трговски договор – Kurir.mk

Џонсон бара ревизија на трговскиот договор со ЕУ

Тале Кристо — Mon, 16 May 2022 13:08:46 +0000

Британскиот премиер Борис Џонсон денеска, во пресрет на неговата посета на Северна Ирска, изјави дека доколку ЕУ не се согласи со ревизијата на трговските правила кои стапија во сила по Брегзит, ќе биде „неопходно да се дејствува“. Џонсон во авторски текст за Белфаст Телеграф напиша дека ЕУ не сака да признае дека договорот не функционира и дека британската влада сака промени, а не повлекување од договорот со ЕУ. „Се надевам дека позицијата на ЕУ ќе се промени. Ако не, ќе треба да се дејствува“, напиша Џонсон. Тој оцени дека трговските правила ја дестабилизираат чувствителната политичка рамнотежа на Северна Ирска и додаде дека британската влада „во следните денови на парламентот ќе претстави подетална проценка и следните чекори“. На почетокот на овој месец, националистичката партија Шин Феин освои најмногу места на изборите во Северна Ирска. Ова е прва победа на партијата која се залага за обединување на Северна Ирска и Република Ирска. Втората по големина Демократска унионистичка партија одбива да влезе во владата и да се организира седница на парламентот додека владата на Џонсон не ги поништи царинските и другите проверки и прописи кои стапија во сила по излегувањето на Велика Британија од ЕУ. Според правилата на мировниот процес во Северна Ирска, не може да се формира влада без согласност и на националистичката и на унионистичката партија. Северна Ирска е единствениот дел од Велика Британија што граничи со ЕУ. По Брегзит, границите на Северна Ирска останаа отворени и без посебна царинска контрола, бидејќи тоа е важен дел од мировниот процес со кој беше ставен крај на претходните конфликти во земјата. Се контролираат само одредени стоки, како месо и јајца, кои влегуваат во Северна Ирска од Велика Британија. На аранжманот се противат унионистите на Северна Ирска, кои тврдат дека тоа ја оптоварува економијата и ги нарушува врските со другите земји во Велика Британија.

Џонсон ги повика Британците по божиќниот ручек да го прочитаат новиот трговски договор

Ивона Петрова — Fri, 25 Dec 2020 07:56:31 +0000

Британскиот премиер Борис Џонсон во видеопорака објавена доцна синоќа, ги повика Британците денеска на Божиќ да го прочитаат трговскиот договор постигнат со Брисел. Преговарачите на Лондон и Брисел вчера конечно постигнаа договор за трговски односи меѓу двете страни пред крајот на преодниот период кој истекуваше на крајот на годината. Целосниот текст на договорот, на неколку илјади страници, не беше веднаш достапен за јавноста. – Патем, вечерва на Бадник имам мал подарок за секој што ќе бара нешто да прочита во поспаните моменти по божиќниот ручек – еве го, рече Џонсон во видеопораката на Твитер по што во рацете го зема договорот. – Ова е гозба – полна со риби, патем, додаде Џонсон за договорот постигнат по преговорите во кои риболовот беше една од главните точки на несогласување меѓу двете страни. – Верувам дека ова ќе биде основа за среќно, успешно и стабилно партнерство со нашите пријатели во ЕУ во следните години, заклучи британскиот премиер. Неговата победничка порака беше објавена во време кога многу Британци нема да го поминат Божиќ со своите семејства поради ограничувањата воведени за спречување на ширењето на новиот вид на коронавирус. – Знаеме дека следниот Божиќ ќе има луѓе што ги сакаме и кои се живи токму затоа што се жртвувавме и не го славевме овој Божиќ нормално, рече Џонсон.

ЕУ и Велика Британија постигнаа трговски договор

Магдалена Андонова — Thu, 24 Dec 2020 15:39:45 +0000

Велика Британија и Европска Унија денеска се договорија за трговскиот договор по Брегзит, јави Би-Би-Си. – Со овој договор е испорачано се што и беше ветено на британската јавност за време на референдумот во 2016 година и на општите избори минатата година. Ја вративме контролата над нашите пари, граници, закони, трговија и нашите риболовни води. Во соопштението се наведува дека договорот е фантастична вест за семејствата и фабриките во сите делови на Велика Британија. – Потпишавме прв договор за слободна трговија заснован на нулта царини и нулта квоти, што е некогаш постигнат со ЕУ. Договорот е најголем билатерален трговски договор потпишан со која било страна… Договорот исто така гарантира дека не сме повеќе во лунарна привлечност со ЕУ, не сме поврзани со правилата на ЕУ, не постои улога на Европскиот суд за правда и постигнати се сите наши клучни црвени линии за враќање на суверенитетот, се истакнува во документот од британската Влада. Исто така се потенцира дека со постигнатиот договор Велика Британија „ќе има целосна политичка и економска независност од 1 јануари 2021 година. – Завршивме Брегзит и сега можеме целосно да ги искористиме фантастичните можности што ни се достапни како независна трговска нација, склучувајќи трговски договори со други партнери ширум светот, соопшти британската Влада. (МИА)

Меркел: Треба да се направи се за да се постигне трговски договор меѓу ЕУ и Велика Британија

Тале Кристо — Sun, 13 Dec 2020 13:27:14 +0000

Германската канцеларка Ангела Меркел денеска изјави дека треба да се направи се за да се постигне трговски договор меѓу Европската унија и Велика Британија. – Секоја можност да се постигне договор е исклучително добредојдена, рече Меркел на прес-конференција во Берлин. Велика Британија се повлече од ЕУ на 1 јануари, но е неформална членка до 31 декември, кога официјално завршува преодниот период за време на кој беше дел од единствениот пазар и царинската унија.

Лондон напорно работи со ЕУ на постигнување трговски договор

Тале Кристо — Mon, 02 Nov 2020 14:41:44 +0000

Велика Британија продолжува да работи напорно со Европската унија за надминување на значителните празнини во стремежот за постигнувањето трговски договор, изјави денеска портпаролот на британскиот премиер Борис Џонсон. – Ние продолжуваме да работиме напорно за време на овој интензивен период на разговори насочени кон премостување на значителните празнини што сè уште постојат меѓу нас во најтешките области, рече портпаролот на Џонсон. Двете страни се обидуваат да постигнат конечен трговски договор до крајот на преодниот рок до конечното излегување на Велика Британија од ЕУ на крајот на годината.

Трамп призна дека го загубил интересот за трговски договор со Кина

Тале Кристо — Sat, 16 May 2020 07:40:46 +0000

Американскиот претседател Доналд Трамп синоќа изјави дека го загубил интересот за склучување американо-кинески трговски договор. На прес конференцијата во Белата куќа Трамп беше прашан зошто не сака да разговара со кинескиот лидер Си Џинпинг, на што тој одговори дека Кина троши премногу време во преговорите за договорот, а тој лично, како шеф на државата, го загубил интересот за договорот, пренесе Тасс. Трамп, исто така, беше запрашан дали е подготвен да ги врати серијата царини врз кинеските производи, на што тој возврати дека сега не е подготвен да зброува за тоа. -Можам само да кажам дека Кина купува многу наши стоки, рече претседателот и додаде дека набрзо по првата фаза од договорот Кина соопштила за распламтувањето на коронавирусот во земјата. „Така што не сме задоволни”, рече американскиот претседател Претходно Трамп кажа и дека се откажал и од повторното разгледување на условите од првата фаза на договорот. Според провладиниот кинески весник „Глобал Тајмс“, неименувани советници претпоставуваат дека кинеските власти ја разгледуваат можноста трговскиот договороп со САД да го прогласат за неспроведлив и да побарат поповолни услови. Но, Трамп реагираше дека не е заинтересиран за таква варијанта. Согласно условите од првата фаза на трговскиот договор, следните две години Пекинг треба да купи американски стоки и услуги во вредност од 200 милијарди долари, а Вашингтон се согласи да почне постепено да ги намалува царините врз кинеските производи за американскиот пазар.

САД и Кина се блиску до трговски договор

Предраг Кукиќ — Mon, 04 Mar 2019 08:31:44 +0000

Договорот за решавање на трговскиот спор меѓу Кина и САД би можел да биде потпишан на 27 март. Преговорите се во завршна фаза, пишува весникот „Волстрит џурнал“. Американскиот претседател Доналд Трамп и неговиот кинески колега Си Џинпинг ќе го потпишат договорот за решавање на трговскиот конфликт меѓу двете земји на 27 март на Флорида, тврдат за весникот добро информирани извори. Во рамки на договорот Кина може да ја намали царината за увоз од САД, вклучувајќи земјоделски производи, автомобили и производи од хемиската индустрија. Вашингтон како одговор постепено ќе ги повлекува казнените царини воведени на кинескиот увоз. Дел од договорот би можело да биде и набавка на американски течен гас во вредност од 18 милијарди долари од Пекинг. Според претставниците на двете земји, преговорите за регулирање на трговскиот конфликт се во завршна фаза, постигнат е „суштински напредок“, но и американското и кинеското раководство се незадоволни бидејќи условите за другата страна сметаат дека се многу поповолни.

Канада се приклучи кон трговскиот договор меѓу САД и Мексико

Ивона Петрова — Mon, 01 Oct 2018 05:48:10 +0000

Канада доцна синоќа се согласи да се потпише на трговскиот договор меѓу САД и Мексико, документ кој го замени НАФТА, трилатералниот Северноамерикански договор за слободна трговија, по повеќе од една година тешки преговори. Само неколку часа пред истекот на крајниот рок, американската и канадската Влада се согласија на договор со кој на американските фармери ќе им се овозможи поголем пристап до пазарот на млечни производи во Канада, а Канада ќе се заштити од евентуални американски царини во автомобилската индустрија. Новиот договор со Канада и Мексико – земјите кои се најголеми трговски партнери на САД, сега се вика УСМЦА (The United States-Mexico-Canada Agreement), Договор меѓу САД, Мексико и Канада. МИА