Свидетелства – Kurir.mk

МОН: Сите ученици навреме ќе ги добијат свидетелствата за учебната 2022-2023 година

Ивона Петрова — Mon, 22 May 2023 08:16:34 +0000

Сите ученици навреме ќе ги добијат свидетелствата за учебната 2022-2023 година, завршена е постапката за набавка и во тек е испораката, соопшти денеска Министерството за образование и наука (МОН). -Учениците од основните и средните училишта навремено ќе ги добијат свидетелствата за учебната 2022-2023 година, во текот на јуни. Бирото за развој на образованието под чија надлежност е спроведувањето на постапката за набавка на педагошка документација за училиштата, вклучително и свидетелства, веќе ја реализираше оваа обврска. Според информациите од БРО, склучен е договор со економски оператор и истиот веќе ги испорачува свидетелствата за сите одделенија, а завршена е доставата за учениците од четврто и деветто одделение во основното образование, како и за учениците од завршните години во средното образование, наведува МОН. Според МОН, по целосната испорака, секое училиште индивидуално ги одредува датумите за доделување на свидетелствата за секое одделение. -Апелираме тоа да се случи што поскоро по завршување на наставната година, која согласно календарите за организација на работата на училиштата, за основците трае до 14 јуни, додека за средношколците до 9 јуни, се наведува во соопштението од МОН.

Конечно: Учениците ќе си ги добијат своите свидетелства

Ивана Ефремовски — Thu, 11 Aug 2022 11:46:31 +0000

Жалбената постапка веќе заврши и од следната недела ќе почнеме со дистрибуирање на свидителствата до сите училишта во државата, изјави денеска за МИА директорот на Бирото за развој на образованието, Зекирија Хасипи. -Уште во текот на јуни беа дистрибуирани свидителствата и дипломите за матурантите кои завршија тригодишно и четиригодишно образование, како и за учениците од деветто одделение со цел непречено да можат да го продолжат своето натамошно образование. Дистрибуцијата на свидителствата за останатите ученици доцнеше поради жалбена постапка која веќе заврши, така што од следната недела ќе почнеме и со нивна распределба по сите училишта во државава, вели Хасипи во изјавата за МИА. (МИА)

Павиќевиќ: Срамно е да се наплаќаат свидетелства, особено во година со онлајн настава

Ивона Петрова — Mon, 21 Jun 2021 10:11:43 +0000

Сојузот на средношколци бара Државниот просветен инспекторат јавно да ги објави извештаите од направените инспекции во училиштата за кои имаше тврдења дека на учениците им наплаќале пари за свидетелства. Од Сојузот бараат и училиштата да им ги вратат парите на учениците и нагласуваат дека е срамно да се наплаќаат сведителства, особено во година која, како што посочуваат, имало неквалитетна онлајн настава. Имаат и забелешки на тоа што Бирото за развој на образованието годинава не ги обезбедило навреме сведителствата за сите ученици. -Некои училишта прават бизнис од јавното образование кое според законот е бесплатно. Бараме ДПИ јавно да ги објави извештатите за направените инспекции во четирите училишта. Ги поздравивме инпекциите, но, не интересира методологијата на извештаите односно како дошле до овие заклучоци. ДПИ го контактиравме на 14 јуни, а се уште немаме одговор. Затоа сметаме дека извештатите по ова прашање треба да бидат јавни, рече новиот лидер на средношколскиот сојуз Лука Павиќевиќ на денешната прес-конференција што се одржа пред Министерството за образование и наука. Се надеваме, додаде тој, дека во следните денови ќе ги добиеме извештаите и на електронската пошта на Сојузот на средношколци. -Денеска сакаме директно да им се обратиме на четирите училишта. Ние знаеме кои сте, вие самите знаете кои сте. Вратете ги парите кај учениците зошто само така може да го решите овој проблем. Срамно е да се наплаќаат сведителства кога било, но, особено во училишна година целосно одржана преку неквалитетна онлајн настава со професори кои беа слабо обучени или воопшто не беа, истакна тој. Според Сојузот, сакаат да посочат уште на еден процес, кој, како што рече, не оди во прилог на средношколците. -Откако им беше одземено задоволството на социјализацијата, сега им се одзема и задоволството да се гордеат со своите успеси преточени во сведителства. БРО од необјасниви причини годинава не го обезбеди сведителствата за сите средношколци на ниво на државата, истакна тој. Сојузот на средношколци на 12 јуни соопшти дека се повторува проблемот од минатата година и оти добива поплаки од средношколци од повеќе градови во земјава дека нивните средни училишта наплаќаат такси за издавање свидетелства. Сојузот бил информиран за ова од средношколци, а информациите му биле потврдени и од мрежата на активисти во тие градови. Сојузот тогаш посочи дека Средното медицинско училиште во Тетово наплаќа меѓу 150-200 денари за свидетелство, додека Економското училиште во Тетово бара износ од 150 денари за издавање на свидетелството и на дипломата за крај на средното образование. Исто така, и скопската гимназија „Зеф Љуш Марку“ им наплаќа на своите ученици 100 денари за свидетелство, наведува Сојузот, а гимназијата „Мирче Ацев“ во Прилеп 30 денари од ученик.

Професор од кичевско доби кривична: Наместо во самоизолација, делел свидетелства на ученици

Ивона Петрова — Thu, 23 Jul 2020 09:55:03 +0000

ОВР Кичево, до надлежното Јавно обвинителство поднесе кривична пријава против Д.П.(46) од кичевското село Осој, поради постоење основи на сомнение за сторено казнено дело „непостапување според здравствените прописи за време на епидемија“. -Тој, во својство на професор и класен раководител во основно училиште во Кичево, на учениците од класот, им доделил свидетелства иако знаел дека потпишал изјава за задолжителна самоизолација, информираат од СВР Охрид.

Свидетелства за полуматурантите од Аеродром денеска од 8 до 15 часот

Ивона Петрова — Mon, 15 Jun 2020 08:07:50 +0000

Заврши учебната 2019/2020 година за сите ученици, во која првпат се реализира настава по електронски пат и во вонредни услови. Свидителствата за деветтоодделенците ќе се доделуваат денеска во сите основни училишта на територијата на Општина Аеродром од 8 до 15 часот. Запишувањето во средните училишта, како што соопшти Општината, ќе се одвива од 16 до 18 јуни 2020 година во периодот од 7 до 19 часот и на 19 јуни 2020 од 7 до 13 часот. – Градоначалникот Златко Марин и Општина Аеродром им го честитаат крајот на учебната година на сите ученици и наставници, кои во специфични околности успешно ја реализираа наставата и ги надминаа предизвиците, се наведува во соопштението.