ТФТ Скопје – Kurir.mk

ТФТ со пораз ја отвори новата сезона во АБА2 лигата

Бошко Тасиќ — Tue, 10 Oct 2023 04:07:37 +0000

Македонскиот кошаркарски прволигаш ТФТ доживеа пораз од Златибор од 93:74 во првата средба од новата сезона во АБА2 лигата. Скопскиот тим не одигра добро во првата и последната четвртина што придонесе на крајот да доживеаа и убедлив пораз од српскиот тим. Златибор првите десет минути ги реши со 33-22, па таа предност потоа ја задржа по 20 и по 30 минути игра за да во завршниот период дополнително ја зголеми и на најдобар можен начин го отвори турнирот во Суботица. Најефикасен играч кај ТФТ беше Николов со 17 поени на кои придодаде 5 скока и 1 асистенција. Ковачевиќ пак со 22 кошеви беше прво име кај победникот. ТФТ во второто коло се соочува со Широки Бријег.

Три нови имиња во ТФТ

Бошко Тасиќ — Tue, 29 Aug 2023 04:22:25 +0000

Екипата на ТФТ ја формира екипата за новата сезона во домашното првенство и во АБА-2 лигата, а донесе вкупно четири американски кошаркари, од кои двајца се повратници. Давид Хотон се враќа во дресот на ТФТ, каде играше важна улога во ланската сезона и ќе остане една година. Исто така во Тафталиџе ќе игра и Двејн Морган, кој е повратник по една сезона во Мексико. Новајлија е Треј Верц, „руки“ од Универзитетот Нотр Дам, а минатиот месец работеше на тренинг-кампот на НБА-тимот Шарлот Хорнетс, пред драфтот за најсилната лига во светот. Се работи за бек висок 196 сантиметри, има 23 години и ќе ја има првата европска авантура. ТФТ и Верц потпишаа договор на една година, со можност истиот да биде продолжен на уште една сезона. Се очекува Американецот со својот стил на игра да биде од помош за натпреварите во АБА-2 и во мак-баскетот. Претходно, ТФТ потпиша договор и со Џелани Симонс, што значи дека Боро Смилковски во новата сезона во ростерот ќе има најмалку четири Американци.

ТФТ Скопје и следната сезона во АБА 2 лигата

Бошко Тасиќ — Wed, 07 Jun 2023 05:12:09 +0000

Освојувачот на Купот на Македонија од 2022 година, ТФТ Моцарт и во новата сезона ќе биде еден од претставниците на нашата земја во АБА 2 лигата. Право на настап во неа, тимот од Тафталиџе обезбеди со третото место во основниот дел од домашното првенство, а денеска на адреса на клубот пристигна потврда дека е прифатена апликацијата и дека раководството може да почне да се подготвува на организациски и играчки план. Во својата дебитантска сезона, ТФТ го освои 11. место со три победи и 10 порази и не успеа да се пласира во плејофот, па тоа ќе биде една од амбициите за идната натпреварувачка кампања. Мината сезона ТФТ учествуваше и во квалификациите за Кошаркарската Лига на Шампиони, дури и беше организатор на еден од турнирите, но останува да се види дали и претстојната сезона ќе биде дел од натпреварувањата на ФИБА. Покрај ТФТ Моцарт, право на настап во АБА 2 лигата имаат и МЗТ Скопје кој испадна од елитната дивизија и Пелистер кој го освои второто место во основниот дел.

ТФТ ја доби „мајсторката“ со Еуро Никел и се пласира меѓу најдобрите четири

Бошко Тасиќ — Sat, 06 May 2023 18:27:14 +0000

По МЗТ Скопје, втор патник во полуфиналето во македонскиот кошаркарски плејоф е екипата на ТФТ, која лесно ја доби „мајсторката“ со Еуро Никел, користејќи ја предноста на домашниот терен. Првата четвртина беше катастрофална во офанзивен план и двата тима потфрлија со реализацијата, па иако гостите од Кавадарци се снајдоа подобро и имаа предност од 8:14, продолжението донесе сосема поинаква кошарка. ТФТ промени брзина и заигра навистина побрзо, а тоа направи да ги добие сите наредни три четвртини и да оствари сигурна победа со резултат 73:59. Александар Костоски беше лидер со 26 поени во својот тим, па го доби епитетот играч на мечот и покрај тоа што Планиниќ на спротивната страна постигна 31 поен. Тимот од Тафталиџе со оваа победа се пласираше меѓу четирите најдобри, а таму ќе игра со подобриот од дуелот меѓу Пелистер и Феникс.

ТФТ со триумф го обезбеди третото место пред стартот на плеј-офот

Бошко Тасиќ — Sat, 22 Apr 2023 17:19:11 +0000

Екипата на ТФТ беше голем фаворит во денешната пресметка против Куманово и славеше огромна и заслужена победа со резултат 107-70. Ова за тимот на тренерот Боро Смилковски значи дека сигурно го обезбедуваат третото место на табелата во регуларниот дел од Првата лига. Марко Симоновски и Виктор Ташовски беа најрасположени и двоцифрени уште во првото полувреме. Симоновски постигна 21 поен и Виктор Ташовски 18 поени, додека кај гостите од Куманово најдобар поединец беше Андрија Маријановиќ со 19 поени зад своето име.

МЗТ Скопје по победата над ТФТ се пласира во финалето на Купот на Македонија

Бошко Тасиќ — Fri, 17 Feb 2023 18:29:26 +0000

МЗТ Скопје буквално го прегази тимот на ТФТ победувајќи го со 41 поен разлика, тимот од аеродром славеше со 102-61 и се пласираше во финалето од Купот на Македонија. Кошаркарите на МЗТ Скопје утре ќе се борат за 11. трофеј во Купот на Македонија со што би се одлепиле од главниот ривал Работнички со кој засега имаат по 10 трофеи во ова натпреварување. Неизвесно беше само во првите минути од мечот, потоа МЗТ Скопје се одлепи и уште во првиот период направи двоцифрена разлика која до крајот на мечот само ја зголемуваше за на крајот да победи со дури 41 поен разлика, 102-61. Кошаркарите на МЗТ Скопје имаа шутерско шоу, постигнаа дури 18 тројки. Најдобар стрелец беше Дамјан Стојановски со 18 поени, Робев постигна 16. Во составот на ТФТ, Бишоп постигна 15 поени.

ТФТ лесно со Академија

Бошко Тасиќ — Mon, 28 Nov 2022 21:54:01 +0000

ТФТ денеска имаше полесен тренинг против ФМП Академија и го декласираше противникот во меч во кој постигна повеќе од 100 поени, а воедно оствари победа од 43 разлика. Натпреварот од седмото коло му ја донесе четвртата победа на ТФТ во домашното првенство, но додека тафталиџани се враќаат во форма, „академците“ остануваат на разочарувачки биланс. Со денешниот убедлив пораз, ФМП останува на една победа во домашното првенство, а шестиот пораз прави да биде сигурен фенерџија во домашниот шампионат. Николов со 18 поени и 11 скока беше лидер во победата на ТФТ, Батрик уфрли 16 поени, а двоцифрени беа и Бишоп (14), Мекбрајер (14), Андерсон (13) и Крстевски (11).

Кошаркарите на ТФТ го претрпеа и третиот пораз во АБА2 лигата

Бошко Тасиќ — Tue, 22 Nov 2022 06:01:03 +0000

Македонскиот кошаркарски клуб ТФТ го отворија вториот „балон“ во АБА 2 лигата, во Сараево (Босна и Херцеговина), со пораз од актуелниот првак Златибор од Србија (76:90). Првото полувреме протекна во постојано водство на Златибор, во осмата поведе со 21:13, а со тројката на искусниот Костоски, ТФТ го затвори првиот период со минус од еден поен, (24:25). Израмнето се играше и во најголем дел од втората четвртина. Дел од играта во кој Златибор одново се одвои на плус од осум поени разлика (40:32), како што беше резултатот во 16 минута од играта. Серија која со тројка ја прекина Бишоп (35:40). Но „црно-белите“ немаа доволно добри решенија за шутерски расположениот противник кој стигна и до својата седма тројка (од 17 обиди) за ново „бегство“, сега на исто така солидни 43:35 со кои се влезе во последната минута од првото полувреме, кое заврши со истиот резултат. Слично беше и во второто полувреме, со таа разлика што српската екипа за прв пат на средбата се стекна со двоцифрено водство (53:42), како што беше во 24 минута. Но, новите две тројки на Костоски, го вратија тимот од Тафталиџе кон егал-резултат, за преполување на високата негатива (48:53). Но, за кратко, не можеа да се одбранат од тројките на Ѓуран (пет од тимските 10), кој ја врати предноста, онаа двоцифрената (54:64) на истекот на третиот период. Во оној последниот, ТФТ не го направи она што го бараше во претходните три. Таа негатива остана недостижна за тимот на Боро Смилковски, кој го запиша третиот пораз на дебито во ова натпреварување. Костоски реализираше 12 поени (4/5 во шутот за три поени), а Ташовски еден кош помалку. Нашиот втор претставник во регионалното натпреварување, екипата на Пелистер, својот натпревар од третото коло на турнирот во Сараево ќе го одигра на 23 ноември (среда). Противник на „пелистерци“ во обид да стигнат до својата трета победа ќе им биде екипата на Широки од БиХ. Овој меч Пелистер-Широки ќе стартува од 15.00 часот

ТФТ домаќин на квалификациски турнир од официјалната кошаркарска лига на шампиони во организација на ФИБА

Бошко Тасиќ — Fri, 16 Sep 2022 19:19:45 +0000

Скопје за прв пат во својата историја има чест да биде домаќин на квалификациски турнир од официјалната кошаркарска лига на шампиони во организација на светската кошаркарска федерација ФИБА. Нашата гордост од Тафталиџе, екипата на ТФТ, храбро го прифати предизвикот да биде домаќин на великани од самиот врв на европската кошаркарска елита. Во период од 21.9 – 25.9. 2022 година, во три натпреварувачки дена, преку елиминационен систем на натпревари, Европа ќе го добие новиот учесник во групната фаза од лигата на шампионите. За престижното „столче“ во елитата, покрај нашиот ТФТ, како минатогодишен освојувач на купот на Македонија, ќе се борат и романскиот ЦСО Волунтари, швајцарски Фрибург, најстариот британски кошаркарски клуб Лестер Рајдерс, како и одлично познатите Кемниц од Германија и Тофаш Бурса. Натпреварите ќе се играат во салата „Борис Трајковски“, а карти за истите може да се набават на овој линк.

МЗТ Скопје е првиот финалист во финалето на кошаркарскиот плеј-оф

Бошко Тасиќ — Mon, 30 May 2022 05:10:53 +0000

Актуелниот македонски кошаркарски шампион, МЗТ Скопје Аеродром ќе игра во финалето на плејофот, откако вечерва во СРЦ „Кале“ го победи ТФТ со 92:82.

Аеродромци полуфиналната серија ја завршуваат со 2:0. Најефикасни на вечерашниот меч беа Ајви со 18, Милошевиќ со 17 и Дамјан Стојановски со 16 поени.

Во поразениот тим се истакнаа Морган со 19, Хортон со 17 и Николов со 15 поени.