струмица никоб – Kurir.mk

Струмица Никоб дојде до десеттата јубилејна титула во македонската одбојка

Бошко Тасиќ — Wed, 26 Apr 2023 18:09:51 +0000

Одбојкарите на Струмица Никоб дојдоа до третата победа во финалната серија против ГОК Борец и ја освоија јубилејната десетта титула. Струмичани славеа со 3:0 на домашен терен и ја заокружија серијата на доминантен начин. Во првиот сет Струмица Никоб немаше проблеми и го доби со 25:18, но Борец сериозно се закани во вториот сет. Имаше водство од 24:22 во поени, но повторно не успеа да го комплетира сетот. Искусниот Васе Михаилов влезе на теренот и помогна Струмица Никоб да освои четири поени во низа, за освојување и на вториот сет со 26:24. Третиот сет потоа беше рутина за струмичкиот тим. Го доби со 25:19 и дојде до десеттата шампионска титула во клупската историја.

Струмица Никоб ја одбрани титулата во машкиот Куп на Македонија

Бошко Тасиќ — Sat, 25 Mar 2023 18:15:12 +0000

Одбојкарите на Струмица Никоб се старо-нови шампиони во Купот на Македонија. Фаворитот ја оправда улогата и во финалето беше подобар од ГОК Борец од Велес. Струмичани до посакуваниот успех дојдоа во три сета, кои ги добија со 25-7, 25-23 и 25-18. Во првиот сет Струмица Никоб покажа целосна доминација и загуби само седум поени, а во вториот, иако Борец имаше 19-21, фаворитот го сврти во своја корист. Владо Милев кај победникот имаше 12 поени, Хараба заврши со 11, Алексов со 7, Глобоцки заработи 5, Наков 4, а Ефтим Ричлиев 2. Кај ГОК Борец најефикасни беа примачите Волков со 14 и Костиќ со 12 поени.

Одбојкарите на Струмица Никоб со убедлив пораз се враќаат од Амстердам

Бошко Тасиќ — Tue, 20 Sep 2022 20:30:05 +0000

Струмица Никоб убедливо со 3-0 во сетови беше поразена од холандскиот тим Динамо Апелдрон во првиот меч од првото квалификациско коло во одбојкарската Лига на шампиони. Холандскиот тим го доби првиот сет со 25-20, а во следните два Апелдрон беше уште поубедлив, нив ги доби со 25-13 и 25-16. Канаѓанецот со македонско потекло, Деан Глобоцки со шест поени беше најдобар во составот на Струмица, додека Бекхуд со 14 поени беше најдобар кај Динамо Апелдрон. Реваншот се игра за седум дена во Скопје, но по овој пораз мисијата на Струмица за пласман понатаму стана речиси невозможна.