трпејца – Kurir.mk

Мицкоски: Трпејца ќе добие нова канализациона мрежа и колекторски систем за што ќе се инвестираат речиси 2 милиони евра

Дарко Андоновски — Tue, 03 Oct 2023 14:48:22 +0000

Претседателот на ВМРО-ДПМНЕ, Христијан Мицкоски и градоначалникот на Охрид, Кирил Пецаков денеска беа во посета на Трпејца. „Заедно со градоначалникот на Охрид Кирил Пецаков бевме во посета на Трпејца која што ќе добие нова канализациона мрежа и колекторски систем за што ќе се инвестираат речиси 2 милиони евра, со што ќе се реши повеќедецениски проблем на жителите од ова населено место и проект кои со години беше ветуван и нереалзиран. По промената на власта новата Влада од централниот буџет ќе издвојува до 250 милиони евра за развој на општинската локална инфраструктура, канализации, водоводи и други важни потреби на граѓаните. Во Охрид на годшино ниво ќе се инвестираат по 8 милиони евра. Па така освен нов кокелекторски систем и канализација во Трпејца, исто такви капитални инвестиции ќе има и во Долно Лакочераи, ќе изградиме ново училиште Глигор Прличев, нов градски плоштад кај стариот Чинар, нова катна гаража, како и почеток на нов водовен систем "свињишки извори" со што Охрид ќе добие решение за квалитетно водоснабдување за наредните неколку децении. Важно е! Од сите вас зависат промените“, стои во неговиот пост на Фејсбук.

Во Трпејца почнува 12 издание на манифестацијата „На зајдисонце“

Ивона Петрова — Wed, 19 Jul 2023 08:53:42 +0000

Во организација на Здружението „За Трпејца со љубов“ и под покровителство на Општина Охрид од утре до 28 јули по 12 пат оваа туристичка населба и гостите ќе „дишат“ во ритамот на новото издание на културно-забавната манифестација „На зајдисонце“. Сцената ќе биде отворена утревечер со изложбата на дела од Интернационалната уметничка колонија што се одржува во Трпејца, а во музичкиот дел ќе настапат Влатко Броз и диџеј Марама. И оваа година манифестацијата ќе понуди повеќе културно-забавни содржини, со историски часови, презентации на трудови, проекции на документарни филмови, панорамски прошетки, изложби, спортски активности...Кај рекреативните и забавни содржини се издвојува атрактивната трка со куфери по скалинадата во Трпејца. Летото во свој стил со пародијата „Дојдете во Трпејца“ ќе го затворат познатата македонска актерка Марија Кондовска и угостителот Марјан Митрески – Мац . Општата цел и концептот на манифестацијата е преку промоција, пред се на познати и признати уметници секој во својата област, со поддршка и отворена афирмација на млади таленти кои потекнуваат од Трпејца и Охрид, но и земјата, па дури и од странство да се збогати културната понуда во ова туристичко место. Здружението „За Трпејца со љубов“ освен културолошка димензија и градење публика за културни настани во една селска средина има за цел и реализација на забавни содржини кои ќе ја подигнат туристичката понуда на Трпејца која е веќе позната на туристичката мапа во Македонија.

Бомба извадена од Охридско езеро кај Трпејца

Ивона Петрова — Sun, 16 Jul 2023 10:21:28 +0000

Рачна бомба била пронајдена вчера во водите на Охридското езеро, кај селото Трпејца. -Од увидот, извршен во присуство на овластено лице од Дирекцијата за заштита и спасување, констатирано е дека се работи за бомба М-17 од Првата светска војна која е безбедно подигната и предадена за натамошна постапка, информира МВР.

Почна 11. „На зајдисонце“ во Трпејца

Ивона Петрова — Thu, 21 Jul 2022 09:00:01 +0000

Со изложба на слики од уметникот Мајкл Клос од Канада и настап на бендот „8balls“ синоќа во охридското село Трпејца почна 11. издание на „На зајдисонце“. Организатор на манифестацијата е здружението за развој и промоција „За Трпејца со љубов“, со поддршка на Општина Охрид. Советникот и претседател на Комисијата за одбележување празници и манифестации Перчо Божиноски во име на Локанлата самоуправа ги поздрави присутните со уверување дека и годинава културно-забавното лето во Трпејца ќе понуди сплет од креативна сценска програма, со уметнички, спортски и едукативни содржини, кои ќе привлечат многубројна публика. – Престојот овде, во овој живописен амбиент на брегот на Охридското Езеро, што плени со најпрекрасните пејсажи кои природата секојдневно ги подарува, носи едно неописливо чувство на мир и хармонија. Секој момент поминат тука ни носи нова убавина и нова привилегја за неповторливо доживување, рече Божиновски. Со сета своја уникатност, нагласи, оваа крајбрежна населба е своевидна атракција, која незапирливо го привлекува вниманието на гостите и туристите, а ваквите настани само ја надополнуваат и ја збогатуваат туристичката понуда. На летната сцена вечер ќе настапат младите од Црвен крст-Охрид со поетско-музичкиот перформанс „Треба да бидеме подобри“. Во наредните седум дена манифестацијата „На зајдисонце“ пред домашната и странска публика ќе прикаже културни, забавни и спортски содржини.

Почнува традиционалното „На зајдисонце“ во Трпејца

Ивона Петрова — Wed, 20 Jul 2022 10:42:02 +0000

Со изложба на слики од уметникот Мајкл Клос од Канада и настапот на бендот „8balls“, денеска почнува 11. издание на Културно-забавната манифестација „На зајдисонце“ во Трпејца, во организација на здружението „За Трпејца со љубов“. Според организаторот, годинашната манифестација, што ќе се одржува до 28 јули ќе понуди низа интересни содржини со кои ќе го привлечат вниманието на гостите кои летуваат во Трпејца. – На летната сцена под ведро небо, в четврток ќе настапат младите од Црвен крст – Охрид со поетско-музичкиот перформанс „Треба да бидеме подобри“. Следниот ден е резервиран за поетесите Вера М. Самарјанин и Марика Тапанџиева и пејачот Драган Мијалковски, соопшти здружението. В сабота своја видео презентација на тема „Трпејца низ вековите“ ќе има Петар Симоноски, а ќе биде прикажан култниот македонски филм „Мирно лето“ во режија Димитрија Османли. Настап ќе има и гитаристот Горан Кичеец. Традиционалната кајакарска регата „Номче Митрески“ и натпреварот во пливање ќе се одржат в недела, а вечерта мини концерт ќе одржи дуото „Black Moon“ од Охрид. – Следната вечер ќе почне нова содржина наменета за забава на гостите, односно ќе се одржи трката со куфери по скалинадата во Трпејца. За тројцата најбрзи ќе има интересни награди. Предвидено е и запознавање со „Богатството на Охридското Езеро“ и концерт на класична музика насловен „Млади надежи“, информира „За Трпејца со љубов“. Наредните денови најмладите преку цртежи ќе го овековечат зајдисонцето во Трпејца, нивните трудови ќе бидат и претставени пред гледачите. – По традиција ќе биде поставена и изложба на дела од минатогодишната четврта Уметничка колонија која секој септември се одржува во Трпејца. Ќе настапи танчерската група „Dancing Angels“, а вечерта ќе биде заокружена со гостувањето на д-р Анис Сефиданис, кој ќе се обиде гледачите на популарен и интерактивен начин да ги воведе во светот на компјутерите и роботиката, стои во најавата. Претпоследната вечер од годинашното „На зајдисонце“ е резервирана за видео изложбата на фотографии направени со мобилен „Трпејца низ објективот на туристите“ и настапот на пејачката група и оркестар на ансамблот „Ѓердан од бисери“ од Охрид. Културно-забавното лето во Трпејца ќе биде заокружено со вечер посветeна на познатиот македонски хармоникаш и композитор Гоце Џуклески, градскиот хор „Вокс Лихнидос“ и пејачот Мирко Вретовски.

Десетто јубилејно културно-забавно лето „На зајдисонце“ во Трпејца

Ивона Петрова — Mon, 19 Jul 2021 05:44:46 +0000

Од утре до 28 јули во Трпејца ќе се одржи десеттото културно-забавно лето „На зајдисонце“. Манифестацијата се одржува под покровителство на Општина Охрид, а веќе втора година е поддржана од Делегацијата на Европската Унија во Скопје, како и од други бројни спонзори и помагатели. Во чест на десетгодишнината ќе биде прикажан и видео материјал под наслов „Ние на зајдисонце“. Вечерта ќе биде заокружена со концерт на познатите „Силви Бенд“. Следните седум дена трпејчани и гостите ги очекуваат средбите со Нуркачкиот центар „Амфора“ од Охрид, со авторите на Рибарскиот алманах, проф. д- р Теон Џинго, доц. д-р Никола Митровиќ – Бабе и презентерот Славчо Новески, како и настанот работно насловен „Еден поглед на Трпејца од ономастички аспект“ со проф. д-р Мери Јосифовска. Десеттото „На зајдисонце“ се вклучува во одбележувањето на 100-годишнината од раѓањето на големиот Блаже Конески со вечер „Поезијо чувствата ми ги будиш“ на која со избор од поезија од Конески и од други домашни светски поети ќе настапат Марија Кондовска, Симон Јаковлев – Писин во придружба на Лео Спасески – Охридски ( синтисајзер). На листата на учесници се и младите Христијана Матеска – хармоника и Марија Џуклеска – виолина. Тие ќе настапат на Вечерната променада наречена „Со кајче по езерото“ а во Трпејца свои концерти ќе одржат дуото „BLACK MOON“ , бендот „Броз“, Градскиот хор „Вокс Лихнидос“, ансамблот „Билјана“ и пејачката група и оркестар од Фолклорниот ансамбл „Бисери“ од Охрид. Од културните настани во рамките на летото се и традиционалната изложба на дела од Ликовната колонија „Трпејца 2020“ и настанот „Цртаме на зајдионце“. Во рекреативниот дел се традиционалната кајакарска регата „Номче Митрески“ и Малиот пливачки маратон помогнати од Асоцијацијата „Спорт за сите“ и традиционалната прошетка по патеката „Чоколско“. Сите содржини во рамки на манифестацијата се бесплатни и под отворено небо. Вечерните настани започнуваат од 20:30 часот.

Со лажен елаборат изградил куќа во националниот парк „Галичица“- жител на Трпејца заработи кривична пријава од полицијата

Дарко Андоновски — Sat, 06 Mar 2021 12:48:47 +0000

Според информациите на МВР, СВР Охрид поднесе кривична пријава против Н.Л.(76) од охридското село Трпејца, поради постоење основи на сомнение дека е сторител на казнените дела „бесправно градење“, „узурпација на недвижности” и „употреба на исправа со невевистинита содржина“, како и против В.К.(53) од Охрид поради сторено казнено дело „фалсификување или уништување деловни книги”. Првопријавениот, во период од август-декември 2020 година, на катарстарска парцела во селото Трпејца, во месноста „Трпејчко кале“ што е во состав на Националниот парк „Галичица“, без да поседува одобрени за градба изградил индивидуален објект и како доказ употребил фалсификат геодетски елаборат, изработен од второпријавениот.

Загина 20 годишно момче откако неговиот трактор се превртел во село Трпејца

Магдалена Андонова — Fri, 25 Sep 2020 15:40:16 +0000

Загина 20 годишно момче од Љубаништа во несреќа што се случи денеска во близина на патниот правец Отешево-Трпејца. Дознаваме дека тој со трактор се спуштал по планински пат при што од засега непознати причини возилото изгубило контрола и се превртело при што смртно настрадал возачот. Надлежните екипи се на терен и го расветлуваат случајот како дошло до превртување на тракторот.

Забава за сите „На зајдисонце“ во Трпејца

Super Admin — Mon, 27 Jul 2020 12:28:21 +0000

Уште два дена до крајот на културно – забавната манифестација „На зајдисонце“ исполнети со атрактивни содржини кои се очекува да привлечат уште повеќе гледачи на летната сцена во крајезерската населба Трпејца. Денеска заинтересираните за рекреативно пешачење ќе ја откријат патеката Чоколско која е на дофат на Трпејца, а е дел од Националниот парк „Галичица“. Во вечерниот термин од 20 часот ќе гостува поп групата „Броз“ која до пред пандемијата од Ковид – 19 ги полнеше кафетериите при секој свој настап во Охрид. И викендов што остана зад нас во одлично посетената Трпејца од туристи, почитувајќи ги сите мерки за заштита од коронавирусот организаторот на културно – забавното лето понуди интересни содржини. Петтата вечер, во петокот помина во знакот на класичната музика и театарот. На брегот крај езерото за трпејчани и гостите, а подоцна и на фестивалската сцена настапија: Леона Неделкоска (флејта), Наум Палоски (кларинет) и Андреј Пувтоски (хармоника) обајцата од Пештани. Со два раскази и една народна приказна веднаш потоа се претстави Театарската работилница предводена од актерката составена од деца летувалци и деца од Трпејца. Ден потоа се одржа забавно-рекреативниот настан „Фаќаме риба на јадица”, а вечерта мина во знакот на Концертот на евергрин музука со Емилија Маринова и Јане Тодороски. Тие со овации беа испратени од страна на публиката и два биса, како доказ за прекрасниот флуид и штимунг на сцената и меѓу публиката. Вчера се одржа традиционалната кајакарска регата „Номче Митрески“ како потсетување на славното време на Кајакарскиот клуб „Рибар“ од Трпејца. Вечерта на сцената Кај бунарот помина во знакот на творештвото на македонскиот писател, новинар, публицист и хроничар Данило Коцевски. Неговата ќерка – новинарката Јана Коцевска и актерката Марија Кондовска потсетија на неговите раскази од книгата „патување за Аркашон“ во којаДанило Коцевски има објавено неколку раскази сврзани со Трпејца и трпејчани. -Тоа ни дава за право да кажеме дека Коцевски освен што е хроничар на Скопје ( патем настанот се поклопи со 57 годишнината од скопскиот земјотрес ) дека Данило е хроничар и на Трпејца , рече Јана Коцевска. Синоќа пред нова публика репризно беше прикажана репортажата „Трпејца на дланка“ премиерно прикажана во средата. Деветтото „На зајдисонце“ утревечер ќе биде заокружено со настапот на анасамблот „Билјана“ и изложбата на слики од минатогодишната Втора меѓународна ликовна колонија одржана во Трпејца а во организација на Здружението „За Трпејца со љубов“. Годинашното „На зајдисонце” е под покровителство на Општина Охрид, финансиски поддржано од Министерството за култура и од Делегацијата на ЕУ во Скопје.

ФОТО: Големо невреме во охридско Трпејца- откорнати дрвја, искршени кајчиња…

Катерина Бојаџиева — Wed, 10 Jul 2019 19:08:19 +0000

Охридското село Трпејца, познато туристичко место попладнево го зафати страшно невреме како што непаметат старите Трпејчани. Откорнати дрвја, искршени кајчиња, гранки на сите страни, е она што остана по невремето. Во невремето среќа нема повредени, но настаната е голема матреријана штета. Голема штета има и во атрактивните ресторани кои се во ова место. Во моментов селото нема струја, а и приодот со таму е крајно отежнат поради одрони на патот кон Св Наум. Трпејца инаку е полна и со туристи. Ова село од година во година прераснува во атрактивно летувалиште. Извор: Скопје1