сведочење – Kurir.mk

Класната на Коста Кецмановиќ мора да сведочи на суд: „Таа жена е во шок, не е истата наставничка“

Ивана Ефремовски — Tue, 31 Oct 2023 13:24:19 +0000

Според неофицијални информации, класниот раководител на момчето убиец, Коста Кецмановиќ (14) кој на 3-ти мај уби девет ученици и вработен во обезбедување на ОУ „Владислав Рибникар“ е во лоша психичка состојба поради страшниот масакр што го извршил нејзиниот ученик. Одделенскиот раководител од минатогодишнотo 7/2 во основното училиште „Владислав Рибникар“ ќе треба да сведочи пред суд во граѓанската постапка што ја покренаа 27 оштетени, односно родителите, браќата и сестрите на жртвите на момчето, против момчето убиец, неговите родители, но и училиштето. Одделенскиот раководител на момчето ќе треба да објасни како тој бил префрлен во нејзиниот клас пред почетокот на учебната година и чија одлука била. Некои родители на ученици од ова училиште за медиумите изјавија дека класниот раководител нема никаква врска со доаѓањето на момчето во нејзиниот клас и дека тоа е одлука на директорот. „Таа жена е во шок. Веќе не е истата наставничка. Знаеме дека ќе сведочи на суд. Кога тоа момче се запиша во нејзиниот клас, таа ги упати децата добро да го прифатат и да го вклучат и во училишните активности и во дружењето. До тој ден и се чинеше дека нема проблеми. Сега жената не знае што да каже, а таа и сите го колнеме денот кога момчето дојде на час“, изјави мајката на еден од учениците. Инаку, во граѓанската постапка, покрај одделенскиот раководител, ќе бидат повикани и други вработени во училиштето да зборуваат за кобниот ден, но и за тоа што му претходело на хоророт.

Синот на Бред Пит и Анџелина Џоли сведочеше против татко му

Магдалена Андонова — Fri, 19 Mar 2021 10:59:20 +0000

Најстариот син на Анџелина Џоли и Бред Пит, 19-годишниот Медокс Џоли Пит, сведочеше против неговиот татко за време на долгата битка околу старателството над децата на поранешната двојка. -Како возрасен, Медокс веќе сведочеше во тековниот спор за старателството и не беше многу ласкав кон Бред, дознава ексклузивно од извор, Us Weekly. Тој не го користи презимето Пит на своите документи, туку само Џоли, што не е легално. - Медокс сака законски да го смени своето презиме во Џоли, но Анџелина рече дека не го поддржува тоа, додаде изворот. Џоли минатиот петок достави нови докази до судот во кои Пит е обвинет за семејно насилство. Во документите се наведува дека актерката и нивните деца Медокс, Пакс, Захара, Шајло и близнаците Нокс и Вивиен се подготвени да понудат докази во прилог на наводите против Пит.

Мицкоски ќе сведочи за „27 април“

Ивона Петрова — Fri, 25 Dec 2020 08:07:24 +0000

Претседателот на ВМРО-ДПМНЕ Христијан Мицкоски денеска ќе сведочи за настаните во Собранието на 27 април. Во своето сведочење пред судот за настаните во Собранието, премиерот Зоран Заев ги амнестираше од одговорност Трајко Вељановски, Миле Јанакиески и Спиро Ристовски. -Не мислам дека главни осмислувачи и организатори се Миле Јанакиески, Спиро Ристовски, Трајко Вељаноски и другите тука, истакна Заев во сведочењето. На минатото рочиште според вештакот проф. Д-р Мирослав Котевски, доказите кои ги приложила Рускоска пред судот кога го подигнала обвинението не биле запечатени односно заштитени од промени, поради што тој се сомнева дека е можно некој да ги променувал – односно да направил фалсификат. -Материјалните докази кои ми беа предадени од страна на одбраната не содржат никаква заштита на датотеките (“xls” фајловите) со што се нарушена нивната доверливост како податоци, вели професорот Мирослав Котевски. Според него, во вакви незаштитени електронски докази секој кој имал контакт со нив до моментот на поднесување на обвинението можел да направи промена, односно фалсификат. -Дополнително, во ваквите датотеки може да се креираат непостоечки (фиктивни) нови записи кои никогаш реално како настан не постоеле. Тоа може да бидат текстуални пораки кои не биле разменети помеѓу два мобилни телефонски броја или две лица, говорна комуникација меѓу две лица која никогаш не била реализирана или приклучувања кон глобалната интернет мрежа, појаснува професорот. Дополнителен проблем е што според него во EXCEL датотеките не може да се утврди дали се правени измени во податоците поради фактот што измените и/или дополненијата може да се направат без запис (трага) за настанатата измена и/или дополна и без запис кој и кога ја направили таа измена и/или дополна. Индиции за можно фалсификување на доказите има поради неколку утврдени непостојани податоци од страна на вештакот, односно одредени разговори кои се запишани во една ексел табела, не се забележани во три други ексел табели во кои исто така би морало да ги има. Според вештото лице професор Котевски, ова е доволна причина да се посомнева во кредибилноста и веродостојноста на доказите. -Ова наведува на заклучок дека доверливоста на xls фајловите кои се дел од доказните материјали е проблематична, заклучи проф. Д-р Котевски на рочиштето кое започна со проблеми откако Рускоска во судот донела погрешен советник кој не бил од полето на стручност на Котевски.

Денеска тaткото на убиениот Ангел од Ѓорче сведочеше: Ми рече татко ова е лицето што го украде точакот.

Магдалена Андонова — Wed, 09 Dec 2020 14:36:27 +0000

По рочиштето за воведни зборови, во Кривичен суд Скопје, денеска продолжи судењето против Насер Ештрефи, обвинет дека во мај 2014 го лишел од живот Ангел Петковски во населбата Ѓорче Петров. Овој предмет со одлука на Врховен суд на РСМ е вратен на повторно одлучување. За настанот пред кривичниот совет по втор пат свој исказ даде мајката на починатиот Ангел Петковски, Благица. Денот на настанот како што истакна Благица, била на работа и преку телефон малиот син ја информирал дека точакот им е украден. -Воедно, и една пријателка ми се јави и ми кажа дека Ангел, е прободен со нож. Потоа со точак од работа тргнав накај дома, односно заминав на местото на настанот. Ми кажа дека Ангел, бил однесен во болица. Од гужвата некој зборуваше за ножот, слушав многу гласови, вриштења, рече сведокот Петковска. Таа уште додаде дека и сега се чувствува многу лошо, и дека нејзиниот син Ангел бил примерно момче. Таткото на починатиот Ангел, Сашо Петковски, кој бил на лице место кога обвинетиот Ештрефи, го пребодел неговиот син, истакна дека бил многу револтиран за кражбата на велосипедот и затоа двајцата тргнале по потрага на точакот. -Заедно со Ангел со кола тргнавме да го пресретнеме кај очната болница. Нашата цел беше да го најдеме точакот. По пат баравме, но не го видовме велосипедот. Тргнавме накај мостот на реката Вардар. Со голи раце тргнавме од дома. Потоа Ангел, ми рече татко ова е лицето што го украде точакот. Тој потоа се фати на појасот, го извади ножот и го пребоде Ангел. Јас потоа со дрво го удрив. Тој побегна заедно со ножот. Потоа се упатив кон очната болница да барам прва помош, рече сведокот Сашо Петковски. На денешното рочиште за овој предмет сведочеше и друг сведок кој на денот на немилиот настан шетал со семејството кога видел група на луѓе, односно тепачка. Повторната постапка против обвинетиот Насер Ештрефи, ја води судијката Дијана Груевска Илиевска. Како застапник на обвинението е обвинителот Дарко Јакимовски. Во образложението на одлуката на Врховен суд на РСМ, се вели дека во доказната постапка има недостатоци, и затоа случајот се враќа на повторно одлучување. Следното рочиште за овој предмет е закажано на 15 декември. (МИА)

Директорот на американската Поштенска служба сведочеше во Сенатот за покривање на изборите

Магдалена Андонова — Tue, 25 Aug 2020 08:31:59 +0000

Првиот човек на Поштенскaта служба на САД, Луис Деџој, синоќа сведочеше пред сенатската Комисија за национална безбедност и владини прашања во врска со планираното масовно гласање преку пошта во САД, поради пандемијата на Ковид-19. Пред комисијата тој кажа дека нема промена на политиката во однос на изборната пошта за изборите во 2020 година, и вети дека по пошта испратените гласачки ливчиња ќе бидат спроведени „безбедно и на време“ за ноемвриските избори. Деџој пред сенатската комисијата се обрати виртуелно. Ова е првпат директор на американската пошта (УСПС) да одговара на прашања на законодавците во врска гласањето преку пошта. Се стравуава од доцнење на поштенските пратки, што се припишува на политиката за намалување на трошоците. Ова пак, предизвикува загриженост кај републиканските законодавци, како и кај претседателот Доналд Трамп, кој многупати досега го критикуваше масовното гласање преку пошта планирано на претседателските избори закажани за 3 номеври, а поради сомнеж од манипулации и изборен фалсификат од ненавремено доставување на гласачките ливчиња. Деџој не можеше да изложи детален план за тоа како ќе обезбеди гласачките ливчиња да стигнат на време, но даде уверување и посочи дека во УСПС работат „многу посветено“ за тоа да не стане проблем. (МИА)

Апостолски: Сведочењето на Нинџа нема никаква тежина и никаква вредност

Тале Кристо — Fri, 19 Jun 2020 14:31:06 +0000

Последниот сведок на Рускоска го демантираше Нинџа, никогаш не работел за УБК. Денес заврши со сведочење и последниот сведок од случајот 27-ми април. Драгче Стојчевски кој е вработен во поранешното УБК пред судот рече дека на 27-ми април бил В.Д директор на единицата за набљудување и имал за цел да следи странски државјани кои биле во Собранието. Тогашниот директор на УБК Владимир Атанасовски кој е обвинет во предметот негираше дека имал наредба за следење на Зоран Заев, Оливер Спасовски и Јовче Ременски. Сведочеше дека и го познавал Александар Василевски Нинџа бидејќи во периодот од 2010 до 2012 бил следен од УБК. На следното рочиште ќе се презентираат материјалите. Притоа Антонио Апостолски, адвокат денес во вестите на телевизија Телма посочи дека сведочењето на Нинџа нема никаква тежина и никаква вредност. „Сведочењето на Нинџа нема никаква тежина и никаква вредност. Денешниот сведок според сведочењето на Нинџа би требало да бил негов шеф. Но денешниот сведок кажа дека никогаш ниту бил вработен Нинџа во ДБК, ниту бил соработник во ДБК“, истакна Апостолски. Апостолски додаде дека целото тврдење на Александар Василевски Нинџа падна во вода.

Поранешни функционери ќе сведочат во „Монструм“

Ивона Петрова — Thu, 27 Feb 2020 06:47:48 +0000

Повторената судска постапка за предметот „Монструм” во Кривичниот суд во Скопје продолжува со искази на сведоците Синиша Алексовски, Сашо Мијалков, Блерим Беџети и Муса Џафери. Потребата од нивното сведочење произлегува од разговорите во „бомбите”, презентирани претходно во оваа судска постапка, каде што се слушаат или споменуваат имињата на денешните сведоци како лица што знаат нешто повеќе за петкратното убиство кај Смилковско Езеро, на 12 април 2012 година. На последните рочишта за овој предмет сведочеа повеќе сегашни и поранешни функционери од извршната власт, меѓу кои и Гордана Јанкуловска, Зоран Заев, Али Ахмети, Бујар Османи, Џелал Бајрами и Љупчо Тодоровски-Радникот.

Ахмети дојде во судот да сведочи за „Монструм“

Ивона Петрова — Fri, 21 Feb 2020 09:15:23 +0000

Претседателот на ДУИ Али Ахмети претпладнево пристигна во Кривичниот суд каде треба да сведочи на рочиштето за петкратното убиство кај Смилковското Езеро. Ахмети дојде во судот во придружба на Артан Груби и уште неколку лица. Освен Ахмети, како сведок треба да се појави и неговиот сопартиец, обвинителот Џелал Бајрами, кој во 2012 година, кога се случи немилиот настан кај Смилковско Езеро ја вршеше функцијата заменик-министер за внатрешни работи. На претходните рочишта за случајот „Монструм“ сведочеа и лидерот на СДСМ Зоран Заев и поранешната министерка за внатрешни работо Гордана Јанкулоска. За петкратното убиство на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, во претходна постапка за случајот на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута. Судскиот процес го води судијата Огнен Ставрев, а застапници на обвинението се Фатиме Фетаи и Гаврил Бубевски. Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.

Судењето за „Рекет“ продолжува со сведочење на обвинителката Стефанова. Ќе дојдат ли сега адвокатите на Јанева?

Ивона Петрова — Thu, 23 Jan 2020 06:41:38 +0000

Во Основниот кривичен суд во Скопје денеска треба да продолжи судењето за случајот „Рекет“. Минатото рочиште се одложи поради отсуство на бранителите на Катица Јанева, адвокатите Дељо Кадиев и Ирена Фрчковска. Случајот се наоѓа во доказна постапка и на денешното рочиште треба да сведочи поранешната специјална јавна обвинителка Лиле Стефанова, која ја води истрагата за случајот „Империја“. Досега како сведоци исказ дадоа заменичката на поранешната специјална јавна обвинителка Катица Јанева, Елизабета Јосифовска, бизнисменот Орце Камчев, неговата сопруга Ана Камчева, сметководителката во приватните фирми на Камчеви, новинарот Христијан Баневски од телевизија 1ТВ и други. Основното јавно обвинителство за гонење организиран криминал и корупција во октомври годинава поднесе обвинение против Бојан Јовановски, Катица Јанева и Зоран Милевски. Првообвинетиот Јовановски се сомничи дека сторил кривично дело „перење пари и други приноси од казниво дело“, а Јанева и Милевски за „примање награда за противзаконито влијание“. Второобвинетата Јанева се товари и дека сторила и кривично дело „злоупотреба на службена положба и овластување“. На првото рочиште за „Рекет“, што се одржа на 3-ти декември минатата година, третообвинетиот Зоран Милевски-Кичеец призна вина, по што беше осуден на три години затвор.

Домот на Боки 13 како оперативен центар на СДСМ

Катерина Бојаџиева — Sat, 28 Dec 2019 12:23:16 +0000

Вчерашното сведочење на Драгана Колевска, куќна помошничка на првообвинетиот во случајот „Рекет“ Бојан Јовановски- Боки 13, откри дека во неговиот стан доаѓале градоначалникот на Карпош, Стефан Богоев, потоа министерката за одбрана Радмила Шекеринска, како и пратеникот Александар Кирацовски. -Доаѓаше и Венко Филипче, Радмила Шекеринска… Стефан Богоев, Александар Кирацовски … и други. Куќата имаше безбедносен видео надзор…., рече меѓу другото Колевска. Ова сведочење, како и сите претходни сознанија за другарувањата на високите функционери на владејачката СДСМ со Боки 13 во времето на силната промоција на неговиот Меѓународен сојуз, го отвора прашањето за тоа дали во неговиот дом всушност била координирана целата операција за изнудувања на македонските бизнисмени која потоа заврши со судски епилог во случајот „Рекет“. Но дури откако таа се појави во странските медиуми, и веројатно со асистенција на странска држава, пишува Нетпрес. Наведените имиња посочуваат дека во луксузниот апартман редовни гости биле најблиските соработници на премеирот Зоран Заев, со кого Боки 13, исто така, имаше јавни повеќе средби. Покрај тоа, многу интересно е што сиве овие политичари биле сведоци на луксузот со кој се опкружувал Боки 13, и никој не се ниту запрашал од каде потекнуваат парите за такво неограничено трошаџиство. А не се прашале за потеклото на парите, како што само може да се претпостави – или затоа што биле запознаени и ја овозможувале рекетарската шема. Или, пак, и самите тие учествувале во нејзиното создавање. Неразбирливо е како министерката за одбрана Радмила Шекеринска, на пример, во екот на своите најголеми, нели, пожртвувани активности и заложби за прием во НАТО, има време прво да биде чест гостин во домот на, во најмала рака контроверзен лик како Боки 13. Исто така, се поставува и прашањето кои се причините и мотивите на министерката за одбрана да другарува со Јовановски, кога нема ниту генерациска ниту професионална близина со него. Но можеби станува збор за „деловна“ соработка која ги зближила челничката на одбраната на најновата земја членка на НАТО и сега првоосомничениот во „Рекет“. Шефот на дипломатијата, пак, Никола Димитров, не бил виден во домот на Боки 13, но сепак од претходните сведочења произлезе дека бил предупреден за рекетирањето, и тоа од странски амбасадор. Во август годинава Димитров на социјалните мрежи напиша оти имал „лошо претчуство“ и затоа не се сретнал со Боки 13. Сепак, според сѐ судејќи, не станувало збор за претчуство, туку министерот имал конкретни информации за рекетот на Јовановски. Оттаму Димитров ѝ должи неколку одговори на јавноста по сведочењето на почесниот конзул на Летонија во Македонија, Зоранчо Митровски, кој дека е жртва на рекет му се пожалил на нерезидентниот амбасадор на Летонија. Амбасадорот во март годинава разговарал со Димитров од кого добил уверување дека Митровски нема да има проблем со СЈО и дека се ќе биде во ред. По јавното признание на бизнисменот, Димитров мора да одговори дали воопшто и кому пријавил дека од страна на Јовановски и Јанева се врши рекет, иако негира до денеска дека бил информиран за случајот. И министерот за здравство Венко Филипче бил чест гостин кај Боки 13, веројатно договарајќи „јавни приватни партнерства“ во македонскиот здравствен систем. Ни тој, секако, не се досетувал од каде и на кој начин Јовановски обезбедува огромни средства, не само за да си овозможи луксуз редок дури и во странство, како и да влегува во проекти, како на пример, градењето старски домови или медицински центри. Во ова друштво на лица од врвот на СДСМ се вбројува и сега предложениот за технички премиер на преодната влада до изборите, министерот за внатрешни работи, Оливер Спасовски. Тој, осведочено, имал комуникации и повеќе јавни средби со Боки 13, но несфатвливо е како до него не допреле никакви информации за операциите на уцени и изнуди од страна на обвинетите во „Рекет“, како што тврди самиот. Попрво ќе биде дека Спасовски ги предупредувал Јовановска и неговите соучесници да ги прекинат контактите со нивните жртви, кои се охрабриле да го пријават рекетот. Премиерот на заминување, Зоран Заев, пак, никако не успева да докаже кога и каде тој прв го пријавил пријавениот случај со изнуда од бизнисменот Орце Камчев. Опозицијата тврди дека фамозната скапа торба „Луј Витон“ со изнудените милиони завршила токму на „Илинденска“, а главниот станар во оваа зграда неколкупати беше споменуван во видео и аудио снимките поврзани со овој скандал. Половина владин кабинет и од раководните структури на СДСМ, сега и со сведоци, бил редовен посетител на станот на Боки 13, и тоа не може да го поништи впечатокот на јавноста, дека токму од таму била координирала операцијата „Рекет“, дека од тој комплекс во скопско Волково биле избирани жртвите и начинот на кој блиските соработници на Заев ќе ги „олеснуваат“ за милиони евра. Поради тоа и сѐ уште не се знае каде се наоѓаат изнудените милиони, додава порталот.