Струмичка болница – Kurir.mk

Заев ќе донира амбулантно возило за потребите на струмичката болница

Ивона Петрова — Sun, 15 Nov 2020 09:01:52 +0000

Премиерот Зоран Заев и министерот за здравство Венко Филипче, денеска ќе ја посетат ЈЗУ Општа болница Струмица каде ќе имаат средба со директорот на болницата Наќе Гогов. Во рамки на средбата премиерот Заев, ќе реализира и лична донација – амбулантно возило за потребите на болницата, соопштија од владината прес-служба. По средбата пред зградата на болницата Заев, Филипче и директорот Гогов ќе дадат изјави за медиумите.

Ефтимов: Болницата во Струмица бара донации за болнички возила, а власта одби амандман на ВМРО-ДПМНЕ со ребалансот да се набават три нови возила за струмичката болница

Тале Кристо — Sun, 01 Nov 2020 10:42:59 +0000

Вчера јавноста беше сведок на очајната состојба во која се наоѓа македонското здравство. Дојде време Директорот на „ЈЗУ Општа болница-Струмица” Наќе Гогов вчера да бара донации за болницата да набави болнички возила, поради малиот број и дотраеноста на постоечките со кои не може да се излезе во пресрет на здравствената криза во Струмица. Веројатно поради притисоци директорот Гогов потоа го повлече овој апел, но за жал остана чувството и реалноста дека Струмица нема доволно возила во моментот да одговори на потребите на граѓаните во услови на епидемија од корона вирусот, истакна на денешната пресконференција пратеникот од редовите на ВМРО-ДПМНЕ Дајанчо Ефтимов. Во продолжение интегрално ви ја пренесуваме целата изјава од прес-конференцијата на Ефтимов: За информација на јавноста како пратеници од струмичкиот регион поднесовме амандман на ребалансот на буџет, кој е во постапка, за прераспределба на 3,5 милиони денари за набавка на три амбулантни возила за Болницата во Струмица, но за жал пред неколку дена власта овој амандман го одби со образложение дека не е потребна таква набавка. Очигледно е дека власта или не ја знае состојбата во Струмичката болница или не сака да ги помогне капацитетите, само затоа што предлог амандманот на буџетот доаѓа од пратениците од ВМРО-ДПМНЕ. Оттука сметам дека е крајно лицемерен одговорот на пратеникот Костадин Костадинов, кој исто така доаѓа од Струмица и кој најави дека интервентно ќе се обезбедувало возило за Струмичката болница, кога истиот и власта од неговата партија можеа тоа да го направат со поддржување на амандманите на опозицијата, а доколку успееја да обезбедат и уште едно возило, дотолку подобро и за болницата и за граѓаните на Струмица. Патем Костадинов најавува, замислете итна набавка на болничкото возило дури после два месеци, а на болницата и требаат токму сега во услови на илјадници заболени дневно од корона вирус. Зоран Заев во Струмица е власт 18 години, што како пратеник, што како градоначалник, што како премиер и тоа што болницата нема возила во услови на пандемија е негов личен неуспех и пораз. И пандемијата од корона вирусот и проблемот со болничките возила во струмичката болница не се од вчера, и затоа требаше уште пред неколку месеци да се решаваат ваквите состојби. На крајот, бидејќи Костадинов и Заев сакаа да пресметуваат колку болнички возила може да се набавуваат од продажби на други работи, еве да ги прашам колку болнички возила чини возниот парк на Заеви? Колку болнички возила можеа да се набават само од бентлито или од мајбахот на Заеви? Колку возила може да се набават ако се продаде барем возниот парк од четирицикли и луксузни мотори кои го поседува свитата на Заеви? Замислете 3,5 милиони денари за набавка на три возила за болницата, е далеку помала сума од едно од овие возила на Заеви. Оваа сума веројатно ја трошат во едно полугодие само на сервисирање или гориво за својот возен парк. Што е поважно, луксузот на Заеви или здравјето и животите на граѓаните на Струмица и Македонија? Хипокризијата на власта на Заев излезе на виделина. Очекувам власта да се освести час поскоро и да му помогне конкретно на здравствениот систем, затоа што тој се бори против пандемијата и спасува животи, а не пиарот на владата, рече Ефтимов.

Директорот на Заев и Филипче во струмичката болница на ФБ моли за донации за купување на амбулантно возило (ФОТО)

Дарко Андоновски — Sat, 31 Oct 2020 16:28:48 +0000

Директорот на струмичката болница, Наќе Гогов на Фејсбук бара донации од граѓаните за да се купи ново болничко возило. Неверојатно, во време кога во Собранието се расправа за ребалансот на буџетот во Македонија, болниците ги молат граѓаните за помош, бидејќи власта не им обезбедува основи средства за работа. - Почитувани пријатели, мои ценети сограѓани , знам дека не би требало да се барат донации на ваков начин , меѓутоа заради малиот број на болнички возила, заради тоа што се застарени и често се расипуваат, заради ситуацијата во која се наоѓаме со корона вирусот каде транспортот на пациенти е неколкукратно зголемен - болничките возила се 24 часа вклучени во транспорт на пациенти од нашата болница до клиничките центри и обратно,ние како "ЈЗУ Општа болница -Струмица" имаме потреба од ново болничко возило кое ќе биде од голема корист за сите граѓани од Струмица и струмичкиот регион. Да се организираме и да си помогнеме самите. Ве замолувам сите кои сте во можност и сакате да донирате од срце , каде сумата ќе биде по ваша желба да донирате на следната жиро сметка :660270170248596 . Се надевам дека ќе ја покажеме хуманоста на дело. Ве замолувам споделувајте го статусот.“ напиша директорот на струмичката болница, Наќе Гогов. По ова јавноста веднаш започна да коментира дека директорот на Заев и Филипче со ова молење на Фејсбук за донации уште еднаш докажа дека буџетот и ребалансот е во катастрофална состојба во нашата земја, особено во време на кризата со коронавирусот.

Се огласија од МЗ, еве зошто момчето во Струмица примало инфузија пред болницата

Ивана Ефремовски — Sat, 17 Oct 2020 15:39:55 +0000

Министерството за здравство ја разреши дилемата зошто младиот пациент примаше инфузија пред Струмичката болница. Оттаму објаснуваат дека не станува збор за преполнетост на болничкиот капацитет, туку на барање на родителите на младото момче, кое се лекува од бубрежна болест, бидејќи им било страв да влезе внатре поради ковид 19. „Од струмичката болница не информираа дека пациентот кој се лекува од хроничка бубрежна инсуфитиентиа примил терапија до вратата на болницата поради тоа што неговите родители не дозволувале да биде внесен во болницата од страв од ковид-19. Тоа е причината зошто на младиот пациент му е дадена терапија пред влезот на болницата“, објаснија за Фактор од Министерството за здравство.

На пациент во Струмица му се дава медицинска помош пред болница, внатре нема место! (ВИДЕО)

Ивана Ефремовски — Sat, 17 Oct 2020 10:30:20 +0000

За тоа колку се преполни болничките капацитети, доволно говори едно видео кои редакциите на Фактор и Хаштаг го добија од читател од Струмица. -Според неговите тврдења, станува збор за струмичката болница, која поради преполнетите капацитети, не може да ги собере сите граѓани, па на дел им се дава инфузија, односно медицинска помош и надвор од болницата, односно точно пред нејзиниот влез, пишува Фактор. Она што може да се види, е дека веројатно станува збор за помлад пациент, за кого можеби и нема потреба од целосна хоспитализација. Фактор нема точна информација кога е направено видеото.

Коронавирусот ги исполни капацитетите на струмичката болница, директорот бара дополнителен персонал

Дарко Андоновски — Mon, 12 Oct 2020 13:19:47 +0000

Зголемениот број на заразени од Ковид-19 целосно ги исполни сместувачките капацитети во струмичката болница, дури и тие кои беа дополнително отворени, информира директорот д-р Наќе Гогов. Покрај Инфективното одделение, кое е веќе полно и таму се лекуваат 15 пациенти со полесна клиничка слика, пополнет и дополнителниот од 13 кревети кој беше отворен во поранашените хируршки амбуланти. -Планираме да ги прошириме капацитетите со поставување на уште шест-седум кревети во другите амбуланти, кои се веднаш до хируршките. Но, засега најголем проблем ни е персоналот и тоа како лекари, така и сестри. Ги немаме доволно за да ја покриваат работата во овој оддел на Инфективното одделение, вели директорот Гогов. Тој вчера побарал помош од заменик-министерот за здравство за обезбедување персонал за да се пополнат празните места за да може да се лекуваат ковид-пациентите. -Со постојниот персонал повеќе не можеме и неиздржливо е да се постигне потребниот обем на работа. Веќе од среда очекувам да ни биде испратен дополнителен персонал за да може да се покрие и новиот простор што треба да се отвори за сместување на пациенти, додаде директорот на струмичката болница, д-р Наќе Гогов. Инаку, проблемот добива уште повеќе на тежина, бидејќи двајца лекари, три медицински сестри и двајца административци од струмичката болница се позитивни на Ковид-19 и се во домашна изолација.

Хаос во болницата во Струмица: Со коронавирус заразени доктори, медицински сестри и административци

Ивана Ефремовски — Thu, 08 Oct 2020 10:00:47 +0000

Двајца лекари, три медицински сестри и двајца административци од струмичката болница се позитивни на Ковид-19 и се во домашна изолација, потврди директорот на ЈЗУ „Општа болница Струмица", д-р Наќе Гогов, пренесе Канал 5.

Според него отсуството од работа на лекарите и сестрите се чувствува во секојдневното работење и тешко се организира работата на одделенијата од каде се заразените. -Обезбедуваме персонал од другите одделенија, каде што нема позитивни. Засега успеваме, но тешко. Тие се веќе седум денови во изолација и се надевам дека бргу ќе се вратат на секојдневните обврски, рече директорот Гогов. Информираше дека се полнат капацитети во болницата каде се примаат ковид-пациенти. Во дополнителниот адаптиран простор на поранешните хирурушки амбуланти има слободни само два кревети, додека капациетите на Инфективното оделение се оддамна полни. -Доколку не почне да се намалува бројот на заразени во нашата општина, тогаш и првиот спрат од новиот болнички крак ќе го подготвиме за прием на ковид-пациенти, додаде директорот.

Нов инцидент во струмичката болница, почина деветмесечно бебе

Магдалена Андонова — Mon, 21 Sep 2020 18:23:14 +0000

Попладнево околу 16 часот на детското одделение при струмичката болница починало деветмесечно бебе од село Банско, а со правовремена интервенција на полицијата е спречен инцидент, откако еден од роднините на детето бурно реагирал обвинувајќи ги лекарите за смртта на детето, изјави за МИА директорот на болницата, д-р Наќе Гогов. -Детето во болницата било донесено во многу тешка состојба и покрај обидите за реанимација од страна на лекарите тоа починало. Обезбедувањето на болницата навреме ја повикало полицијата и е спречен поголем инцидент. Јас ја разбирам тагата на блиските, но никој нема право да реагира како што не треба, рече д-р Гогов. Инаку, денес претпладне се случи голем инцидент на инфективното одделение во болницата, кога група од дваесетина граѓани украдоа мртовец. Пациентот, откако бил примен во тешка состојба, по дваесет минути починал, а дваесетина граѓани од Турското маало во Струмица насилно го извлекле починатиот со кревет надвор во дворот на болницата, го дигнале од креветот и го префриле преку оградата, го ставиле во комбе и се упатиле во непознат правец.

СЕ СЛУЧИ КАКО ВО ХОРОР ФИЛМ: Се огласи директорот на струмичката болница- „мртовецот со се кревет го украдоа преку прозор“

Дарко Андоновски — Mon, 21 Sep 2020 11:58:13 +0000

Триесет луѓе денеска ја скршиле вратата на инфективното одделение во Струмичката болница и го земале пациентот, кој починал, а на кој претходно му бил направен тест за Ковид 19. Според информациите, пациентот во раните утрински часови бил примен на инфективното одделение како сомнителен случај на Ковид 19 и веднаш му бил земен брис дали е носител на вирусот или не. Во меѓувреме, неговата состојба се влошила и тој починал. Резултатите од неговиот тест се уште не се готови. Директорот на општата болница во Струмица за овој случај со украдениот мртовец даде и своја изјава за медиумите. Видеото кое го објави ТВ канал ВИС Струмица, погледнете го во продолжение, или ТУКА.

Пациент почина од корнавирус во Струмичката болница

Ивана Ефремовски — Wed, 22 Jul 2020 13:55:56 +0000

Маж на 67-годишна возраст од струмичко синоќа починал на Инфективното одделение при Струмичката болница од нагло губење на кислород во белите дробови предизвикано од коронавирусот, соопшти директорот на Центарот за јавно здравје Петре Витанов. Лицето било примено пред четири дена на Инфективното одделение и не потекнува од досега познат кластер. Членовите на семејството на починатиот се во изолација и се под здравствен надзор. Според Витанов, последните случаи во струмичкиот регион се нови и се од непознат кластер. Денеска се извршени 12 тестирања на пунктот на Центарот за јавно здравје во Струмица, а директорот Витанов информираше дека сите термини за тестирање до сабота се пополнети. Досега во Струмица се евидентирани 34 случаи позитивни на Ковид-19, од кои три лица починаа, 15 се оздравени, а 16 се активни.