Србија-Хрватска – Kurir.mk

Поради изјава на Вучиќ, Колинда Грабар-Китаровиќ нема да ја посети Србија

Предраг Кукиќ — Tue, 07 Aug 2018 08:18:34 +0000

Поради изјавата на српскиот претседател Александар Вучиќ дека „Хитлер сакаше свет без Евреи и дека Хрватска и нејзината политика сакаат Хрватска без Срби”, хрватскиот претседател Колинда Грабар-Китаровиќ нема да ја посети Србија, како што претходно најави, објави хрватски „Јутарњи лист”. – По последниот потег на Вучиќ, невозможно е дури и да се размислува за подобрување на односите меѓу нашите земји, изјави висок државен претставник за „Јутарњи лист“. Тој додаде дека следи длабок пад во односите со Србија на неопределен период, што значи дека нема разговор за посета на хрватската претседателка во Србија. Според соговорникот на Јутарњи лист, „за некое време не е потребно да се очекуваат состаноци на високи владини претставници од Хрватска и од Србија”. „Иако се лути поради споредба со нацистичкиот режим во локалните политички кругови, се смета дека претседателот на Србија постигнал толку многу радикален автогол”, пишува „Јутарњи“.

Дачиќ: Ако Хрватска сака дипломатска војна, ќе има

Даниел Василев — Mon, 30 Apr 2018 10:37:22 +0000

Српскиот министер за надворешни работи Ивица Дачиќ изјави дека политиката на Србија кон Хрватска во иднина ќе биде заснована на принципот на реципроцитет и дека Белград ќе возврати со иста мерка доколу Загреп одлучи да го повлече својот амбасадор. - Се надевам дека разумот ќе надвладее и дека ќе продолжиме по патот на добрососедските односи, како што имаат зацртано претседателите Колинда Грабар Китаровиќ и Александар Вучиќ. Но, доколку некој сака дипломатска војна, ќе добие дипломатска војна, изјави Дачиќ за таблоидот Информер. Тој потсети дека Хрватите го прогласеле за непожелна личност министерот за одбрана Александар Вулин и дека Белград возвратил со реципрочна мерка. - Реципрочните мерки се вообичаена пракса во дипломатијата. Секаде тоа се работи. Секако, не сме задоволни со ова, но сме принудени на ваков чекор. Ние само реагираме, одговараме на нивните потези. Доколку дојде до нови непријателски чекори на Загреб, подготвени сме за реакција, вели Дачиќ. Шефот на дипломатијата оцени дека „реципроцитетот е мајка на дипломатијата“ и дека тоа го прават и американскиот и рускиот претседател Доналд Трамп и Владимир Путин. Говорејќи за можноста Хрватска да го закочи европскиот пат на Србија, Дачиќ оцени дека не е извесно Загреб во јуни да го блокира отворањето на новите преговарачки поглавја со ЕУ. МИА

Вучиќ: Србија и Хрватска испаѓаат смешни пред цел свет

Даниел Василев — Fri, 27 Apr 2018 18:48:31 +0000

Српскиот претседател Александар Вучиќ денеска изјави дека Србија и Хрватска испаѓаат смешни пред целата меѓународна јавност поради реципрочните мерки кои ги воведоа една на друга. - Важно е да разбереме дека и едните и другите испаѓаме смешни, како трупци, пред целата меѓународна јавност. Бадијала ни е што ние не сме виновни и што како држава морате да повлечете реципрочни мерки, сите испаѓаме смешни, бидејќи луѓето во светот се прашуваат - што им е на овие?, изјави Вучиќ пред новинарите во Скопје, каде присуствува на Процесот Брдо-Бриони. Тој изјави дека Србија треба да се сврти кон себе и да се обиде да не учествува во нешто, со некој друг, што би можело да го наруши нејзиниот углед. - Тие нека ја тераат својата работа. Дајте да се свртиме кон себе и за себе да размислуваме, изјави Вучиќ. Хрватската претседателка Колинда Грабар-Китаровиќ од Скопје порача дека Хрватска „има испружено рака за дијалог“ со Србија и оти ќе продолжи да се залага за членство во ЕУ на сите држави од југоисточна Европа. МИА