Светска програма за храна – Kurir.mk

Светската програма за храна бара 77 милиони долари за помош на засегнатите од земјотресот во Турција и Сирија

Тале Кристо — Fri, 10 Feb 2023 19:11:24 +0000

Светската програма за храна (WFO), една од специјализираните агенции на ОН, побара денеска 77 милиони американски долари за да обезбеди помош за 874.000 лица погодени од земјотресот во Турција и Сирија. „WFO бара 77 милиони долари за да обезбеди помош со храна и топли оброци за 874.000 луѓе погодени од земјотресот во Турција и Сирија“, соопшти агенцијата со седиште во Рим. Оваа помош би била наменета за 284.000 новораселени лица во Сирија и 590.000 луѓе во Турција, прецизира агенцијата на ОН. Разорниот земјотрес со јачина од 7,8 степени по Рихтер во понеделникот ги погоди двете земји и досега однесе повеќе од 22.300 животи. WFO додава дека досега испратила помош за 43.000 луѓе во Сирија и 73.000 во Турција. Станува збор за готови оброци. -За илјадниците луѓе погодени од земјотресот, храната е една од главните потреби и наш приоритет е да ја доставиме храната што е можно побрзо до луѓето на кои им е најпотребна, рече Корин Флејшер, регионален директор за Северна Африка и Блискиот Исток.

ПРЕДУПРЕДУВАЊЕ: Следи голем пораст на цените на храна, милиони луѓе може да останат без оброци со хранливи материи

Магдалена Андонова — Thu, 08 Jul 2021 14:32:47 +0000

Светската програма за храна на ОН (WFP) предупреди дека милиони луѓе годинава би можеле да останат без оброци богати со хранливи материи, поради зголемувањето на цените на храната. – Веќе имаме конфликт, климата и Ковид-19 кои работат заедно за да турнеме повеќе луѓе во глад и сиромаштија. Сега цените на храната се приклучија на смртоносното трио, изјави денеска главниот економист на WFP Ариф Хусеин. – Ако сте семејство што веќе троши две третини од вашиот приход на храна, зголемувањето на цената на храната ќе биде голем проблем. Замислете што ќе значи тоа ако веќе сте изгубиле дел или целиот приход поради Ковид-19, додаде тој. Покрај пандемијата, агенцијата со седиште во Рим соопшти дека климатските феномени, како што е Ла Нина, временските услови на Тихиот океан со далекусежни ефекти, исто така придонесуваат за покачување на цените. Во однос на регионите ширум светот, експертите на WFP регистрираа најголемо зголемување на цените на храната на Блискиот исток. Во Сирија, според WFP Market Monitor, просечната цена на маслото за јадење се зголеми за 58 проценти во периодот од март до мај во споредба со претходните три месеци. Во Либан, каде што владее сериозна економска криза, просечната цена на пченичното брашно порасна за 50 проценти за истиот споредлив период. Земјите во Африка, како Зимбабве и Мозамбик и во Јужна Америка, како Венецуела, исто така регистрираат пораст на цените на храната. WFP предвидува дека 270 милиони луѓе ќе бидат гладни или ќе бидат изложени на висок ризик од глад во 2021 година. Тоа би претставувало зголемување за 40 проценти во однос на претходната година. Агенцијата, која ја доби Нобеловата награда за мир во 2020 година, истакнува дека нејзините напори за помош оваа година се најголеми во историјата на организацијата, а хуманитарните работници имаат за цел да стигнат до 139 милиони луѓе ширум светот.

Светска програма за храна апелира милијардерите да донираат за гладните

Ивона Петрова — Fri, 18 Sep 2020 07:01:31 +0000

Директорот на Светска програма за храна Дејвид Бизли ги повика најбогатите луѓе во светот да донираат пари за да спасат околу 30 милиони луѓе, кои би можеле да умрат од глад доколку не добијат помош. – Околу 270 милиони луѓе се на раб на гладот и Светска програма за храна се надева дека годинава ќе успее да им пружи помош на 138 милиони луѓе, истакна Бизли пред безбедносниот совет на Обединети нации. Тој додаде дека се потребни околу 4,1 милијарди долари на годишно ниво за да се нахранат 30 милиони луѓе, кои би починале без помош на Светската програма за храна. Бизли истакна дека во светот постојат околу 2.000 милијардри, чие богатство се проценува на околу 6,8 трилиони долари, а некои од нив заработиле милијарди за време на пандемијата со Ковид-19. Тој наведе дека не е против луѓето кои создаваат и го зголемуваат своето богатство, но потенцира дека човештвото се соочува со најголемата криза досега.