Стефан Марковски – Kurir.mk

Избор поезија од Стефан Марковски на книжевен фестивал во Полска

Ивана Ефремовски — Tue, 18 Apr 2023 06:36:51 +0000

Избор поезија од современиот македонски поет, романсиер и драматург Стефан Марковски ќе биде претставен во рамки на фестивалот „Пронајдени во преводот“ во Гдањск, Полска. Изборот насловен „Prędkość snu – A Dream’s Pace – Брзина на сонот“ е објавен на полски, англиски и македонски јазик, а преводот на полски јазик е направен од Зофиа Дембовска. Изборот на поезијата на Марковски ќе го промовира полската поетеса Хана Лозовска, а во рамки на истиот настан што ќе се одржи на 21 април во 13:00 часот во Европскиот центар за солидарност ќе биде промовиран и избор поезија и од современата италијанска поетеса Лаура Капра. Фестивалот „Пронајдени во преводот“ е уникатен книжевен фестивал посветен пред се на книжевно-преведувачката дејност. Годинава фестивалот ќе се одржи од 20 до 22 април. Наградата за превод „Тадеуш Бој-Желењски“ (Tadeusz Boy-Żeleński Translation Award) која во рамки на фестивалот ја доделува градоначалникот на Гдањск е важно признание за уметноста на литературниот превод и се доделува на секои две години на живи преведувачи од странска литература на полски јазик. Фестивалот е организиран од страна на Градскиот културен институт (Instytut Kultury Miejskiej) и градот Гдањск. На овој фестивал свое учество зеле некои од најреномираните светски автори и добитници на Нобеловата награда за литература, како Адам Загајевски, Олга Токарчук, Вислав Мишливски, Анджеј Стасјук и други. (МИА)

Марковски, Христовска и Ќушкоски лауреати на наградата „Скрипт фест 2022“

Ивана Ефремовски — Fri, 29 Apr 2022 07:26:55 +0000

Стефан Марковски, Оливера Христовска и Анастас Ќушкоски се лауреати на наградата за најдобри сценарија „Скрипт фест 2022“. На Конкурсот за филмски сценарија, што го распиша Меѓународниот фестивал на филмски сценарија „Скрипт фест“, свои сценарија испратија авторите Тихомир Диковски, Владо Јаневски, Теа Павлова, Леонид Велковски, Игор Поп Трајков, Моника Рујаноска, Христијан Крстевски, Анастас Ќушкоски, Андриана Ангелова, Оливера Христовска, Иво Митев – Жиле, Лука Јованоски, Андреј Ристиќ, Стефан Марковски, Кирил Максимоски, Изабела Јакимова, Зоран Митровиќ, Ангела Бошкоска и Катерина Николовска. Годинава селектор на сценаријата беше проф.м-р Гоце Ристовски, универзитетски професор и декан на Интернационалниот универзитет Еуропа Прима од Скопје, кој ги избра авторите на најдобрите сценарија. Фестивалот на филмските сценарија ќе се одржи на 16 мај во Домот на културата „Кочо Рацин“ во Скопје, а признанијата „Скрипт фест 2022“ ќе ги врачи селекторот Гоце Ристовски. Годинашни организатори на фестивалот „Скрипт фест“ се Фондацијата за културна и научна афирмација и презентација Македонија Презент – Скопје и Домот на културата Кочо Рацин – Скопје. (МИА)

Промоција на романот „Анатомија на бумбарот” од Стефан Марковски

Ивона Петрова — Thu, 23 Dec 2021 06:39:55 +0000

Во Домот на културата „Кочо Рацин“ – Скопје вечер од 19 часот ќе биде промовиран романот „Анатомија на бумбарот” од Стефан Марковски. Романот беше објавен на англиски јазик и достапен во електронска и печатена верзија на платформата „Амазон” каде, како што соопшти авторот, годинава достигна и рекордно прво место во категоријата Источноевропска литература за Киндл-изданијата. Македонското издание на романот го објави „Паблишер“. Александар Прокопиев во поговорот наведува дека романот „во наративот прогресира една примамлива, куриозитетна, откачена, убаво и сочно раскажана приказна раслоена во делови кои во себе носат и гнев и пркос, од една, и хумор и гротеска од друга страна“. Приказната е раскажана од две перспективи – машка и женска и, според авторот, таа е „фино испреплетена мозаична сложувалка во која на крајот ќе се состават сите делчиња“.