транша – Kurir.mk

Новата транша помош за Грција одложена за еден месец

Ивана Ефремовски — Tue, 12 Mar 2019 07:25:22 +0000

Министрите за финансии на еврозоната го одложија за еден месец исплаќањето на новата транша финансиска помош за Грција поради недоволни реформи. Еврокомесарот за економија и финансии, Пјер Московиси, по вчерашниот состанок на Еврогрупата синоќа рече дека е уверен дека до следниот состанок во април ќе можат да бидат ослободени парите. Откако Грција излезе од третата програма за спасување во јуни 2018, министрите за финансии одобрија ослободување на дополнителна помош за Атина, но под одредени реформски услови. Оваа транша изнесува една милијарда евра. Грчките власти имаат задача да спроведат уште три претходни мерки за да добијат зелено светло од Европската Унија. Министрите за финансии сепак констатираа позитивен напредок во земјата и веруваат дека до следниот месец Атина ќе ги имплементира бараните реформи, со што ќе се одобри ослободувањето на новата транша.

Исплатена последната транша од европската помош за Грција

Ивона Петрова — Mon, 06 Aug 2018 17:16:11 +0000

Европскиот стабилизациски механизам денеска соопшти дека ја исплатил последната транша од помошта за Грција во висина од 15 милијарди евра. Во соопштението на Механизмот се посочува дека од вкупната сума, 9,5 милијарди се наменети за создавање на фонд, кој треба да и помогне на Грција за покривање на финансиските потреби за период од речиси две години. Останатите 5,5 милијарди евра од средства се предвидини за исплата на доспеаните рати од кредитите на Грција. Според директорот на Европскиот стабилизациски механизам, Клаус Реглинг, исплатата на последната рата од помошта е доказ дека Грција изминала долг пат за време на тригодишната програма за спас и дека „посветеноста и жртвувањето на грчкиот народ вродиле со плод“. Исплата на последната транша од помошта за Грција доцни неколку недели, првенствено поради резервите на Германија, која се противеше на трансферот, тврдејќи дека Атина не ги исполнила во целост преземените обврски со програмата за спас. МИА

Грција ќе добие нова транша финансиска помош до крајот на март

Ивана Ефремовски — Tue, 20 Feb 2018 08:04:15 +0000

Грција исполни 99 проценти од условите за добивање нова транша финансиска помош, но ќе ја добие не порано од крајот на март, се посочува во заклучокот на министрите за финансии од еврозоната на состанокот на Еврогрупата во Брисел. - Грција постигна многу голем напредок. Исполнети се 108 од 110-те договорени услови. Би рекол дека тоа се 99 проценти, но уште не е 100, а таа работа треба да се доведе до крај, изјави еврокомесарот за економски и финансиски прашања Пјер Московиси по средбата со министрите. Според раководителот на Европскиот механизам за стабилизација Клаус Реглинг, Грција нема да може да ја добие уште една транша од помошта пред втората половина на март. Состанокот на Еврогрупата беше важен, бидејќи врз основа на констатираниот напредок се очекува решение за доделување на транша од 5, 7 милијарди евра за Грција.