стојан ѓуровски – Kurir.mk

Ѓуроски: Ова ќе биде одличен тест за предизвиците што ни претстојат

Бошко Тасиќ — Wed, 26 Jul 2023 04:22:38 +0000

Македонската кошаркарска репрезентација ги започна подготовките за претквалификациите за Олимписките игри, кои догодина ќе се одржат во Париз, Франција. Свое видување за претстојните предизвици даде репрезентативецот Стојан Ѓуроски. „Мислам дека нè очекуваат прилично тешки натпревари. Играме со физички снажни селекции кои се силни на позициите „четири“ и пет“, но сметам дека овие натпревари ќе бидат одлични за нас како репрезентација и ќе бидат добар тест за следните предизвици. Ова е одлична етапа за нас и се надевам дека ќе се претставиме во најдобро светло. Следните ФИБА-прозорци ќе се играат во текот на сезоната, така што нема да имаме премногу пауза меѓу овие мечеви и тие што следуваат во ноември и февруари. Мораме да сме максимално подготвени за сè што следи“, заклучи Ѓуроски. Македонија ќе одигра три натпревари на турнирот што ќе се одржи во главниот град на Естонија, Талин. Стартуваме против Израел на 12 август, ден подоцна играме со домашната селекција на Естонија, а последниот меч на програмата е на 15 август и ќе се соочиме со Чешка.

Ѓуроски: Повторно со одлична одбрана ја победивме Норвешка

Бошко Тасиќ — Mon, 27 Feb 2023 05:27:34 +0000

Стојан Ѓуроски е презадоволен од победата над Норвешка од 79:41 со која кошаркарската репрезентација на Македонија го освои првото место во претквалификациите и обезбеди пласман во главните квалификации за ЕП 2025. „Го следевме натпреварот меѓу Данска и Словачка, знаевме дека тој меч многу ни значи, но исто така бевме подготвени да одиграме за себе и да победиме. Го следевме планот на селекторот кој беше многу сличен на оној од првиот меч во Гевгелија, да го запреме нивниот најдобар играч Фреј. Успеавме во тоа, одигравме агресивен и цврст натпревар, примивме само 41 поен и мислам дека одбраната повторно беше клуч на нашиот успех со што го запечативме првото место кое го заслуживме. Во овој циклус игравме со силни репрезентации кои не се за потценување, сега ќе прославиме во очекување на следните ривали во квалификациите за ЕП“, вели Ѓуроски.

Стојановски и Ѓуровски се враќаат дома

Дарко Андоновски — Tue, 17 Mar 2020 11:56:21 +0000

Со оглед на тоа дека и официјално ПРО А и ПРО Б лигите ги суспендираа сите наредни активности, а по првата клупска препорака, македонските репрезентативци Војдан Стојановски и Стојан Ѓуровски ја напуштија Франција. – Се некако се случи набрзина, особено по онаа првична информација дека до следното, остануваме. Во клубот ја сфатија ситуацијата како доста сериозна, па на сила дојде една друга одлука која вели дека сме ослободени од понатамошните обврски, изјави Ѓуровски за веб-страницата на КФСМ. Стојановски треба во Скопје да пристигне попладнево. Капитенот на македонскиот национален тим не е премногу убеден дека во Франција ќе се игра кошарка оваа пролет. – Иако првично беше дека треба да останеме, сепак, одлуката на клубот е да ги ослободи сите странци. Да си заминат дома, во оваа криза, да бидеме дома со семејствата, што веројатно е и најдоброто можно решение, ако може да се каже така. Заминувам за Скопје со една голема непозната, што и како со лигата во Франција понатаму, порачува Стојановски.