Сребрена Лига – Kurir.mk

Македонија по пет сета го освои бронзениот медал во Сребрената лига

Бошко Тасиќ — Sun, 19 Jun 2022 16:26:53 +0000

Одбојкарската репрезентација на Македонија победи во „малото финале“ против Унгарија со 3-2 во сетови (25-22, 18-25, 25-15, 19-25, 15-7) и го освои третото место на Ф4-турнирот во Сребрената европска лига. „Спартанците“ одиграа натпревар кој беше доста мачен на психолошки план и траеше повеќе од два часа. Најдобрата игра на мечот нашите одбојкари ја покажаа прво во првиот сет, кога од 21-20 заминаа на 24-20 и ја искористија третата сет-топка. Откако го загубија вториот сет, следеше одличен трет сет во кој на противникот му се дозволи да освои само 15 поени. Во четвртиот сет, Унгарците изедначија на 2-2 откако ја имаа во целост контролата на играта, но во петтиот, како да загубија сила, па Македонија од 10-6 замина на 14-6 и го реши натпреварот. Никола Ѓорѓиев повторно беше лидер на Македонија, овој пат реализира 27 поени, а го следеше Стојан Илиев кој на натпреварот имаше 17 поени. Кај Унгарците, Марсел Пешти постигна 21 поен.

Македонија се пласира во финалето на одбојкарската Сребрена Лига

Бошко Тасиќ — Sat, 05 Jun 2021 18:41:28 +0000

Одбојкарската репрезентација на Македонија оствари важна победа против Хрватска во полуфиналниот натпревар од Сребрената лига. Избраниците на Матијашевиќ со 3:2 по сетови ги совладаа „коцкестите“ и си закажаа финална средба со подобриот од второто полуфинале кое се игра помеѓу Данска и Унгарија. Хрватска подобро го започна натпреварот и убедливо го доби првиот сет со 25:15, а потоа македонските одбојкари се консолидираа и ги добија следните два сета со 25:19, односно 25:22. Третиот сет им припадна на гостите со 25:21 за крајно возбудлив финиш на натпреварот и петти сет кој ќе го одлучи победникот. Во одлучувачкиот сет, за среќа подобри беа нашите одбојкари со 15:12 и на крајот забележаа нова победа со која добија можност да атакуваат и на првото место во Сребрената лига. foto: gol.mk

Одбојкарите сигурни против Кипар и го заверија пласманот на Ф4 во Сребрената Лига

Бошко Тасиќ — Sun, 30 May 2021 16:15:14 +0000

Македонската одбојкарска селекција запиша уште еден успех во Сребрената европска лига и со скор од пет победи и само еден пораз ќе го отвори „фајнал-форот“ во ова натпреварување. Во рамки од последното коло од групата А, со сигурни 3-1 по вторпат за само девет дена ја совладаа селекцијата на Кипар. Избраниците на Матијашевиќ и на натпреварот во Данска немаа посериозни проблеми против кипарските одбојкари, иако овој пат загубија сет. „Спартанците“ без многу мака дојдоа до водство од 2-0 во сетови и ја контролираа играта, а имаа и соодветен одговор во моментите кога противникот знаеше да изненади и влезе во серија. Неизвесно беше и на стартот од третиот сет. Кипар одново отвори мотивирано и ефикасно и го имаше водството во свои раце, но овој пат не го испушти и со сигурни 25-18 намали на 2-1 во сетови. Сепак, кога беше најпотребно искуството и квалитетот на „спартанците“ се покажа на дело и Македонија со сигурни 22-25 се избори за нова победа за успешен крај на турнирот во Данска. Покрај Македонија, која без разлика одличните настапи и петте победи, како домаќин обезбеди „фајнал-фор“, од групата А во завршницата ќе игра и селекцијата на Данска.

Одбојкарите на Македонија подобри од Израел

Бошко Тасиќ — Sat, 29 May 2021 17:04:30 +0000

Машката одбојкарска репрезентација славеше против Израел со 3-1 во сетови, односно 16-25, 32-30, 31-29 и 25-23, и ја запиша четвртата победа во европската Сребрена лига. Нашите одбојкари одиграа лош прв сет, кој го загубија со 16-25, по што со голема борба го освои вториот сет со 32-30 и израмни на 1-1. Израел не се предаваше ниту во третиот сет и даваше отпор до самиот финиш, но македонските одбојкари успеаа да го добијат сетот со 31-29, по што со многу мака го добија и четвртиот сет со 25-23. Македонија има четири победи во групата А од пет натпревари, а последниот меч го игра утре против Кипар. foto: gol.mk

Македонија ја победи Данска со 3:0 во сетови

Бошко Тасиќ — Fri, 28 May 2021 19:57:00 +0000

Македонската одбојкарска репрезентација одлично го отвори вториот турнир во рамките на Европската сребрена лига, вечерва во Шлагелсе со 3-0 славеше против домаќинот Данска. Македонија и се реваншираше на Данска за поразот од Струмица од пред пет дена. Вечерва на отварањето на вториот турнир, „спартанците“ славеа со 3-0. Избраниците на селекторот Никола Матијашевиќ првиот сет го добија со тесни 25-23, но потоа го надиграа противникот во вториот сет кој го добија со 25-17. Третиот сет го имавме под контрола и го добивме со 25-21. Со оваа победа, Македонија сега се враќа на првото место во групата со 9 бодови, еден повеќе од Данска, потоа следува Кипар со четири бодови, а Израел има три. Одбојкарите утре се среќаваат со Израел, натпреварот е со почеток во 16 часот, додека во последното коло во недела играме против Кипар.

Велес домаќин на средбите од првиот турнир на Европската Сребрена Лига

Бошко Тасиќ — Mon, 08 Mar 2021 16:49:30 +0000

Македонската одбојкарска репрезентација, најверојатно во Велес, ќе ги одигра натпреварите на првиот турнир од Сребрената европска лига . Одбојкарската федерација на Македонија ја доби организацијата и на турнирот од групата „А“ во која покрај Македонија се и Израел, Кипар и Данска, но и на завршниот Ф4 турнир на кој најдобрите четири селекции од двете групи ќе се борат за титулата во ова европско натпреварување . „Разговараме, има расположение кај Велес и се надевам дека ќе успееме да се договориме. Има некои работи кои треба да се исполнат за беспрекорна организација, а Велес ќе добие еден голем репрезентативен настан каков што градот во кој одбојката се негува со децении, навистина заслужува“, вели генералниот секретар на ОФМ, Зоран Карановиќ.

Македонија ќе биде организатор на завршниот турнир во Сребрената Лига

Бошко Тасиќ — Fri, 26 Feb 2021 19:13:35 +0000

Одбојкарската федерација на нашата земја ќе биде организатор на завршниот турнир во Сребрената лига оваа година. Турнирот ќе се одржи на почетокот на месец јуни. Претходно се закажани двата турнири од групната фаза кои ќе се одржат од 21-23 и од 28-30 мај. Македонската репрезентација ќе игра во групата А заедно со Израел, Данска и Кипар. Во втората група ќе се надигруваат Хрватска , Австрија, Унгарија и Луксембург. Бордот на ЦЕВ уште еднаш ја потврди целосната доверба во македонската одбојка, па покрај претходната одлука за организација на турнир од групната фаза во континенталното натпреварување, највисокото управно тело на ЦЕВ реши и битката за медалите да биде кај нас. foto : gol.mk