трговија со дрога – Kurir.mk

Скопјанец под истрага за недозволена трговија со дрога

Ивона Петрова — Thu, 26 Jan 2023 14:37:30 +0000

Основното јавно обвинителство Скопје поведе истражна постапка против едно лице за две кривични дела – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. Осомничениот 55-годишник, на 25 јануари, во својот автомобил држел 24 пакувања со вкупно 8,94 грама хероин, како и две пакувања со вкупно 1,25 грама метамфетамин. Откако ги забележал полициските службеници, тој го запрел возилото на паркинг на улицата „Њуделхиска“ и пешки се дал во бегство. Полицајците го следеле, па тој влегол во агенција за недвижности, a дрогата ја фрлил при влезот во објектот. Полициските службеници ја пронашле дрогата, а лицето го лишиле од слобода, информираат од Обвинителството. Во текот на постапката утврдено е основано сомнение дека истото лице, на 06.10.2022 година во дом на улицата „Радика“ во Скопје, каде престојувал како потстанар, заради продажба држел 0,61 грам амфетамин, а истиот ден на сведок му продал 0,45 грама хероин. Бидејќи постојат околности кои упатуваат дека осомничениот би можел да се даде во бегство или да го повтори делото за кое и претходно веќе неколкупати е осудуван, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор.

ОЈО Тетово со истрага за недозволена трговија со дрога

Магдалена Андонова — Tue, 12 Apr 2022 13:22:00 +0000

Јавен обвинител од Основното јавно обвинителство Тетово донесе Наредба за спроведување истражна постапка против 27-годишен тетовец, осомничен за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. На 8 април, при претрес во семејната куќа на осомничениот, на улицата „29 Ноември“ во Тетово, полицијата пронашла вкупно 114,68 грама марихуана во повеќе помали пакувања. Дрогата била скриена на различни локации во домот, во автомобилот, како и во исушен канал за наводнување во дворот на куќата. Кај осомничениот била пронајдена и дигитална вага наменета за мерење при препакување на дрогата. До судијата на претходна постапка од Основниот суд во Тетово јавниот обвинител поднесе предлог за определување мерка притвор за осомниченото лице, оценувајќи дека постои опасност тој да се даде во бегство, да го повтори делото или да влијае врз сведоците и да се обиде да ги прикрие трагите. Судијата го прифати предлогот и на осомничениот му определи притвор во траење од 30 дена.

Истрага против скопјанец за неовластена трговија со дрога и психотропни супстанции

Магдалена Андонова — Wed, 02 Mar 2022 09:20:39 +0000

Против 42-годишен скопјанец Основното јавно обвинителство Скопје донесе Наредба за спроведување истражна постапка, бидејќи постои основано сомнение дека тој сторил кривично дело – Неовластено производство и пуштање во промет наркотични дроги, психотропни супстанции и прекурсори согласно член 215 став 1 од Кривичниот законик. Откако на точно неутврден датум во текот на месец февруари набавил одредено количество наркотична дрога – марихуана и психотропна супстанција – амфетамин од непознато лице, осомничениот ги препакувал во помали пакувања и ги подготвил за продажба. При преглед на неговиот автомобил, на 28 февруари, полициски службеници откриле вкупно 16,21 грам марихуана и 8,73 грама амфетамин спакувани во повеќе полиетиленски пакувања. Надлежниот јавен обвинител до судијата на претходна постапка од Основниот кривичен суд Скопје достави Предлог за определување мерка притвор на осомниченото лице, бидејќи постојат околности кои укажуваат дека тој би можел да се даде во бегство за да го избегне кривичниот прогон или да го повтори делото.

ОБСЕ: За борба против илегалната трговија со дрога потребни се координација и соработка

Дарко Андоновски — Tue, 01 Jun 2021 13:34:51 +0000

Борбата против трговијата со дрога и нејзините врски со другите облици на организиран криминал бара координиран и коoперативен пристап, изјавија денеска учесниците на отворањето на овогодишната Конференција посветена на шверцот на наркотици во Европа, соопшти Организацијата за безбедност и соработка во Европа (ОБСЕ). – Трговијата со недозволени дроги е сериозна закана за нашата заедничка безбедност, изјави амбасадорот Хакан Јеврел, специјален претставник на Шведска за организиран криминал, кој зборуваше во име на шведскиот претседавач на ОБСЕ во 2021 година. Тој додаде дека илегалната трговија со дрога е поврзана и со корупција и финансиски криминал, како и со криумчарење и експлоатација – Се проценува дека приходите од илегалната трговија со дрога само во Европа изнедуваат 30 милијарди евра, наведе генералната секретарка на ОБСЕ, Хелга Марија Шмид, додавајќи дека ниту една земја, без оглед на големината, не може да се бори сама со прекугранична трговија и затоа се потребни кооперативни и координирани пристапи. На Конференцијата, организирана од шведското претседателство со ОБСЕ до 2021 година и Единицата за стратешки полициски прашања при Одделението за транснационални закани на ОБСЕ, присуствуваат речиси 200 експерти од земјите-учеснички на ОБСЕ, партнери за соработка, како и меѓународни организации и граѓанско општество. Конференцијата е посветена на нелегалните финансиски текови поврзани со разни илегални пазари и нивното негативно влијание врз економскиот развој, конкуренцијата и социјалната еднаквост.

Приведени три лица од гостиварско поради трговија со кокаин

Магдалена Андонова — Sat, 16 Jan 2021 11:00:43 +0000

На 15.01.2021 во 21.30 часот во Гостивар, од страна на инспектори од Одделението за недозволена трговија со дрога и оружје при Надворешната канцеларија за криминалистички работи Гостивар лишени од слобода се К.М.(30), К.О.(20) од Гостивар и О.С.(19) од с.Горна Бањица, гостиварско, поради постоење основи на сомнение дека извршиле кривични дела „неовластено производство и пуштање во промет на наркотични дроги, психотропни супстанции и прекурсори“ и „овозможување на употреба наркотични дроги“. Имено, при преглед кај К.М. биле пронајдени пет пакувања кокаин, кој сакал да им го продаде на К.О. и С.О.. Сите тројца биле приведени во Полициска станица Гостивар и по целосно документирање на случајот против нив ќе биде поднесена соодветна пријава по чл.215 и чл.216 од Кривичниот законик.

Двајца обвинети за трговија со дрога во Скопје

Магдалена Андонова — Fri, 25 Dec 2020 09:38:55 +0000

Основното јавно обвинителство Скопје поднесе Обвинителен акт против две лица кои се товарат дека сториле кривично дело – Неовластено производство и пуштање во промет на наркотични дроги, психотропни супстанции и прекурсори согласно член 215 став 1 од Кривичниот законик. – На 30 ноември, во домот во кој престојувал, првиот обвинет, 34-годишен скопјанец, неовластено држел седум најлонски пакувања со наркотична дрога марихуана, со вкупна нето маса од 54,82 грама. При претресот кај него била пронајдена и една дигитална вага. Во истиот дом, на булеварот “Босна и Херцеговина“, при претресот бил затекнат и вториот обвинет, 45-годишен скопјанец, кој во десниот џеб имал пластична кутија со 68,42 грама марихуана, а во левиот џеб – уште една дигитална вага со траги од канабис, соопштија од Основното јавно обвинителство Скопје. Надлежниот јавен обвинител до Основниот кривичен суд Скопје доставил предлог за продолжување на претходно определената мерка куќен притвор за двајцата обвинети.

Обвинение заради трговија со дрога

Магдалена Андонова — Thu, 17 Dec 2020 12:45:20 +0000

Основното јавно обвинителство Кавадарци до надлежниот суд достави Обвинителен акт против 29 – годишен жител на село Дуброво, Неготино, поради сторено кривичното дело – Неовластено протизводство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. Обвинетиот во домот и помошните простории во местото каде живеел неовластено заради продажба држел 39.533,4 грама наркотична дрога марихуана. Дрогата, која службени лица ја пронашле при претрес извршен на 5 ноември 2020 година, била спакувана во 41 пакување во најлонска фолија, залепени со бела трака и скриени на повеќе места во близина на домот на осомничениот, во помошна просторија – шупа. Со поднесување на обвинението, а за да се овозможни натамошно непречено одвивање на постапката, јавниот обвинител од Основното јавно обвинителство Кавадарци достави и посебен предлог за продолжување на веќе определената мерка притвор за обвинетиот.

Кривична за седум лица за трговија со дрога

Ивона Петрова — Fri, 04 Dec 2020 09:33:10 +0000

Одделот за криминалистичка полиција - Сектор за недозволена трговија со дрога, оружје и опасни материи во координација и заедничка соработка со СВР Скопје – Единица за недозволена трговија, поднесе кривична пријава против А.М.(27) од Дебар, поради постоење основи на сомнение за сторено кривично дело „продолжено кривично дело“, во врска со кривично дело „неовластено производство и пуштање во промет на наркотични дроги, психотропни супстанции и прекурсори“ и против Р.А.(35) од с.Житоше, прилепско, Г.Х.(42) од Р.Албанија, Ф.П.(29), М.Ѓ.(29), В.М.(34), тројцата од Скопје и П.Ѓ(32) од Дебар, поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанции и прекурсори“. -На 16.11.2020, Г.Х. пренел дрога од Р.Албанија на територијата на Р.С. Македонија и во Дебар му ја предал на А.М., кој пак, по претходен договор со П.Ѓ., ја префрлил преку оградата на КПУ „Теферич“ во Струга. Потоа, полициски службеници од Надворешната канцеларија за криминалистички работи Струга извршиле претрес во собата каде П.Ѓ. веќе издржува казна затвор поради недозволена трговија со дрога, при што пронашле и одзеле марихуана, семки од растението Cannabis, мобилен телефон и сим картичка, со што П.Ѓ. повторно го врши кривичното дело. По преземени мерки било утврдено дека Р.А. во ноември од лице од Албанија ја набавил марихуаната, по што во комуникација со А.М. се договорил да ја пренесе преку зелениот појас на државната граница. На 21/22.11.2020 А.М. дрогата ја предал на Ф.П.. Потоа, на 25.11.2020 Р.А. и А.М. ја продале на П.Ѓ. за сума од 3.000 евра. На 26.11.2020 на бул.„Борис Трајковски“ во Скопје, полициски службеници сопреле возило, управувано од В.М., во кое бил и М.Ѓ. и при преглед на истото била пронајдена марихуана и неколку мобилни телефони. На 26.11.2020 бил извршен претрес во викенд куќа во с.Моране, сопственост на М.Ѓ., каде биле пронајдени и одземени 1 килограм марихуана и пиштол калибар 8 мм без рамка. Исто така, на 26.11.2020 полициски службеници извршиле претрес на Р.А. во КПД Прилеп, му бил одземен мобилен телефон и СИМ картичка. Притоа, Р.А. веќе издржува затворска казна од триипол години за недозволена трговија со дрога, откако при преглед од полициски службеници извршен на 02.12.2019, му биле пронајдени 5 кг марихуана, со што тој, додека ја издржува казната, го повторил кривичното дело. При претрес извршен кај А.М., пак, биле пронајдени и одземени парични средства во износ од 3.000 евра, во различни апоени во денари и евра, информира МВР. Од извршеното вештачењето било утврдено дека станува збор за маса од 2,7 килограми марихуана.

Двајца скопјани под истрага за трговија со дрога

Магдалена Андонова — Wed, 02 Dec 2020 14:05:18 +0000

Основното јавно обвинителство Скопје донесе Наредба за спроведување истражна постапка против две лица за кои постои основано сомнение дека сториле кривично дело – Неовластено производство и пуштање во промет на наркотични дроги, психотропни супстанции и прекурсори согласно член 215 став 1 од Кривичниот законик. На 30 ноември, во домот во кој престојувал, првиот осомничен, 34-годишен скопјанец, неовластено држел седум најлонски пакувања со наркотична дрога марихуана, со вкупна нето маса од 54,82 грама. При претресот кај него била пронајдена и една дигитална вага. Во истиот дом, на булеварот “Босна и Херцеговина“, при претресот бил затекнат и вториот осомничен, 45-годишен скопјанец, кој кај себе имал една најлонска кеса со 68,42 грама марихуана и уште една дигитална вага со траги од канабис. Надлежниот јавен обвинител за двајцата осомничени до судијата на претходна постапка при Основниот кривичен суд Скопје достави предлог за определување мерка куќен притвор, поради опасност од бегство, можност да влијаат врз сведоците или да ги уништат трагите, како и да го повторат делото. Судијата го прифати предлогот и на осомничените им определи мерка куќен притвор во траење од 30 дена.

Притвор за двајца заради трговија со дрога

Магдалена Андонова — Mon, 16 Nov 2020 14:52:28 +0000

Основното јавно обвинителство Велес донесе Наредба за спроведување истражна постапка против две лица од Куманово на возраст од 59 и 52 години поради постоење основано сомнение дека сториле кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. Откако првоосомничениот му помогнал на второосомничениот да отвори транспортна фирма и да започне со работа како превозник, по идеја на првоосомничениот се договориле да преземат канцелариски материјал од фирма во Приштина. Второсомничениот заминал со товарното возило во Приштина, каде го оставил возилото за да се натовари потребниот материјал, а тој се сретнал со првоосомничениот. По кратко време првоосомничениот отишол да види до каде е утоварот, па откако бил завршен, второсомничениот со товарното возило се вратил во Република Северна Македонија, додека првоосомничениот се вратил со такси-возило. По завршувањето на шпедициските формалности, првоосомничениот го известил второосомничениот дека со натоварената стока треба да замине во Република Грција, по што второосомничениот така постапил. Меѓутоа, на 09.11.2020 година, движејќи се по патот Велес-Скопје кај м.в.Ветерско, второосомничениот изгубил контрола над товарното возило и излетал од патот при што се здобил со телесни повреди. При преглед на товарното возило, овластени полициски службеници пронашле две пакувања во вкупна количина од 2008 грама наркотична дрога – марихуана која второосомничениот неовластено заради продажба ја пренесувал, а во што со умисла му помогнал првоосомничениот. Со оглед на видот и тежината на стореното кривично дело и можноста истото да биде повторено, јавниот обвинител кој постапува во предметот до Основниот суд Велес достави предлог за определување на мерката притвор за двајцата осомничени.