тетово – Kurir.mk

Уапсена малолетничка од Мала Речица, полицијата при нејзин претрес и потоа во нејзиниот дом пронашла дрога

Тале Кристо — Sat, 04 Nov 2023 13:15:05 +0000

Полициски службеници од СВР Тетово вчера во 23:05 часот на улицата „Илинденска“ во Тетово лишиле од слобода малолетничка од село Мала Речица, тетовско, поради тоа што кај неа била пронајдена и одземена марихуана. -Малку подоцна, во координација со ОЈО Тетово бил извршен претрес во нејзиниот дом, при што била пронајдена и одземена бела прашкаста материја. Во присуство на родител и претставник од Центарот за социјални работи во полициска станица бил извршен службен разговор со малолетничката и по целосно документирање на случајот ќе следи соодветен поднесок, соопшти МВР.

Контроли на Бит Пазар, Зелен Пазар и пазарите во Тетово и Ченто: Запленети пиротехника и режан тутун кои нелегално се продавале (ФОТО)

Катерина Бојаџиева — Mon, 30 Oct 2023 19:46:09 +0000

Денеска (30.10.2023) полициски службеници од Одделот за криминалистичка полиција- Сектор за економски криминал и корупција и Одделот за сузбивање на организиран и сериозен криминал во координација со царински службеници од Секторот за контрола и истраги при Царинската управа и Државниот пазарен инспекторат на повеќе локации во Скопје спроведоа мерки и активности за сузбивање на криумчарење на акцизна стока и избегнување на давачки за продажба на режан тутун и производи од тутун без акциза и платени давачки. При контролата на Бит Пазар во Скопје констатирано е дека повеќе физички лица на импровизирани тезги вршат недозволена продажба на режан тутун, а со тоа избегнуваат плаќање акциза, како и поголема количина на пиротехнички средства, кои се одземени и по целосно документирање на случаите против лицата ќе бидат поднесени соодветни пријави, како и глоби од пазарните инспектори. Голема количина режан тутун и цигари се одземени и од пет физички лица кои вршеле продажба на импровизирани тезги пред зелениот пазар во Тетово, како и кај две лица на пазарот во населбата Методија Андонов Ченто во Скопје. На Зелен пазар во Скопје пак се одземени околу 180 килограми режан тутун, за што исто така ќе следуваат соодветни поднесоци.

Најдено починато женско лице кај трговскиот центар во Тетово

Катерина Бојаџиева — Fri, 27 Oct 2023 11:30:32 +0000

Утрово околу 9 часот и 30 минути е најдено починато лице во непосредна близина на градскиот трговски центар во Тетово. Веднаш потоа полицијата го обезбеди местото и започна увид заедно со претставниците на Обвинителството. -Јавен обвинител изврши увид на лице место. Издадена е наредба за обдукција на починатата, како и наредба за обезбедување на снимки од видеонадзор. Се преземаат сите дејствија за целосно расчистување на настанот, информираа од Обвинителството. ФОТО: МИА

Касами: Ако во училиштата се пее македонската химна, ќе мора да се пее и албанската!

Ивана Ефремовски — Fri, 27 Oct 2023 08:28:50 +0000

Градоначалникот на општина Тетово, Билал Касами истакна дека, ако се пее македонската химна во училиштата, мора да се почитува албанското мнозинство и да се пее и албанската химна, објави ТВ 21. -Тоа е политичко прашање. Како градоначалник можам да кажам дека ќе ги почитуваме законите и Уставот, но во исто време мора да ја почитуваме и различноста. Во овој случај, ако се донесе законска одлука за интонирање на државната химна, сигурно дека ќе мора да се почитува и мнозинството граѓани, кои се од албанска етничка припадност, ќе мора да се пее и албанската химна, рече Касами. Во некои скопски општини, за почеток во Аеродром, а потоа во Гази Баба и други, секој прв понеделник во месецот, наставата започнува со интонирање на државната химна на Македонија.

ВМРО-ДПМНЕ: Дали ДУИ мести тендер од 4.5 милиони евра во Тетово за партиска градежна фирма?

Тале Кристо — Fri, 27 Oct 2023 06:59:51 +0000

Дали ДУИ мести тендер од 4.5 милиони евра во Тетово за партиска градежна фирма?, прашуваат преку денешното соопштение од ВМРО-ДПМНЕ. На 12 октомври годинава МОН на Јетон Шаќири распишува јавен оглас за избор на фирма за реконструкција на средното училиште Моша Пијаде во Тетово во вредност од 4.5 милиони евра Тендерот кој е еден од поголемите во обем во државата го следат многу контроверзии. Постојат сомнежи дека ДУИ го мести за партиска градежна фирма. Според условите на повикот фирмите кои воопшто може да учествуваат мора да имаат реализирани минимум три договори во последните пет години, од кои барем еден да биде со сума не помала од 160 милиони денари. Дополнително фирмите мора да имаат приход не помал од 287 милиони денари за секоја од последните три години. Според условите на тендерот станува јасно дека веќе однапред е скицирана фирмата или фирмите кои треба да се јават на него, а потоа и да го добијат. Дали повторно како фирма добитник на овој тендер ќе се јави фирма донатор на ДУИ или фирма блиска до врвот на оваа партија?, се вели во соопштението на партијата.

Протест на учениците и родителите во тетовското медицинско училиште

Дарко Андоновски — Thu, 26 Oct 2023 13:51:17 +0000

Учениците со нивните родители, професори и раководството на Општинското средно медицинско училиште „Никола Штејн“ во Тетово протестираа во училишниот двор. Причина е известието од Министерството за образование, за кое велат дека, учениците од дуалните паралелки ќе бидат изземени од стипендија. Родителите се револтирани затоа што добивањето стипендија и извршување практична работа во здравствена установа како дуално стручно образование било наведено во конкурсот при упис и, затоа сите тие се одлучиле да ги одберат тие паралелки. -Без никакво објаснување Министерството објави дека од 1500 ученици кои ќе добиваат стипендија во дуалните паралелки, се изземаат само учениците од здравствена струка во средни училишта на ниво на државата. Ние имавме шест паралелки по 25 или вкупно 150 ученици. Министерството за образование зеде обврска преку фондот добиен од Швајцарската амбасада да им додели стипендија од 3500 денари по ученик во текот на школска година од девет месеци, изјави Бинас Пајазити, директор на ОСМУ „Никола Штејн“. Револт има и кај наставниот кадар затоа што имале повеќе месеци работа за да се организираат и договорат овие дуални паралелки со повеќе здравствени установи. - Без разлика на образложението ние сме ги направиле сите процедури. Изгласано е во советот на училиштето, Совет на Општина, па пратени до Министерството, тие ги анализирале и го објавиле конкурсот за дуални паралелки. Наеднаш го одземаат правото на децата тоа што им следи според објавениот конкурс. Бараме од Министерството ако може оваа учебна година да го добијат ова право затоа што им следи согласно конкурсот. Ако не следат стипендии за дуално образование, нема да се нафатиме, затоа што ова е макотрпна работа, со секоја здравствена установа треба да се преговара и да се потпише договор, рече Пајазити. Кај родителите незадоволството е големо затоа што децата се одлучиле за ваква струка токму поради убедувањата на властите да се избере средно стручно образование, како начин на полесно обезбедување работа во иднина. - Ова право треба да се оствари бидејќи им биле ветени стипендии, уште пред упис, сега имаме известие дека нема да добиваат. Тоа значи дека се деградирани и нивното право кое им беше ветено нема да биде реализирано. Како сите струки така и медицинската е многу битна за секое општество. Ова е тешка професија за која треба да се залага секој за да постигне резултати, да спасува животи и хумано да се однесува, изјави Бети Богоев, мајка на ученик. - Да ни кажат зошто тие средства се блокирани. Ние не знаеме. Тие пари ќе бидат поттик и за поголема волја да учат понатаму. Тие се добро дојдени средства бидејќи ние се соочуваме со економски предизвици, изјави Шабан Зибери, татко на двајца ученици во медицинското училиште. Директорот Пајазити рече дека по писмен пат побарале но не добиле одговори од оддел за стипендии во Министерството за образование и од Центарот за стручно образование. Според информациите она училиштето во јануари 2023 Министерство за образование и Швајцарската амбасада потпишале меморандум за соработка и грант од 5.9 милиони швајцарски франци за стипендирање на учениците од дуалните паралелки.

Касами го обвини Министерството за образование дека не ги исполнува обврските кон тетовската гимназија

Ивана Ефремовски — Thu, 26 Oct 2023 12:56:09 +0000

Градоначалникот на Тетово, Биљал Касами на прес-конференција упати критика и обвинување за незаконски постапки до Министерството за образование и наука околу одземањето на неговите ингеренции врз гимназијата „Кирил Пејчиновиќ“. Тој го обвини Министерството за неправилно одземање на ингеренциите поради што се проблематизира нормалното функционирање на гимназијата. -Една ингеренција за една работа може да се одземе два пати, но не подолго од 12 месеци. Во Министерството нашле начин како да ги одземат ингеренциите уште 12 месеци со некоја правна дефиниција дека ми ги одземаат сите надлежности во гимназијата. Заборавиле дека Општината не е само градоначалникот, Општината е Советот и градоначалникот, со поделени надлежности. Советот го усвојува буџетот, кој го реализира градоначалникот. Со тоа што на градоначалникот му ги имаат одземено ингеренциите не можат со таа одлука да реализираат буџет, затоа што буџетот е надлежност на Советот. Во тој дел тие не можат да постапат затоа што донеле незаконско решение и сега доаѓа до оваа ситуација во која не можат да ги реализираат обврските кои доброволно против законски ги зеле, истакна Биљал Касами. Тетовскиот градоначалник смета дека поради потезите на Министерството за образование нема редовно дотации до гимназијата со што се јавуваат финансиски проблеми за установата. -Доцни плаќање на струја исто така предупредувам и за друг проблем. Доцнат плаќања до фирмите кои вршат превоз за ученици од гимназија, како што имам информации. Министерот за образование рече дека поради тоа што по вторпат се одземаат ингеренциите, обврска на Министерството е да најде решение за раздолжување на долговите за струја во гимназијата „Кирил Пејчиновиќ“, па дури и призна дека не се способни да го направат ова наеднаш, ама го прават на рати, месец по месец, посочи Касами на прес-конференцијата. Тој рече дека со ова Министерството во последно време не ги исполнува своите задачи и обврски и не обезбеди соодветна поддршка за училиштата во Тетово. Потоа потенцираше дека да била вината кај општина Тетово, ова ќе се случело и во другите училишта, но тоа не е така и наставата продолжува непречено и ефикасно. -Значи ова е силен доказ дека ДУИ заедно со нејзиниот министер за образование и познатата директорка воопшто не се грижат за одвивање на наставниот процес, туку се занимаваат со дневна политика и клеветење на општината, но се чини дека тоа не го прават добро бидејќи се негираат сами себе си. Општина Тетово во овој период нема пуштено финансиски средства на Гимназијата, но добро е познато зошто. Бидејќи гимназијата ја води директорка која има кривична тужба за злоупотреба на средства, и истото е констатирано и од внатрешната ревизија, кои констатирале сериозни прекршувања на користењето на финансиските средствата. И поради оваа причина Општината не е заинтересирана да дава средства за да продолжат да се злоупотребуваат, рече Касами. (МИА)

Од Косово бил дојден во Тетово за летово да продава марихуана

Ивана Ефремовски — Sat, 21 Oct 2023 20:19:15 +0000

СВР Тетово поднесе кривична пријава против Е.Б. (23) од Косово, поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори“. На 09.06.2023 во Тетово, полициски службеници извршиле преглед во патничко возило „мерцедес“, во кое бил пријавениот, при што пронашле и одзеле марихуана.

Тинејџер нападнат во Тетово

Ивана Ефремовски — Sat, 21 Oct 2023 18:51:09 +0000

На 20.10.2023 во 19:50 часот И.П.(18) од Тетово пријавил дека околу 19:05 часот во „Жена парк“ во Тетово бил физички нападнат од едно лице. Се преземаат мерки за расчистување на случајот.

Работник од Тетово тешко се повредил при изведување на градежни работи

Тале Кристо — Fri, 20 Oct 2023 19:00:42 +0000

На 19.10.2023 во 14.05 часот во ОВР Берово, од Итна медицинска помош било пријавено дека кај нив со тешки телесни повреди бил донесен Б.Г.(34) од Тетово. Според пријавеното, тој се здобил со повредите при извршување градежни работи на објект во изградба на ул.„Маршал Тито“ во Берово. Увид извршила екипа од ОВР Берово.