Тбилиси – Kurir.mk

Македонските фудбалери заминаа за Тбилиси на дуел со Грузија

Тале Кристо — Wed, 21 Sep 2022 16:27:04 +0000

Македонската фудбалска репрезентација, откако утринава тренираше во Скопје, попладнево со чартер-лет замина за Тбилиси на дуел против Грузија во рамки на Лигата на нации. Македонските фудбалери му гостуваат на лидерот во групата 3 од Ц-Дивизијата во ослабен состав без неколкумина стандардни фудбалери, вклучувајќи ги капитенот Стефан Ристовски, Аријан Адеми и Дарко Чурлинов. Натпреварот во Тбилиси се игра в петок со почеток во 18 часот. Својот настап во Лигата на нации, избраниците на селекторот Благоја Милевски ќе го завршат в понеделник во Скопје против Бугарија. На табелата води Грузија со 10 бодови, пред Македонија (7), Бугарија (3) и Гибралтар (1).

Судир меѓу полицијата и демонстрантите во Тбилиси кои бараат повторување на парламентарните избори

Ивона Петрова — Mon, 09 Nov 2020 06:31:07 +0000

Грузиската полиција синоќа употреби солзавец и водени топови во растерувањето на демонстрантите од пред зградата на Централната изборна комисија во Тбилиси, кои, заедно со опозицијата, бараат повторување на парламентарните избори, тврдејќи дека се нерегуларни. Илјадници демонстранти се собраа на Главната авенија во Тбилиси за мирно да го изразат својот протест, а помали групи ја гаѓаа полицијата со камења, по што таа реагираше. Британските медиуми, повикувајќи се на полицијата, јавија дека демонстрантите се обиделе да упаднат во зградата на грузиската ЦИК. Полицијата преку соопштение појасни дека „откако демонстрантите употребија насилни методи и не ги следеа упатствата, Министерството за внатрешни работи употреби пропорционална сила, во рамките на своите овластувања“. Според официјалните резултати од изборите, владејачката партија „Грузиски сон“ освои 48,2 проценти од гласовите, додека најголемата опозициска партија, „Обединето национално движење“, освои 27,1 процент од гласовите. Осум опозициски партии најавија бојкот на работата на парламентот.

Пандев: Дојдовме во Тбилиси по трите бода, атмосферата е одлична

Магдалена Андонова — Mon, 07 Sep 2020 18:07:57 +0000

Капитенот на фудбалската репрезентација на Македонија, Горан Пандев пред утрешниот дуел против Грузија во Лигата на нациите изјави дека „жолто-црвените“ дошле по трите бода во Тбилиси „Важни беа трите бода со Ерменија како за почеток. За разлика од Скопје тука имаме добар терен за игра. Дојдовме по трите бода, сакам да ги освоиме. Кај нас атмосферата е одлична, никогаш не ни била на вакво ниво. Свесни сме дека не сме 100% подготвени но во овој дрес секогаш треба да се даде максимумот и само така може да се стигне до посакуван резултат“, изјави капитенот Горан Пандев. Поради повреди селекторот нема да смета на Иван Тричковски и Кире Ристевски. Натпреварот меѓу Грузија и Македонија се игра утре од 18:00 часот во Динамо Арена во Тбилиси. (МИА)

Масовни протести во Грзуија против можноста за враќање на Саакашвили

Ивона Петрова — Mon, 26 Nov 2018 07:55:57 +0000

Во грузискиот главен град Тбилиси десетици илјадници луѓе синоќа протестираа против можното враќање на поранешниот претседател Михаил Саакашвили, три дена пред вториот круг од претседателските избори на 28 ноември, јави ДПА. Организаторите на протестот велат дека над 90.000 луѓе демонстрирале против опозицискиот кандидат Григор Вашаѕе, поранешен министер за надворешни работи. Во предизборната кампања тој вети дека ако биде избран, ќе го помилува Саакашвили, кој е осуден на шест години затвор поради злоупотреба на власта и сега живее во Холандија. Вчерашниот протест беше организиран од опозициската Алијанса на патриоти. Претседателката на партијата Ирма Инашвли изјави дека Грузија не треба да се враќа во „ерата на конфискација на сопственост и тортура” и ги повика Грузијците да ја изберат за претседателот Саломе Зурабишвили која е противкандидат на Вашаѕе. Зурабишвили е поранешна амбасадорка на Грузија во Франција. МИА