српска влада – Kurir.mk

Српската Влада донесе Одлука за прогласување елементарни непогоди во 56 градови и општини

Дарко Андоновски — Mon, 19 Jun 2023 17:10:14 +0000

Владата на Србија на денешната седница ја донесе Одлуката за прогласување елементарна непогода во 56 градови и општини во државата. На седницата на Владата беше донесен заклучок за формирање Работна група за координација на активностите за санирање на последиците од поплавите и подготовка на државна помош и програми за обнова по поплавите што ја погодија Република Србија. Работната група ќе има секојдневни состаноци на кои ќе биде разгледан актуелниот пресек на состојбите во загрозените подрачја ќе бидат претставени. Владата на Република Србија во најкраток можен рок ќе ги евидентира настанатите штети во сите единици на локалната самоуправа во Србија и ќе изготви план за санирање на штетите, се вели во соопштението од владината седница. Поројните дождови и излеаните порои и другите водотеци предизвикаа штети на регионалната и локалната инфраструктура.

Српската Влада формираше Совет за спречување врсничко насилство

Тале Кристо — Thu, 11 May 2023 16:56:41 +0000

Владата на Србија на денешната седница формираше Советот за спречување на врсното насилство, чија задача меѓу другото ќе биде да обезбеди организирање мобилни тимови за спречување врсничко насилство преку протоколи меѓу центрите за социјална работа и други служби, како образовни и здравствени установи и полиција, која итно ќе реагира ако се случи таков вид насилство. Со Советот ќе раководи претседателката на Владата на Србија, Ана Брнабиќ, а заменик-претседател на Советот ќе биде министерката за семејна грижа и демографија, Дарија Кисиќ, се наведува во владиното соопштение. Советот го сочинуваат и министрите за внатрешни работи, правда, здравство, информации и телекомуникации, министерот за труд, вработување, социјала, потоа за државна администрација и локална самоуправа, за човекови и малцински права и социјален дијалог, министерот за туризам и млади, претставник од Министерството за образование, УНИЦЕФ, Здружението „Мајките се закон“ и Центарот за исчезнати и злоупотребени деца. Владата на Сртбија донесе Одлука за формирање Работна група за поддршка на менталното здравје и безбедност на младите, чија задача е да подготви предлог за програма за поддршка на менталното здравје и безбедноста на младите, со посебен акцент на воспоставување на повеќесекторска соработка која би вклучила образовни и здравствени институции и други организации и општествени заедници кои се занимаваат или имаат влијание врз менталното здравје на таа популација. Тие програми бараат пристап на повеќе нивоа со различни платформи како што се дигитални медиуми, здравствени или социјални институции, училишта или други заедници, како и различни стратегии за пристап и комуникација со адолесцентите, додека главна цел на овие програми е да се зајакне поединецот капацитет да се регулираат емоциите, да се подобрат алтернативите на ризичното однесување, да се изгради отпорност за управување со тешки ситуации и неволји и да се промовира социјална средина во која адолесцентот се чувствува безбедно и заштитено. Членовите на владата на Србија донесоа и Одлуката за формирање Работна група за безбедност на децата на интернет, која во наредниот месец ќе го разгледа воведувањето мерки за забрана за пристап до сајтови како ДаркНет и слично, кои содржат совети за тоа како да се изврши убиство, да се набави дрога или огнено оружјеа.

Српската Влада донесе десет заклучоци по вчерашното масовно убиство во училиштето во Белград

Тале Кристо — Thu, 04 May 2023 14:45:43 +0000

Српската Влада донесе десет заклучоци по вчерашното масовно убиство во училиштето во Белград, кои вчера ги изнесе претседателот Александар Вучиќ, јави дописникот на МИА од Белград. Првиот заклучок претставува двегодишен мораториум за издавање дозволи за чување и носење мало огнено оружје (овластувања за набавка на оружје, сертификати за оружје и сл.). Во рок од три месеци МВР ќе изврши ревизија на сите издадени дозволи за оружје. Министерството за внатрешни работи во рок од шест месеци ќе ги контролира лицата кои имаат дозволи за чување оружје, особено исполнувањето на законските услови за безбедно чување на оружјето и посебно на чување муниција. Во истиот период, МВР ќе прегледа и дали е соодветно спречен пристапот до оружје и муниција на малолетни и други неовластени лица, се наведува во соопштенеито на Владата. -Работата на сите стрелишта ќе биде предмет на контрола на МВР во следните три месеци. Потоа, во соработка со Министерството за правда, во рок од еден месец ќе се изготват прописи за условите и начинот на користење на стрелиштата, вклучително и забраната за пристап на малолетници, се наведува во соопштението. Министерството за правда, во рамките на постојната Работна група за измена на Кривичниот законик, ќе подготви измени на законот со кои ќе се пропише кривична одговорност за лицата кои овозможуваат малолетници и други неовластени лица да поседуваат огнено оружје и кои обучуваат малолетници и други неовластени лица да ракуваат со огнено оружје . -Министерството за правда, исто така, во рамките на постоечката Работна група за изменување и дополнување на Кривичниот законик, ќе ја разгледа можноста за измена на Кривичниот законик со цел намалување на старосната граница за кривична одговорност на малолетниците од 14 на 12 години, притоа почитувајќи ги меѓународните и европските стандарди, се наведува во соопштението. Министерството за правда и Министерството за информации и телекомуникации во рок од еден месец ќе ја разгледаат можноста за заострување на санкциите за непочитување на пропишаните обврски на давателите на медиумски услуги, вклучително и интернетот и другите електронски платформи, како и социјалните мрежи, во однос на забраната за програмски содржини кои нагласуваат и поддржуваат насилство, криминално и друго незаконско однесување, емитување сцени на брутално насилство и други содржини кои можат сериозно да му наштетат на физичкиот, менталниот или моралниот развој на малолетниците. Во рок од еден месец Министерството за образование и Министерството за здравство ќе подготват прописи со кои ќе се овозможи воведување задолжителни тестови за дрога во средните и во основните училишта за учениците од седмо и осмо одделение. Владата во рок од десет дена ќе формира Совет за спречување врсничко насилство, кој меѓу другото ќе обезбеди организирање на мобилни тимови за врсничко насилство преку протоколи меѓу центрите за социјална работа и други служби (образовни и здравствени установи, полиција), кој итно би реагирал на случаите на врсничко насилство и во консултација со синдикатите на воспитно-образовните работници и здруженијата на родители на ученици, ќе ја разгледа целесообразноста да се донесе мерка за забрана за употреба на мобилни телефони во училиштата. Владата, исто така, во рок од десет дена ќе формира работна група за безбедност на децата на Интернет, која ќе го разгледа воведувањето мерки за забрана на пристап до веб-страниците (DarkNet и слично), кои содржат совети како да се изврши убиство, стекнување дрога или огнено оружје. Членовите на Владата донесоа одлука да се прогласи ден на жалост на територијата на Република Србија, со што за денови на жалост се прогласени 5, 6 и 7 мај 2023 година, се наведува во денешнотот соопштение на српската Влада.

Српската Влада му го предаде на КФОР барањето за враќање на силите за безбедност на Косово

Ивана Ефремовски — Fri, 16 Dec 2022 13:03:36 +0000

На меѓународната мировна мисија на Косово (КФОР) денеска на преминот Мердаре и е предадено барањето на српската Влада да одобри враќање на стотина до илјада припадници на српските сили за безбедност на Косово, во согласност со Резолуцијата 1244 на Советот за безбедност на ОН, јави Радиотелевизија Србија. Владата таа одлука ја донела на седница одржана синоќа, додека веќе седми ден трае напнатоста на Косово откако локалните Срби, протестирајќи поради апсењето на поранешен полицаец и присуството на специјалните единици на косовската полиција на север, поставиле барикади. Одлуката на Владата, усвоена едногласно, ја соопшти српскиот претседател Александар Вучиќ, наведувајќи дека КФОР ќе го одбие тоа барање. -Мислам дека не постои можност тие да го прифатат нашето барање, рече синоќа Вучиќ за Радиотелевизија Србија. Американските претставници во последните три дена му ставија јасно до знаење на Белград дека Вашингтон се противи на „милитаризирање на проблемот“. Американскиот амбасадор во Белград, Кристофер Хил оцени вчера дека српската Влада има право да побара од КФОР враќање до илјада припадници на силите за безбедност, но дека е неопходно политичко решение. Претходно американскиот заменик помошник државен секретар Габриел Ескобар порача дека „барикадите на северот на Косово треба мирно да ги отстранат тие кои ги поставиле“ и нагласил дека „САД се противат на доаѓањето на српската Армија на север“ и дека „Србија и Косово мора да постигнат правно обврзувачки договор“. (МИА)

Српска Влада: Отворениот Балкан ќе придонесе за подобра економска соработка на Србија, Албанија и Македонија

Катерина Бојаџиева — Mon, 15 Nov 2021 16:52:59 +0000

На крајот на состанокот на регионалната иницијатива „Отворен Балкан“, кој се одржа во Ниш од 12 до 14 ноември, а на кој присуствуваа министрите за финансии, земјоделство, труд и вработување на владите на Република Србија, Република Албанија и Република Северна Македонија, потпишани се два заклучоци од работните средби, со кои се дефинирани сите активности што треба да се спроведат до самитот во Тирана на крајот на декември, а кои ќе придонесат за олеснување на трговијата, соработката во областа на безбедноста на храната, фитосанитарна и ветеринарна инспекција, како и слободниот пристап до пазарот на трудот за граѓаните од трите земји, сопштија од српската Влада. Според соопштението, како што јави допсиникот на МИА од Белград, првиот Заклучок го потпишаа министерот за финансии во Владата на Србија Синиша Мали, министерот за земјоделство, шумарство и водостопанство Бранислав Недимовиќ, министерката за трговија, туризам и телекомуникации Татјана Матиќ, потоа министерот за финансии и економија во Владата на Албанија Делина Ибрахимај, министерката за земјоделство и рурален развој на Албанија, Фрида Крифка, и заменик министерот за земјоделство, шумарство и водостопанство во Владата на Северна Македонија Трајан Димковски. На потпишувањето присуствуваа и претседателот на Стопанската комора на Србија Марко Чадеж, кој беше домаќин на собирот, како и претседателката на Сојузот на стопански и индустриски комори во Албанија Инес Мучостепа и претставници на Стопанската комора на Северна Македонија, Анета Димовска и Нена Николовска. Со овој документ се предвидува до крајот на годинава интензивно да се работи на воспоставување систем за електронска размена на сите потребни документи, царински декларации, фитосанитарни и ветеринарни сертификати, како и на подобрување на постоечките системи. Спроведувањето на оваа мерка значително ќе придонесе за помало задржување на камионите на границите. Договорено е и до крајот на годината сите три земји да воведат систем каде сите гранични служби, вклучително и фитосанитарната инспекција, ќе работат 24/7. Заклучено е и дека сите три страни до крајот на 2021 година ќе потпишат и валидираат договори за признавање на статусот на овластени економски субјекти, што во голема мера ќе го олесни преминувањето на границата за некои компании и ќе донесе други придобивки. Договорено е и дека ќе се работи на намалување на сите такси што се плаќаат при преминување на граничните премини, а за стоки со потекло од земјите-членки. Кога станува збор за интегрираното гранично управување, т.н „One stop-shop“, Србија и Северна Македонија до крајот на годината ќе ги решат сите постојни недостатоци за да истото биде целосно функционално, а Северна Македонија и Албанија ќе продолжат да работат на формирањето на „One stop-shop“ меѓу нивните земји. Заклучокот од работните средби предвидува формирање заедничка работна група до крајот на ноември, која ќе се занимава со усогласување на даночната политика на нашите три земји, соопштија од срспката влада. Во делот на заклучокот поврзан со соработката во областа на храната, фитосанитарната и ветеринарната инспекција, договорено е да се усогласи листата на растенија и растителните производи за кои е потребна фитосанитарна инспекција и издавање на фитосертификати, потоа размена на карантински листи со статус и размена на програмата за надзор над штетните организми, натамошна размена на сите мониторинзи и планови на службената контрола од областа на храната од растително, животинско и мешано потекло, препознавање и прифаќање на лабораториски анализи, преглед надвор од граничните премини, односно во најблиските царински испостави за растенија за кои е потребна фитосанитарна инспекција, унифицирање на листата на болести на животните, како и список на одобрени капацитети за храна од животинско потекло и добиточна храна, што подразбира размена на нотификација на објекти без контрола на терен, само со размена на планот за мониторинг. Вториот заклучок го потпишаа министерката за трговија, туризам и телекомуникации во Владата на Србија Татјана Матиќ, министерката за труд, вработување, ветерани и социјала Дарија Кисиќ Тепавчевиќ, министерката за финансии и економија во Владата на Албанија Делина Ибрахимај. и заменик министерот за земјоделство, шумарство и водостопанство во Северна Македонија Трајан Димковски. Со овој заклучок се предвидува потпишување на договор со кој ќе се овозможи слободен пристап до пазарот на труд на граѓаните на нашите три земји. Тие ќе можат слободно да престојуваат и работат на територијата на Србија, Албанија и Северна Македонија. Во Тирана, Албанија, на крајот на декември ќе се одржи самит на кој ќе се разговара за тоа што е во меѓувреме направено и кои се следните планови за искористување на целосниот потенцијал на оваа иницијатива, соопштија од српската Влада. Регоналната иницијатива „Отворен Балкан“ ја покренаа претседателот на Република Србија, Александар Вучиќ, премиерот на Албанија, Еди Рама и премиерот на Северна Македонија, Зоран Заев.

Српската Влада донесе нови мерки – угостителските објекти ќе работат до 18 часот, забрана за јавни собири

Тале Кристо — Sat, 21 Nov 2020 13:01:20 +0000

Српската Влада, поради влошување на состојбата со епидемијата на коронавирус, денеска донесе седум нови мерки кои ќе се применуваат од вторник, јави дописникот на МИА од Белград. Новите противепидемиски мерки се однесуваат на намалување на работното време до 18 часот за ресторани, кафулиња, барови, клубови, обложувалници и трговски центри; задолжителна употреба на опрема за лична заштита (носење заштитна маска) во затворен простор, како и на отворено во оние ситуации кога не може да се избегнат контакти; забрана за сите јавни собири со присуство на повеќе од пет лица. Исклучени од оваа мерка се работни организации, училишта, продавници, трговски центри и слични објекти, кои подлежат на пропишаниот лимит за бројот на присутни лица во секое време во однос на квадратурата на објектот (минимум четири квадратни метри по лице). Исто така треба да се овозможи работа од дома на сите вработени чиј што работен процес го дозволува тоа. Пропишана е строга контрола на обврската за носење заштитна маска во јавниот превоз, со ограничување на максималниот број патници во возилото до половина од декларираниот капацитет на возилото. Исто така ќе има и строга контрола на спроведувањето на домашната изолација, домашниот карантин (самоизолација), како и сите други анти-епидемиски мерки што се на сила. Српската Влада наведува дека мерките се ограничени на период од 10 дена и ќе бидат преиспитани во согласност со моменталната епидемиолошка состојба. „Владата исто така ја користи оваа можност уште еднаш да побара и силно да апелира до сите граѓани да се однесуваат одговорно кон себе и кон другите сограѓани. Сите донесени мерки се насочени исклучиво на зачувување на вашиот живот и здравје“, се наведува во соопштението.

Новата српска влада со три нови министерства, 6 нови лица, 50% жени, Стефановиќ и Вулин ги менуваат ресорите

Магдалена Андонова — Sun, 25 Oct 2020 12:27:34 +0000

Новата српска влада ќе има три нови министерства или вкупно 24 ресори, два до три министри без портфељ, 6 нови лица и околу 50 отсто од министрите ќе бидат жени, изјави денес мандатарот за состав на владата Ана Брнабиќ на прес конференција по седница на претседателството на Српската напредна странка (СНС). Како што јави допсиникот на МИА од Белград, од досегашните минстри, најголемо изнендаување е замената на ресорита на досегашниот министер за внатрешни работи Небојша Стефановиќ во министерството за одбрана, ресорот кој досега го водеше Александар Вулин, кој доаѓа на неговот место за прв човек на полицијата. И Зорана Михајловиќ го менува ресорот и ќе биде министер за рударство и енергетика. Министрите Синиша Мали, Јадранка Јоксимовиќ, Златибот Лончар, Бранислав Недимовиќ и Вања Удовичиќ ги задржуваат своите ресори-за финсии, евроинтеграции,здравство, земјоделство и спорт. За нов министер за надворешни работи предложен е досегашниот шеф на кабинетот на српскиот претседател, Никола Селаковиќ, а нови имиња се и Маја Гојковиќ, досегашниот прв собраниски спикер која ќе биде министер за култура, Маја Поповиќ, сегашен советник во БИА за министер за правда, Ирена Вујовиќ за министер за животна средина, а заменик директорката на Батут, д-р Дарија Кисиќ Тепавчевиќ, ќе го добие ресорот за труд, вработување, ветерани и социјални прашања. Нова личност во српската влада е и Гордана Чомиќ, поранешен пратеник и до изборите поранешен член на опозициската Демократска странка (ДС), која како непартиска личност го добива новото министерство за човекови и малцински права и социјален дијалог. Новото Министерство за семејна грижа и демографија ќе го води новинарот Ратко Дмитровиќ, а министер за грижа на селата ќе биде Милан Кркобабиќ. Како што изјави Брнабиќ, нови лица се и идната министерка за стопанство-Анѓелка Атанацковиќ, министерот за градежништво и сообраќај-Томислав Момировиќ, министерката за трговина и туризам-Татјан Матиќ, миниситерката за правда-Маја Поповиќ и министерката за државна управа-Марија Обрадовиќ. Лидерот на СНС, српскиот претседател Александар Вучиќ на прес конференцијата изјави дека нивниот коалционен партнер Српската социјалистичка партија (СПС), „поради внатрешни недорзбирања сеуште го нема одредено името за нов министер за образование и две до три имиња за министри без ресор“, додавајќи дека ова ќе биде „влада на политички континутет“. Тој како цели на новата влада ги означи борбата против мафијата, раст на економијата, Косовскиот дијалог-кој тој ќе го води, евроинтеграциите. -Србија ќе ги спроведе сите вредности кои ги имаат спроведено членките на ЕУ, но нема да спроведе нешто што ќе и биде наметнато да го направи, она што ниту една членка на ЕУ го нема направено, а се бара од Србија, кажа Вучиќ. Тој посочи дека една од задачите на новото министерство за човекови и малцински права и социјален дијалог е дијалогот не само со партиите, туку и со сите другу од граѓанскиот сектор, бидејќи, како што кажа „со гадови како што сум јас, како што ме нарекуваат, неќат да преговараат.“ (МИА)

Новата српска влада со три нови министерства- ресори за селото, човековите права и семејството

Тале Кристо — Fri, 23 Oct 2020 11:11:42 +0000

Во српскиот парламент стигнат е Предлог-закон за министерства, кој предвидува Владата на Србија да добие уште три нови ресори – Министерство за човекови и малцински права и социјален дијалог, Министерство за семејна грижа и демографија, како и Министерството за грижа на селата. Покрај новите, Владата на Србија ќе ги има веќе познати министерства: финансии, економија, земјоделство, шумарство и водостопанство, заштита на животната средина, градежништво, транспорт и инфраструктура, рударство и енергетика, трговија, туризам и телекомуникации. Во Владата ќе бидат и Министерството за правда, државната администрација и локалната самоуправа, Министерството за внатрешни работи, Министерството за одбрана, за надворешни работи, Министерството за европски интеграции, како и министерствата за образование, здравство, млади и спорт, култура и информирање, за труд, вработување и социјални работи. Предлог-законот го потпишаа 167 пратеници од пратеничката група „Александар Вучиќ за нашите деца“ на Српска напредна партија (СНС). Собранието за нацрт-законот ќе расправа по итна постапка во сабота, на 24 октомври, за да може да се избере новата Влада, што е најавено за среда, на 28 октомври 2020 година. Составот на новата Влада на Србија, треба да биде познат по седница на претседателството СНС, која како што е најавено ќе се одржи во недела на 25 октомври. Манадатар за составот на новата влада е досегашната премиерка Ана Брнабиќ, а вчера, досегашнито шеф на дипломатијата Ивица Дачиќ беше изгласан за претседател на највисокиот законодавен дом на Србија.

Српската Влада го измени протоколот за влез во државата за српските државјани

Тале Кристо — Thu, 14 May 2020 15:10:28 +0000

Епидемиологот и член на владиниот кризен штаб, д-р Предраг Кон, вчера ја дообјаснуваше потребната документација и процедура за туристите и сите оние кои сакаат да влезат во Србија. Владата на Република Србија на денешната седница донесе измена на одлуката за протокол за влез на српските државјани во Србија, во согласност со епидемиолошката состојба и заштитата на населението од заразна болест КОВИД-19, соопштија од владата. -Државјаните на Србија можат да влезат во земјата и да се движат без ограничувања со негативен PCR тест за коронавирус, не постар од 72 часа. Ако државјанинот на Србија влезе во земјата без направен тест, тој е должен да помине 14 дена во самоизолација. За време на периодот на самоизолација, има можност да направи тест во една од референтните лаборатории во Србија и доколку тестот е негативен, може да ја прекинат самоизолацијата, се наведува во владиното соопштенние. Како што јави дописникот на МИА од Белград, српската влада пред два дена ги донесе протоколите за влез и излез од Србија и за странските државјани, во кои се наведува дека можат да влезат во Република Србија под два услови – негативен ПЦР тест за коронавирус не постар од 72 часа и потврда издадена од комисија составена од претставници на Министерството за здравство, Министерството за градежништво, транспорт и инфраструктура, Министерството за надворешни работи и Министерството внатрешни работи. Овој сертификат може да се добие во српската амбасада или конзулат во земјата од која доаѓа странскиот државјанин, се наведува во соопштението.

Српската Влада донесе одлука за релаксирање на полицискиот час за првомајските празници

Тале Кристо — Thu, 30 Apr 2020 12:54:44 +0000

Српската Влада на денешната седница донесе измени на одлуката во врска со мерките за заштита на населението од вирусот Ковид-19 за време на првомајските празници, јави дописникот на МИА од Белград. Како што соопштија од Владата, забраната за движење ќе започне денеска во 18 часот и ќе трае до сабота, 2 мај, до 5 часот. На граѓаните на возраст над 65 години ќе им биде дозволено во петок да одат на прошетка двапати, во секое време од денот, не повеќе од шестотини метри од нивното место на живеење. Во сабота и недела, забраната за движење започнува во 18 часот и трае до 5 часот следниот ден. Тогаш најстарите граѓани ќе можат да одат на прошетка само еднаш според истите правила, за време на периодот на забрана на движење од 18 часот до 5 часот наутро. Од Владата потенцираат дека за време на викендот, за да се минимизираат социјалните контакти, сè уште ќе биде во сила забраната за собирање на повеќе од две лица на отворено и оваа мерка ќе биде строго контролирана од надлежните органи.