Тасманија – Kurir.mk

Австралиската држава Тасманија со закон го забрани нацистичкиот поздрав

Катерина Бојаџиева — Wed, 16 Aug 2023 12:33:08 +0000

Владата на австралиската држава Тасманија денеска стана прва во земјата која го забрани нацистичкиот поздрав, јави ДПА. Главниот обвинител на Тасманија, Елис Арчер, рече дека Владата дала јасен сигнал дека однесувањето со омраза и навреда не е добредојдено во земјата. Заедно со нацистичкиот поздрав, државата ги забрани нацистичките симболи, вклучително и свастиката. „Силно го осудуваме секое прикажување на омраза во нашето општество“, рече Арчер. Прекршителите може да бидат осудени на затворска казна до три месеци, се наведува во законот, кој се очекува да стапи на сила годинава. Арчер рече дека законот го зема предвид значењето на свастиката за будистичките, хиндуистичките и џаинските верски заедници. Федералната влада на земјата работи на забрана за прикажување и продажба на нацистички симболи на јавни места, но нацистичкиот поздрав не е вклучен во предлогот.

ФОТО: Околу 230 китови насукани на Тасманија, само половина се се уште живи

Ивона Петрова — Wed, 21 Sep 2022 09:48:57 +0000

Околу 230 пилот-китови, се насукаа на западниот брег на Тасманија (Австралија). Воздушните снимки покажуваат голем број од овие морски цицачи долж широката плажа на јужниот остров, а само половина од нив сѐ уште се живи, соопшти Одделот за природни ресурси и животна средина на оваа австралиска сојузна држава. На Тасманија, оваа појава е помасовна, иако се случува китови да се насукаат и на копното на Австралија. Пред точно две години на австралиското крајбрежје се насукаа 500 пилот-китови, од кои 400 угинаа. Не е целосно познато зошто пилот-китовите се насукале. Можно е јатото да било привлечено кон брегот заради храна, или пак, еден – два кита залутале, па другите ги следеле нив.

Околу 470 китови се уште насукани во Тасманија

Ивона Петрова — Wed, 23 Sep 2020 06:05:00 +0000

Втора група од околу 200 пилот китови е пронајдена заглавена во близина на западниот брег на Тасманија, со што вкупниот број на китови што треба да се спасат неделава достигна околу 470, јави ДПА. Спасувачките екипи денеска изјавија дека новата група беше пронајдена утринава околу седум километри јужно од првичната локација во пристаништето Меккури. Биологот на програмата за зачувување на морињата, Крис Карлион, изјави дека тоа е најголемиот број на заглавени китови што некогаш ги снимиле во Тасманија. Околу 270 китови во понеделникот останаа заглавени на три локации во пристаништето, близу градот Страхан. Една третина од нив веќе беа мртви пред да почне акцијата за спасување. Спасувачите вчера успеаја да ослободат 25 китови кои беа заглавени во песок во близина на рампата за бродови „Меккури Хедс“. Карлион ја опиша ситуацијата како „конфронтирање“, додавајќи дека можело да се слушне како китовите меѓусебно се вознемируваат. Таа кажа дека причината за заглавувањата често пати останува непозната и затоа може да дојде „едноставно до несреќа“.

Над 40 степени Целзиусови измерени во Тасманија

Ивона Петрова — Mon, 30 Dec 2019 09:35:50 +0000

Во австралиската држава Тасманија измерени се рекордни 40,8 степени Целзиусови, соопшти австралиското Метеоролошко биро. За Тасманија, која е најблиску до Јужниот Пол, не се карактеристични високите температури односно просечната температура на воздухот изнесува 20 степени. – Причината за топлото време во Тасманија е што ветровите носат топол воздух, изјави метеорологот Лук Џонстон. Најкритично е во државата Нов Јужен Велс, каде се активни 43 пожари, а нивното гаснење е отежнато поради силниот ветер. Во сите австралиски градови поради пожарите откажани се новогодишните огномети.