странска војска – Kurir.mk

Приведено лице од тетовско – се сомничи дека учествувал во странска војска

Магдалена Андонова — Thu, 07 Apr 2022 12:13:02 +0000

На 06.04.2022 околу 11.00 часот во с.Неготино, полошко, полициски службеници на СВР Тетово го лишиле од слобода 30-годишниот З.С. од ова село, на барање на Одделот за сузбивање на организиран и сериозен криминал, а во координација со Основното јавно обвинителство за гонење на организиран криминал и корпуција, поради сомнение за сторено кривично дело „учество во странска војска, полиција, паравоени или параполициски формации“, казниво по член 322-а став 3 од Кривичниот законик. Тој бил приведен во полициска станица и изведен пред Судија на претходна постапка, при што му е определена мерка притвор.

МНР: Учеството во која било странска војска е кривично дело

Ивана Ефремовски — Wed, 09 Mar 2022 14:32:15 +0000

Од Министерството за надворешни работи велат дека како земја пријател на Украина, имаме разбирање за сложената состојба во која се наоѓа Украина и која ги става во посебна состојба украинските власти да повикуваат за секаков вид помош, во сите пријателски земји, вклучувајќи и придружба, и/или доброволци кои би се приклучиле на украинската армија во одбраната од воената закана која доаѓа од руските воени сили. Министерството за надворешни работи во денешното соопштение ги потсетува граѓаните на Македонија дека учеството во која било странска војска, со законските прописи, поточно со Кривичниот законик на земјава, е кривично дело. -Воедно сакаме да потсетиме дека Република Северна Македонија во целост ја осудува воената агресија на Русија врз Украина, и тоа соодветно земјава го демонстрира и во ОН, НАТО, ОБСЕ и на сите други билатерални и мултилатерални форуми, се наведува во соопштението од МНР.

Обвинение за 24 годишен Скопјанец – учествувал во странска војска и бил баран со потерница

Магдалена Андонова — Fri, 29 Jan 2021 13:11:00 +0000

По спроведената истражна постапка надлежен обвинител од Основното јавно обвинителство за гонење на организиран криминал и корупција до Основниот кривичен суд достави Обвинителен акт против дваесет и четиригодишниот И.Т. од Скопје, за сторено кривично дело – Учество во странска војска, полиција, паравоени или параполициски формации од член 322-а ст.3 од Кривичниот законик. Обвинетиот е дел од групата опфатена во акцијата „Ќелија 2″. За потсетување, акцијата беше спроведена на седум локации во Скопје и Тетово, на 9 јули 2016 година и притоа беа уапсени четири лица – поранешни припадници на ИСИС, а подоцна беше лишено од слобода уште едно лице. За останатите три лица меѓу кои и обвинетиот И.Т. беа распишани национални и меѓународни потерници. Имено, по претходна радикализација во нашата земја, И.Т. како македонски државјанин спротивно на законот заминал во Сирија, каде бил обучуван и учествувал во воените акции на правоената формација – муџахединска единица наречена „Тахрир Хајат Ал-Шали“ – Tahrir Hayat Al – Shali, која од страна ООН е прогласена за терористичка организација. По завршената обука која траела околу 6 месеци бил распореден во единица задолжена за обезбедување на терен во близина на градот Ибдил и извршувал одредени стражарски активности. По постигнатото примирје во 2017 година, обвинетиот во месец јули 2019 година од Сирија илегално влегол во Р.Турција и одреден временски период престојувал во Анкара и Истанбул. Со оглед дека со него имал патна исправа со истечен рок на важење не можел легално да се врати дома, па стапил во контакт со неговите родители. Согласно договорот, тој илегално ја преминал турско – грчката граница и во Р. Грција се сретнал со неговите родители, кои му ја донеле патната исправа на неговиот брат со која ја поминал границата и истиот ден преку ГП Долно Блаце ја напуштил државата заминувајќи на Косово. Кога се вратил во РС Македонија врз основа на претходно издадена Наредба за издавање на национална и меѓународна потерница од 2017 година, обвинетиот И.Т. на 06.10.2020 година беше спроведен во КПУ Затвор Скопје – Скопје. Имајќи ги предвид специфичноста, видот, тежината и начинот на извршување на кривичното дело, како и меѓународниот карактер на истото, а воедно и фактот дека обвинетиот долго време бил недостапен на органите на прогонот, обвинителството со Обвинителниот акт достави и посебен предлог за продолжување на мерката притвор определена од судија на претходна постапка.

Уапсен скопјанец кој учествувал во странска војска

Ивона Петрова — Wed, 07 Oct 2020 10:26:09 +0000

Полициски службеници вчера вечерта го уапсиле 24 годишниот И.Т. од Скопје. Како што информира МВР лицето е приведено врз основа на судска наредба за истрага со определена мерка притвор во траење од 30 дена, за сторено кривично дело „учество во странска војска, полиција, паравоени или параполициски формации“ по член 322-а став 3 од Кривичниот законик. Лицето било спроведено во казнено-поправна установа.