ТОПЛОТЕН БРАН ВО РЕГИОНОТ – тропски температури и над 44 степени во оваа земја од соседството

Дарко Андоновски — Fri, 22 Jul 2022 09:50:45 +0000

Топлотниот бран што ги зафати земјите од регионот ќе трае до 27 јули, прогнозираат метеоролозите, а температурите во некои градови и населени места ќе достигнат до 44 степени Целзиусови. Поради високите дневни температури во Босна и Херцеговина денеска е на сила портокалов аларм, а температурите ќе се движат од 32 до 38 степени. Следните два дена во повеќето области ќе важи црвен метео-аларм, кога температурата ќе се движи меѓу 33 и 41 степен, во јужните делови на регонот и до 42. Тропски горештини денеска се очекуваат и во Хрватска. Во Сењ живата во термометарот во 6 часот не падна под 30 степени, а топло изутринава е и на Ластово, Палагружа, Хвар, во Риека и Опатија каде во најсвежиот период на деноноќието се измерени 24 и 25 степени. Пикот на топлотниот бран се очекува викендов кога температурата локално ќе биде околу 40-тиот степен, со прогнози на метеоролозите дека постои можност да се надминат и јулските рекорди. Топлотниот бран стигна и до Црна Гора, која според метеоролозите ќе биде една од најтоплите земји во Европа со температура до 44 степени Целзиусови.

Тропски температури во Македонија- жолта алертна фаза до четврток

Катерина Бојаџиева — Tue, 02 Jul 2019 05:44:40 +0000

Територијата на државава, неделава е зафатена од топлотен бран со температури од жолта (алертна) фаза. Според информациите од Управата за хидрометеоролошки работи, денеска и утре максималните температури на повеќе места ќе надминат и 35 степени. Се очекува температурите утре да достигнат 40 степени. УВ индексот ќе биде 9. Зголемената влажност на воздухот ќе придонесе да се има чувство дека температурите се повисоки од измерените. Од утре до петок во попладневите часови ќе има услови за локален пороен дожд и грмежи. Од Министерството за здравство апелираат граѓаните да ги почитуваат општите препораки за заштита од високите температури, односно да се заштитат од директна сончева изложеност, да избегнуваат престој на отворено во периодот од 11 до 17 часот, да носат светла и лесна облека, а при директна изложеност на Сонце да носат заштитни очила и капа (светлите бои ја рефлектираат светлината), да консумираат лесна храна и течности, посебно да внимаваат при подготовка и консумирање на храната, да избегнуваат термички необработени производи, на пример мајонези од домашни јајца, внимателно да консумираат сладолед и разни кремови, да внесуваат поголемо количество течности, најдобро обична вода за пиење, да избегнуваат алкохолни пијалаци, а при влегување во возило треба одреден период да го проветрат. Во текот на ваквите екстремно топли денови, посочуваат од Министерството, граѓаните треба да останат во затворени простории (пред се климатизирани), при неопходен престој на отворен простор во овој период, да најдат можност за почести одмори под сенка, а хронично болните лица редовно да ја земаат пропишаната терапија.

тропски температури – Kurir.mk

ТОПЛОТЕН БРАН ВО РЕГИОНОТ – тропски температури и над 44 степени во оваа земја од соседството

Тропски температури во Македонија- жолта алертна фаза до четврток