светско првенство катар 2022 – Kurir.mk

Ван Гал: Навивачите кои решија да го бојкотираат Светското првенство во Катар се во право

Дарко Андоновски — Wed, 16 Nov 2022 13:39:57 +0000

Селекторот на Холандија Луј ван Гал ги откри своите размислувања за одлуката на навивачите на националниот тим да го бојкотираат Светското првенство во Катар во 2022 година. Тој смета дека навивачите постапуваат правилно со тоа што го искажуваат своето мислење на ваков начин. – Мислам дека навивачите кои го бојкотираат Светското првенство во Катар се во право бидејќи веруваат во тоа. Не гледам проблем. Се надевам дека ќе можеме да играме магично и кога ќе стигнеме до финалето, тие ќе го гледаат натпреварот на ТВ и ќе видат колку сме добри, изјави Ван Гал за „Франс прес“. Светското првенство во Катар ќе се одржи од 20 ноември до 18 декември. Репрезентацијата на Холандија ќе игра во групата против Катар, Еквадор и Сенегал.

СКАНДАЛ пред СП: Селекторот на најтрофејната селекција барал играчите да лажираат повреди

Бошко Тасиќ — Sat, 05 Nov 2022 07:35:22 +0000

Селекторот на бразилската репрезентација, Аденор Леонардо Баки, попознат како Тите е во центарот на скандалот поврзан со Светското првенство кое за две недели ќе започне во Катар. Тите им наредил на фудбалерите на кои смета за Мундијалот во Катар, да лажираат повреди во своите клубови, за да може да бидат свежи и одморни за настап на планетарниот собир. Бразилскиот весник Глобо ја пренесе веста, а се верува дека изворот на оваа информација е од познатиот напаѓач Габриел Барбоса-Габигол, кој доби „корпа“ од селекторот Тите и нема да биде во составот на Кариоките. „Тите побара од играчите да глумат повреди, за да не играат во своите клубови во наредниот период“, стои во текстот на Глобо, а во продолжение пишува „Габигол го прашал Тите каква повреда треба да одглуми. Овој пота му одговорил дека нема потреба ништо да глуми затоа што него не планира да го носи на Светското првенство“, пишува во текстот. Бразил е петкратен светски првак и во Катар сигурно ќе биде еден од најсериозните кандидати за мундијалскиот пехар.

ФИФА бара од учесниците на СП да се концентрираат на фудбалот

Дарко Андоновски — Fri, 04 Nov 2022 11:40:16 +0000

Меѓународната фудбалска федерација (ФИФА) во писмо испратено до сите федерации на репрезентациите кои ќе учествуваат на Светското првенство во Катар да се концентрираат на фудбалот и да не дозволат спортот да биде вовлечен во идеолошки или политички борби. – Ве молиме, одиме да се концентрираме на фудбалот!. Знаеме дека фудбалот не егзистира во воздушен простор и свесни сме за многуте предизвици и тешкотии од политичка природа, кои постојат ширум светот. Но, Ве молиме да не дозволите фудбалот да биде вовлечен во секоја идеолошка и политичка борба која постои, се наведува во заедничкото писмо на претседателот на ФИФА, Џани Инфантино и генералниот секретар Фатма Самоура. Писмото на ФИФА е реакција на бројните протести кои изминатите недели можеа да се видат и слушнат во голем број од земјите чии репрезентации ќе настапат на претстојниот Мундијал во Катар, а се однесуваат на теми поврзани со прaвата на ЛГБТ заедницата во оваа арапска држава или односот кон странските работници, од кои многумина учествуваа во изградбата на потребната инфраструктура за завршниот турнир од 20 ноември до 18 декември.