меси кога тој се шета по теренот? Ако постигне три гола не знам дали некој воопшто смее да каже дека само се шета по теренот. Немате право ни мене да ми говорите како играм, им порача Погба на неговите критичари. Францускиот репрезентативец зад себе има лоша сезона во дресот на Манчестер Јунајтед и останува да се види дали тоа ќе се одрази на неговата игра во националниот тим.

Салах конечно пресече- еве дали ќе игра на СП во Русија

Дарко Андоновски — Mon, 04 Jun 2018 13:11:57 +0000

Најдобриот египетски фудбалер, Мохамед Салах, е на листата на репрезентацијата за Мундијалот во Русија и покрај повредата на неговото рамо здобиена во финалето на Лигата на шампионите. Напаѓачот на Ливерпул на репрезентацијата ќе и се приклучи на 9 јуни, а дотогаш ќе закрепнува во Шпанија. Салах сигурно ќе го пропушти првиот натпревар против Уругвај на 15 јуни. Во Египет веруваат дека тој ќе биде подготвен за натпреварот против Русија четири дена подоцна, а дека тоа сигурно ќе се случи за средбата со Саудиска Арабија на 25 јуни.

Почнува безвизен режим за фановите на СП во Русија

Дарко Андоновски — Mon, 04 Jun 2018 08:48:12 +0000

Русија од денеска воведува безвизен режим за сите странски државјани кои ќе дојдат да присуствуваат на фудбалскиот Мундијал. Заинтересираните навивачи ќе можат да го користат првото на повеќекратен безвизен влез во Русија од 4 јуни до 25 јули кога ќе треба да ја напуштат земјата. Светското првенство во Русија ќе се одржи во 11 градови на 12 стадиони од 14 јуни до 15 јули.

Нејмар: Се уште не сум целосно подготвен

Дарко Андоновски — Mon, 04 Jun 2018 07:50:14 +0000

Бразилската фудбалска ѕвезда Нејмар кој вчера се врати на теренот по повредата на глуждот, не се чувствува целосно подготвен. Нејмар кој го постигна водечкиот гол за „Кариоките“ во победата над Хрватска (2:0) очекува до почетокот на Светското првенство закажано за 14 јуни да биде во топ-форма. -Поминаа три месеци откако се повредив. Се радувам што бев во можност да се вратам и при тоа постигнав гол. Среќен сум. Секој ден се подобрувам. Сега сум подготвен за 80 проценти. Очекувам за Мундијалот да бидам целосно подготвен, истакна Нејмар. Бразил на Мундијалот во Русија ќе игра во Е-групата заедно со Швајцарија, Костарика и Србија.