Николовски: Ќе реализираме голем број на капитални проекти во Кратово во идната 2023 година

Тале Кристо — Sat, 24 Dec 2022 11:53:13 +0000

И покрај големите проблеми и тешката состојба предизвикани од светската економска и енергетска криза, која предизвика инфлација и поскапување на сите услуги и трошоците за живот, Општина Кратово планира реализација на голем број проекти во нареднава 2023 година. Ова е главната поента од обраќањето на Тодорче Николовски, градоначалник на Општина Кратово на средба на градоначалниците од редовите на ВМРО-ДПМНЕ коалицијата која што се одржа во Кочани. Општина Кратово ја наследив со голема кадровска неекипираност во општинските служби, недостаток на проекти и технички документации, но и со комплицирана соработка со Министерството за транспорт и врски и останатите органи на централната власт, која за нас е многу потребна, пред се поради статусот на централното градско подрачје кое е прогласено за Културно наследство од особено значење. Општина Кратово, заедно со својата администрација и Совет, со максимални напори и голем труд успеа да изработи голем број на проекти и градежни активности – кажа градоначалникот Николовски. Кратовскиот градоначалник најави реализација на голем број на капитални проекти за идната 2023 година, кои покрај од сопствени општински средства, би биле реализирани и со финансиски средства од други тела и агенции. Во 2023 година ќе се изврши реконструкција на улицата „Јосиф Даскалов“ која е една од најважните сообраќајници во централното градско јадро, а за чија реализација се потребни 12,6 милиони денари. Со овој проект е предвидена реконструкција и целосна замена на старата коцка. Тука е и капиталниот проект за асфалтирање на улицата „ Ѓорѓи Какашевски“, на потегот наречен „Млачки пут“ за чија реализација обезбедивме 5 милиони денари. Веќе се завршени постапките и избран е изведувач за уредување на кејот на Кратовска река, каде ќе се изградат пешачки мостови, ќе се постават заштитни огради, ново осветлување, ќе се изгради пешачка патека до спомен костурницата. Во тек се постапките за избор на понудувач за уредување на платото пред Домот на културата во Кратово, а се планира и ревитализација на турскиот затвор. Обезбедивме средства во износ од 3 милиони денари од ТАВ програмата за изградба на водовод во селото Полови, а обезбедени се и средства во износ од 4,6 милиони денари за набавка на градежна машина која ќе биде од огромно значење за секојдневните активности на нашата општина – додаде градоначалникот Николовски. Градоначалникот на Кратово најави реализација на повеќе проекти и со средства кои планира да ги обезбеди преку Северноисточниот регион за кои општината има изработени технички документации, а тука се реконструкција на повеќе локални улици и патишта, како што се „Вера Пазаванска“, дел од улица „Табачка маала“, дел од улица „Планинска“, изградба на пешачка патека од црквата „Свети Ѓорги Кратовски“ со местото Габреш и многу други проекти. Регионалната средба беше организирана од страна на Комисијата за локална, Комисијата за инфраструктура, урбанизам и транспорт и Комисијата за финансии при ВМРО-ДПМНЕ.

Николовски: Со подобрување на условите на живеење граѓаните ќе останат во Кратово, ќе се прекине егзодусот на кратовската младост

Ивана Ефремовски — Wed, 13 Oct 2021 17:08:09 +0000

„Мојата кандидатура за градоначалник на Кратово доверена од ВМРО-ДПМНЕ и Социјалистичката партија на Македонија ја доживувам како огромна чест но истовремено и голема одговорност и обврска, сериозна должност која ќе ја оправдам пред вас граѓаните на Кратово“, истакна Тодорче Николовски, кандидат за градоначалник на општина Кратово на митингот. Николовски вети поинаков пристап кон суштинските проблеми на градот и кратовските села. Исто така вети целодневна посветеност, секојдневна отвореност и пристапност за секој граѓанин на Кратово, отчетност, транспарентност, со сите сили заедно со граѓаните ќе се воздигне градот. „Ви нудиме програма со остварливи проекти кои ќе го разубават нашето место и ќе го подобрат квалитетот на животот на граѓаните во рамките на финансиските можности на општината. Нудиме проекти со кои ќе се решаваат проблемите во комуналните работи, инфраструктурата, урбанизмот, животната средина и сообраќајот. Квалитетни проекти со кои ќе се пробиваат, трасираат и тампонираат локални патишта, проекти со кои ке се реконструираат и асвалтираат голем број на улици и патишта во градот и кратовските села со кои ќе се воспостави подобра комуникација со маалите, селата и соседните општини. Активности во насока на подобрување на капацитетите и квалитетот на водата за пиење како и одведување и обезбедување на вода во места и средини каде што ја нема“, нагласи Николовски. Николовски додаде дека ќе се залага во подобрување на условите за образованието, обнова на градинките, училиштата, школскиот инвентар, модернизација и компјутеризација, како и доедукација на наставниот кадар. „Ќе воспоставиме механизми за вклучување на граѓаните, бизнис секторот и други интересни заедници во работата и носењето на правилни одлуки во општината, форми и механизми кои во досегашното функционирање на Општината не биле пракса, облици на учество на граѓаните како форуми на заедници, јавни дебати и граѓански иницијативи, на овој начин ке се градат мостови на соработка меѓу локалната самоуправа и граѓаните и ќе се зголемува транспарентноста“, рече Николовски. Николовски посочи дека со многу труд, секојдневен ангажман, заедно со неговиот тим, и поддршката од граѓаните Кратово ќе стане убаво место за живеење, привлечно туристичко место, град на задоволни и исполнети граѓани. Со развојот на општината, со подобрување на условите на живеење ќе се допринесе да граѓаните да останат да живеат во градот, и ќе се прекине егзодусот на кратовската младост.

Тодорче Николовски – Kurir.mk

Николовски: Ќе реализираме голем број на капитални проекти во Кратово во идната 2023 година

Николовски: Со подобрување на условите на живеење граѓаните ќе останат во Кратово, ќе се прекине егзодусот на кратовската младост