Стефче Алушовски – Kurir.mk

Алушовски уште три години ќе биде тренер на исландската екипа Тор

Бошко Тасиќ — Wed, 04 May 2022 15:13:48 +0000

Македонскиот ракометен тренер Стевче Алушовски одлучи да ја продолжи соработката со екипата на Тор Акурејри на уште три години. Нашиот стратег ќе остане на Исланд иако не успеа да го одведе клубот преку плеј-офот во елитата. Претходно Алушовски како тренер ги водеше тимовите на Вардар, Е. Работник и Пелистер. Како играч настапуваше за РК Пелистер, Јафа Промет, Вардар Ватростална и Металург.

Стевче Алушовски: Oвој Вардар во момент е многу поквалитетен од тоа што игравме на тој меч во септември.

Бошко Тасиќ — Tue, 30 Mar 2021 18:22:24 +0000

Тренерот на актуелниот ракометен шампион Вардар 1961, Стевче Алушовски ветува дека екипата ќе го даде максимумот во првите 60 минути против Веспрем во рамките на ракометната ЛШ

– Прв натпревар од осминафиналето во Лигата на шампионите против Веспрем. Имаме уште два тренинзи да ги одработиме до почетокот на натпреварот. Ги анализираме ривалите, Веспрем е екипа која оваа година играше на Фајнал-фор во ЛШ, ја има фаворитската улога, но тоа не значи дека ние сме без шанси и дека лесно ќе се предадеме на овој двомеч.
Ние во финалето на СЕХА лигата оваа година игравме против Веспрем, таму останавме должни на нашите симпатизери за она што значи добар натпревар. Практично го загубивме мечот некаде во 40 минута. Мислам дека овој Вардар во овој момент е многу поквалитетен и повоигран од тоа што игравме на тој дуел во септември. Ќе го дадеме максимумот доколку биде тоа доволно да се радуваме, а јас се надевам дека ќе биде доволно, зошто да не сега и во првиот натпревар, како и на реваншот. Тоа што играме пред празни трибини, ни на првиот натпревар, ниту на возвратниот, не значи многу. Ниту е предност, ниту е слабост тоа што играме прв меч на домашен терен.
Имавме еден добар континуитет во формата, одигравме еден добар натпревар со Мотор, како и против Еурофарм Пелистер, два тешки меча за нас. И вчера во еден ден имавме два натпревари во Купот на Македонија, сето тоа ја држи екипата во натпреварувачки ритам. Мислам дека сме доволно подготвени да одговориме на предизвикот Веспрем – потенцира Алушовски.

Алушовски: Она што го покажавме во последните пет минути е за респект,тоа е нашиот победнички карактер

Бошко Тасиќ — Wed, 24 Feb 2021 20:38:00 +0000

Тренерот РК Вардар Стевче Алушовски им честита на своите ракометари за борбата и потенцира дека карактерот на Вардар е она во последните пет минути . „Најпрво, би сакал да му честитам на Елверум. Моите момци дојдоа до втора победа во ЛШ. Мислам дека бевме поприсебни во клучните моменти, можеби и малку поискусни од ракометарите на Елверум во вакви моменти и можеби и малку посреќни. Отворивме многу лошо, ако не се лажам со 11 промашени чисти шутеви во првото полувреме, нивниот голман беше расположен и на паузата имавме минус три. Го одигравме второто полувреме до последниот атом и честитки за сите играчи. Она што го покажавме во последните пет минути е за респект. Тоа е нашиот победнички карактер“, изјави Алушовски. Вардар според распоредот во следното коло треба да биде домаќин на Мешков Брест (4 март).

Алушовски: Направивме многу технички грешки и глупави исклучувања

Бошко Тасиќ — Sun, 21 Feb 2021 17:24:45 +0000

Тренерот на македонскиот ракометен шампион Вардар Стевче Алушовски ,после мечот против Елверум истакна дека промашените клучни шутеви скапо го чинеа македонскиот тим, а исто така во тој период од играта се направени непотребни исклучувања. „После секој натпревар од прилика доаѓаме на истото дека промашивме многу клучни шутеви, но што е тука е. Знаевме дека Елверум е тим што трча и што има добра транзиција, но во првиот дел не го правевме тоа добро и примивме 21 гол, што за меч во ЛШ е недопустливо. Во второто полувреме благодарение на голманот Марко Кизиќ успеавме да направиме разлика од четири гола, меѓутоа направивме премногу технички грешки и глупави исклучувања. Немавме решение за нивната игра 5-1 со Абало напред, нашите бекови беа престатични. Нашите глупави исклучувања не донесоа во ситуација да го загубиме резултатот. Честитки на Елверум за бодот, се надевам дека во среда ќе биде поинаку“, кажа Алушовски. Вардар и Елверум ги чека втор натпревар, кој исто така ќе се одигра во Скопје. Дуелот е закажан за во среда

Алушовски : Го одигравме можеби најдобриот меч сезонава, но зицерите не чинеа пораз

Бошко Тасиќ — Sun, 14 Feb 2021 19:04:25 +0000

По натпреварот помеѓу Вардар и ПИК Сегед тренерот на домашните Стевче Алушовски истакна дека промашените зицери многу го чинеле домаќинот. „Најпрво, сакам да му честитам на тимот на ПИК Сегед за двата важни бода, овие бодови беа важни и за нас. Сакам да им честитам на играчите кои дадоа се од себе. Го одигравме можеби најдобриот меч оваа сезона. Јас сум малку тажен затоа што загубивме, ама сум среќен затоа што одиме во една добра насока со тимот. Се трудиме да бидеме секогаш фокусирани и спремни на сите предизвици. Сегед е една извонредна екипа која секоја година се бори за Ф4. Промашивме во клучните моменти ако не се лажам три пенали и една или две контри и овој натпревар можеше да заврши во наша корист. Меѓутоа што е, тука е, честитки на Сегед во следните натпревари“, изјави Алушовски.

Алушовски: Флензбург го победивме, но секој меч во ЛШ е приказна за себе

Магдалена Андонова — Wed, 21 Oct 2020 14:14:47 +0000

Утре Вардар ќе го игра натпреварот против Порто во Лигата на шампионите, а пред овој меч за медиумите зборуваше и тренерот Стефче Алушовски. -Атмосферата е на високо ниво, убаво е кога ќе победите тим како Флензбург. Работевме и го анализиравме Порто, тоа е екипа која е во добра форма и посебно добро знае да одигра во играта 7 на 6. Ако бидеме подготвени имаме големи шанси одново да славиме во Скопје. На претходниот натпревар победивме, но секој натпревар е приказна за себе. Ние ќе бидеме максимално претпазливи, момците се фокусирани, останува да се договориме што како треба и да излеземе да се обидеме да дојдеме до втора побеа. Лесно нема да биде, но ова е Лига на шампиони и секој меч е тежок, изјави Алушовски. Натпреварот помеѓу Вардар и Порто се игра утре во 20:45 часот.

Алушовски: Вардар 1961 како европски првак оди со цел да го освои турнирот во Струга

Магдалена Андонова — Wed, 12 Aug 2020 13:57:09 +0000

Тренерот на Вардар 1961, Стефче Алушовски пред турнирот во Струга на кој тимот ќе настапи по пауза од шест години изјави дека е презадоволен од работната атмосфера. – Се работеше најмногу на физичка подготовка, а попладне и на тактика. Ни претстои уште доста за да дојдеме до посакуваното ниво за Лига на шампионите. Струга е прв турнир на кој ќе провериме се што работевме изминатиот период. Тука мислам на она што го вежбавме. Сите играчи ќе добијат шанса. Вардар 1961 како европски првак оди со цел да го освои турнирот во Струга. Не можам да кажам дека резултатот не е важен, но во преден план е формата, вели Алушовски. Последен пат Вардар 1961 има триумфирано во Струга во 2007 година. – Не дека одиме да се проверуваме само. Нормално е дека одиме да победиме. Бројките се само бројки. Вардар 1961 не учествувал одамна на турнирот. Сега сме повторно тука да играме и да се надигруваме, вели Алушовски. Ривали во Струга ќе ни бидат Охрид, Еурпфарм Пелистер 2 и Бутел. – Екипата на Охрид од лани ја знам. Се работи за квалитетен тим што не е за потценување. Еурофарм Пелистер 2 е млад тим со неколку искусни играчи кои имаа настапувно за посериозни екипи. Бутел е тим што е во врвот на домашното првенство. Овој момент е добро да играме вакви натпревари. Ние сме фаворити, но никого не потценуваме. Ова ќе биде вистинска проверка на се што сме работеле, вели Алушовски. Вардар 1961 сите три натпреварувачки денови своите мечеви ги игра во вечерен термин од 21,15 часот. Во четврток игра со Охрид, во петок со Еурофарм Пелистер 2 и во сабота со Бутел. Финалните средби се играат во недела. (MИА)