стевчо јакимовски – Kurir.mk

Советникот од град Скопје Милетиќ со низа прашања до градоначалникот на Карпош Стевчо Јакимовски

Дарко Андоновски — Wed, 01 Nov 2023 11:35:29 +0000

Советникот од градот Скопје Петар Милетиќ преку статус на Фејсбук постатува неколку директни прашања до градоначалникот на општина Карпош, Стевчо Јакимовски. „Почитувани сограѓани и пријатели, денес, по подолго време им се обраќам на истражните органи во Република Македонија, а со намера да се проверат неколку ситуации. Ќе се обидам да му поставам неколку прашам на Стевчо Јакимовски за да ги појасни фактите: o Дали е точно дека менувачницата на Стевчо Јакимовски во Сити мол со која работи неговата втора сопруга, во неговиот мандат од 2013. до 2017 година имаше огромен обрт на средства и добивка, а од 2017. до 2021 година, добивката му беше евидентно намалена. Дали е точно дека од 2021. па до денес (01.11.2023.) е повторно зголемена? Зошто е тоа така и дали не станува збор за перење пари или корупција? o Дали Стевчо Јакимовски со дадената дозвола за Сити мол (во својство на Градоначалник) имал договор со една фирма на добро познат бизнисмен дека во самиот мол ќе има само една менувацница, а која ќе биде резервирана за неговата сопруга, покриена со долгогодишен договор? Дали е можеби веќе во нивна сопственост? Ќе имаат ли храброст неговите сегашни коалициски партнери (СДСМ и ДУИ) да го проверат тоа? o Дали во моментов има предмет во општина Карпош за кој Министерството за транспорт и врски му поништува две решенија, а се однесуваат на нелегално дооформено земјиште? Дали во тој предмет му се одземени правата на еден сопственик и дали истиот инвеститор го уценува и бара противуслуга за да го реши предметот, а кој според законите на Р.М е кристално чист. И дали на тоа исто земјиште има запишано негови луѓе? o Дали Стевчо Јакимовски во неговите јавни претпријатија во Град Скопје има именувано заменик директор кој е осуден за местење тендери? Дали Никола Николовски звани Нита беше дел од комисијата во општина Карпош задолжен за исправноста на тендерската документација? Дали добро ме служи помнењето дека заменикот директор го призна делото и беше осуден на една година условно?“, стои во неговиот пост на Фејсбук.

ВМРО-ДПМНЕ: Ако е толку убеден Јакимовски во тоа што го збори следниот пат наместо во прашална форма нека оди во потврдна форма за да може да се докаже вистината пред судовите

Катерина Бојаџиева — Tue, 04 Jul 2023 11:20:36 +0000

Ја разбираме задачата на Стевчо Јакимовски која пред се е мотивирана од концесиите кон ДУИ и кон таткото и синот Ковачевски и сега има мисија да шири невистини, измислици и лаги кон лидерот на ВМРО-ДПМНЕ Христијан Мицкоски, велат од ВМРО-ДПМНЕ. -Тоа што го збори Стевчо Јакимовски е тоа што му наредил тандемот Ковачевски. Тоа е и причината зошто Јакимовски после 6 години власт на СДС и ДУИ и украдени милијарди збори за ВМРО-ДПМНЕ, а не за она што е изворот на проблемите во државата. Ако е толку убеден Јакимовски во тоа што го збори следниот пат наместо во прашална форма нека оди во потврдна форма за да може да се докаже вистината пред судовите. Навистина е срамен крајот на Јакимовски кој на тие години одлучи да се спушти толку ниско да биде измеќар на синот и таткото Ковачевски, што секако е жално за гледање, стои во партиската реакција.

ФОТО: Јакимовски свечено пушти во употреба џамија во Карпош

Катерина Бојаџиева — Thu, 15 Dec 2022 22:27:06 +0000

Изет Меџити, пратеник од редовите на ДУИ и поранешен градоначалник на Чаир, на својот Фејсбук профил објави информација за свеченото отворање на новата џамија во скопско Нерези. На свеченото отворање, покрај градоначалникот на Општина Сарај Блерим Беџети, присуствувал и градоначалникот на Општина Карпош, Стевчо Јакимовски. На настанот присуствувале и високи лица од Исламската верска заедница, како и претставници на црквата Свети Пантелејмон. -Ја поздравувам конструктивноста што во овој процес ја покажа градоначалникот на општина Карпош, Стевче Јакимовски. За високата меѓуверска толеранција и соживот меѓу заедниците во нашиот град сведочи и присуството на претставници на црквата Свети Пантелејмон, меѓудругото, напиша Меџити на Фејсбук.

Арсовска и Јакимовски на средба со Ковачевски во владата, ќе има ли нова коалиција?

Магдалена Андонова — Thu, 24 Nov 2022 12:04:35 +0000

Премиерот и лидер на СДСМ, Димитар Ковачевски, вчера попладне имал средба во владата со скопскиот градоначалник Данела Арсовска и со градоначалникот на општина Карпош и претседател на ГРОМ, Стевчо Јакимовски, дознава НетПрес. Целиот текст може да го прочитате ТУКА.

Деманти и најави за тужби кон Стевчо Јакимовски

Катерина Бојаџиева — Thu, 03 Nov 2022 18:11:42 +0000

Градоначалникот на општина Карпош, Стевчо Јакимовски, во емисија на еден електронски медиум, излезе со низа обвинувања кон лидерот на ВМРО-ДПМНЕ Христијан Мицкоски, кој навдоно му упатувал закани, а вмеша и повеќе советници на ВМРО-ДПМНЕ. Истите тие советници го демантираат Јакимовски и најавуваат тужби. Прво се огласи Живко Белчев: „Со длабоко жалење за нивото на комуникација можам да констатирам дека претседателот на ГРОМ, Стевче Јакимовски со цел да привлече медиумско внимание се служи со креирани невистинити приказни во кои со жалење можам да констатирам дека го злоупотребува моето име“. -Во емисија на еден електронски медиум, Стевче Јакимовски вчера раскажува целосно измислен разговор кој јас сум го водел со Советникот од општина Илинден. Целосно го демантирам она што го кажува Стевче Јакимовски. Со Советникот од општина Илинден освен краток пријателски разговор на средбата на обуката во Хилтон ништо друго не беше разговарано. А кога се однесува на делот на апсење и носење со лисици, можам само да го потсетам Стевче Јакимовски кога власта го апсеше со финансиска полиција во доцните часови на таа ноќ јас бев еден од десетината луѓе кои стоеа пред зградата на Финансиската полиција за да му дадат поддршка. На крај сакам и јавно како што тоа го сторив и во личната комуникација со Јакимовски, да го замолам да не го валка моето име во јавноста. Ниту го споменувам, ниту сакам да ме споменува, напиша Белчев на Фејсбук. Советникот од ВМРО-ДПМНЕ во општина Илинден, Горан Гочевски се оградува дека имало какви било муабети. „Почитувани, во понеделникот бев присутен на обука организирана од УСАИД заедно со повеќе колеги советници од повеќе општини. Таму се видов и со колегата Живко Белчев од Гази Баба со кој имамвме само едно куртоазно поздравување. Сакам да потенцирам дека со него на тој настан воопшто не сум разговарал наполитички теми и не се спомнати ниту Христијан Мицкоски ниту пак Стевче Јакимовски. Ова го пишувам само да се оградам од злоупотреба на моето име во разни политички пресметки“, истакнува Гочевски. Демант и најава за тужба, Јакимовски доби и од Илија Тозија. „Народот вика “уценет човек жив ѓавол”, така некако изгледа и реакцијата на Стевчо Јакимовски и неговите континуирани лаги врз мене, за наводен рекет, притисоци, уцени и закани. Демек некој ќе поверува дека Стевчо Јакимовски “под уцена и присила” ги изгради сите оние згради низ Карпош и уште десетина нови кои ги планира. Не сакам да ги коментирам и оние лични навреди, фрустрирани реакции на Јакимовски и неговата дружина против мене, што само ја покажува состојбата во која тие се наоѓаат и интересите кои седат позади тоа. Одговорно тврдам дека немам никаква врска со бизнис градежните планови на Јакимовски, ниту пак сум учествувал во било што. За таквите лаги и клевети барам јавно извинување во рок од 24 часа или пак спротивно истото ќе мора да го докаже Јакимовски пред суд“, вели Илија Тозија.

Јакимовска Панчевска: Јакимовски без закуп, дал простории во 8 од 10 училишта на училиште за странски јазици, сопственост на кандидат за советник од ГРОМ и врски со СДС

Магдалена Андонова — Fri, 07 Oct 2022 08:00:17 +0000

Продолжува самоволието и непочитувањето на законите, процедурите и одлуките на Советот, од страна на градоначалникот Стевче Јакимовски и СДСМ во Карпош. Го прашуваме градоначалникот дали последното од низа е давањето на користење на училишен простор и училници за дополнителни часови на правно лице без оглас за издавање на просторот, без никаква постапка и без одлука и одобрување од страна на Советот во Општина Карпош. Училиште за странски јазици отпочнало со предавање и вршење на дејноста во училиштето со знаење и согласност од страна на градоначалникот и без важечки договор за закуп, изјави денеска за медиумите, Адријана Јакимовска Панчевска, советник од ВМРО-ДПМНЕ во Општина Карпош. Таа праша дали и покрај големиот интерес за закуп на просториите изразен од страна на повеќе фирми и здруженија, просториите во 8 од вкупно 10 основни училишта во Карпош веќе се дадени на користење на фирма чија сопственичка беше кандидат за советник од ГРОМ во 2017 година и истата имаше тесни врски и соработка со СДСМ во изминатите 5 години во Општина Карпош, користејќи ги училниците, наплатувајќи ги услугите од родителите и остварувајќи профит. - Воедно би сакале да потенцираме дека непрофитните спортски клубови кои беа досегашни корисници на салите во училиштата беа отстранети и оставени да се снаоѓаат и молат за простор како знаат и умеат. Најголемиот дел од децата во Карпош што тренираат во отстранетите клубови сега се приморани секојдневно да патуваат на тренинг во сали во другата страна на крајот од градот. Би сакале јасно да им посочиме на директорите на училиштата интересот од договорите, соработката, самоволието се кај градоначалникот Јакимовски и СДСМ, но кај директорите останува кривичната одговорност од незаконското давање на просторот за користење. Родителите, пак чии деца ги посетуваат дополнителните часови во училиштата би сакале да ги информираме дека приватните училишта незаконски неосновано го користат просторот и затоа нема потреба и не треба да ги плаќаат уплатниците што им се доставени од страна на узурпаторот. Граѓаните би сакале да ги увериме дека ВМРО-ДПМНЕ и Коалицијата секогаш ќе ги штити нивните интереси. ВМРО-ДПМНЕ и Коалицијата секогаш инсистира на почитувањето на законските норми и акти. Советничката група на ВМРО-ДПМНЕ и Коалицијата ќе гласа за одобрување на предлог одлуката за начинот и условите за давање на согласност на училишен простор и спроведување на други активности во врска со основните општински училишта на територија на Карпош кога точката ќе биде разгледувана на седница на Советот, појасни таа. Јакимовска Панчевска додаде дека советничката група ќе опстои по секоја цена на ставот дека за секое самоволие, непочитување на процедурите и законите треба да се сноси одговорност.

Мицкоски: Со Јакимовски од поодамна не сум во комуникација, го охрабрувам наводните индиции да ги пријави во соодветните институции и му посакувам среќа во политичката кариера

Тале Кристо — Wed, 08 Jun 2022 13:55:19 +0000

При денешната посета на Охрид претседателот на ВМРО-ДПМНЕ, проф. д-р. Христијан Мицкоски одговарајќи на новинарско прашање во однос на напуштањето на коалицијата со ВМРО-ДПМНЕ на Стевчо Јакимовски и обвинувањата за наводни закани и рекетирање истакна дека со Јакимовски од поодамна не е во комуникација, ги отфрли навредите и обвинувањата и посочи доколку има такви индиции, истите да ги пријави во соодветна институција и му посака среќа во понатамошната политичка кариера. „Па јас со господинот Јакимовски немам комуникација уште од пред нова година, тогаш еднаш или два пати се видовме да му честитам на тоа што беше избран за градоначалник, ги отфрлам овие навреди, вчудоневиден сум, претпоставувам ако има такви индиции треба да соработува со органите на прогонот и да го пријави, го охрабрувам да го пријави затоа што во спротивно ако не го пријави тоа што го кажува тогаш станува соучесник, нели ја сокрива правдата. Еве јас го охрабрувам тоа да го стори веднаш таму каде што тој еве како искусен човек и политичар мисли дека треба да го стори дали во обвинителството дали во МВР јас стојам тука на располагање сум ако има било какви такви индиции во спротивно за жал тогаш ќе прикрива кривично дело, затоа што обвинувањето е многу големо и сериозно. А што се однесува во делот на напуштање на коалицијата, тој е долги години во политиката јас му посакувам среќа успех понатаму во животот се надевам дека одлуката што ја донесе мисли дека е исправна и дека таа ќе му донесе некаков политички би рекол ете подобар комфор. Бидејќи како што го слушнав во изјават тој вели дека некој му вршел тортура,изживување и не знам уште што се не кажа а луѓето кои што ме познаваат вклучително и тој знам дека тоа не го мисли бидејќи јас сум се, само не сум таков човек. Со еден збор му посакувам среќа во понатамошната политичката кариера“, нагласи Мицкоски.

Арсовска на средба со урбаните заедници во Општина Карпош

Тале Кристо — Wed, 16 Mar 2022 13:53:56 +0000

Градоначалничката на Град Скопје, Данела Арсовска, денеска одржа координативен состанок со градоначалникот на Општина Карпош, Стевчо Јакимовски и претставници на урбаните заедници од општината Карпош. На средбата присуствуваа и претставници на јавните градски претпријатија и на администрацијата на Град Скопје. Тимовите од Град Скопје воспоставиja месечна соработка со Општината Карпош за да се запознаат со сите предизвици што ги имаат граѓаните и за да се одговори на нивните барања кои во најголем дел се од областа на сообраќајот, уредувањето на просторот со зеленило и комуналната хигиена. Изнесените барања од граѓаните ќе бидат дел од акцискиот план со проекти кои Градот Скопје ќе ги реализира во населените места во оваа општина. Претставници од Град Скопје и од јавните градски претпријатија веќе почнаа теренски активности за целосна проценка на состојбата со населбите во Општина Карпош, која ја сочинуваат 13 урбани и 1 месна заедница. Градоначалничката Данела Арсовска и тимови од Град Скопје во изминатиот период остварија средби со претставниците на месните и урбаните заедници од скопските општини. Целта на оваа активност на Град Скопје е да се излезе во пресрет на реалните проблеми на граѓаните и да се овозможи брз и рамномерен раст и развој на сите општини и населени места во нив, подеднакво.

ВИДЕО: Јакимовски повторно во лов на работници на „Комунална хигиена“

Ристе Здравков — Thu, 17 Feb 2022 13:19:03 +0000

Градоначалникот на Карпош, Стевчо Јакимовски на својот фејсбук профил објави видео во кое прави обиколка низ оваа Општина за да види дали има работници на „Комунална хигиена“ низ неа и нагласува дека нема тој да ја работи нивната работа. Лично направив кратка обиколка на главните улици во Карпош и го снимив ова видео за да се уверат граѓаните на Карпош како се потценети од страна на ЈП Комунална хигиена- Скопје иако имаат најголем процент на наплата токму од нашите 24 илјади домаќинства кои живеат на територија на Карпош, напиша тој. Како што вели, не бара неговата работа да ја работи никој, но нема ни тој да ја работи нивната.

Јакимовски потпиша Декларација за унапредување на женското претприемништво

Ивана Ефремовски — Mon, 07 Feb 2022 13:09:21 +0000

Градоначалникот на општина Карпош, Стевчо Јакимовски, денеска во својот кабинет одржа информативен состанок со претседателката на Националната платформа за женско претприемништво, Валентина Дисоска. Во текот на работната средба, првиот човек на општината подетално се запозна со долгорочните цели и планирањето на претстојните активности, кон кои се стремат претставничките на оваа платформа. По тој повод, Јакимовски ја потпиша и Декларацијата за подобрување и унапредување на положбата на женското претприемништво, која треба да резултира со економско и социјално јакнење, во рамки на локалната самоуправа и целокупното општество. Инаку, Националната платформа за женско претприемништво (НПЖП) е воспоставена преку проект кој е кофинансиран од ЕУ, а го спроведува Здружението на бизнис жени, во партнерство со Сојузот на стопански комори на Македонија, Националната федерација на фармери и Фондацијата за менаџмент и индустриско истражување (МИР). Од здружението напоменуваат дека нивните заложби се насочени кон обезбедување на системска поддршка за развој на женското претприемништво, преку креирање на инфраструктура за негова поддршка и развој. Од особена важност за нив е зајакнување на капацитетите на граѓанските организации за женско претприемништво, со цел, креирање на политики, застапување и соработка со националните и локалните власти, како и формирање на локални клубови за женско претприемништво.