томислав јагуриновски – Kurir.mk

Јагуриноски: Мора да бидеме цврсти во дефанзивата

Бошко Тасиќ — Tue, 07 Mar 2023 06:08:03 +0000

Томислав Јагуриноски е еден од оние ракометари кои покажа дека местото му е меѓу најдобрите во македонскиот дрес. Пред двомечот со Португалија, уште еден квалитетен противник во редот, вели дека треба да одиграат перфектно во одбраната, нешто што мора да се промени од последниот настап на Македонија, а тоа е Мундијалот во Полска. „На овие два меча ќе бидеме без поискусните во составот. Против Португалија ќе играме без притисок. Добро знаеме за каков противник станува збор, но секако ќе се подготвуваме за победа. Мора да ја бидеме цврсти во одбраната, да го подигнеме нивото, да одиграме квалитетно со многу дуели, млади сме мора да трчаме на теренот, да бидеме агресивни. Не смееме да дозволиме да примаме многу голови како на Светското првенство“, изјави Јагуриноски.

Јагуриновски: Не бевме на тоа ниво на кое што треба да бидеме

Бошко Тасиќ — Wed, 01 Mar 2023 05:18:02 +0000

И покрај поразот, Вардар 1961 е лидер во групата Б на СЕХА лигата со шест бода, пред Партизан и Татран Прешов кои имаат по три. Сепак, скопскиот тим ги заврши своите натпревари, а Словаците и Србите требаат да играат двапати меѓусебе. „Ова не беше одличен натпревар, одлична атмосфера. Попладнево Партизан беше подобар од нас, ние не бевме на тоа ниво на кое треба да бидеме. Му честитам на противникот за триумфот“, рече Томислав Јагуриновски по натпреварот.

Против Холандија без Јагуриновски!

Ристе Здравков — Sat, 14 Jan 2023 14:20:52 +0000

Maкедонската репрезентација утре против Холандија ќе мора да биде без Томислав Јагуриновски кој се повреди вчера против Норвешка во поразот од 27:39. Првите прогнози беа дека повредата на Јагуриновски на скочниот зглоб не е сериозна, но сепак дополнителните прегледи покажаа дека селекторот Лазаров нема да може да смета на него за утрешниот дуел. На местото на Јагуриновски повикан е Давид Савревски. Савревски заедно со Цветан Кузмановски и Марко Кизиќ беа ракометарите кои отпаднаа за конечниот список, но беше највено дека ќе бидат спремни да заменат некого доколку има потреба. Отсуството на Јагуриновски сигурно ќе биде хендикеп за нашата селекција, посебно затоа што вчера против Норвешка беше одличен додека беше на теренот. Натпреварот против Холандија Македонија го игра утре од 18:00 часот, додека третиот дуел на првенството ќе го играме против Аргентина во вторник исто така од 18:00 часот.

Повредата на Јагуриновски е од полесен карактер

Бошко Тасиќ — Sat, 14 Jan 2023 07:15:35 +0000

Повредата на Томислав Јагуриновски се чини дека не е сериозна иако точно ќе се знае откако ќе биде напревена снимка. Јагуриновски се повреди во финишот од првото полувреме, по што на раце беше изнесен од теренот. Селекторот Лазаров вели дека првиот впечаток на медицинските лица е дека не станува збор за сериозна повреда.

„Првите мислења на медицинскиот тим се дека повредата не би требало да е сериозна. Секако, сега ќе направиме снимки, па ќе знаеме поточно за што се работи. Сепак тој е борбено момче, се надевам ќе го имаме за Холандија. Кога би го немале Јагуриноски би било огромен хендикеп за нас. Тој е сепак малку поискусен од Серафимов, потребен е и во напад и во одбрана“, рече Лазаров.

Јагуриновски: Ќе дадеме сè од себе, одиме да се надигруваме со сите ривали

Ристе Здравков — Fri, 13 Jan 2023 09:54:18 +0000

Може ли овој петок 13-ти да биде среќен за македонската ракометна репрезентација? Дуелот со Норвешка вечерва ќе го отвори нашиот осми Мундијал, а на хартија првиот дуел ни е со најсилната селекција во групата. Сепак, свежи се сеќавањата од ремито во „Таурон Арена“ пред седум години на шампионатот на Европа. Пред соочувањето со Сагосен и другарите својот став за натпреварот го изнесе десниот бек Томислав Јагуриновски. „Ќе дадеме сè од себе да го изненадиме денешниот противник. Норвежаните играат одличен ракомет, познати се по својата игра. Сметам дека можеме да одиграме добар натпревар и во некој сегмент да ги изненадиме. Ми се допаѓа овој систем, ми одговара побрзата игра. Јас мислам дека сме добри и ќе бидеме само уште подобри. На подтотвителниот турнир во Хрватска игравме коректно во нападот, а мал проблем беше одбраната, на пониско ниво. Тоа мора да го поправиме. Нормално е кога играш брзо да примаш повеќе голови. Норвешка игра исто така брзо, знае што прави и не смее да се греши. Одиме на победа на секој натпревар, да се надигруваме со сите“, кажа Јагуриновски. Пред натпреварот Македонија - Норвешка во нашата група Е уште ќе играат Аргентина и Холандија.

Вардар ќе ги има Јагуриновски и Аларов во битката за титулата!

Ристе Здравков — Thu, 12 Jan 2023 13:29:49 +0000

Репрезентативецот на Македонија, Томислав Јагуриновски и повремениот член на репрезентацијата Михаил Аларов во пролетниот дел од сезоната ќе играат за Вардар. Управата на Вардар се договори со скопскиот суперлигаш Пролет каде досега играа двајцата ракометари да се преселат во СЦ „Јане Сандански“ и да му помогнат на тимот во одбрана на двојната титула. Двајцата ракометари требаше да дојдат во Вардар од јуни, и да останат две сезони. Сега порано ќе го облечат шампионскиот дрес на „црвено-црните“ и ќе имаат шанса побрзо да се вклопат во играта на Вардар. Михаил Аларов веќе тренира со тимот, а Јагуриновски се очекува да се приклучи по завршувањето на настапот на СП во Полска каде тој е со репрезентацијата на Македонија. Јагуриновски по две сезони повторно ќе биде дел од Вардар, и тој е дете кое потенува од школата на клубот. По една полусезона мината на Исланд се врати во Македонија, а од следната сезона пак ќе биде дел од Вардар. Игра на позиција на десен бек, а по потреба може и да игра како десно крило. Леворакиот играч веќе е стандарден дел од репрезентацијата на Македонија и со своите игри покажува дека е зрел играч. Михаил Аларов важи за еден од перспективните пивотмени во првенството. Неколку сезони игра стандардно и заслужува да биде дел од најдобрите. Се наоѓа на поширокиот список за репрезентацијата на Македонија и сериозно се наметнува за во иднина. Тој ќе биде колега на Милан Лазаревски, Стефан Атанасовски и Стојанче Стоилов со што сигурно Вардар ќе ја има најквалитетните пивотменска позиција во првенството.

Вардар обезбеди домашни засилувања за следната сезона

Бошко Тасиќ — Tue, 15 Nov 2022 06:12:40 +0000

Актуелниот македонски шампион и поранешен двоен европски шампион, екипата на Вардар, без разлика што сезоната се уште е во првата фаза веќе обезбеди две засилувања за следното лето и тоа од домашното првенство. Станува збор за Томислав Јагуриновски, кој се враќа во добро позната средина со оглед што беше дел од црвено-црните во сезоната 2020/21, по што изнесен период мина на Исланд па се пресели во дресот на скопски Пролет. Од оваа екипа е и второто ново засилување за вардарци почнувајќи од идната сезона и тоа Михаил Аларов. „Со ова го зголемуваме бројот на македонски репрезентативци, а плановите на клубот околу засилувањата не застануваат тука. Двајцата ракометари и покрај другите клубови решија да му се приклучат на Вардар, кој е препознатлив спортски бренд во светот, свесни за големината на најдобриот македонски клуб“, велат од таборот на Вардар.

Јагуриновски поради семејни причини замина од исландскиот Тор

Бошко Тасиќ — Mon, 02 May 2022 07:55:30 +0000

Македонскиот ракометен репрезентативец Томислав Јагуриновски си замина од исландскиот тим Тор Акурејри откако заврши сезоната на Исланд. Тимот кој го предводи македонскиот стратег Стевче Алушовски беше елиминиран во полуфиналето од плеј-офот за место во елитната конкуренција на Исланд, па сезоната за ракометарите на Тор веќе заврши. Јагуриновски на Исланд го имаше првото интернационално искуство, но нема да го продолжи својот престој таму и се враќа во Македонија.

Јагуриновски: Чешка ги искористи нашите грешки,во Скопје нема да биде така

Бошко Тасиќ — Thu, 14 Apr 2022 18:52:29 +0000

Томислав јагуриновски одново беше првата опција на десната бековска позиција во ракометната репрезентација Членот на Тор Акурејри по ремито од 24-24 жали за пропуштената шанса за победа и истакна дека домаќинот ги искористи сите наши грешки во финишот од натпреварот. „Знаевме од каде доаѓа нивната најголема опасност, доста напаѓаа еден на еден, но бевме подготвени за тоа. Задоволни сме од резултатот, мислам дека ги завршивме задачите кои што ни ги зададе селекторот. Нè чека уште еден натпревар, на кој мора да победиме доколку сакаме пласман на Светско првенство. Одбраната добро функционираше, но во нападот направивме многу грешки и промашивме доста зицери. Но, тоа ќе го поправиме во реваншот. Чешка ги искористи нашите грешки и резултатски се врати“, вели десниот бек