спортист на годината – Kurir.mk

ФФМ ги номинираше овие тројца фудбалери за наградата Спортист на годината на АМС

Дарко Андоновски — Thu, 15 Dec 2022 11:25:22 +0000

Фудбалската федерација на Македонија до Агенцијата за млади и спорт (АМС) ги испрати предлог-номинациите за избор на Спортисти на годината во организација на АМС. На предлог на селекторот на македонската репрезентација, Благоја Милевски, во категоријата Спортист на годината, ФФМ ги номинираше капитенот Стефан Ристовски, Елиф Елмас и Енис Барди. Во дописот до Агенцијата за млади и спорт, селекторот на нашиот најдобар национален состав даде свое објаснување во однос на номинациите за тројцата наши репрезентативци. Стефан Ристовски Придонес во одиграните натпревари за македонската репрезентација во квалификациите за Мундијалот 2022 и освоеното второ место во групата; Придонес во одиграните бараж натпревари за Мундијалот 2022. Победа против европскиот првак Италија и пласман во финалето од плеј-офот против Португалија; Придонес во одиграните натпревари за освојување на шампионската титула во хрватското првенство со загрепски Динамо и придонес во освојувањето на националниот куп со Динамо; Придонес во одиграните натпревари за Динамо во УЕФА Лига на шампиони и пласман во групната фаза од ова натпреварување; Елиф Елмас Придонес во одиграните натпревари за македонската репрезентација во квалификациите за Мундијалот 2022 и освоеното второ место во групата; Придонес во одиграниот бараж натпревар за Мундијалот 2022. Финале од плеј-офот против Португалија; Придонес во одиграните натпревари за Наполи во УЕФА Лига на шампиони и пласман во групната фаза од ова натпреварување; Посветеност кон националниот дрес и секогаш во функција на тимот за репрезентативните натпревари во изданието од Лигата на нации; Енис Барди Придонес во одиграните натпревари за македонската репрезентација во квалификациите за Мундијалот 2022 и освоеното второ место во групата; Придонес во одиграните бараж натпревари за Мундијалот 2022. Победа против европскиот првак Италија и пласман во финалето од плеј-офот против Португалија; Посветеност кон националниот дрес и секогаш во функција на тимот за репрезентативните натпревари во изданието од Лигата на нации.

Рохас и Меси спортисти на годината во Јужна Америка

Дарко Андоновски — Fri, 31 Dec 2021 13:12:47 +0000

Венецуелската атлетичарка во трискок Јулимар Рохас и аргентинскиот фудбалер Лионел Меси се најдобри спортисти во Јужна Америка за 2021 година, одлучи во својот избор Меѓународното здружение на спортски новинари (AIPS). Рохас (26) го освои златниот медал на Олимписките игри во Токио, а со скокот од 15,67 метри воедно го собори и 26 години стариот рекорд што во дисциплината трискок го држеше Инеса Кравец (15,50). Најдобриот спортист на јужноамериканскиот континет за 2021 година Меси, првпат во кариерата освои голем трофеј со аргентинската репрезентација, која беше најдобра на Копа Америка, и тоа првпат по 1993 година. Аргентина во финалето на „Маракана“ во Рио де Женеиро го совлада Бразил со 1:0.

Каратистот Емил Павлов повторно е избран за спортист на годината на Штип

Ивона Петрова — Fri, 29 Jan 2021 07:42:32 +0000

Каратистот Емил Павлов шести пат е спортист на годината во Општина Штип. Манифестацијата „Спортист на годината“ се одржа согласно здравствените протоколи, а признанија им беа доделени на повеќе спортисти и спортски работници од различни категории. Комисијата за избор на спортист на годината во Општина Штип го избра Емил Павлов, повеќекратен европски првак. Тој истакна дека упорноста, пожартвуваноста и желбата да се постигне успех се неговите водилки, а во мај очекува да ја постигне и нормата, со што ќе може да се натпреварува и на Олимписките игри во Токио. Пандемијата и замирањето на сите спортски натпревари во 2020 година, за Павлов биле можност да ги санира сите помали повреди, но и упорно да тренира. -На почетокот на годината успеав да го освојам тој златен медал во светската Премиер лига. Јас сум оптимист и овој период го искористив да бидам уште подобар, сега сум и поискусен, можам да кажам дека си го одморив и телото, санирав некои ситни повреди и сега сум полн со желби и постојано тренирам, рече Павлов. Градоначалникот на Штип Сашко Николов ја истакна својата континуирана поддршка за спортот и изјави дека Општина Штип согласно со Програмата за активности од областа на спортот и во 2021 година ќе продолжи да ги стимулира сите предвидени активности и да прави соодветна афирмација на сите постигнувања. – Дозволете да упатам срдечни честитки до сите вас и да ви посакам уште многу успеси. Сите вие сте млади, а веќе доволно истакнати. Вашите успеси се слика на нашиот град. Вие сте одраз на приматот што го има Штип како универзитетски, културен и спортски град. Порачувам сите вие да бидете пример за сегашните и за идните генерации. Нашиот град се гордее со вас. Ние како општински тим сме горди на вашите резултати, истакна Николов.

Леброн по рекорден трет пат прогласен за спортист на годината во изборот на „Sports Illustrated“

Дарко Андоновски — Mon, 07 Dec 2020 07:56:18 +0000

Американското спортско списание „Sports Illustrated“ по рекорден трет пат го прогласи Леброн Џејмс за спортист на годината. Кошаркарот на Лејкерс стана првиот спортист што ја добил оваа награда по трет пат. Претходно, Леброн беше избран за спортист на годината во 2012 и 2016 година. Џејмс минатата сезона ја освои четвртата титула во НБА-лигата. Претходно има освоено шампионски титули со Мајами (2012, 2013) и Кливленд (2016). Сезоната 2019/20 Џејмс ја заврши со просек од 25,3 поени, 7,8 скока, 10,2 асистенции и 1,2 украдени топки по натпревар.

Анамарија Георгиевска е најуспешна млада спортистка на официјалниот избор за спортист на годината

Ивана Ефремовски — Thu, 27 Dec 2018 10:14:37 +0000

Анамарија Георгиевска во 2018-та освои бронзен медал на јуниоското светско првенство во таеквондо кое се одржа во Тунис, тоа е еден од најголемите младински спортски резултати кои што се постигнати во последниве години во Македонија. Анамарија заедно со нејзиниот брат Дејан Георгиевски се едни од најсериозните претендети за освојување на олимписки норми за олимписките игри во Токио 2020-та. Да потсетиме, таеквондото е олимписки спорт и е еден од најбрзорастечките спортови во Македонија. Дејан Георгиевски на овој избор беше номиниран исто така и тоа во најтесна конкуренција за најдобар спортист, додека пак нивниот тренер Борче Костовски беше номиниран во најтесна конкуренција за тренер на годината.