тениски турнир – Kurir.mk

Воведно коло на тенискиот турнир „Македонија Опен 2023“

Тале Кристо — Tue, 23 May 2023 09:40:21 +0000

По комплетирањето на квалификациските натпревари, денеска почнува главната фаза на силниот АТП Челинџер турнир „Македонија Опен 2023“, кој се игра за награден фонд од 73.000 евра, а победникот ќе освои и 75 АТП поени. Најдобриот македонски тенисер Калин Ивановски, кој неделава напредуваше на АТП листата на 415 место, за пласман во второто коло ќе игра против Дино Призмиќ од Хрватска. Противникот на Ивановски е рангиран на 295 место на АТП листата. Од другите македонски претставници, во натпреварите во двојки ќе настапат Обрад Марковски и Горазд Србљак. Противници на македонската комбинација во првото коло ќе бидат Филип Бегеви од Шведска и Џејсон Тејлор од Австралија.

Утре стартува тенискиот „Скопје Опен 2022“ со награден фонд од 25.000 долари

Тале Кристо — Fri, 03 Jun 2022 13:28:37 +0000

Со квалификациски натпревари на терените на Тенискиот клуб „Југ“ утре стартува АТП машкиот Челинџер „Скопје Опен 2022“, како увертира на богата тениска програма во јуни и јули во македонскиот главен град. Како што соопштија организаторите, вкупно 64 тенисери в сабота и недела ќе се борат за пласман во главниот турнир, кој е од календарот на Меѓународната тениска федерација (ИТФ) со награден фонд од 25.000 долари. Најавени се тенисери од Шпанија, Холандија, Бразил, Шведска, Израел, Германија и многу други земји од светот, а од македонските играчи, меѓу другите, се пријавени Горазд Србљак, Стефан Мицов, Калин Ивановски и Обрад Марковски. „Скопје Опен 2022“ ќе се игра од 7 до 12 јуни, а веќе следниот ден на терените на „Југ“ ќе стартува машки тениски турнир со награден фонд од 15.000 долари. Во периодот од 4 до 10 јули во Скопје ќе се одигра и женскиот „Били Џин Кинг куп“, поранешниот ФЕД куп, од евро-африканската зона група 3, на која ќе настапи и најдобрата македонска тенисерка Лина Ѓорческа.

ВТА ги суспендираше сите тениски турнири во Кина

Ивона Петрова — Thu, 02 Dec 2021 09:10:31 +0000

Женското тениско здружение (ВТА) објави дека ги суспендира сите свои тениски турнири на подрачјето на Кина поради загриженост околу безбедноста на поранешната најдобра светска тенисерка во двојки Пенг Шуаи. – Не гледам како можам да барам од нашите спортисти да се натпреваруваат таму, кога Пенг Шуаи не смее слободно да комуницира со светот и се чини дека била под притисок да ги негира своите наводи за сексуално злоставување, изјави синоќа извршниот директор на ВТА Стив Сајмон. – Имајќи ја предвид актуеланата состојба на работите, исто така, сум многу загрижен поради ризикот со кои сите наши играчи и персоналот би можеле да се соочат доколку организираме настани во Кина во 2022 година, додаде првиот човек на ВТА. Каде се наоѓа Пенг Шуаи, една од најголемите кинески спортски ѕвезди, се наметна како прашање во меѓународната јавност, откако пред речиси еден месец тенисерката исчезна по објавата дека поранешен висок функционер на Комунистичката партија на Кина ја присилувал на сексуален однос. Шуаи во меѓувреме се појави во Пекинг и оствари видеоразговор со претседателот на Меѓународниот олимписки комитет Томас Бах, меѓутоа ВТА порача дека тоа не ја решила, ниту пак ја ублажила загриженоста околу нејзината безбедност.

Коронавирусот го откажа тенискиот турнир во Индијан Велс

Ивона Петрова — Mon, 09 Mar 2020 07:58:43 +0000

Организаторите на тенискиот турнир во Индијан Велс, кој требаше да се одржи оваа недела, известија дека поради коронавирусот, нема да се игра. Причината е што се откриени заразени лица на подрачјето на турнирот. Одлуката е донесена по консултација со експерти и со властите во државата Калифорнија. Не е соопштено дали Мастерсот ќе добие нов термин или воопшто е откажан. – Ние сме подготвени да го одржиме турнирот во друг термин и ќе разгледаме опции за такво нешто, изјави Томи Хас, директор на турнирот. Мастерсот во Индијан Велс е еден од најголемите турнири во календарите на АТП и ВТА.