Тјери Анри – Kurir.mk

Анри: Сите европски клубови му се плашат на Реал, а Реал ѝ се плаши на Барселона

Ристе Здравков — Tue, 10 May 2022 15:57:02 +0000

Тјери Анри по долгогодишната кариера во Арсенал одлучи да заигра за Барселона. Во периодот минат во Шпанија доби шанса да се надигрува со Реал Мадрид, во популарното „Ел Класико“. Францускиот напаѓач моментално работи како фудбалски аналитичар во „Скај Спортс“. По повод епскиот пресврт на „кралевите“ во трите двомеча од нокаут фазата во Лигата на шампионите тој даде интересна изјава која ги радува фановите на каталонскиот клуб. „Сите европски клубови му се плашат на Реал, а Реал се плаши од Барселона. Лично јас мислам дека Ливерпул ќе ја освои титулата во Лигата на шампионите. Тимот на Клоп е многу посилен од Реал Мадрид“, рече Анри. Финалето во Лигата на шампионите оваа година требаше да се одигра во Санкт Петербург. Поради воениот конфликт меѓу Русија и Украина, мечот за титула беше преместен во Париз (28 мај).

Ширер и Анри први фудбалери во Куќата на славни на Премиер лигата

Ивона Петрова — Mon, 26 Apr 2021 10:19:19 +0000

Поранешните англиски и француски фудбалски репрезентативци, Алан Ширер и Тјери Анри, станаа првите играчи примени во Куќата на славни на Премиер лигата од нејзиното формирање во 1992 година. Ширер, кој во својата кариера со голем успех го носеше дресот на Блекбурн и Њукасл, и натаму го држи рекордот на најдобар стрелец во Премиер лигата со 260 голови на 441 натпревари во 14 сезони. Со Блекбурн ја освои шампионската титула во сезоната 1994/5 под водство на Кени Далглиш., по што од 1996 до 2006 година играше за Њукасл. – Кога ќе ги погледнете имињата на сите играчи одликувани во Премиерлигата, влезот во Куќата на славни за мене претставува огромна чест. Сè што посакував во животот е да бидам професионален фудбалер. Мојот сон беше да освојувам трофеи, да постигнам гол на „Сент Џејмс парк“, да го облечам „црно-белиот“ дрес со бројот 9 … Уживав во секој момент, изјави Ширер. Французинот Анри дојде во Премиер лигата по трансферот од Јувентус во Арсенал во 1999 година и освои две шампионски титули со тимот од северен Лондон. Најдобриот стрелец во историјата на Арсенал рекордни четири пати ја освојуваше „Златната копачка“, а за Арсенал постигна вкупно 175 голови на 258 натпревари. – Приемот во Куќата на славни заедно со Алан Ширер е нешто посебно. Да ми кажевте на почетокот на кариерата дека еден ден ќе бидам дел од Куќата на славните немаше да ви верувам. Ова е неверојатна чест за мене, рече Анри. Потесниот избор на уште 23. фудбалери номинирани за влез во Куќата на славни ќе биде соопштен вечерва, а избрани ќе бидат шестмина од нив.

Тјери Анри поради расизам ги брише сите профили од социјалните мрежи

Тале Кристо — Fri, 26 Mar 2021 20:51:53 +0000

Поранешниот француски фудбалер Тјери Анри објави дека поради распространетиот расизам на социјалните мрежи од утре ги затвора сите свои профили. Анри рече дека компаниите што стојат зад социјалните мрежи не сториле доволно за да спречат насилничко однесување кое редовно за цел ги има фудбалерите со темна боја на кожата. – Од утре изутрина ги бришам сите свои профили на социјалните мрежи сè додека надлежните не ги регулираат своите платформи со иста енергија и жестина како што тоа го прават кога се кршат авторските права, наведе поранешниот француски репрезентативец и член на Арсенал.

Анри: Монако испливува, но се уште не е на сигурно

Ивона Петрова — Wed, 05 Dec 2018 11:40:13 +0000

Тренерот на Монако, Тјери Анри смета дека не треба да залажува победата над Амиен (2:0) оставрена синоќа во натпревар од 16. коло на француското првенство. Ова е втора победа на Монако под водство на Анри. – Ние испливуваме, но сепак не се многу сигурни, понекогаш пак сме под вода. Ни треба серија победи за да може да дишеме длабоко. Треба да продолжиме напорно да работиме пред големиот натпревар со Ница. Ова е дерби, ова е многу важен дуел за нас. Победата над Амиен треба да ни е мотив плус, изјави Анри. Во пресрет на преостанатите натпревари од колото, Монако со 13 бода за прв пат по подолго време излезе од зоната на испаѓање на табелата во Лига 1. МИА

Анри и Бордо не се договорија

Ристе Здравков — Tue, 28 Aug 2018 09:25:12 +0000

Францускиот прволигаш Бордо и поранешниот репрезентативец на таа земја, Тјери Анри не се договорија околу преземањето на тренерската функција. Како што објави „Л’Екип“ двете страни не можеа да ги усогласат ставовите околу условите за реализација на трансферот. Анри наводно побарал плата од 200 илјади евра месечно, а раководството на Бордо не било подготвено да го ангажира за таа сума, а како аргумент било посочено неговото тренерското неискуство како шеф на стручен штаб. Бордо е во потрага по нов тренер по отстранувањето на Густаво Појет кој имаше конфликт со управата на клубот.