суперлига – Kurir.mk

Јувентус ја напушти Суперлигата

Ивона Петрова — Fri, 14 Jul 2023 09:27:03 +0000

Најтрофејниот италијански фудбалски клуб Јувентус објави синоќа преку својот официјален сајт дека се повлекува од проектот за формирање Суперлига, зад кој сега остануваат само шпанските гиганти Реал Мадрид и Барселона. Одлуката на Јувентус доаѓа само неколку денови откако клубот од Торино се спогоди со УЕФА околу казната поради финансиски малверзации поврзани со плати на играчите и доби зелено светло едногодишната суспензија да ја издржи во сезоната 2023/24 во која требаше да настапува во Конферециската лига. Обидот да се формира европска фудбалска Суперлига, замислена како паралелно натпреварување на Лигата на шампиони од 12 клубови од Англија, Шпанија и Италија, пропадна само неколку денови по иницирањето во април 2021 година под жесток притисок од фудбалските навивачи и УЕФА. Зад проектот официјално сè уште стојат мадридски Реал и Барселона, додека проектот експресно го напуштија Манчестер јунајтед, Манчестер сити, Челзи, Ливерпул, Тотенхем, Арсенал, Милан, Интер и Атлетико Мадрид.

Манчестер Јунајтед би можел да ја поддржи Суперлигата?

Бошко Тасиќ — Sat, 11 Feb 2023 19:01:36 +0000

Суперлигата се обидува да се врати на мапата, а упорното трио, Јувентус, Реал Мадрид и Барселона, сака да најде нови поддржувачи. Еден од нив во иднина би можел да биде Манчестер Јунајтед. „Европскиот фудбал се наоѓа во опасност од колапс. Време е за промени. спортска и финансиска страна“, изјави пред неколку дена извршниот директор на Суперлигата, Бернд Рајхарт. Барселона, Јувентус и Реал Мадрид издржаа, излегоа на суд, се бореа против монополот на УЕФА и се чини дека ја добиваат битката. Останатите европски гиганти почнуваат да се будат и за очекување е наскоро да пристапат кон најупорната тројка. Манчестер Јунајтед би можел да биде првиот што ќе го направи тоа. Манчестер Јунајтед минува низ деликатна фаза. Сопственоста на клубот се менува бидејќи семејството Глејзер одлучи да го продаде. Има неколку заинтересирани купувачи, пред се најбогатиот Британец Џим Ретклиф и катарското кралско семејство Ал Тани. Не е исклучена опцијата новите сопственици да се согласат да играат во Суперлигата. Тренерот Ерик Тен Хаг кажа нешто слично меѓу редови. „Мислам дека сегашната структура на натпреварувања е во ред, но секогаш ќе има иницијатива да се подобри фудбалот. Така е во животот. Луѓето секогаш сакаат да изградат нешто подобро. Тоа е секогаш добро затоа што е добро за фудбалот“, изјави Тен Хаг.

УЕФА пак едногласно го отфрли проектот Суперлига

Дарко Андоновски — Wed, 09 Nov 2022 19:54:57 +0000

Челниците на УЕФА и најсилните европски лиги одржаа состанок во Нион со претставници на компанијата „А22 Спортс менаџмент‘, која стои зад проектот Суперлига, и уште еднаш ја офтрлија идејата за формирање на ова натпреварување. Во соопштението на УЕФА се наведува дека на состанокот присуствувале претседателот Александар Чеферин, претставници на европските клубови и лиги, како и претставници на Здружението на навивачи и Синдикатот на фудбалери (FIFPRO) од една, и извршните директори на „А22“, Бернд Рајнхарт, Анас Лаграри и Џон Хан, од друга страна. – Во согласност со единството на европскиот фудбал, УЕФА и фудбалските актери уште еднаш за време на дискусијата едногласно го отфрлија образложението за проект каков што е европска Суперлига, соопшти УЕФА. Од 12 европски клубови кои иницираа формирање Суперлига, зад идејата останаа само Реал Мадрид, Барселона и Јувентус.

Германските клубови и натаму против Суперлига

Ивана Ефремовски — Fri, 21 Oct 2022 12:55:20 +0000

Раководствата на Баерн Минхен и Борусија Дортмунд ја повторија поддршката за УЕФА која се противи на формирање европска Суперлига. -Проектот Суперлига пропадна пред повеќе од една година. Нашиот став по тоа прашање е јасен, изјави членот на раководството на Баерн, Оливер Кан. Поддршка за УЕФА против Суперлигата изрази и Борусија Дортмунд. -Лигата на шампиони има одличен формат. Проширувањето, кое е предвидено за 2024 година, ќе го унапреди ова натпреварување. Ја поддржуваме УЕФА која се грижи и за помалите клубови, изјави шефот на бундеслигашот од Дортмунд, Јоаким Вацке. Претходно оваа недела, поранешниот прв човек на германската телевизија РТЛ, Берн Рајнхарт, беше избран за нов извршен директор на компанијата А22 Спорт Менаџмент, која стои зад проектот Суперлига. (МИА)

Компанијата која стои зад фудбалската Суперлига доби нов директор

Магдалена Андонова — Wed, 19 Oct 2022 13:33:33 +0000

Поранешниот шеф на германската телевизија РТЛ, Берн Рајнхарт, е избран денеска за нов извршен директор на компанијата А22 Спорт Менаџмент, која стои зад контроверзниот проект на европска суперлига во фудбал. Европската Суперлига е проект кој го иницираа 12 клубови во април лани, но поради жестоки критики од јавноста идејата ја напуштија девет клубови – Арсенал, Челзи, Ливерпул, Манчестер сити, Манчестер јунајтед, Тотенхем, Интер, Милан и Атлетико Мадрид. Суперлигата сега ја поддржуваат Реал Мадрид, Барселона и Јувентус, а одлуката за именување на нов директор доаѓа во време кога се чека пресудата на Европскиот суд на правдата по поднесената тужба од Суперлигата. Во поднесокот Суперлигата ја тужи УЕФА за монопол над меѓународните натпреварувања со акцент на Лигата на шампиони. (МИА)

Стартува новата ракометна сезона

Ивона Петрова — Sat, 03 Sep 2022 08:30:02 +0000

Со четири натпревари во рамки на првото коло денеска официјално почнува новата сезона во македонската ракометна Суперлига. Актуелниот шампион Вардар 1961 ја почнува одбраната на титулата на гостински терен против Вардар Неготино со почеток во 18:30 часот, додека во истиот термин Прилеп е домаќин на Алкалоид. Од 19:30 часот на програмата се пресметките меѓу Бутел – Охрид и Радовиш – Јуниор, додека в недела Струга е домаќин на Куманово. Лигата брои вкупно 16 екипи поделени во две групи. Првите четири тимови по регуларниот дел ќе продолжат да разигруваат за титулата.

Роналдо: Суперлигата ќе се случи

Ивона Петрова — Wed, 02 Feb 2022 07:24:51 +0000

Поранешниот најдобар фудбалер на светот, Бразилецот Роналдо го сподели своето мислење за создавањето на европската Суперлига. – Тоа ќе се случи порано или подоцна. Фудбалот секогаш се развива и се подобрува. Но, не знаеме како ќе заврши. Врвните клубови бараат се повеќе пари за да ги платат играчите кои вредат сe повеќе и повеќе. Суперлигата нема да биде како претходната затоа што беше катастрофа, туку ќе се создаде нов формат, изјави Роналдо за „Марка“. Според поранешниот напаѓач, нема дијалог меѓу фудбалските лидери за подобрување на фудбалската индустрија. – Не разбирам зошто ФИФА и УЕФА не разговараат меѓу себе, вели тој. Претходно, на 2 јануари беше објавено дека Реал Мадрид, Барселона и Јувентус сакаат годинава да го рестартираат проектот Суперлига. На 19 април 2021 година, 12 клубови го објавија создавањето на Суперлигата. По протестот на навивачите и заканата со санкции од УЕФА проектот беше прекинат.

Бадел 1862 испиша историја, девојките се пласираа во Суперлигата

Ивона Петрова — Thu, 16 Dec 2021 06:56:42 +0000

„Баделки“ славеа убедлива победа против Партизан (58:46) доволно за потврда на позицијата „4“ и место во следниот круг од натпреварувањето. Девојките во „сино-жолта“ комбинација стигнаа до историски пласман во првата „четворка“ која продолжува во втората фаза од женското регионално натпрварување. За тоа им требаше уште една победа над белградски Партизан, а „баделки“ вчеравечер го реализираа тоа. Го најавија планираниот триумф домашните кошаркарки уште во првото полувреме во кое по израмнетата прва четвртина, во втората дојдоа до посакувана разлика, и тоа од десет поени, реализирана преку неколку „контри“ и „полуконтри“. Во голем дел преку Трајчевска, на која одлично и асистираше Кметовска, која и немаше рамноправен противник во рекетот. „Ниската постава“ на екипата од Белград се обидуваше со брза игра и доста шутеви од далечина да парира во тоа, но без некој голем успех. На полувремето, Бадел 1862 водеше со сосема солидни (34:24). Но избраничките на тренерот Перо Стамески не се задоволија со тоа водство. Притиснаа уште повеќе по одморот. Во третиот дел од играта му дозволија на противникот да постигне само шест поени Дадоа двојно повеќе 13, и стигнаа до недостижна предност (47:30). Кметовска финишираше со дабл-дабл ефект од 20.поени и 10. скока, двоен скор имаше и Нена Трајчевска изразен преку 16.поени и 13.скока (плус и четири асистенции), додека двоен број на поени – 15, реализираше и Димова. Во Суперлигата, која стартува по новата година, кошаркарките на Бадел 1862 ќе играат уште осум натпревари против екипите на Будуќност Бемакс, Орлови, Војводина 021 и Триглав, кои беа најдобри во групата „А“ во која настапуваше нашиот втор претставник – Баскет Кам 2011.

Иницијаторите на фудбалската Супер лига најавуваат нов концепт

Ивона Петрова — Fri, 15 Oct 2021 12:48:29 +0000

Иницијаторите на фудбалската Супер лига, чиј првичен концепт пропадна под жесток притисок на бројни институции и јавноста, сè уште не се откажале од намерата да го заживеат новото натпреварување, јави германската новинска агенција ДПА. Весникот „Франкфуртер Алгемајне Цајтунг“ пишува денеска за промени во концептот на Супер лигата, замислена како алтернатива на Лигата на шампиони на УЕФА, според кој во новото натпреварување би учествувале 20 најдобри екипи, со можност и за така наречена „втора лига“ со дополнителни 20 тимови, од кои сите би продолжиле да играат во своите национални лиги. Германските новинари наводно имале увид во документот, кој открива некои нови правила во обидот да заживее Супер лигата, а истовремено содржи и критики за постојните натпреварувања во организација на УЕФА. Зад идејата за формирање Супер лига останаа само Јувентус, Реал Мадрид и Барселона, а другите девет иницијатори се повлекоа.

Се лажете дека е мртва: Перез не се откажува од Суперлигата

Тале Кристо — Thu, 22 Apr 2021 06:55:31 +0000

Претседателот на Реал Мадрид и претседател на Европската Суперлига, Флорентино Перез останува уверен во проектот за новото натпреварување. Според него, досега никој не го напуштил списокот на учесници, и покрај изјавите. – Не се плашиме од одмазда од УЕФА или ФИФА. Ако мислите дека Суперлигата е мртва, апсолутно не сте во право. Досега никој не ја напушти Суперлигата. Никој не плати провизија за ова. Потпишаните договори се обврзувачки. Клубовите од Премиер лигата не можат само да си заминат. Ние нема да поднесеме тужби, но тоа се сериозни луѓе и заедно ќе најдеме решенија, изјави Перез за „Ел Ларгуеро“ На 19 април беше објавена Суперлигата. Своето учество тогаш го потврдија: Арсенал, Челси, Ливерпул, Манчестер сити, Манчестер јунајтед, Тотенхем, Реал, Барселона, Атлетико, Милан, Интер и Јувентус. Флорентино Перез, кој има слична функција во мадридскиот клуб, стана претседател на лигата. Вчера, управата на Суперлигата одлучи да го прекине проектот по одбивањето на англиските клубови да учествуваат на турнирот.