ссм – Kurir.mk

ССМ: Апелираме да се намалат функционеските плати за 78% со употреба на европско знаме и без консултации

Тале Кристо — Thu, 19 Oct 2023 09:39:21 +0000

Сојузот на синдикатите на Македонија апелираме до Владата да не бара изговори и да не го одложува намалувањето на функционерските плати за 78 отсто. - Апелираме до Владата, да не бара изговори за процесот со намалување на функционерските плати, туку да го примени веќе воспоставениот принцип како кога носи закони на штета на работниците и со злоупотреба на европското знаменце, без широки консултации, без дијалог и без да се грижат за одлуките на Уставниот суд како што тоа го направија за воведување на 72 часовната работна недела или пак сега кога сакаат да ја тргнат минималната плата од Законот за административни службеници и да достави до Парламентот предлог на Законот со кој ќе ги намалат функционерските плати за 78%, се посочува во апелот од ССМ. Според синдикатот, не е потребно многу време за да се направи измената на законот. ССМ веќе доставил предлог до пратениците кои, како што наведуваат, молчат три месеци, а истото решение го предлагаат и на Владата. Предлогот предвидува во Законот за плата и другите надоместоци на пратениците во Собранието на Република Македонија и другите избрани и именувани лица во Републиката, да се смени член 11 и да гласи: „Основица за пресметување на платата започнувајќи со исплатата на платата за месец септември 2023 година е минималната плата објавена во Службен весник за претходната година објавена од страна на Министерството за труд и социјална политика“. - Укажуваме дека работниците живеат од плата без право на храна и превоз, а добро е што конечно функционерите како Министерот за надворешни работи разбраа дека треба да се живее од плата, но нивните плати се колку 6 минимални плати, а имаат право на службени возила, обезбедување, ручеци, трошоци и други бенифиции, се вели во апелот од Сојузот на синдикатите на Македонија.

ССМ: Состојбата во „Еуроникел“ е алармантна, без работа може да останат 800 работници

Ивана Ефремовски — Wed, 18 Oct 2023 13:39:41 +0000

Сојузот на синдикатите на Македонија (ССМ) и Синдикатот на индустрија, енергетика и рударство (СИЕР) денеска изразија загриженост за состојбата во „Еуроникел“ Кавадарци. -Иднината на оваа компанија е неизвесна дотолку повеќе ако се знае дека во текот на вчерашниот ден генералниот директор на компанијата издал наредба за гаснење на печките. Ваквиот потег значи дека компанијата нема да работи и дека 800 вработени ќе останат без своите работни места, се вели во соопштението од ССМ и СИЕР. Оттаму велат дека работниците не се информирани од раководството за тоа што ќе се случува со компанијата што е спротивно на работничките права и меѓународните трудови стандарди. Работниците и денеска одржаа предупредувачки собир пред компанијата. (МИА)

Митревски оствари средба со високи ЕУ претставници во врска со неговата смена од претседател на ССМ

Тале Кристо — Sat, 07 Oct 2023 12:57:24 +0000

Претседателот на Синдикатот на шумарство и дрвна индустрија на Македонија во врска со неговата нелигитимна смена од претседател на ССМ за време на престојот во Брисел на покана на неколку Европски пратеници имаше и посебна средба со г-н Массимо Ромањоли, претседател на Партијата "Движење за слобода на Италија" и избран координатор на политичките претставници во ЕУ парламентот и др претставници во Европа како и со претставници на политичките партии од Италија . Воедно имаше средба и со адвокатската канцеларија на Лук Ван дер Хенде кои го отвораат случајот на нелигитимната смена на д-р Митревски пред ЕУ парламентот и пред комисијата за правда и пред претс на таа Комисија ,Дидиер Рендерс. На сите состаноци беше изразена подршка за Митревски и враќање на позицијата претседател на ССМ и констатирано драстично прекршување на правото,законите мегународните стандарди и Конвенции на МОТ и отстапување од владеењето на правото како фудаментален принцип за влез во ЕУ.

Протест на УПОЗ: Судската администрација бара зголемување на платите за 78 проценти

Ивона Петрова — Thu, 28 Sep 2023 10:58:26 +0000

Членови на Синдикатот на работниците од управата, правосудните ограни и здруженијата на граѓани (УПОЗ) од судската администрација од цела држава денеска протестираат во Скопје со барање за зголемување на платите за 78 проценти и враќање на додатоците на плата. Протестот почна пред зградата на Сојузот на синдикати на Македонија, продолжи со краткотрајни собири пред Собранието и Министерството за правда, по што учесниците се упатија пред Владата. По почетокот на протестот од Синдикатот информираа дека се повикани на средба во Министерството за правда во 14 часот. Упатија пораки за достоинствени плати и предупредија дека без нив не може да функционира судството. -Судската служба повторно е на улица. Пред почетокот на судската ферија само скопските судови излеговме на двочасовен протест и побаравме 78 проценти покачување на плата и враќање на додатоците на плата како што тоа го добија функционерите. Денеска членовите на Синдикатот на УПОЗ и други вработени кои не се членови од сите судови во државата се во Скопје. Овие луѓе што се тука собрани морале да се борат за секое право што го имаат добиено – во 2002 година 80 дена штрајк, во 2016 година – 60 дена штрајк, сега од 2.000 вработени во судовите 1 000 вработени се тука во Скопје и ако тоа не е доволна порака за надлежните да го слушнат нашиот глас не знам што ќе биде, изјави Трпе Деановски, претседател на Синдикатот на УПОЗ, на собирот пред ССМ. Деановски порача дека со исполнување на нивното барање за зголемување на платата за 78 проценти никој од вработените нема да ја надмине просечната плата, туку само ќе се доближи до неа. -Работата во судовите е тимска. Доколку еден вработен не си ја заврши работата судијата нема да може да донесе пресуда. Идната недела и колегите од државното правобранителство најавија штрајк. Колегите од обвинителствата вчера започнаа штрајк. Ако колегите од судовите, луѓето што се тука и тие започнат штрајк ќе се парализира целото правосудство. Мора да се разбере дека не може да се живее и не е фер еден во судовите да зема огромна плата, а нашите плати во однос на нивните да бидат во размер 1:6 до 1:7, изјави Деановски. Апелира на одлуки од Судскиот буџетски совет и Собранието за исполнување на поставените барања. -Имаме амандман со којшто бараме за сите вработени да се преиспита одлуката за прераспределба на средства во Буџетот да добијат по 78 отсто и да се вратат додатоците. Се уште не е на Комисија за финансирање и буџетот, гледаме секој ден дали ќе ја стават на дневен ред, меѓутоа ако тоа не се измени мислам дека ја знаеме пораката од овие луѓе, рече Деановски. Тој информираше дека поради штрајкот во обвинителство веќе се одложуваат случаите и се работат само итни и неодложни предмети. -Како што најавивме вчера, значи притвори, претреси и оние предмети каде што има жалби и треба да се запазат роковите, а се’ друго не се работи и нема да се работи. Денеска бевме на разговор со обвинителот за организиран криминал, денеска ќе имаат и тие состанок, поддршката ја имаме и од обвинителот за организиран криминал, од републичкиот обвинител, на ред се министрите и Владата да се заземат за нас, рече Деановски. Доколку се зголеми за 78 проценти, просечната плата на администрацијата од судовите ќе биде околу 24.000 денари. Членството на УПОЗ по денешниот протест дополнително ќе одлучи за идниот начин на делување, дали ќе штрајкуваат или ќе излегуваат пред судовите. Протестен марш денеска од пред Кривичен суд во Скопје до Министерството за финасии организираа и Независниот синдикат на судската администрација и Синдикатот на затворската полција, со истите за зголемување на платата и враќање на додатоците на плата.

ССМ: Без плата вработените во „Печатница“ која треба да ги печати учебниците и „Службен весник“

Ивона Петрова — Mon, 11 Sep 2023 13:37:40 +0000

Вработените во „Печатница Напредок принт“ и „Напредок 1“ кои преку „Просветно дело“ се ангажирани за издавање на дел од учебниците за средно образование за државните институции и кои подолг временски период го печатат „Службен весник“, веќе два месеца немаат добиено плата од работодавачот (управителот), со што се загрозува навременото печатење на учебниците, како и на „Службениот весник“, соопшти Сојузот на синдикатите на Македонија (ССМ). Според ССМ, со ова, освен што се нанесува штета кон вработените со неисплаќањето на платите, ќе се нанесе штета и на образовниот процес, како и на редовната објава на сите службени акти во Службениот весник. -Работниците веќе со години немаат навремено здравствено осигурување, а 80 отсто од нив се над 50 години старост и лекувањата ги плаќаат на приватно. Управителот на Печатниците, иако наплаќа државни пари, пари од граѓаните и од даноците, не исплаќа редовно плата ниту пак здравствено осигурување кон вработените, а што во изминатиот период по пријави на ССМ е констатирано брзо и ефикасно и од страна на Државниот инспекторат за труд, наведува ССМ. Сојузот бара државните институции веднаш да преземат мерки за да не се доведе во прашање печатењето на учебниците и на Службениот весник. -Работниците се подготвени да ги преземат сите чекори и преку протест и евентуален штрајк да го остварат ова егзистенцијално работничко право на плата и со тоа да си овозможат подостоинствен живот за себе и за своите семејства, а ние, заедно со Синдикатот ССДМ при ССМ ќе застанеме со работниците и ќе им ја дадеме целосната поддршка во борбата за остварување на нивните права од работен однос, велат од ССМ.

ССМ поднесе предлог до Собранието за намалување на платите на функционерите

Катерина Бојаџиева — Mon, 21 Aug 2023 11:31:52 +0000

Сојузот на синдикатите на Македонија поднесе предлог до Собранието за намалување на платите на функционерите за 78 отсто. Бараат итни измени на член 11 од Законот за плата и другите надоместоци на пратениците во Собранието и другите избрани и именувани лица во државата. - Предлагаме порастот на платите на вработените во јавниот сектор и на функционерите да биде на еднакви принципи без дискриминација согласно договорените принципи во Општиот колективен договор за јавен сектор и правилата за работниците да важат подеднакво за функционерите, па доколку Владата смета дека зголемување на платите од 10 проценти од септември 2023 година и утврдување на методологија за пресметка на платите по принципот просечна бруто плата и коефициент на сложеност на работното место но започнувајќи од 1 март 2025 година за работниците, истиот принцип функционерите треба да ги применат и за себе и затоа ССМ го дава овој предлог токму во таа насока на примена на еднакви принципи за платите на сите вработени во јавен сектор и избрани и именувани функционери без оглед дали тоа е на централно или на локално ниво, посочува ССМ. Оттаму наведуваат дека ССМ во изминатиот период укажувал до сите избрани и именувани функционери дека нелогично е драстично да се зголемат платите на функционерите особено во време кога работниците, граѓаните и пензионерите се соочени со справување со последиците од економската, здравствената и воената криза, зголемените трошоци за живот – инфлацијата и растот на синдикалната минимална кошница.

Минималните трошоци на едно семејство во јуни 48.543 денари

Ивона Петрова — Fri, 07 Jul 2023 11:48:25 +0000

На едно семејство во јуни за минимални месечни трошоци му биле потребни 48.543 денари, покажуваат податоците од синдикалната кошничка што на месечно ниво ја изработува Сојузот на синдикати на Македонија. Оттаму велат дека иако има благо намалување на вредноста на синдикалната кошничка во јуни, сепак трошоците за храна и пијалоци се зголемени. За храна и пијалоци во јуни биле потребни минимум 19.805 денари, а за покривање на режиските трошоци 13.416 денари. За превоз минимум на едно семејство му биле потребни 3.720 денари, а за хигиена 3.252 денари.

Трендафилов: Министерката за труд да стави потпис на решението за нов претседател на ССМ

Ивона Петрова — Wed, 05 Jul 2023 09:23:53 +0000

Новоизбраниот претседател на Сојузот на синдикати на Македонија, Слободан Трендафилов денеска упати апел до министерката за труд и социјална политика да стави потпис на решението со кое тој треба да биде впишан во Централниот регистар како нов претседател на ССМ. - Сакам да упатам апел до министерката за труд и социјална политика да не се меша во внатрешните работи на синдикатите. Конгресот на ССМ во петокот имаше седница на која едногласно бев избран за претседател на ССМ. Согласно Статусот на ССМ, Конгресот е највисокото тело кое разрешува и именува претседатели на ССМ. Тоа вчера беше потврдено и од претставниците на Меѓународната организација на трудот. За жал, Министерството за труд и социјална политика и министерката се ставаат над законите и над конвенциите на МОТ и им треба време да размислат кој да биде претседател на ССМ, изјави Трендафилов, одговарајќи на новинарско прашање по состанокот во Министерството за финансии. Министерката, како што посочи Трендафилов, треба да креира политики во Министерството и да ги почитува легитимните одлуки на органите и телата на синдикатите без оглед на тоа дали се работи КСС, ССМ, КСОМ. - Апелирам до министерката тоа да го направи уште денес и да биде направена промената во Централниот регистар затоа што сеуште стои дека претседател ни е Дарко Димовски кој прерано го загуби животот. Се надеваме дека Министерството за труд и социјална политика нема да биде единствениот виновник да не бидат исплатени платите на вработените во ССМ во услови кога преговараме за зголемување на платите во јавниот сектор, рече Трендафилов. Доколку биде потребно, додаде Трендафилов, уште еднаш ќе го поднесат решението во Министерството и таму уште еднаш ќе го направат изборот, но тогаш и ќе побараат оставка од министерката. Трендафилов беше избран за нов претседател на ССМ во петокот на Конгрес што се одржа во Скопје. Тој беше единствен кандидат за претседател. Изборот за нов претседател на ССМ уследи откако по кратко боледување на 45-годишна возраст почина дотогашниот претседател Дарко Димовски.

Трендафилов за ТВ 24: Не може да дозволиме функционерите на 78% зголемени плати да добијат одреден процент на зголемување во септември

Ивана Ефремовски — Tue, 04 Jul 2023 20:34:46 +0000

Претседателот на ССМ, Слободан Трендафилов во емисијата 24 Отворено истакна дека утре на барање на министерот за финансии треба да се одржи состанок на ниво министри од влада и претседатели на сојузи и конфедерации на кои ќе се разговара за надминување на транзицискиот период. -Ние на последната седница на ЕСС изнесовме дека во името на солидарноста, функционерите треба да покажат добар чекор и да си ги вратат платите пред одлуката на Уставниот суд. Не дека ние ги сакаме нивните плати да ги земем, туку сакаме и ние да ги земаме истите плати. Во септември доколку се договориме за пораст или усогласување на платите во јавниот сектор, да се однесува на вработениот на највисоко работно место и на претседателот. Ние како синдикални претставници, не може да дозволиме функционерите на 78% зголемени плати да добијат одреден процент на зголемување во септември, рече Трендафилов.

Слободан Трендафилов избран за претседател на ССМ

Ивона Петрова — Fri, 30 Jun 2023 12:18:26 +0000

Слободан Трендафилов е новиот претседател на Сојузот на синдикати на Македонија. Тој е избран по денешниот Конгрес што се одржа во Скопје. Трендафилов беше единствен кандидат за претседател на ССМ. Конгресот започна со едноминутно молчење во знак на почит кон прерано починатиот претседател на ССМ Дарко Димовски и неговите заложби за синдикалното делување. Димовски ја извршуваше функцијата претседател на ССМ од декември 2017 година, а претходно беше претседател на Синдикатот на работниците од угостителството, туризмот, комунално- станбеното стопанство, занаетчиството и заштитните друштва (СУТКОЗ).