Стјуарт Пич – Kurir.mk

Стјуарт Пич: Време е сите политички чинители да помогнат во пристапувањето на Македонија во ЕУ

Тале Кристо — Sat, 11 Mar 2023 09:53:06 +0000

Специјалниот претставник на Обединетото Кралство за Западен Балкан, лорд Стјуарт Пич во интервју за МИА порача дека сите македонски политичари треба добро да размислат што е во најдобар интерес за државата и за граѓаните, кои живеат во неа и нагласи дека е време сите политички чинители да помогнат во пристапувањето на Северна Македонија во Европската Унија. Одговарајќи на прашање за уставните измени и фактичката состојба дека реално во моментов не е обезбедено потребното двотретинското мнозинство, со оглед на тоа што опозицијата е децидна дека нема да поддржи промена на Уставот и опстојува на ставот за предвремени избори, Пич изјави дека би било нечесно кон луѓето од оваа земја да се одложи европскиот пат на кој различни влади напорно работеле во текот на многу години. - На ова не треба да се гледа само како победа на Владата што е на власт сега, тоа е победа на сите претходни влади и пред се за македонските граѓани. Свесни сме дека патот не беше лесен и дека имаше многу препреки во текот на годините и затоа ги охрабрувам сите политичари да не дозволат политиката да влијае врз една од најважните стратешки цели уште од осамостојувањето на Северна Македонија. Потребен е заеднички напор за Северна Македонија да стигне до повеќе од заслуженото членство во ЕУ, нагласи Пич. Тој изрази загриженост поради неодамнешните тензии во билатералните односи меѓу Северна Македонија и Бугарија, но додаде и дека е уверен оти постои значителен степен на добра волја кај сите страни и верува дека ќе се најде решение. - Северна Македонија и Бугарија се земји членки на НАТО, сојузници и со исти гледишта. Во однос на моменталните односи, двете земји треба да го земат предвид поширокиот контекст и геостратешките поместувања во регионот. Обединетото Кралство продолжува да ги охрабрува и Северна Македонија и Бугарија да продолжат да работат на подобрување на билатералните односи што ја поддржуваат Северна Македонија на нејзиниот пат кон членство во ЕУ, вели Пич. Во однос на бугарските клубови во земјава, кои имаат називи поврзани со фашистичкото минато, Пич нагласува дека е потребна сензитивност околу моќта на симболите, јазикот и историјата, особено во контекст на Западниот Балкан. - Знаеме дека ова е регион каде историските личности различно се паметат од различни заедници и затоа е многу важно изразувањето на идентитети да не дава дополнителни основи за поделби. Слободата на здружување и изразување се важни, но исто така е важно, би рекол императив, да се избегнуваат навреди, вели Пич. Во интервјуто со специјалниот претставник на Обединетото Кралство за Западен Балкан зборувавме и за безбедносната состојба по руската воена агресија во Украина, за можностите за прелевање на кризата во регионот на Западен Балкан, за обидите на трети страни за дестабилизација на регионот, за хибридните закани. Во продолжение следува целото интервју со специјалниот претставник на Обединетото Кралство за Западен Балкан, лорд Стјуарт Пич, заедно со видео материјал. Граѓаните на Северна Македонија ја перцепираат корупцијата како еден од клучните проблеми во земјата и Владата треба да покаже дека се справува со овој проблем, порача во интервју за МИА, спе Бевте во посета на Скопје кон крајот на минатата година, сега повторно сте тука, имавте средби со државниот врв, каков е вашиот впечаток сега по неколку месеци во однос на политичката состојба, реформите, состојбата со корупцијата и каква порака испративте на сите овие средби? -Ви благодарам и мило ми е што повторно се гледаме. Од клучно значење е Северна Македонија да ги спроведува реформите без одлагање, иако за активностите што се преземаат денес ќе биде потребно време за истите да станат видливи за граѓаните. Она што е важно е да се направат конкретни чекори што е можно побрзо на полето на владеење на правото, доброто владеење, човековите права и заштита на малцинствата. Обединетото Кралство ја поддржува амбициозната реформска агенда на Северна Македонија, вклучително и реформите што треба да се спроведат за членство на земјата во Европската Унија. Анкетите тука покажуваат дека јавноста, граѓаните на Северна Македонија ја перципираат корупција како проблем. Владата треба да покаже дека се справува со овој проблем. Постоење на независен систем за назначување заснован на заслуги, на пример транспарентен изборен процес на лица на клучни позиции, вклучително и за судии, членовите на Комисијата за борба против дискриминацијата и лица на високи раководни позиции претставува добар почеток, заедно со потребата за транспарентност и отчетност во многу јавни институции. Обединетото Кралство финансиски ја поддржува Северна Македонија во справување со овие аспекти преку повеќе програми. Постои заладување на односите Скопје-Софија, по серијата провокации, кои доведоа и до закана од бугарски политичар кон македонскиот претседател. Има најави за ново бугарско вето за отворање на поглавјата по завршувањето на скрининг процесот во ноември, како ги оценувате македонско-бугарските односи во моментов? - Ова не претставува ново вето, туку е одржување на тековното вето и многу е важно сите партнери да работат на поддршка на добрососедските односи и агендата на соработка. Тоа е заедничката евроатлантска иднина во која веруваме и сигурен сум дека сите што не гледаат ќе се согласат оти има повеќе работи што ги зближуваат граѓаните на Северна Македонија и Бугарија отколку такви што ги раздвојуваат. Минатото лето Бугарија го усвои т.н. француски предлог и објави дека ќе го отстрани ветото за започнување на преговорите на Северна Македонија за пристапување кон ЕУ. Условот што го постави претседателот Радев е Бугарите да бидат додадени во малцинските заедници во рамките на македонскиот Устав. Досега нема мнозинство во Парламентот во Скопје да се исполни ова, но важно е сите во Македонија, Македонците да се обединат за да ја исполнат оваа обврска. Ние сме загрижени поради неодамнешните тензии во билатералните односи помеѓу Северна Македонија и Бугарија, но јас сум уверен дека постои значителен степен на добра волја кај сите страни и дека ќе се најде решение. Северна Македонија и Бугарија се земји членки на НАТО, сојузници и со исти гледишта. Во однос на моменталните односи, двете земји треба да го земат во предвид поширокиот контекст и геостратешките поместувања во регионот. Обединетото Кралство продолжува да ги охрабрува и Северна Македонија и Бугарија да продолжат да работат на подобрување на билатералните односи што ја поддржуваат Северна Македонија на нејзиниот пат кон членство во ЕУ. Споменавте дека заедничката соработка е потребна од двете страни, сметате ли дека е провокација отворањето на бугарски клубови во Северна Македонија, кои се именувани по историски личности, кои и според светската историографија се поврзуваат со фашизмот? - Како поранешен претседавач на Кралскиот воен музеј, треба да бидеме сензитивни околу моќта на симболите, јазикот и историјата, особено во контекст на Западниот Балкан. Знаеме дека ова е регион каде историските личности различно се паметат од различни заедници и затоа е многу важно изразувањето на идентитети да не дава дополнителни основи за поделби. Слободата на здружување и изразување се важни, но исто така е важно, би рекол императив, да се избегнуваат навреди. Сакаме да видиме намалени, не зголемени тензии и важно е сите да работат на смирување на тензиите и да се фокусираат на градење на мостови меѓу луѓето, како што е тоа случајот со заедничката Мултидисциплинарна експертска комисија за историски и образовни прашања. Вашиот министер за надворешни работи Бујар Османи неодамна се сретна со претставници од организации на бугарската заедница во Северна Македонија и двете страни потврдија дека нивните активности ќе бидат насочени кон намалување на тензиите помеѓу Скопје и Софија. Гледано од регионален контекст, не треба да го потцениме фактот дека оние кои можат да имаат корист од спорот помеѓу Северна Македонија и Бугарија ги користат тие провокации за свои цели и тоа е лошо за сите во регионот. Опозицијата е децидна дека нема да поддржи уставни измени, кои, пак согласно преговарачката рамка се услов за преговорите, и бара предвремени избори, власта има ново мнозинство, но не и двотретинско. Како ја оценувате моменталната состојба? - Сите македонски политичари треба добро да размислат што е во најдобар интерес за вашата земја и вашите граѓани. За жал, продолжуваме да гледаме „одлив на мозоци“ и младите луѓе продолжуваат да емигрираат во странство. Последните анкети покажуваат дека граѓаните се разочарани и сметаат дека Северна Македонија се движи во погрешна насока. Луѓето во Северна Македонија сакаат и заслужуваат подобар животен стандард, чист воздух, добро образование, висококвалитетен здравствен систем, без разлика која политичка партија е на власт. И би било нечесно кон луѓето од оваа земја да се одложи европскиот пат на кој различни влади напорно работеле во текот на многу години, уште од поднесувањето на кандидатурата за членство на земјата во ЕУ во 2004 година. Време е сите политички чинители да помогнат во пристапувањето на Северна Македонија во ЕУ. На ова не треба да се гледа само како победа на Владата што е на власт сега, тоа е победа на сите претходни влади и пред се за македонските граѓани. Свесни сме дека патот не беше лесен и дека имаше многу препреки во текот на годините и затоа ги охрабрувам сите политичари да не дозволат политиката да влијае врз една од најважните стратешки цели уште од осамостојувањето на Северна Македонија. Потребен е заеднички напор за Северна Македонија да стигне до повеќе од заслуженото членство во ЕУ. Господине Пич присуствувате на Минхенската безбедносна конференција, имавте куса средба со вицепремиерот за европски прашања Бојан Маричиќ, од која упативте порака Западен Балкан да остане на патот на ЕУ, но истовремено и да биде приоритет за ЕУ. Дали регионот е приоритет за Европската Унија, имајќи ги предвид безбедносните предизвици со кои се соочува Европа, но и регионот? - Тоа е прашање за Европската Унија. За Обединетото Кралство, Западниот Балкан секако е приоритет. Ние имаме многу блиска соработка за широк спектар на прашања, за одбраната, со партнерите и сојузниците на НАТО во регионот, за миграцијата со Албанија или преку трговијата, на пример, имаме над 2,2 милијарди фунти во билатералната трговија меѓу Обединетото Кралство и Северна Македонија. Неодамна се одбележа една година од руската воена агресија врз Украина, но и според она што беше заклучено на Минхенската безбедносна конференција, но и според последните случувања, како да не се гледа крајот. Дали ситуацијата може да стане полоша и да ескалира и во други земји, на пример и во регионот на Западен Балкан? - Руската нелегална инвазија на Украина го зголеми ризикот од нестабилност на Западен Балкан. Русија користи дезинформации, други алатки за да ги влоши веќе постоечките тензии на Западниот Балкан, со цел да се предизвика нестабилност и всушност да се спречи или запре евроатлантската интеграција на сите земји во регионот. Обединетото Кралство продолжува исклучително сериозно да ја сфаќа заканата од руската држава и продолжуваме да работиме со сите наши партнери, сојузници и пријатели за да ги искористиме сите капацитети против противници кои се обидуваат да ја поткопаат нашата колективна безбедност на Западен Балкан и на други места. Регионот има нерешени прашања, кои може да доведат до дестабилизирање, сведоци сме на обидите за решавање на спорот Белград-Приштина, најавена е средба на српскиот претседател Александар Вучиќ и косовскиот премиер Албин Курти во Охрид на 18 март, на која домаќин ќе биде премиерот Ковачевски. Што очекувате од средбата, но и воопшто од досегашниот тек на преговорите? - Обединетото Кралство го поздрави напредокот постигнат во преговорите предводени од ЕУ меѓу Приштина и Белград за договор кон нормализација на односите и го правиме тоа како основа за одржлив долгорочен договор. Јасно е дека има многу работа и што да се направи пред состанокот на 18 март. Тој состанок, благодарение на Северна Македонија што ќе биде домаќин на истиот, ќе биде клучен момент за да се постигне понатамошен напредок. Следните чекори за да се договори план за имплементација ќе бидат клучни, со лидерство и флексибилност клучни за да се обезбеди позитивен исход, а Обединетото Кралство продолжува и ќе продолжи целосно да го поддржува овој процес. Дали отворените прашања на Балканот оставаат простор за руско или други влијанија во регионот? - За жал да, оставаат простор. Руското влијание го загрозува целиот меѓународен систем и има цел, како што реков претходно, да ја запре, да ја одложи или да ја попречи евроатлантската интеграција на земјите од Западен Балкан и на други земји. Поради нелегалниот, континуиран и неиспровоциран напад на Русија врз Украина, сега е апсолутно од критично значење Западниот Балкан да добие поддршка и да напредува со демократските реформи и да демонстрира единство. Една од главните теми на Минхенската конференција беа хибридните закани, во интервјуто што го дадовте за МИА, кога бевте претседавач на Воениот комитет на НАТО пред повеќе од две години, порачавте дека пропагандата не се уништува со пропаганда, туку со факти. Како да се справат државите во овој наплив на хибридни закани, со кои се соочуваме и ние тука во Северна Македонија? - Од последниот пат кога се сретнавме и го направивме интервјуто, хибридните напади станаа уште поголем предизвик. Сите сојузници на НАТО се соочуваат со закани и предизвици од државни и од недржавни актери. Хибридните активности сега се користат за таргетирање на политичките институции, да се влијае на јавното мислење и да се поткопа нашата безбедност. Секој ден гледате примери за тоа и во вашата земја и во мојата земја. Затоа, земјите мора да ја зајакнат својата национална отпорност, да ја зајакнат свеста и да ја подобрат способноста да ја разберат сликата за хибридни закани, да се спротивстават на дезинформациите, да разговараат за новите форми на хибридно војување, да работат заедно и да преземат мерки за подобрување на нашата отпорност. Како Велика Британија се справува со хибридните закани? - Велика Британија ја препознава оваа закана веќе подолго време. И јас работев на тоа долго време. Како што расте заканата, ние продолжуваме да го развиваме нашиот одговор и во однос на сложеноста и на глобално ниво. И сите ние треба да го прилагодиме нашиот одговор и да го засилиме. Треба да бидеме обединети, транспарентни, да ги почитуваме правата, но и да се осигураме дека сме усогласени и меѓусебно се зајакнуваме. Ќе ви дадам неколку примери. Би можеле и треба да разменуваме знаење преку достапни разузнавачки анализи, да следиме и разоткриваме непријателски информации, како тие ги спроведуваат овие операции, како се појавуваат нови тактики. Сите тие активности ги поткопуваат нашите демократии и предизвикуваат реална штета. Ние, исто така, спроведуваме стратегиски комуникациски кампањи за да се спротивставиме на дезинформациите во еден глас, колективен глас. Заеднички се претставуваме во однос на комуникациските услуги за да ја разбереме и подобриме ефективноста на интервенциите, да се спротивставиме на дезинформациите на Интернет и како што неодамна разговаравме за ова во Горниот дом. Треба да ги обединиме постојните иницијативи како што се Законот за онлајн безбедност на Обединетото Кралство и Кодексот на однесување на Европската Унија. Дополнително, продолжуваме да ги координираме донациите за ефективно финансирање на иницијативи за разбирање и разоткривање на заканата од дезинформации и за поддршка на независните медиуми.

Стјуарт Пич со порака: Владата треба да покаже дека се справува со корупцијата

Тале Кристо — Fri, 10 Mar 2023 07:32:13 +0000

Граѓаните на Северна Македонија ја перцепираат корупцијата како еден од клучните проблеми во земјата и Владата треба да покаже дека се справува со овој проблем, порача во интервју за МИА, специјалниот претставник на Обединетото Кралство за Западен Балкан, лорд Стјуарт Пич. - Анкетите тука покажуваат дека јавноста, граѓаните на Северна Македонија ја перцепираат корупција како проблем. Владата треба да покаже дека се справува со овој проблем. Постоење на независен систем за назначување заснован на заслуги, на пример транспарентен изборен процес на лица на клучни позиции, вклучително и за судии, членови на Комисијата за борба против дискриминацијата и лица на високи раководни позиции претставува добар почеток, заедно со потребата за транспарентност и отчетност во многу јавни институции, нагласи Пич, кој оваа недела беше во посета на земјава и оствари средби со претставниците на државниот врв. Тој во интервјуто за МИА изјави дека Обединетото Кралство ја поддржува амбициозната реформска агенда на Северна Македонија, вклучително и реформите што треба да се спроведат за членство на земјата во Европската Унија. Лорд Пич додаде и дека Обединетото Кралство финансиски ја поддржува Северна Македонија во справување со овие аспекти преку повеќе програми. Интервјуто со специјалниот претставник на Обединетото Кралство за Западен Балкан, лорд Стјуарт Пич, заедно со видео материјал целосно ќе биде објавено утре.

Османи – Пич: Северна Македонија е извозник на стабилност во регионот

Тале Кристо — Tue, 07 Mar 2023 10:54:40 +0000

Министерот за надворешни работи и претседавач со ОБСЕ, Бујар Османи денес оствари средба со специјалниот пратеник на Обединетото Кралство на Велика Британија и Северна Ирска за Западен Балкан, лорд Стјуарт Пич, на која биле разменети мислења за текот на преговорите со ЕУ и домашните процеси во овој контекст. Како што информираат од Министерството за надворешни работи, Пич ја повторил неопходноста од заокружување на уставните измени со цел трасирање на евроинтеграцискиот пат на земјава со забрзана динамика. Министерот Османи се заблагодарил за конзистентната британска поддршка на овој план, дополнително подвлекувајќи го високиот степен на соработка меѓу двете земји сојузнички во рамки на НАТО. Во својство на претседавач со ОБСЕ, Османи го запознал соговорникот со актуелностите во однос на нашето претседавање со ОБСЕ, реализираните и идните планирани активности низ призмата на утврдените приоритети, во кои Украина се истакнува како прв и врвен приоритет. На средбата, како што посочуваат од МНР, станало збор и за регионалната динамика, при што соговорниците биле согласни дека Северна Македонија е перцепирана како земја извозник на стабилност во регионот, меѓу другото и преку претседавањето со две важни регионални иницијативи оваа година, САД-Јадранската повелба (А5) и Процесот за соработка во Југоисточна Европа (ПСЈИЕ). Двајцата соговорници, како што соопшти МНР, го поздравиле напредокот постигнат во Брисел за нормализација на односите Косово-Србија, што претставува значаен чекор од интерес за целиот регион на Западен Балкан. Министерот Османи потенцирал дека Северна Македонија, како директен сосед на двете земји, ги охрабрува сите решенија кои обезбедуваат стабилност и ЕУ перспектива за целиот регион.

Пендаровски се сретна со специјалниот британски претставник за Западен Балкан Пич

Катерина Бојаџиева — Wed, 26 Oct 2022 09:15:53 +0000

Претседателот Стево Пендаровски денеска го прими специјалниот британски претставник за Западниот Балкан, сер Стјуарт Пич со кога разговараше за севкупните билатерални односи меѓу двете држави, за состојбите во регионот, како и за влијанието на руската инвазија врз Украина по стабилноста и безбедноста на европскиот континент. Како што соопшти Кабинетот на претседателот на Републиката, Пендаровски истакна дека Северна Македонија придава особено значење на развојот на билатералните односи со Обединетото Кралство и има постојан интерес за зајакнување на соработката меѓу двете држави во повеќе сфери од заемен интерес. Пендаровски, како што се наведува во соопштението, се заблагодари за најновата британска донација што вклучува 14 мобилни единици за обука на припадниците на Армијата во урбана средина, што денеска ќе биде примопредадена на полигонот „Криволак“, оценувајќи ја како уште една потврда на силното сојузништво на двете држави – членки на НАТО алијансата. На средбата беа разменети и мислења во врска со почетокот на пристапните преговори на Северна Македонија со Европската Унија.

Специјалниот британски претставник за Западен Балкан Стјуарт Пич во посета на Македонија

Ивона Петрова — Wed, 26 Oct 2022 06:30:58 +0000

Специјалниот претставник на Обединетото Кралство за Западен Балкан Стјуарт Пич денеска пресотјува во посета на Република Северна Македонија. Пич ќе има средба со претседателот на Собранието Талат Џафери, а предвидени се средби и со претставници на Владата. Стјуарт Пич попладне заедно со министерката за одбрана Славјанка Петровска и британскиот амбасадор во Скопје Метју Лосон ќе присуствуваат на примопредавањето на донацијата од Обединетото Кралство која вклучува 14 мобилни единици за обука за припадниците на Армијата во урбана средина.

Пендаровски и Пич разговараа за состојбите во регионот

Катерина Бојаџиева — Fri, 17 Jun 2022 10:21:23 +0000

Претседателот Стево Пендаровски денеска во „Вила Билјана“ во Охрид го прими сер Стјуарт Пич, специјален претставник на Обединетото Кралство за Западен Балкан, со кој разговараше за актуелните состојби во регионот во светло на активностите на Пич како специјален претставник на Обединетото кралство за Западен Балкан. -Во тој контекст, претседателот Пендаровски ја истакна посветеноста на Обединетото Кралство за одржување на просперитетот и безбедноста на регионот. Обединетото Кралство, посочи претседателот Пендаровски, е докажан пријател на Северна Македонија и силен поддржувач во исполнувањето на нејзините стратешки цели и изрази очекување за продолжување на поддршката за зајакнување на стабилноста, демократијата, владеењето на правото и справувањето со криминалот и корупцијата, соопшти кабинетот на Пендаровски. Во контекст на македонските аспирации за членство во Европската Унија, претседателот Пендаровски истакнал дека деблокадата на процесот и отворањето на пристапните преговори за членство со Северна Македонија позитивно ќе се влијае за стабилноста на регионот. На средбата претседателот Пендаровски и специјалниот претставник Пич размениле мислења и информации во врска на руската инвазија врз Украина, како и делувањето на двете држави во рамки на НАТО Алијансата во однос на ова прашање. сст/лв/

Пич: Србија треба да одлучи во која насока ќе оди

Ивана Ефремовски — Fri, 18 Mar 2022 11:36:01 +0000

Британскиот пратеник за Западен Балкан, Стјуарт Пич, денеска изјави дека Србија е една од ретките земји кои не воведоа санкции кон Русија поради инвазијата на Украина, но го поздрави фактот што официјален Белград се приклучи кон осудата на Русија во ОН, јави дописникот на МИА од Белград. За тоа дали е време Србија да одлучи во која насока ќе оди – поблиску до Запад или кон Русија, британскиот пратеник кажа дека „Белград треба да ја избере позицијата“. Пич во изјава за Хина порача дека британската Влада го поддржува дијалогот меѓу Белград и Приштина со посредство на Мирослав Лајчак, специјалниот претставник на ЕУ за, како што наведе, „дијалогот меѓу тие две земји“. Тој кажа дека Србија веќе осум години води пристапни преговори со ЕУ, но со спроведувањето на реформите за приближување до Унијата, клучни ќе бидат односите на Белград со Приштина. Тој посочи дека Британија ги охрабрува сите влади во регионот на евроатлантскиот пат и патот кон ЕУ, бидејќи „мислиме дека тоа им дава најдобра надеж на луѓето во регионот за подобра иднина, ослободена од војна“. -Почитуваме ако земјите од регионот не сакаат да влезат во НАТО, но оние кои сакаат треба да ја добијат таа можност, изјави Пич, додавајќи дека истото важи и за влезот во ЕУ. Зборувајќи за ситуацијата во БиХ, Пич оцени дека иако ситуацијата во оваа земја е загрижувачка, тоа е политичко прашање, а не безбедносна криза. Тој додаде дека „руската војна во Украина е предизвик кој не смее да се прелее на Балканот“. Пич го поздрави неодамнешното зголемување на бројот на војниците на ЕУФОР во БиХ од 600 на 1.100 и порача дека тоа е, „видлива демонстрација на присуство“. (МИА)

Специјалниот британски пратеник за Западен Балкан во посета на БиХ

Ивона Петрова — Tue, 14 Dec 2021 08:01:20 +0000

Специјалниот британски пратеник за Западен Балкан, Стјуарт Пич денеска ќе ја посети Босна и Херцеговина, каде ќе се сретне со членовите на Претседателството, а се очекува да разговара и со други високи функционери. Премиерот Борис Џонсон рече дека Пич во Босна и Херцеговина ќе продолжи да го поддржува високиот претставник Кристијан Шмит, за кого рече дека има целосна поддршка од Лондон. Посетата на Пич е една од серијата посети на странски официјални претставници за посредување во клучните политички прашања во Босна и Херцеговина. Неговата посета е речиси две недели откако британскиот премиер Џонсон го назначи за специјален пратеник. Тој беше избран за пратеник набргу откако поднесе оставка од функцијата претседател на Воениот комитет на НАТО на почетокот од оваа година. Меѓу другото, тој беше шеф на британскиот одбранбен штаб и шеф на воената разузнавачка служба – зад себе има долга воена кариера.

Стјуарт Пич назначен за специјален претставник за Западен Балкан

Тале Кристо — Thu, 02 Dec 2021 13:43:46 +0000

Британскиот премиер Борис Џонсон го назначи Стјуарт Пич за специјален претставник за Западен Балкан како дел од континуираната посветеност на Обединетото Кралство на стабилноста и просперитетот во регионот, соопшти британската Амбасада во земјава. Оваа улога тој ја презема по повлекувањето од функцијата претседавач со Воениот комитет на НАТО на почетокот на оваа година, улога што ја извршуваше од 2018 година. Претходно, беше началник на Генералштабот на Обединетото Кралство. Како што се наведува во соопштението, како специјален претставник на премиерот за регионот кој ги вклучува Албанија, Босна и Херцеговина, Косово, Црна Гора, Северна Македонија и Србија, сер Стјуарт ќе работи со лидерите од Западен Балкан, и други претставници од регионот, како и со нашите сојузници од САД и Европа во поддршка и зајакнување на регионалната стабилност. Неговата работа, исто така, ќе вклучува промовирање на силни демократски институции и отворени општества, помагање во справувањето со сериозниот и организиран криминал и други заеднички безбедносни предизвици, како и поддршка во решавањето на наследените прашања како што се воените злосторства и исчезнатите лица. Поврзано со последното, Обединетото Кралство, исто така, се посочува, ќе продолжи да ја предводи работата во врска со унапредувањето на родовата еднаквост и спроведувањето на иницијативата за спречување на сексуалното насилство во конфликтите. Во Босна и Херцеговина (БиХ), ангажманот на сер Стјуарт ќе биде поддршка на ангажманот на меѓународниот Висок претставник, Кристијан Шмит, кој продолжува да ја има целосната поддршка од Обединетото Кралство. Во Србија и Косово, ќе работи со нашите партнери во поддршка на Дијалогот помеѓу Србија и Косово, потпомогнат од ЕУ. -Високиот претставник предупреди дека Босна и Херцеговина се соочува со најголемата егзистенцијална закана од нејзиниот повоен период и дека постои реална перспектива за натамошна поделба и конфликт. Заедно со меѓународните партнери, Обединетото Кралство работи на справување со сите закани по стабилноста во согласност со Дејтонскиот мировен договор, кој го поткрепи 26-годишниот тешко стекнат напредок во Босна и Херцеговина. Обединетото Кралство, исто така, помага во решавањето на другите регионални предизвици, вклучително и поддршката за нормализација на односите меѓу Србија и Косово и борбата против организираните криминални групи. Обединетото Кралство ќе игра важна улога, во непосредна соработка со владите во регионот и нивните меѓународни партнери. Премиерот Борис Џонсон рече дека Обединетото Кралство е длабоко посветено на европската безбедност, а Западниот Балкан ја доживува најголемата закана по неговата стабилност и безбедност во повеќе од две децении. -Имаме одговорност да направиме сè што можеме за да ги зачуваме придобивките постигнати преку мир и дијалог – не можеме да дозволиме враќање кон насилството и поделбите од минатото. Големото искуство и експертиза на Сер Стјуарт ќе ги зајакне меѓународните напори за заштита на мирот и промовирањето на евроатланската интеграција во овој клучен регион, вели Џонсон. Министерката за надворешни работи Лиз Трас рече дека назначувањето на Сер Стјуарт е јасен доказ за посветеноста на Обединетото Кралство на Западен Балкан како и на одбраната и промовирањето на слободата и демократијата во регионот. -Со нетрпение очекувам да ги продлабочиме нашите економски и безбедносни врски со Западен Балкан и да работиме заедно во одвраќањето на малигните актери. Сер Стјуарт ќе игра клучна улога во тој наш ангажман, вели министерката Трас. Рејчел Галовеј рече дека како амбасадор на Обединетото Кралство во Северна Македонија силно го поздравува назначувањето на Сер Стјуарт Пич за Специјален претставник за Западен Балкан на Премиерот. Во непосредна соработка со британските амбасади во регионот Сер Стјуарт ќе работи со лидерите од Западен Балкан и со нашите сојузници во поддршка и зајакнување на регионалната стабилност. Неговото назначување, додава таа, е силен сигнал на континуираната британска посветеност на зајакнувањето на нашите врски со земјите од Западен Балкан и на безбедноста и просперитетот на овој важен регион. Со нетрпение очекувам да соработувам со него. За политичката ситуација на Западен Балкан се разговараше на состанокот на министрите за надворешни работи на НАТО во Рига, а ќе биде и на агендата на состанокот на министрите за надворешни работи на Г7 во Ливерпул, кој беше најавен претходно во текот на оваа недела, стои во соопштението.

Пендаровски оствари средба со воздухопловниот маршал Стјуарт Пич

Ивона Петрова — Thu, 09 Jan 2020 11:03:38 +0000

Претседателот на Република Македонија, Стево Пендаровски, денеска го прими претседавачот на воениот комитет на НАТО, воздухопловниот маршал Стјуарт Пич, кој престојува во официјална посета на Македонија. На средбата, информираат од Кабинетот на Пендаровски, беа разменети мислења и информации за тековните процеси во државата, во пресрет на скорешното членство во НАТО алијансата. На средбата претседателот Пендаровски беше информиран за актуелната состојба во Ирак и на Блискиот Исток. -Со полноправното членство во НАТО, истакна претседателот Пендаровски, се остварува еден од клучните стратешки приоритети на Македонија, дефинирани од почетокот на нејзината независност. Придонесот во меѓународните мисии и вежби предводени од НАТО, според претседателот Пендаровски, се доказ дека нашата Армија е подготвена да придонесе во колективниот систем за безбедност на Алијансата. Претседателот Пендаровски ја реафирмираше поддршката за натамошни реформи во Армијата и гзолемување на нејзиниот буџет на 2 отсто од БДП до 2024 година. На средбата беше потврдена поддршката што ја дава Алијансата за претстојната фаза на финализирање на интеграцијата на нашата држава во НАТО и беше посочено дека Република Македонија од ценет партнер станува сојузник во Алијансата, стои во соопштението.