темно чоколадо – Kurir.mk

Овие слатки можете да ги јадете без каење или страв од дебелеење

Ивона Петрова — Mon, 02 Oct 2023 20:19:54 +0000

Ако сакате да намалите тежина или да го намалите внесот на нездрави слатки, опциите како што се мус од темно чоколадо или пудинг од чиа може да бидат здрава замена. Ако се обидувате да ослабете или едноставно сакате да се храните здраво, ретко ќе посегнете по чоколадна торта или други нездрави слатки. Сепак, ваквиот начин на исхрана не мора да значи дека треба целосно да ги избегнувате слатките. Сè уште можете да уживате во десерти кои нема да предизвикаат дебелеење, тврдат нутриционистите. Овошниот сладолед е забавен потсетник на детството и е совршена замрзната алтернатива за секој што сака да избегнува млечни производи. Сепак, бидете внимателни: некои сладоледи што можете да ги најдете во продавниците содржат додаден шеќер. Сигурна опција може да биде подготовката на домашни сладоледи со состојки како што се јагоди, праски, темно чоколадо и лубеница. Мус од темно чоколадо носи многу антиоксиданси од темното чоколадо, а додавањето на кокосово млеко, суров мед и ванила го засладува горчливото темно чоколадо и дава здравствени придобивки. Една од најимпресивните карактеристики на темното чоколадо е неговата висока содржина на антиоксиданси. Антиоксидансите вклучуваат витамини, минерали и фитохемикалии - корисни растителни соединенија. Пудингот од чиа семе може да биде уште една здрава алтернатива за слатките полни со шеќер и содржи чиа семе, незасладено кокосово млеко, екстракт од ванила, мед и бобинки. Чиа семките се полни со антиоксиданси, добри масти и влакна, а влакната ќе ве држат сити подолго време и ќе ве спречат да грицкате храна полна со шеќер. Леб од банана со кокосово брашно е хранлива и вкусна алтернатива на традиционалниот леб од банана, често фаворизирана од оние кои бараат поздрав начин на живот или сакаат да изгубат тежина. За разлика од лебот од банана направен со брашно за сите намени, оваа верзија е без глутен и значително пониска со јаглени хидрати, што го прави соодветен избор за поединци кои сакаат да управуваат со нивниот внес на калории и да ја намалат потрошувачката на јаглени хидрати.

Темното чоколадо помага за побрз метаболизам

Ивона Петрова — Wed, 26 Apr 2023 11:25:29 +0000

Познато е дека чоколадото - темното, но не и млечното чоколадо, се смета за здраво уживање. Истражувањата потврдија дека, на пример, може да помогне во согорување повеќе калории. Темното чоколадо со 70 отсто или поголем удел какао, е богато со растителни соединенија наречени флавоноиди и флаваноли, што се поврзува со помала можност од срцеви заболувања. Американското здружение за срце забележува дека јадењето темно чоколадо веројатно е поврзано и со помала опасност од отпорност на инсулин и висок крвен притисок. Истражувањата укажуваат и на когнитивни придобивки, како што се подобрување на протокот на крв во мозокот, подобро помнење, побрза обработка на податоците и поубаво расположение. Научен труд објавен во „Интернејшнал журнал оф егзерсајз сајенс“ (International Journal of Exercise Science), го испитува ефектот на мала количина темно чоколадо врз потрошувањето енергија кај жените за време на одмор и во вежбање. Така, 18 жени во добра форма, одбрани по случаен избор, биле поделени во две групи - на едната ѝ е дадена 20 грама темно чоколадо, а на другата еднаква калориска количина бело чоколадо. Сѐ тоа требало да се јаде секој ден во 28-дневното тестирање. Испитаничките не биле свесни за фактот дека темното чоколадо е тестот, а белото е само плацебо-ефект. Вежбите вклучувале возење велосипед во место со два различни интензитета. Испитувањата покажаа дека учесничките кои јаделе темно чоколадо доживеале скоро 10 отсто зголемување на метаболичката стапка во мирување, наспроти никакво зголемување кај групата со белото чоколадо. Занимливо, темното чоколадо немало никакво влијание врз потрошувањето енергија за време на кој било интензитет во циклусот. Иако може да се претпостави дека кофеинот во чоколадото може да биде причина за зголемен метаболизам, написот вели дека дневната доза темно чоколадо - приближно четири парчиња, била премала за неговата содржина кофеин да игра значајна улога во исходот. Поверојатно е дека флавоноидите во темното чоколадо стимулираат зголемен метаболизам, според истражувачите. Тие посочуваат дека натамошните истражувања може да ја откријат и расветлат улогата на темното чоколадо во енергетскиот баланс, контролата на тежината и на телото воопшто.

Добри вести за љубителите на темно чоколадо: Научниците открија дека какаото го намалува крвниот притисок и го штити вашето срце

Магдалена Андонова — Mon, 01 Aug 2022 07:34:16 +0000

Следниот пат кога ќе посакате нешто слатко - земете темно чоколадо. Научниците открија дека флаванолите - антиоксиданси кои се наоѓаат во какаото - можат да го намалат вашиот крвен притисок и да помогнат во зајакнувањето на вашето срце. Утврдено е дека тие го прават тоа така што ги одржуваат ѕидовите на крвните садови еластични, што овозможува крвта полесно да тече низ телото. За жал оние со слатко, млечното чоколадо сè уште не се добра идеја и подобро е да ги прескокнете, бидејќи имаат многу шеќер и обично содржат само 25 проценти какао, додека темното чоколадо може да има и до 90 проценти. Студијата на Универзитетот во Сари, всушност, покажа дека луѓето кои земале додатоци на какао имале понизок крвен притисок и повеќе проширени крвни садови во рок од три часа. Апчињата имале флаваноли колку, да речеме, околу половина килограм темно чоколадо, кое обично се продава во пакување од 100 грама. - Позитивното влијание на какао флаванолите врз нашиот кардиоваскуларен систем е непобитно - објаснува водечкиот истражувач, професорот Кристијан Хајс, кардиолог. На пример, според Daily Mail, околу една третина од луѓето во Велика Британија имаат висок крвен притисок, што ги става на поголем ризик од срцев и мозочен удар. Лиснат зеленчук, кромид, јаболка, бобинки, цреши, соја, па дури и црвено вино се исто така богати со антиоксиданси здрави за срцето. Во најновата студија, 11 здрави возрасни лица конзумирале капсула какао или плацебо на наизменични денови речиси две недели додека го извршувале својот секојдневен живот. Учесниците носеа монитор за крвен притисок на раката и клип за прст што мери колку им се вкочанети артериите. На крајот од студијата, беше откриено дека нивниот крвен притисок бил понизок, а нивните артерии порелаксирани во деновите кога земале флаваноли - дури и до осум часа подоцна. Што е најважно, суплементите не го намалуваа крвниот притисок во деновите кога веќе беше низок. Професорот Хајс истакнува дека ова откритие може да биде пресвртница кога станува збор за употребата на лекови за одржување на крвниот притисок. - Лекарите често се плашат дека некои апчиња за крвен притисок можат премногу да го намалат притисокот во текот на денот. Она што го откривме укажува дека флаванолите на какаото го намалуваат крвниот притисок само ако е покачен - изјави професорот Хеис и најави дека сега планира да ги тестира апчињата меѓу пациентите кај кои е дијагностициран висок крвен притисок.

Има 7 одлични причини да се засладите со темно чоколадо

Ивана Ефремовски — Tue, 15 Mar 2022 15:26:11 +0000

Иако некои нутриционисти не би го дефинирале чоколадото во категоријата на здрава храна, тоа е одличен избор. Вкусното црно чоколадо е најздрав избор за десерт после овошјето. Секогаш кога имате желба за нешто благо, слободно посегнете по црно чоколадо. Штити од срцеви заболувања Црното чоколадо помага во намалувањето на високиот крвен притисок, со што го намалува ризикот од срцеви заболувања, па дури и од инфаркт. Го намалува ризикот од рак на дебело црево Во едно истражување спроведено во научниот институт за технологија на храна во Шпанија, се докажало дека полифенолите кои ги содржи црното чоколадо го намалуваат ризикот од канцерогени заболувања на дебелото црево. Претставува извор на здрави масти Маснотиите кои ги содржи црното чоколадо не го покачуваат холестеролот. Ова чоколадо во себе содржи и олеинска киселина која ја има и во маслиновото масло. Олеинската киселина помага против срцеви заболувања и ги потикнува антиоксидантните активности во телото. Го подобрува метаболизмот на гликоза Иако ова звучи нелогично, сепак темното чоколадо помага во регулирањето на нивото на шеќерот во крвта. Го подобрува расположението Истражувањата покажаа дека црното чоколадо го потикнува производството на ендорфин (хормонот на среќа), кој е природен антидепресив. Ја подобрува функцијата на мозокот На Универзитетот во Нотингем, професорот Мекдоналд со помош на магнетна резонанца докажал дека мозокот на лицата кои консумираат напитоци со какао, работи подобро во споредба со просечниот мозок. Па, не е чудно што децата и студентите многу често кога учат инстиктивно посегнуваат по чоколадо, барем изберете квалитетно. Ги намалува проблемите поврзани со ПМС Црното чоколадо го потикнува лачењето на хормонот ендорфин кој го намалува чувството на болка и го подобрува расположението. На овој начин поволно влијае на олеснување на непријатностите поврзани со ПМС.

Не е баш толку здраво: Зошто (сепак) мора да внимаваме кога јадеме црно чоколадо?

Ивана Ефремовски — Tue, 04 Feb 2020 19:06:12 +0000

Иако црно чоколадо често се смета за поздраво од млечното, експертите велат дека разликата помеѓу двата вида е многу мала. Основната причина за добрата репутација на црното чоколадо е тоа што содржи повеќе полифеноли од млечното чоколадо. Овие соединенија се секундарни метаболити во растенијата и имаат антиинфламаторно дејство врз телото. Но, не мора да јадеме црно чоколадо за да ги внесеме овие состојки, според експертите. Преку урамнотежената исхрана и јадењето овошје и зеленчук ќе внесеме и доволно полифеноли. И црното и млечното чоколадо се полни со калории. Во црното чоколадо тие се малку помалку и тоа содржи и помала количина шеќер, но често има повеќе маснотии во составот. Што се однесува до нашето здравје, навистина нема некоја голема разлика помеѓу црното и млечното чоколадо. Експертите уверуваат дека повремената и умерена консумација на чоколадо е добра и може да ни наштети само ако изедеме премногу голема количина или ако премногу често имаме навика да го јадеме. Тие препорачуваат да го консумираме чоколадото во помали парчиња и да дозволиме тоа да ни се топи во устата.

Слободно почестете се темно чоколадо: Еве кога и колку треба да јадете

Ивана Ефремовски — Fri, 12 Jul 2019 20:09:29 +0000

Руски експерти препорачуваат да се консумира половина црно чоколадо секој ден, но поделотворно е тоа да го правиме дење, оти тоа е висококалоричен производ што нè прави поенергични и попродуктивни, сметаат докторите. -Ако јадете темно чоколадо со удел на какао од најмалку 50 отсто, тогаш просечната количина што треба да се консумира, е околу 50 грама на ден. Може да си каснете и повеќе, ако се занимавате со потежок физички труд или спорт, смета проф. Алексеј Буверов, при Униврзитетот Сеченов во Москва, Русија. Темното чоколадо е здраво и содржи поголема концентрација на какао и други полезни компоненти. -Сега го проучуваме и благотворниот ефект на холестеролот врз метаболизмот. Односно, и покрај тоа што чоколадото содржи масти, флавоноидите ги намалуваат нивоата на холестерол, објаснува проф. Буверов. Според него, црното чоколадо има и компоненти што го заштитуваат црниот дроб, но предупредува дека може лошо да влијае на панкреасот.