стеф блок – Kurir.mk

Холандскиот министер Блок во Македонија

Ивона Петрова — Wed, 12 Sep 2018 05:55:04 +0000

Во официјална посета на Македонија денеска ќе престојува министерот за надворешни работи на Кралството Холандија, Стеф Блок. Тој ќе се сретне со шефот на македонската дипломатија Никола Димитров и со вицепремиерот за европски прашања Бујар Османи. На средбата со министерот Димитров се очекува да стане збор за актуелните политички состојби во Македонија, подготвителните активности за референдумот, како и за реформската ЕУ и НАТО агенда. По средбата планирани се изјави на двајцата министри. - Ова е четврта билатерална средба на министрите за надворешни работи на Република Македонија и Кралството Холандија за период од 15 месеци што претставува потврда за зголемениот интензитет на политичкиот дијалог меѓу двете земји, наведуваат од македонското МНР. МИА

Блок: Видовме напредок во Македонија, но не доволно, сакаме да видиме резултати во борбата против корупцијата и владеењето на правото

Дарко Андоновски — Wed, 27 Jun 2018 17:19:15 +0000

Холандскиот министер за надворешни работи Стеф Блок вчера пред состанокот на Советот за општи работи на ЕУ во Луксембург изјави дека тие виделе напредок во Македонија и Албанија но не доволно. -Ние видовме напредок во Албанија и Република Македонија, но не доволно, сакаме да видиме резултати во борбата против корупцијата и владеењето на правото, рече тој.

Димитров-Блок: Постојан напредок и реформи за македонските евроинтеграции

Матеја Петровски — Tue, 15 May 2018 17:37:51 +0000

Македонскиот министер за надворешни работи Никола Димитров денеска во Хаг се сретна со неговиот холандски колега Стеф Блок, кој, како што соопшти македонското МНР, го поздравил периодот на стабилност во Македонија и ја нагласил потребата од постојан напредок. Димитров, кој од вчера е во посета на Холандија, ги образложил чекорите преземени од Владата на Македонија на внатрешен и надворешен план, како и нивната заемна поврзаност. Министерот Димитров нагласил дека ЕУ интеграцијата е најдобрата трансформациска алатка во поддршка на реформскиот процес. - Целосно го прифаќаме холандскиот „строг и фер“ пристап кон ЕУ интеграцискиот процес. Тоа е формула која на Република Македонија и' е потребна поради трансформација на државата во стабилна европска демократија, навел Димитров. Шефот на македонската дипломатија се обратил и пред членовите на Комисијата за европски прашања во Парламентот на Холандија. Пред холандските пратеници, Димитров нагласил дека намерата не е да се одбегнуваат проблеми, туку да се решаваат. - „Во однос на ЕУ интеграцијата, поважни од прашањето „Кога?" се прашањата „Како?" и „Што?" во остварување на реформски напредок.”, нагласил Димитров. Генералниот секретар во Министерството за одбрана, Вим Хертс, пак на средба со Димитров упатил пораки на поддршка за НАТО членството на Република Македонија. Димитров се сретнал и со Мартијн Лукасен, советникот за ЕУ прашања на премиерот на Холандија, како и со Матијс ван дер Плас, генерален директор за европска соработка во холандското МНР. (Миа

Стеф Блок: Проблемот со името може да се реши

Ивона Петрова — Fri, 27 Apr 2018 17:17:15 +0000

Холандскиот министер за надворешни работи Стеф Блок денеска, за дописничката на МИА од Брисел, изјави дека проблемот со името може да биде решен за да се почне со процедурата за членство на Македонија во НАТО и додаде дека тој доаѓа од земја која има повеќе имиња. - Грција и Македонија треба да се договорат за прашањето за името. Кога ќе биде решено, и се разбира Македонија треба да ги исполнува критериумите за НАТО, можеме да почнеме со процедурата за придружување. Се надевам дека има придвижување од двете страни за решавањето на името. Според мене, проблем за име може да биде решен. Живеам во земја што се вика Холандија, Недерланд или Пеи Бас, Пајси Баси и многу сум среќен што живеам во земја со повеќе имиња. Тоа сите го признаваат, изјави Блок за МИА. Во Брисел денеска се одржа состанок на шефовите на дипломатиите на НАТО. По средбата генералниот секретар на НАТО Јенс Столтенберг изјави дека НАТО останува на политиката на отворени врати. На состанокот се разговарало за Босна и Херцеговина, Македонија и Украина. - За може да се стане членка потребно е една земја да побара членство и 29 сојузници тоа да го одобрат. Никој друг нема право да побара вето. Столтенберг изјави, дека денеска сојузниците зборувале и за Русија и се согласиле дека НАТО политиката, комбинирана од силно разубедување и одбрана заедно со дијалог, е исправна. - Седумдесет години НАТО ги штити сојузниците. Истовремено, гледаме се повеќе обиди за заплашување и дестаблизација. Вклучително и сајбер напади, обиди да се нарушат нашите демократски институции, дезинформација и пропаганда, изјави Столтенберг. МИА