светско фудбалско првенство – Kurir.mk

Шпанија и Португалија сакаат организација на СП2030 заедно со Украина

Дарко Андоновски — Wed, 09 Nov 2022 16:31:15 +0000

Шпанија и Португалија, кои заеднички сакаат да бидат домаќини на фудбалскиот Мундијал 2030, ја приклучија кон својата кандидатура и со војна погодената Украина, објави денеска првиот човек на португалскиот фудбал Фернандо Гомеш. – Нашата кандидатура има сè што е потребно: инфраструктура, искуство и одличен човечки капитал. Од таа гледна точка, нудиме најдобра кандидатура. Сега имаме дополнителна работа поврзана со вклучувањето на Украина во нашата кандидатура, но темелите се добро поставени, така што нашиот предлог е одличен, изјави Гомеш за весникот „Марка“. Гомеш ги отфрли наводите на критичарите, кои сметаат дека Шпанија и Португалија настојуваат да ја приклучат Украина со цел нивната кандидатура да добие емотивна димензија и со тоа да стекне предност во однос на другите кандидати кои сакаат да бидат домаќини на Светското фудбалско првенство во 2030 година. -Ви тврдам дека немаше таква калкулација кога ја донесовме одлуката. Нашата желба е да ја интегрираме Украина во една поширока европска кандидатура, рече претседателот на Фудбалската федерација на Португалија во разговор за „Марка“.

После 36 години Канада се пласираше на Светското фудбалско првенство

Тале Кристо — Mon, 28 Mar 2022 06:46:18 +0000

Репрезентацијата на Канада ќе се натпреварува на Светското првенство во Катар на крајот од оваа година. Канаѓаните предводени од селекторот Џон Хердман се пласираа на Мундијалот 2022, откако ноќеска во Торонто ја совлада Јамајка со 4:0 во натпреварот од 13. коло во квалификациите во зоната КОНКАКАФ. Така, Канада води во групата со 28 бодови во 13 натпревари и обезбеди пласман на СП 2022 на едно до пред крајот на квалификацискиот циклус, бидејќи повеќе нема да падне под третото место. Канаѓаните ќе играат на Светско првенство по втор пат во историјата и првпат од 1986 година.

Јапонија се откажа од организацијата на Светското првенство поради коронавирусот

Магдалена Андонова — Wed, 08 Sep 2021 12:09:23 +0000

Јапонската фудбалска федерација (ЈФА) се откажа од организација на Светското фудбалско клупско првенство во декември годинава поради ограничувањата поврзани со пандемијата на коронавирус. – Ризикот од зголемување на бројот заразени и тешкотиите да се извлече корист од евентуалното ограничување на бројот на гледачи влијаеше на оваа одлука, јавија денеска јапонските медиуми, повикувајќи се на анонимни извори во ЈФА. Според медиумите, ЈФА е во контакт со ФИФА, која евентуално би можела да го помести за јануари 2022 година одржувањето на турнирот на кој учествуваат континенталните клупски шампиони и фудбалскиот првак на земјата домаќин. Светското клупско фудбалско првенство традиционално се одржува во декември секоја календарска година, но поради пандемијата минатото издание одржано во Катар беше поместено за февруари годинава. (МИА)

Блатер верува дека е можно Мундијалот во 2022 да не се игра во Катар

Ивона Петрова — Thu, 16 Apr 2020 06:14:02 +0000

Поранешниот претседател на Светската фудбалска федерација (ФИФА) Сеп Блатер е уверен дека е можен трансфер на Мундијалот во 2022 година што треба да се игра во Катар. – Соединетите Американси Држави може да бидат домаќини во 2022 година наместо 2026. Тие се способни, ова не е научна фантастика! Јапонија исто така може да го стори тоа. За среќа, ќе има само 32 екипи, а не 48. Не е потребен голем организациски напор. И Германија може да биде домаќин на турнирот. Но, ова ќе значи дека по 2018 година Мундијалот повторно ќе се организира во Европа. Поради тоа Европа нема да биде првата опција, изјави Блатер за германски „Билд“. Изјавата на поранешниот прв човек на ФИФА доаѓа, откако претходно беше распишан обвинителниот акт за мито на службеници на организацијата при изборот на домаќините на Светските првенства 2018 (се играше во Русија) и 2022 година.