транспорт – Kurir.mk

Заштитната обвивка со меурчиња е создадена по грешка, нејзината првична намена ќе ве изненади

Ивона Петрова — Mon, 19 Jun 2023 18:58:43 +0000

Поради можноста за оштетување при транспорт, чувствителните предмети се обвиткуваат во заштитна обвивка со меурчиња, но тоа не била нејзината првична намена. Обвивката со меурчиња всушност не е направена за да ги одржува вашите пакети безбедни при транспорт. Имено, пластичната фолија која го ослободува „стресот“ всушност е направена да се користи како тапет во куќата. Обвивката со меурчиња била измислена по грешка при обидот да се создаде тапет со текстура. Алфред Филдинг и Марк Шаванес го развија Bubble Wrap во 1957 година за да се користи како 3D позадина. Споиле две завеси за туширање и потоа вметнале воздушни џебови внатре. Овој тренд на внатрешен дизајн очигледно не поминал, па тие го пренамениле изумот за безбедна испорака на пакети. Многумина веруваат дека грешката се претворила во одличен резултат. „Најголемиот изум по грешка“, е еден од коментарите, а некои заклучиле дека станува збор за изум кој им овозможува на децата и на возрасните моменти на среќа поради можноста да пукаат меурчиња.

Франција се подготвува за големи нарушувања додека синдикатите повикуваат на штрајк во транспортот

Катерина Бојаџиева — Tue, 18 Oct 2022 06:54:52 +0000

Франција денеска се подготвува за големи нарушувања откако синдикатите свикаа национален штрајк во транспортот, бидејќи остануваат во ќорсокак со владата поради напуштањето на нафтените магацини, што предизвика недостиг на гориво. Тој потег доаѓа откако работниците во неколку рафинерии и складишта управувани од енергетскиот гигант „Тотал Енерџис“ (TotalEnergies) гласаа за продолжување на штрајкот. Нивната индустриска акција сериозно ја наруши дистрибуцијата на гориво низ целата земја, особено во северна и централна Франција и во регионот на Париз. Возачите се обидуваат да ги наполнат резервоарите со гориво бидејќи штрајкот, што трае речиси три недели, го наруши снабдувањето на повеќе од 30 отсто од бензинските пумпи во Франција и имаше ефект во сите сектори на економијата. Владата на претседателот Емануел Макрон ги искористи овластувањата за реквизиција за да принуди некои штрајкувачи да се вратат да отворат складишта за гориво, потег што ги налути синдикатите. „Ќе продолжиме да правиме максимум“, рече Макрон по вчерашниот состанок со министрите, додавајќи дека сака кризата „да се реши што е можно побрзо“. Министерот за финансии Бруно Ле Мер претходно рече дека е неопходно да се искористат овластувањата за повторно отворање на рафинериите и депоата. „Времето за преговори е завршено“, изјави Ле Мер за телевизијата БФМТВ. Левичарските ЦГТ и ФО повикаа на национален штрајк денеска за повисоки плати и против владините реквизиции на нафтените инсталации, заканувајќи се дека тоа особено ќе го погоди јавниот транспорт. Синдикатите во другите индустрии и јавниот сектор, исто така, најавија акција во знак на протест против двојното влијание на зголемените цени на енергијата и вкупната инфлација врз трошоците за живот. – Железничкиот оператор СНЦФ ќе има „сериозни прекини“ со откажани половина од железничките услуги, рече министерот за транспорт Клемент Бон. Приградските услуги во парискиот регион, како и автобуските услуги, исто така, ќе бидат засегнати, објави операторот РАТР, но системот на метро во Париз главно не треба да биде погоден. Покрај транспортните работници, синдикатите се надеваат дека ќе излезат и од секторите како што се прехранбената индустрија и здравството, изјави шефот на ЦГТ, Мартинез за радиото Франс Интер. Нивната акција ќе започне бидејќи Макрон, исто така, се обидува да ја спроведе својата водечка домашна политика за зголемување на возраста за пензионирање. Последниот повик за штрајк доаѓа откако десетици илјади демонстранти протестираа во Париз во неделата поради зголемените трошоци на живот. Демонстрациите беа по повик од левичарската политичка опозиција. Некои демонстранти носеа жолти флуоросцентни елеци, симболот на насилните антивладини протести во 2018 година што ја потресоа про-бизнис владата на Макрон. Организаторите тврдеа дека на маршот во неделата присуствувале 140.000 луѓе, но полицијата соопшти дека имало 30.000.

Швајцарија забранува прелетување над нејзина територија заради транспорт на оружје

Магдалена Андонова — Fri, 11 Mar 2022 18:46:16 +0000

Швајцарија, верна на својата доктрина за воена неутралност, одлучи да забрани прелетувањето над нејзината територија на сите оние кои сакаат да им дадат воена поддршка на завојуваните страни во Украина, јави дописникот на МИА. -Во врска со руската агресија врз Украина, Федералниот совет одлучи (…) дека барањата за прелети над швајцарска територија од страните во конфликтот и други држави со цел да се обезбеди воена поддршка на страните во конфликтот, особено преку испораката на воен материјал нема да биде прифатена“, се вели во соопштението на владата. Оваа одлука не се однесува на прелетување на воени авиони на страните во конфликтот или на други држави за хуманитарни или медицински цели, вклучително и воздушно префрлање на повредените. Според законот за неутралност, Швајцарија не може да учествува во војна меѓу други држави. (МИА)

Со два воено-транспортни авиони денеска ќе пристигнат посмртните останки на жртвите во несреќата кај „Струма“

Ивона Петрова — Fri, 03 Dec 2021 07:06:02 +0000

Со два воено-транспортни авиони денеска во 9 часот од Бугарија се очекува на Меѓународниот аеродром Скопје да пристигнат посмртните останки на 45 граѓани кои загинаа во сообраќајната несреќа на автобусот на „Беса транс“-Скопје, што се случи на 23 ноември на автопатот „Струма“ во близина на градот Перник. По пристигнувањето, како што најавија од МНР, поворката ќе се движи по однапред утврдена патека до и низ главниот град. Во периодот од 10 до 13 часот граѓаните ќе може да оддадат последна почит и да положат цвеќе на плоштадот „Скендербег“ и да ја проследат поворката која ќе помине по булеварот веднаш до плоштадот, во периодот меѓу 11 и 12 часот. Од плоштадот ќе може да се проследи колоната со возилата која ќе се движи по булевар „Гоце Делчев“, кон крајните дестинации (домовите) на загинатите. На плоштадот „Скендербег” граѓаните ќе имаат можност преку видео екран да го следат настанот, со цел достоинствено да оддадат почит кон загинатите сограѓани. Првиот вицепремиер и министер за политички систем и односи меѓу заедниците, Артан Груби вчера на средбата со Амбасадорот на Република Бугарија, Ангел Ангелов, му се заблагодарил за брзата интервенција на бугарските власти со цел целосно расветлување на трагичниот настан во кој животот го изгубија 45 патници од Северна Македонија, како и за третманот и укажаната грижа кон преживеаните. -Веќе се идентификувани сите 45 жртви на автобусот што се запали на автопатот Струма, а нивната идентификација е направена со ДНК профили, изјави заменик-главниот обвинител и директор на Националната истражна служба Борислав Сарафов вчера за БТА. Со указ на јавниот обвинител, информира тој, дадено е одобрение посмртните останки на жртвите да им бидат предадени на претставници на Владата на Република Северна Македонија за транспорт и трансфер на нивните роднини. Невладиниот бугарски Институт за безбедност на патиштата во меѓувреме задолжи меѓународен ревизор да изврши непристрасна стручна проверка на состојбата на патиштата пред тешката несреќа на автопатот Струма, во која загинаа 45 – те македонски државјани. Како што јави дописникот на МИА од Софија, при увидот констатирано е дека заштитните огради не се поставени во согласност со барањата. На подрачјето на сообраќајната несреќа се случиле бројни несреќи при што биле оштетени заштитните огради. Во овој случај, имало повторно инсталирање на објектот во средната разделна лента. Од Институтот за безбедност на патиштата сугерираат дека на истото подрачје можеби имало и претходна сообраќајна несреќа. Приклучокот на заштитната ограда бил неправилно монтиран со две наместо со четири завртки, како што требало. Ова е, наведуваат, причината поради која заштитната ограда се скинала и покрај малата брзина со која удрил автобусот. – Кобната делница на „Струма“ е пуштена во употреба пред 20 години без Акт 16. Утврдено е и дека недостасуваат знаци и дека има оштетени ознаки. Испратен е извештај и до Агенцијата за патна инфраструктура, а оваа информација треба да биде проверена од истражните органи на Бугарија, велат од невладината организација. Во меѓувреме, вчера обвинителот Бисер Михаилов и истражителот Маријан Маринов, кои работат на расветлување на трагедијата, изјавија за БТВ, дека е позната причината за пожарот и локацијата на неговиот првичен извор во автобусот со македонски туристи на враќање од Истанбул. Како што јави дописникот на МИА од Софија, Маријан Маринов одбил да ја открие причината за пожарот и рекол дека „ќе им остави на експертите“ кои веќе имаат свои „тези“. Но, истражителот коментира дека во македонскиот автобус било „нанижано“ големо парче заштитна ограда за гумата до влезната врата, била пронајдена „свиткана хармоника“ и „уништена е пластичната цистерна“.

Османи: Утре почнува транспортот на повредените, за посмртните останки се подготвува акциски план

Ивана Ефремовски — Fri, 26 Nov 2021 15:46:49 +0000

Повредените во автобуската несреќа се во добра и стабилна здравствена состојба. Првите двајца ќе бидат пуштени утре, на 27 ноември, други двајца на 28 ноември, уште двајца на 30 ноември и едно лице на 1 декември. Српскиот државјанин ќе биде пренесен во Србија, а нашите во Скопје, во организација на Министерството за здравство, соопшти министерот за надворешни работи Бујар Османи. Како што рече Османи на прес-конференција во Владата, повредените прво ќе бидат сместени во нашите здравствени установи се додека не бидат пуштени на домашно лекување. За преносот на посмртните останки, акциски план ќе треба да изготви Работната група што ја формира Владата и на чие чело е токму Османи. -Владата ги презема сите трошоци за транспортот и погребот на жртвите. Нашите очекувања се наредната недела, штом заврши идентификацијата, може да се очекува вторник или среда, со можност да се помести тој ден додека не се комплтеира идентификацијата. МНР ќе го организира транспортот на посмртните останки. Денеска имавме средба со повеќе компании кои ќе бидат ангажирани околу тоа, а наредните денови планираме средба и со семејствата за да ги испочитуваме нивните барања за предавање на телата, подвлече Османи. Подготвени сме, додаде, за сите аспекти за пренесување на повредените и на посмртните останки на настраданите. -Породолжуваме со комуникацијата со бугарските власти. Амбасадата во Софија ќе ги преземе сите процедури за олеснување на постапката. Во наредните денови ќе информираме за точниот датум и за движењето на преносот на посмртните останки, рече министерот. На прес-конференцијата во Владата се и министрите за внатрешни работи и за транспорт и врски, Оливер Спасовски и Благој Бочварски.

Дете со сложена клиничка слика од Клиниката за детски болести транспортирано на лекување во Италија

Магдалена Андонова — Sat, 05 Dec 2020 15:18:46 +0000

Специјален медицински тим од Институтот “Џанина Џаслини” од Џенова – Италија, денеска од Универзитетската клиника за детски болести изврши транспорт на дете со сложена клиничка слика во болницата во Италија. Директорката на Клиниката Аспазија Софијанова, целиот медицински тим од одделението за интензивна нега и лекување и онколошкото одделение го подготвија малиот јунак за нов животен предизвик.

Овозможена работа на фабриките и транспортот и за време на построгиот полицискиот час, работниците со посебни дозволи

Тале Кристо — Tue, 07 Apr 2020 11:43:08 +0000

Економските оператори што работат во прва смена треба да го организираат работниот процес согласно забраната и посебниот режим на движење, а производствените капацитети кои работат и во втора, трета и четврта смена да го организираат својот начин на работа како и досега, со издадени дозволи за движење од страна на работодавачот согласно пропишаниот образец, стои во заклучокот на Владата од вчерашната седница на која беа донесени дополнителни мерки и активности за превенција од ширење на вирусот Ковид-19. Како што сооопшти денеска владината прес-служба, производствените погони, фабрики и транспорт ќе продолжат да функционираат и во време на полицискиот час што почнува од утре во 16 часот и ќе трае до 5:00 часот следното утро секој работен ден, како и за време на викенд (од петок од 16:00 часот до понеделник до 5:00 часот). За таа намена самите работодавачи ќе издаваат посебни дозволи за движење на работниците во време на полициски час исклучиво до и од работното место. Од Владата информираат дека станува збор за истите дозволи што се издаваат на образецот усвоен од страна на Кризниот штаб, а ги издаваат самите одговорни лица во компанијата. Во дозволата се наведуваат основните податоци за работникот, адресата на живеење, но и работното место и називот на компанијата во којашто работи лицето. Притоа, се наведува и смената во којашто е ангажиран работникот. Дозволата ќе биде потврда за движењето на работникот во услови на воведен полициски час и таа при контрола ќе треба да се приложи на увид до органите на државата. Дозволата за движење важи исклучиво за лицето на чиешто име е издадена. Дозволите што се издадени од работодавачот, потенцира Владата, не треба да бидат заверени и потврдени од страна на Министерството за внатрешни работи или надлежното ОВР. – Заштитата на здравјето на работниците е основен услов за заштита на целата економија, а Владата и стопанството имаат иста цел – во овие вонредни услови работењето на компаниите да продолжи, но истовремено да се сочува и јавното здравје. Затоа апелираме до компаниите коишто работат во смени и за време на полицискиот час да покажат одговорност, да се придржуваат и да ги почитуваат мерките за заштитата на работниците во услови на епидемија од Ковид-19, истакнуваат од Владата. Како што се нагласува во соопштениеето, инспекциските служби се на терен и ќе го следат почитувањето на препораките: – Во погоните каде непосредно се врши производниот процес да се лимитира бројот на вработени до таа мерка работниците да бидат на растојание од 1,5 до 2 метра, – Во самиот погон задолжително да се обезбеди средство за дезинфекција нa раце и работни површини. – За време на работното време од страна на вработените да се почитуваат општите препорачани мерки за повисоко ниво на лична и општа хигиена. – Да се врши почесто проветрување на работните простории односно повеќе пати во текот на денот и доколку е тоа можно (преку природна и вештачка вентилација). – Еднаш неделно да се врши дезинфекција на сите работни простории, особено во погоните, од овластена служба за тоа. – Во случај на непосреден контакт со позитивен лабораториски потврден случај на КОВИД-19 (со или без симптоми), лицето веднаш се изолира и се пријавува до надлежен Центар за јавно здравје. – Да се избегнува контакт на вработените лица од погоните меѓу себе во текот на работниот процес, а особено со административните службеници. – Во случај на потреба од административна работа, потпишувањето на хартиени документи да се спроведува исклучиво преку едно одредено лице кое носи лична заштитна опрема на себе (заштитна маска и ракавици). – Лицата задолжени за обезбедување на објектот да носат исто така лична заштитна опрема. – Возачите кои дистрибуираат готови производи, репроматеријали, хартиени документи, исто така да носат лична заштитна опрема. – Да не се одржуваат состаноци/колегиуми и истите да се спроведуваат по телефон или на мејл. Според заклучоците од владината седница, вработените во државните органи, агенции, фондови, бироа, заводи, претпријатија во Скопје, кои не живеат во главниот град и секојдневно патуваат на работа, од утре треба да бидат упатени да работат од дома. Министерствата и останатите органи на државната управа, пак, треба да го прилагодат работното време согласно со забраната за движење, односно административните и јавните службеници треба да завршат со работните задачи и обврски навреме со цел да можат да стасаат дома пред 16 часот кога почнува полицискиот час. Министерството за здравство, треба да подготви план за работа и организација на сите јавни и приватни здравствени установи, како и аптеките во општините на територијата на државата. Владата ги задолжи општинските кризни штабови да определат економски оператор/и – маркет/и од каде ќе се обезбедуваат само најнеопходните намирници, согласно приоритетните барања на граѓаните за време на забраната за движење на територијата на државата, а економските оператори кои се регистрирани да вршат достава на храна преку онлајн порачки, непречено да ја извршуваат својата работа за време во деновите сабота и недела. За оваа цел, се задолжуваат Општинските кризни штабови, во соработка со МВР да го организира движењето на лицата волонтери што ќе ги доставуваат најнеопходните намирници до домовите на граѓаните.

Од солунското пристаниште за Скопје непречено се одвива товарниот транспорт

Дарко Андоновски — Tue, 31 Mar 2020 09:25:12 +0000

Коронавирусот и затворените граници не влијаат врз товарниот транспорт и снабдувањето на нашата земја со карго пратки од пристаништето во Солун, а во петокот кон Скопје тргнал товарен воз со 30 контејнери наменети за индустриите кај нас, јави дописничката на МИА од Атина. Од солунското пристаниште соопштуваат дека и покрај исклучително тешката ситуација, „останувајќи посветени на заложбата за обезбедување квалитетни услуги и непречено функционирање на трговскиот сообраќај на пристаништето“, продолжуваат посветено да ги услужуваат нивните клиенти. -Во петокот на 27 март 2020 година од пристаништето во Солун со крајна дестинација Скопје, тргна товарен воз со 30 контејнери наменети за индустрии во соседната земја. Ова претставува важна разврска во одржувањето на континуитетот на работата на услугите на синџирот на снабдувањето за оние кои го користат пристаништето во Солун, а кое игра водечка улога како порта на Балканот, соопштуваат од солунското пристаниште.

Во текот на денот ќе се обезбедат дозволи за возачите на камиони, ќе се дефинираат и протоколите за непречен транспорт

Тале Кристо — Fri, 20 Mar 2020 15:34:48 +0000

По покренатото барање од Стопанската комора на Македонија, Владата во текот на денов ќе овозможи товарните возила непречено да ги поминат граничните премини, а потребните дозволи да им бидат издадени на возачите при повторниот влез во земјава. Прифатена е иницијативата на Комората за дефинирање посебни протоколи за овозможување непречено вршење на дејноста на компаниите од специфични сектори. И тие ќе бидат објавени во текот на денешниот ден. Ова го соопшти вицепремиерката за економски прашања Мила Царовска на денешната средба со претседателите на здруженијата при Комората. На состанокот, како што соопшти Комората, компаниите нагласиле дека е неопходно олеснувањето на влез и излез на стоки и репроматеријали за редовно производство на индустриските капацитети. Апелира побрзо да се воспостават коридори и ефикасни протоколи за непречено одвивање на транспортот во целиот регион. Истовремено повикаа во максимален капацитет да се стави железничкиот сообраќај како алтернатива. Потенцирано беше и дека авионскиот карго превоз е исто така на располагање и компаниите може максимално да го користат. За да се обезбеди непречено работење на производните капацитети, на средбата се заклучи преку Стопанската комора на Македонија компаниите да доставуваат предлози за укинување на царините за сите неопходни репроматеријали и суровини, по кои Владата на РСМ соодветно ќе постапува. -Во овој момент никој не може да предвиди колку ќе трае кризата, како ќе влијае на светската економија и како ќе заврши. Затоа е потребно стопанството и Владата да дејствуваат заеднички и на располагање да се стават сите расположливи ресурси, подвлече претседателот на Стопанската комора на Македонија, Бранко Азески. Вицепремиерката Царовска потенцираше дека во моментот е најважно да се следат препораките од Владата и со заеднички сили да се намалат економските импликации врз стопанството. За таа цел продолжува непрекинатата соработка со Стопанската комора на Македонија, со која се комуницира на дневно ниво. – Потребно е капацитетите на индустријата да продолжат со работа и да се задржат вработените. Повикуваме компаниите да ги користат економските мерки кои ги презентираше Владата, и најавуваме нови мерки во следните денови. Владата стои на располагање на компаниите и добредојдени се сите предлози и иницијативи од компаниите, за заеднички што полесно да се пребродат тековните предизвици, посочи Царовска. Во однос на посебните протоколи за овозможување непречено вршење на дејноста на компаниите од специфични сектори појасни дека со нив, со оглед на специфичноста на работењето на некои сектори, ќе се дефинираат посебни протоколи за постапување во случај да се појават заболени од редот на вработените во таквите компании, кај кои, поради специфичноста на дејноста што ја вршат не е можно запирање на производните процеси или чие непрекинато работење е од клучна важност за справување со можното ширење на вирусот (фармацевска дејност, металуршки сектор и прехранбена индустрија, компании кои снабдуваат медицински гасови или снабдуваат храна во здравствените институции, како и компании со над 1.000 вработени). Стопанствениците информираа дека имаат залихи од потребните суровини и репроматеријали и имаат капацитети да одговорат на зголемената побарувачка на домашниот пазар. мч/ац/ 2020-03-20 15:50:14, од Мирјана Чакарова

Снег го парализира надземниот транспорт во Њујорк

Ивона Петрова — Fri, 16 Nov 2018 06:51:13 +0000

Првите врнежи снег за оваа есен го парализираа функционирањето на надземниот транспорт во Њујорк. Влажниот снег и и силните налети на ветар кршеа гранки од дрва кои го отежнаа сообраќајот, јавија локалните медиуми. Полицијата им препорача на луѓето да не излегуваат и да ги избегнуваат патиштата. Поради лошото време, автобусите тешко стигнувале до централната автобуска станица на Мехнетн, што предизвикало голема гужва на станицата. Доцнеле и вонградските возови, а на мостот „Џорџ Вашингтон“ дошло до верижен судар во кој учествувале неколку автомобили. МИА