Светски ден на детето – Kurir.mk

Третоодделенци од ООУ „Лазо Трповски“ со признанија од Њујорк по повод Светскиот ден на детето

Магдалена Андонова — Thu, 24 Nov 2022 07:41:35 +0000

По повод 20 ноември – Светскиот ден на детето, востановен од УНИЦЕФ, четворица третоодделенци од ООУ „Лазо Трповски“ Дамјан Симески, Јосип Радетиќ, Лара Јакимова и Петар Ѓорѓиев предводени од одделенската наставничка Дијана Петроска и предметниот наставник Стефан Симовски со свои ликовни творби учествуваа на 25. Меѓународен ликовен натпревар „Пријатели на мирот 2022“ во Њујорк, САД. Годинава со свои ликовни творби во овој глобален проект учествуваа 4540 деца од 77 земји. Темата на годинашниот ликовен натпревар кој традиционално се одржува во Њујорк под покровителство на УНИЦЕФ беше „Да владее мир на Земјата“. Целта на овој глобален проект кој изминативе 25 години се реализира во 116 земји под покровителство на УНИЦЕФ е поттикнување на свеста кај децата ширум светот на возраст од 5 до 16 години за креативно изразување. Оваа меѓународна програма има за цел да ги охрабри децата преку креативни активности да бидат посветени кон промовирање на мирот и да создаваат иднина во која ќе владеат хармонија и меѓусебно разбирање. Ликовните творби и на учесниците ООУ „Лазо Трповски“ ќе бидат изложени на светската изложба што ќе се одржи на почетокот на следната година во САД. (МИА)

Децата во Македонија повеќе играат со некој член од потесното семејство, отколку со мајката и таткото

Дарко Андоновски — Sat, 20 Nov 2021 07:54:36 +0000

Повозрасните членови од потесното семејство, а не мајката и таткото, се оние со кои најчесто си играат децата, покажуваат податоците што Државниот завод за статистика ги објави по повод 20 Ноември - Светскиот ден на детето. Според објавените податоци, 32 проценти од децата најмногу играат со таткото, 73 проценти со мајката, а 88 проценти играат со друг повозрасен член на потесното семејство. Најголем процент од децата или 94 проценти играат со индустриски произведени играчки кои се купени од продавница, додека само мал процент (14 проценти) играат со домашно изработени играчки. Високи 60 проценти од децата наместо со играчки, си играат со предмети за играње од домаќинствата. Шеесет и два проценти од децата имаат две или повеќе играчки, додека 55 проценти имаат три или повеќе детски книги.

Клиниката за детски болести ќе го одбележи Светскиот ден на детето

Ивона Петрова — Tue, 01 Jun 2021 05:26:29 +0000

Универзитетската клиника за детски болести – Скопје денеска ќе го одбележи Светскиот ден на детето. На настанот, како што најавија од Клиниката, ќе присуствуваат министерот за здравство Венко Филипче, словачкиот амбасадор во земјава Хенрик Маркуш и претставници од компанијата „Алкалоид“.

Институции и обележја во Скопје ќе светнат во сина боја во чест на Денот на детето

Ивона Петрова — Fri, 20 Nov 2020 07:52:34 +0000

Во знак на одбележување на Светскиот ден на детето денеска дел од институциите во Скопје ќе бидат осветлени во сина боја како симболичен гест на нивната заложба за унапредување на правата на децата. Во сина боја ќе бидат осветлени Владата, Собранието, УНИЦЕФ, делегацијата на ЕУ, Министерството за образование и наука, Археолошкиот музеј, Музејот на современа уметност, Амбасадата на Италија, како и Халк банка и Рамстор мол кои се приклучијае кон иницијативата. Секоја година на 20 ноември, денот кога е потпишана Конвенцијата на Обединетите нации за правата на детето, во светски рамки се одбележува Денот на детето, а зградите и обележјата се осветлуваат во сино. Во 2019 година во сино беа осветлени важни институции како Европскиот парламент во Брисел, Пантеон во Франција, Акрополис на Атина во Грција, Палатата на мирот во Хаг, Холандија, Раштрапати Бахаван во Индија, Петра во Јордан, мостовите на Босфор во Турција и многу други. Годинава, Светскиот ден на детето се одбележува во услови на пандемија која, како што посочуваат од УНИЦЕФ, ги разоткри нееднаквостите во општествата, ставајќи ги децата под ризик да станат скриени жртви. Имајќи го ова предвид, УНИЦЕФ ги повикува владите, бизнис заедницата и сите други чинители да го одбележат овој ден како можност да се слушне како децата и младите сакаат да ја преосмислат иднината. – Надоврзувајќи се на успехот што во 2019 година го имаше првиот состанок на високо ниво во државата#KidsTakeover кога младите отворија дискусија со владините министри на теми што се однесуваат на нивниот живот, на 20 ноември оваа година, заедно со Владата и со Делегацијата на Европската Унија во Северна Македонија,УНИЦЕФ ќе го поддржи вториот #KidsTakeover на кој учесниците ќе се осврнат на најважното прашање што ги засега децата: како ја замислуваат иднината на образованието и како подобро да се надгради образованието по КОВИД-19, се наведува во соопштението од УНИЦЕФ.

Дваесетти ноември – Светски ден на детето

Ивона Петрова — Wed, 20 Nov 2019 09:53:46 +0000

Генералното собрание на Обединети нации во 1954 година го прогласи 20 ноември за Светски ден на детето, со цел да го сврти вниманието на јавноста кон обврските на општеството кон децата, како и на проблемите со кои се соочуваат децата. Додека пет години ГС на ОН усвои Декларација за правата детето. Денот се одбележува за да се заштитат и унапредат правата на децата. И покрај големиот напредок што е реализиран за децата од усвојувањето на Конвенцијата за правата на детето во 1989 година, правата на милиони деца ширум светот се кршат секој ден, а децата се соочуваат со големи предизвици. Речиси 50 милиони деца се раселени, 250 милиони живеат во земји кои се погодени од судири, а милиони деца живеат во екстремна сиромаштија. Покрај сиромаштијата, голем проблем за децата е неадекватната исхрана, немаaт пристап до образование и социјализација, како и вакцинација. Децата исто така во голем број случаи се изложени на насилство во домот и во општеството. Детските права се утврдени со Конвенција за правата на децата, усвоена во 1989 година. Конвенцијата е ратификувана од 193 држави, а основни принципи се право на живот, опстанок и развој, најдобрите интереси на детето, право на партиципација, како и правото на недискриминација. Од 1990 година Светскиот ден на детето се одбележува и годишнината од датумот кога ГС на ОН ја усвои Декларацијата и Конвенцијата за детските права. Годинава се одбележува 30-годишнината од Конвенцијата за правата на детето.

Под мотото „Сите сме=во правата“ во Скопје ќе се одбележи Светскиот ден на детето

Ивона Петрова — Wed, 20 Nov 2019 07:00:46 +0000

По повод Светскиот ден на детето и одбележувањето на 30 години од усвојувањето на Конвенцијата за правата на детето, денеска во Домот на Армијата во Скопје ќе се одржи настан под мотото „Сите Сме = Во Правата“, на кој учествуваат деца од градинки, основни и средни училишта од повеќе градови од Републиката. Настанот е организиран од Институцијата Народен правобранител во соработка со Коалицијата на младински организации „Сега“ од Прилеп, Управата за развој и унапредување на образованието и јазиците на припадниците на заедниците, како и детската фондација „Песталоци“. По тој повод, омбудсманот Иџет Мемети пред седиштето на Канцеларијата на народниот правобранител ќе даде изјава за медиумите и ќе упати порака за Светскиот ден на детето. Ккао што информираат од Канцеларијата на народниот правобранител, по завршување на пригодната свеченост точно напладне, децата пред зградата на Собранието на Република Северна Македонија на претседателот на Праламентот, Талат Џафери ќе му го прочитаат и предадат „Барањето од децата за правата на децата“. Настанот ќе заврши на плоштадот „Македонија“ каде учесниците ќе пуштат балони во разни бои, со што симболично ќе упатат порака за еднаквост на децата во правата.