Страшо Пинџур – Kurir.mk

Сто и осум години од раѓањето на народниот херој Страшо Пинџур

Катерина Бојаџиева — Sun, 05 Mar 2023 12:40:35 +0000

Денеска се навршуваат сто и осум години од раѓањето на народниот херој Страшо Пинџур, информираа денеска од Музеј галеријата во Кавадарци. Потекнувал од видно револуционерно семејство од кавадаречкото село Ваташа. - Роден бил во Струмица на петти март 1915 година. Таму неговиот татко работел како учител. Во Крагуевачката гимназија се изградил како напреден младинец и револуционер. Таму во 1933 година започнал да го пишува својот дневник. Покрај другото, во овој дневник запишал, ,,Јас ќе умрам млад, а мојот гроб нема да се знае”. Во 1935 година Страшо Пинџур се запишал на Правниот факултет во Белград. Многу брзо влегол во редовите на напредното младинско и револуционерно движење. Се вклучил во Друштвото на напредните македонски студенти ,,Вардар”, а во текот на 1936 година бил избран за негов секретар. Станал и член на Акциониот студентски одбор, потсетија од Музеј галеријата. Тој бил еден од основачите на македонското народно движење МАНАПО. - Поради неговата голема активност и агитација меѓу студентите и работничката младина, во мај 1938 година бил уапсен од белградската полиција и осуден на шест месеци затвор во Ада Циганлија. За време на летниот распуст во 1939 година, Страшо Пинџур заедно со Ристо Михов и Ѓошо Бојаџиев ја формирале партиската ќелија на КП за Кавадарци, ја обновиле партиската организација, што по 1920 година се наоѓала во длабока илегала, потсетија од Музејот. По завршувањето на Правниот факултет во декември 1940 година, неговата активност како револуционер уште повеќе се зголемила. На 26 март 1941 година Страшо бил во Скопје и заедно со Кузман Јосифовски – Питу и Мирче Ацев учествувале во демонстрациите против приклучувањето на Југославија кон Тројниот пакт. По окупацијата на Македонија се наоѓал во Скопје, бил назначен за инструктор на ПК на КПЈ за Македонија, а од септември 1941 година бил член на Покраинскиот воен штаб. Тој бил задолжен да ја зајакне партиската структура, да формира нови месни комитети и воени штабови. Од јуни 1942 година бил член на Главниот штаб на Македонија, соопштија од Музејот. Есента 1942 година, бил разбиен велешкиот партизански одред „Димитар Влахов”. Страшо Пинџур и Мирче Ацев дошле во Велес, да ја консолидираат работата на партиската организација. На 18 декември биле провалени од бугарската полиција во куќата на Јован Митрев и биле уапсени и спроведени во Областната полициска управа во Скопје. На 4 јануари 1943 година во Скопскиот областен затвор, како последица од силните измачувања од страна на бугарската полиција, Страшо Пинџур умира. Било наредено уште истата вечер телото да биде однесено и закопано некаде на тајно место. Загинал на неполни 28 години. Така завршил животот на еден од најголемите револуционери и политички раководители на Македонија од времето на Втората светска војна. До денес не се знае каде е неговиот гроб, информираа од Музеј галерија Кавадарци. Кога на 24 септември 1943 година на планината Кајмакчалан бил формиран Вториот баталјон во Македонија, името го добил по големиот револуционер и борец, Страшо Пинџур. За неговата активност во организирањето на македонскиот народ во борба против фашистичкиот окупатор, Страшо Пинџур бил меѓу првите прогласени народни херои во Македонија, на 29 јули 1945 година. свд/сх/

80 години од убиството на Страшо Пинџур и Мирче Ацев, македонските народни херои биле ѕверски мачени

Ивона Петрова — Wed, 04 Jan 2023 08:50:47 +0000

На денешен ден пред 80 години во Скопје убиени се македонските народни херои Страшо Пинџур и Мирче Ацев. Бугарската полиција го убила Страшо Пинџур по повеќедневно ѕверско мачење. Бил член на КПЈ од 1934 годин. Роден бил во селото Ваташа, Кавадаречко, на 5 март 1915 година. Ацев бил убиен по петдневно мачење од бугарската полиција која го фрлила низ прозорец. Правиот батаљон на Народноослободителната војска на Македонија го добил неговото име. Бил член на Покраинскиот комитет на КПЈ на Македонија од 1941 година и член на Главниот штаб на НОВ и ПО на Македонија. Роден е во селото Ореовец, Прилепско, на 26 септември 1915 година.

Украдена бронзена биста на Страшо Пинџур од основно училиште во Скопје

Ивона Петрова — Sun, 06 May 2018 11:24:55 +0000

Тешка кражба била извршена во период од 30 април до 2 мај во основното училиште „Страшо Пинџур“ во населбата Даме Груев. Од полицијата информираат дека непознат сторител од училиштето украл една бронзена биста со ликот на Страшо Пинџур, со димензии 80 х 40 цм. при што е причинета штета од околу 66.000 денари. Се работи на целосно расчистување на случајот. За време на првомајските празници извршена беше кражба и во основното училиште „Кузман Јосифовски – Питу“ лоцирано во Кисела Вода, каде од училишниот двор била украдена бистата на Кузман Јосифовски-Питу, висока околу 80 сантиметри.

Патронен празник на касарната „Страшо Пинџур“ во Петровец

Ивона Петрова — Fri, 05 Jan 2018 07:24:00 +0000

Единиците на АРМ стационирани во касарната „Страшо Пинџур“ во Петровец денеска ќе го одбележат патрониот празник на касарната. Програмата на одбележувањето на патрониот празник на касарната која го носи името на македонскиот народен херој, Страшо Пинџур, предвидува краток историски час за неговиот живот и дело, како и обраќање од страна на командантот на 1.механизирана пешадиска бригада.