Струга Трим Лум – Kurir.mk

Струга остана без групна фаза во Конференциската лига

Тале Кристо — Thu, 31 Aug 2023 20:08:53 +0000

Македонскиот фудбалски шампион Струга Трим Лум го заврши настапот во европските купови, откако вечерва загуби на реваншот во Исланд од Бреидаблик со 1-0, и со вкупен резултат од 2-0 е елиминиран во плејофот во Конференциската лига. Струга допатува на реваншот во Копавогур со негатива од 0-1 од првиот натпревар во Охрид, а шансите за историски пласман во групната фаза во европските купови уште повеќе се намалија кога исландскиот шампион поведе пред домашните гледачи преку Виктор Еинарсон веќе во 3. минута. Македонскиот тим беше немоќен во продолжението да дојде до резултатски пресврт и со елиминацијата од Конференциската лига сега ќе се насочи кон одбрана на домашната титула, а Бреидаблик ќе се најде во утрешната жрепка за составот на групите во третото по ранг европско клупско натпреварување.

Бреидаблик пред полни трибини ќе ја пречека Струга на реваншот во Исланд

Тале Кристо — Wed, 30 Aug 2023 13:46:46 +0000

Македонскиот претставник во Конференциската лига Струга Трим Лум ќе го очекува полн стадион на утрешниот реванш против исландски Бреидаблик во клучниот натпревар за пласман во групната фаза. Исландскиот шампион објави дека распродадени се сите билети за натпреварот против македонскиот првак кој е закажан за в четврток од 18:45 часот во Копавогур на стадионот „Копавогсволур“ со капацитет од 3.009 седишта. Струга денеска допатува во Исланд каде реваншот ќе го почне со резултатска негатива по поразот минатиот четврток во Охрид од 0-1, а на реваншот ќе биде ослабен без суспендираните Радески и Згуро. Поуспешниот од овој дуел ќе обезбеди пласман во групната фаза во Конференциската лига за која жрепката е закажана за в петок.

Финалето од Купот на Македонија место во Струмица ќе се игра на тренинг-центарот „Петар Милошевски“ во Скопје

Бошко Тасиќ — Fri, 05 May 2023 04:32:46 +0000

Иако беше најавено дека фудбалскиот Куп на Македонија на 20-ти мај во кој ќе играат Струга Трим Лум и бранителот на трофејот Македонија Ѓорче Петров ќе се игра во Струмица, сепак ФФМ се одлучи тој да се одигра во Скопје. Пред скоро еден месец Управниот одбор на Фудбалската федерација на Македонија донесе одлука финалето да се игра во Струмица за првпат по пет години. Сепак, на стадионот „Благој Истатов подолг период има проблеми со тревната подлага и ФФМ ја смени одлуката. Место во Струмица Струга Трим Лум и Македонија Ѓорче Петров ќе играат во Скопје и тоа на тренинг центарот на ФФМ „Петар Милошевски“. На Националната Арена нема можност да се игра затоа што ќе биде затворена поради јунскиот квалификаицски натпревар против Украина.