Струга – Kurir.mk

Состанок на експертски тим за охридското крајбрежје во Струга

Ивона Петрова — Thu, 05 Oct 2023 15:29:23 +0000

Мешовитиот експертски тим од Обединетите нации, УНЕСКО, УНДП, УНЕП и Северна Македонија за изработка на Студијата за оправданост за урбанистичкиот план за крајбрежниот појас на Охридското Езеро денеска имал работен состанок со градоначалникот на Општина Струга Рамис Мерко. Предводник на тимот, како што соопшти Општина Струга, била Џејн Томсон, експерт поддржан од УНЕСКО, а покрај струшкиот градоначалник учествувале и неговите соработници од областа на урбанизмот, заштитата на природната средина, културното наследство и туризмот, како и локалниот економски развој. - Целта на овој работен состанок беше подетално запознавање на главните заинтересирани страни со процесот на подготовка на Студијата и примена на GIS алатка за прибирање, презентирање и управување со податоците во рамките на природното и културно наследство на Охридскиот регион, информира општинската прес-служба. Состанокот, како што е наведено, се засновал на иницијативата на работната група за подготовка на урбанистички план од државно значење за крајбрежниот појас на Охридското Езеро, формирана од Владата на Република Северна Македонија, - Со најголемо задоволство мора да истакнеме дека претставниците на овој мешовит експертски тим од домашен и меѓународен карактер е единствениот кој организирал ваков работен состанок во Струга, тим кој сериозно и со најголемо внимание ги слушнал нашите барања и потреби, кој реално ја оценил целокупната состојба со Охридскиот регион, и за делот од Струга, но и тим кој вистински ги дава на располагање сите свои човечки ресурси за успешна изработка и реализација на студијата за урбанистичките планови за крајбрежјето на Охридското Езеро, посочува Општина Струга. Оттаму обвинуваат дека најголем дел од проблемите и тешкотиите во Охридскиот регион произлегле од Општината Охрид и нејзините раководители, кои, како што е наведено, постојано, преку платени медиуми, организации и лобисти, ја напаѓале Општина Струга за секаков аспект во секое време и место, без никакви аргументи.

Во комбе возел 33 мигранти, приведен маж од Струга

Ивана Ефремовски — Wed, 27 Sep 2023 19:00:54 +0000

Денеска (27.09.2023) во 11:30 часот полициски службеници од РЦ за ГР Југ- ПС за ГП и ГН Богородица во близина на бензинска пумпа на автопат А1, кај Гевгелија, го лишија од слобода И.М.(41) од Струга, кој со товарно возило „фиат дукато“ со охридски регистарски ознаки, превезувал 33 мигранти. Известен е јавен обвинител од ОЈО за ГОКК Скопје и против возачот ќе биде поднесена соодветна кривична пријава.

Во Струга стартуваше светскиот шампионат во шах

Тале Кристо — Mon, 18 Sep 2023 20:50:38 +0000

Денес го отворивме светскиот шампионат во шах за сениори кој се одржува во Струга, каде учество земаат околу 50 шаховски федерации и организации од над 25 земји, објави на социјалната мрежа Фејсбук претседателот на Шаховската Федерација на Македонија Саша Богдановиќ. На сите учесници од името на Шаховска Федерација на Македонија / Chess Federation of Macedonia им посакуваме успех и убав претсој во преубавата Струга, пишува Богдановиќ во својата објава.

Ревија на народни носии во Струга

Тале Кристо — Sat, 16 Sep 2023 08:43:27 +0000

„Машки народни носии“ е тема на овогодинашната Ревија на народни носии што денеска ќе се одржи во центарот за култура „Браќа Миладиновци“ во Струга во организација на културно уметничкото друштво „Илинден“, со поддршка на Министерството за култура. Раководителот на КУД „Илинден“ Љупчо Милошески информира дека на сцената ќе продефилираат 20 ревијалци, кои ќе ги претстават машките народни носии на 11 колекционери и културно уметнучки друштва. - Годинашната тема е „Машки народни носии“ и секој учесник треба да претстави народни носии со оваа тематика. Во соработка со Домот на културата од Гевгелија ќе биде прикажана и адаптација на Лазаренки - реликвија на етничкиот предел Бојмија, изјави Милошески за МИА. Ревијата на народни носии во Струга е со долгогодишна традиција, која по пауза од седум години, пред три години беше возобновена од КУД „Илинден“.

Деца и нивните татковци нападнати на плажа во Струга

Ивана Ефремовски — Sat, 26 Aug 2023 14:47:50 +0000

На 25.08.2023 во 20:30 часот во ОВР Струга А.С.(44) од с.Љуботен, скопско пријавил дека околу 19:00 часот на плажа во Струга тој заедно со негов роднина А.Н. и нивните деца, по претходно недоразбирање, биле физички нападнати од едно лице. Напаѓачот употребил тврд и остар предмет. Се преземаат мерки за расчистување на случајот.

Водата во Струга забранета за пиење

Ивона Петрова — Tue, 15 Aug 2023 17:32:43 +0000

Водата за пиење од градскиот водовод во Струга е забранета за конзумирање поради дефект на водоводната мрежа, соопшти денеска јавното претпријатие „Водовод и канализација“. Работните тимови на претпријатието, според информацијата, се на терен е работат на надминување на проблемот. - Ги замолуваме сите граѓани да не ја користат водата за пиење до следното известување, порачуваат од ЈП „Водовод и канализација“ – Струга.

ДКСК до обвинителство ќе достави иницијатива за кривично гонење на градоначалникот Мерко

Ивана Ефремовски — Fri, 04 Aug 2023 12:34:13 +0000

Државната комисија за спречување корупцијата (ДКСК) на денешната седница соопшти дека ќе достави иницијатива до Основното јавно обвинителство Струга за кривично гонење на градоначалникот на Струга, Рамиз Мерко за злоупотреба на службената положба и овластување. Како што посочија членовите на ДКСК, Мерко на незаконски начин на два пати назначил вршител на должност, в.д директорка на основно училиште во Струга која немала завршено високо образование, ниту го имала потребното работно искуство. Од таму предлагаат кривично да се гонат и в.д. директорката и уште неколку други вработени, кои и помогнале да фалсификува документи кои и биле потребни за изборот на функцијата директор. -Градоначалникот на општина Струга спротивно на законот на два пати ја назначил за в.д. директорка наставничката по англиски јазик, иако таа не ги исполнувала условите за тоа. Дополнително тој не го задолжил училишниот одбор да донесе одлука за објавување на јавен повик за избор на директор на училиштето. Пријавената в.д. директорка предавала предмети за кои не била стручна и за кои е потребно високо образование. Имала четири години и осум месеци работно искуство, што не е доволно за да биде назначена за директор. Дополнително во тоа време таа немала уверение за положен испит за директор, а училишниот одбор не донел одлука за распишување на јавен повик. Сето тоа го направила со фалсификувани службени исправи. Во исто време директорката сама на себе со анекс договор си го зголемила фондот на часови што е спротивно на законот. Во тоа и помагале поранешни директори. Со тоа тие ја злоупотребиле службената положба и фалсификувале слижбени исправи, рече членот на ДКСК, Шемси Салаи. (МИА)

Детали за обидот за убиство на струшкиот началник: Го блокирал со возило, се заканил дека ќе го убие со пиштол…

Ристе Здравков — Sat, 29 Jul 2023 16:12:00 +0000

Лице на 44-годишна возраст е осомничено за обидот за убиството врз началникот на полицијата во Струга, кој во текот на вчерашниот ден беше избоден со нож. Според деталите од Обвинителството, додека началникот бил во својот автомобил, осомничениот го престигнал во близина на Медицинскиот центар во Струга и паркирал паралелно со него. Најпрвин започнал да му вика и да му се заканува дека ќе го убие со пиштол, обвинувајќи го началникот дека постојано испраќал полициски службеници да го следат. Началникот излегол од возилото и меѓу нив настанала кратка физичка пресметка, по што ги раздвоиле случајни минувачи. Потоа струшкиот началник влегол во автомобилот за да повика полиција, но во тој момент осомничениот го препаркирал возилото зад него, излегол со нож во раката и му нанел расекотина под долната вилица кон вратот, со должина од 11 и со длабочина од 5 сантиметри. Веднаш потоа избегал од местото на настанот. Јавниот обвинител до судијата на претходна постапка од Основниот суд во Струга достави предлог за определување мерка притвор за осомниченото лице, бидејќи постои опасност тој да се даде во бегство, можност да влијае врз оштетениот и сведоците, како и да го доврши обиденото кривично дело.

Со нож прободен началникот на струшката полиција, напаѓачот приведен

Ристе Здравков — Fri, 28 Jul 2023 19:05:41 +0000

Четириесет и четири годишен жител на струшкото село Велешта е приведен по напад на началникот на Полициската станица во Струга. Информацијата за МИА ја потврди портпаролот на СВР Охрид Стефан Димоски. – Околу 19 часот во Струга од полициски службеници од ОВР Струга е лишен од слобода С.Н. (44) од струшкото село Велешта, затоа што денеска околу 17.30 часот на улицата „Ристо Крле“ во Струга со остар предмет го нападнал А.Д.(46) од Струга, изјави Димоски. А.Д., според него, е пренесен во Општата болница во Струга каде му се констатирани тешки телесни повреди. Против напаѓачот, во координација со јавниот обвинител ќе биде поднесена соодветна кривична пријава, истакна Димоски.

Гореше сендвичара во Струга- пожарот зафатил уште 7 објекти

Катерина Бојаџиева — Wed, 26 Jul 2023 11:29:17 +0000

На 26.07.2023 околу 03.00 часот во полициската станица Струга било пријавено дека на ул.„Боро Хаџиески-Путе“ во Струга настанал пожар во сендвичара сопственост на Б.И. од Лабуништа. Од пожарот биле зафатени уште седум деловни објекти. Повредени лица нема, а пожарот бил изгаснат од екипа Територијалната противпожарна единица Струга.