Лебот нема да поскапи, ова е само шпекулација, тврдат мелничарите

Дарко Андоновски — Wed, 23 Aug 2023 08:16:29 +0000

Цената на лебот во однос на брашното ќе нема никакви поместувања, освен ако драстично не поскапат енергенсите или електричната енергија како минатата година, тврдат мелничарите. Но, во таков случај, тие очекуваат Владата да реагира навремено и да ги изрегулира на соодветно ниво цените на енергенсите или струјата за да не се повтори, велат, проблемот од лани. Според претседателот на Групацијата на мелничко-пекарската индустрија при Стопанската комора Горан Малишиќ, изминатите денови непотребно се крена многу прашина околу цената на лебот. Како што изјави Малишиќ за МИА, Групацијата во консултации со најголемите индустриски производители на леб утврдила дека темата за зголемување на цената на лебот е само шпекулација во јавноста, поттикната од зголемувањето на цените на другите основни производи. За пекарската индустрија од огромна корист би биле и ноќните вишоци што ги продава ЕСМ зашто и онака 75 отсто од производството се изведува во ноќните часови. -Моменталната ситуација на цените на светските и регионалните берзи на пченицата, би рекол и покрај сите турбуленции околу војната во Украина, некако се стабилизираа на ниво од 230 до 245 евра тон за меркантилна пченица на најрелевантната Матиф Француска берза и на Чикашката берза од околу 205 до 215 евра по тон. Регионалните цени во моментов се движат во тој опсег помеѓу цените од двете берзи и сите индекси од берзите за цените во Декември 23, Март 24 или Мај 24 па и по жетвата во 2024 се движат во истиот опсег. Сите овие податоци ни даваат за право да веруваме дека по тој основ цената на брашното како и индиректно на лебот, посебно индустрискиот, ќе го задржат истото ниво на цени во идниот би рекол подолг период. Покрај овие берзански индиции, нашата Групација, во консулатции со своите членки, односно во консултации со најголемите индустриски производители на леб, утврди дека темата за зголемување на цената на лебот се само шпекулации во јавноста поттикнати од страна на зголемувањето на цените на другите основни производи, истакнува Малишиќ. Цените на брашната за индустриска употреба моментно се движат, зависно од типот и квалитетот, од 20 па до 35 денари, а во малопродажбата од 30 до 50 денари. -Овие цени се веќе константни во последниве три месеци и со индикативните берзански цени ќе останат на исто ниво, што ни дава за право да потврдиме дека цената на лебот во однос на брашното ќе нема никакви поместувања, освен ако драстично не се зголемат цените на енергенсите или електричната енергија како минатата година. Во таков случај очекуваме Владата да реагира навремено и да ги изрегулира на соодветно ниво цените на енергенсите или струјата за да не се соочиме со истиот проблем како лани, што беше една голема причина за поскапувањата, дециден е Малишиќ. Вчера, министерот за финансии Фатмир Бесими апелира во време на криза да не се шпекулира со поскапувања. Тој напомена дека цената на белиот леб е се уште 33 денари и тука, подвлече, нема поместувања. Владата, рече Бесими, е подготвена да разговара со мелничката индустрија и да реагира соодветно за да ги заштити граѓаните, но, секој, како што дополни, носи дел од одговорноста. Според Бесими, најавите за поскапувањата само влијаат врз очекувањата на пазарот и дополнително ги оптоваруваат и загреваат очекувањата за цените. -Ги прочитав сите најави од мелничката индустрија. Дали откупната цена на пченицата е повисока во однос на минатата година? Не. Дали електричната енергија е поскапа? Не. Што во меѓувреме се случило за да најават поскапување на лебот? Во постојана комуникација сум со двајцата министри, за економија и за земјоделство, како и со премиерот. Ние сме отворени да разговараме за која било тема, но медиумските укажувања на работи кои влијаат врз очекувањата на стопанството не помагаат во економијата, туку дополнително создаваат очекувања за зголемување на трошоците. Ќе се разговара со нив и ќе излеземе во пресрет на секоја ситуација во однос на овие ситуации што може да влијаат од аспект на ценовната криза, истакна Бесими. Министерот за земјоделство Љупчо Николовски, пак, ги повика мелничарите да кажат кои се аргументите за поскапувањето на лебот, зашто, како што рече, купија суровина за 11, а не за 20 денари. -Мелничката индустрија оваа година се снабди со суровина која е преполовена и фер и коректно е да не се шпекулира и шпекулативно да не се создаваат цени. Ова е специфична година во која цената на житото на светските берзи беше преполовена, но и нашата мелничка индустрија се снабди со суровина која што е по цена од 11 денари, не по цена од 20 денари. Електричната енергија за разлика од минатата година исто така е стабилизиран пазарот и цените. Треба да одговорат кои се аргументите, зошто некој би барал покачување на цената на лебот на грбот на граѓаните кога мелничката индустрија се снабди со драстично поевтина суровина оваа година. И токму затоа нашата поддршка е со дополнителна поддршка на тие коишто го произведуваат житото, а тоа се земјоделците, нагласи Николовски. МИА побара став и од Министерството за екиномија во врска со цените на основните прехранбени производи. -Ценовниот раст може да произлезе од фактори на страната на понудата, односно од порастот на увозните цени, влошување на глобалните синџири на снабдување на пазарот, растот на цените на берзите на суровини (житата, брашното, зеленчукот, суровото масло, месото, млекото, сирењето) потребни во производство, како и цените на горивата и електричната енергија. Сите наведени фактори се клучните влезни компоненти во кои имаат директен одраз врз крајните цени на прехранбените производи. Согласно членот 29 од Законот за трговија, за што надлежност има Министерството за економија, мерки кои може да се преземат како форми на поддршка се ограничувањата на цените во трговијата, предвидени во исклучителни случаи, односно во услови на кризна состојба. Министерството за економија таквата пракса ја спроведе во време на КОВИД кризата и енергетската криза, наведе Министерството за економија. Владата на вчерашната седница донесе три нови мерки за поддршка на земјоделците - производители на пченица, јачмен и градинарски култури. Мерките ќе се реализираат преку Интервентната програма, а предвидуваат по три денари за килограм остварено и предадено или складирано производство на пченица, по три денари за произведен домашен сертифициран семенски материјал од прва и втора генерација на пченица и јачмен, по 35 денари за килограм домат произведен и продаден од 5 април - 31 мај, како и по 30 денари поддршка за краставици произведени од 5 април - 15 мај кога важеше одлуката за замрзнување на цените.

Помалите штипски пекари ја намалија цената на лебот и до пет денари

Дарко Андоновски — Wed, 01 Mar 2023 13:39:09 +0000

Намалена е цената на лебот во одредени штипски пекари, откако Владата и официјално ја замрзна цената на 33 денари. Николче Малинов, сопственик на пекарата „Штипски сокак“, вели дека одредени пекари ја имаат намалено цената на лебот за пет денари, а рафтовите на пекарите не се празни. -Ние го намаливме лебот и од денеска се продава по цена од 30 денари и леб ќе има. Ние не се приклучуваме кон заканите. Леб ќе има, вели Малинов. Пекара Штип Леб и пецива има и во останатите пекари во Штип, како и во супермаркетите. Мерката на Владата за замрзнување на цената на лебот на максимални 33 денари ќе важи до крајот на мај.

Ѓорѓиевски: Владата избрза со одлуката за цената на лебот, компаниите ќе анализираат дали можат да го издржат тој удар

Ивана Ефремовски — Sat, 25 Feb 2023 15:45:22 +0000

Во вторник ќе се замрзне цената на лебот и нема да биде над 33 денари и за белиот и полубелиот леб. Ова е само прв чекор од производите наведени во одлуката на Владата. Ќе следат и нови одлуки за замрзнување на цените. Се прават анализи за тестенините и тие средства ќе се користат за укинување на некои давачки, изјави на денешната прес-конференција Министерот за економија Крешник Бектеши. Цените, како што појасни Бектеши, нема да се зголемат по завршување на мерката, освен ако се зголемат цените на суровините и тогаш може да има нагло покачување на цената. Од Агробизнис комората не се согласуваат со одлуката за замрзнување на цените. За Сител велат, неизвесно е како фурните ќе се справат со трошоците, па можно е или да стават клуч на врата или рафтовите во маркетите да ги остават празни. -Секоја од компаниите ќе си направи внатрешни анализи, ќе си утврди дали може да го издржи тој удар, како би се однесувало за трошоците кои ги има за самото производство и согласно тоа, сама ќе си заклучи секоја од компаниите што би правела во иднина. Можни се сите опции, не би можел сега да искоментирам што би се случувало конкретно во блиска иднина, Меѓутоа, сметам дека требаше посериозно да се разговара, да не се брза со вакви одлуки, рече сопственикот на „Специјал“, Горан Ѓорѓиевски кој е претседател на Агро-бизнис комората при Сојузот на стопански комори на Македонија. Целиот прилог на Сител, погледнете го во продолжение:

цена на леб – Kurir.mk

Лебот нема да поскапи, ова е само шпекулација, тврдат мелничарите

Помалите штипски пекари ја намалија цената на лебот и до пет денари

Ѓорѓиевски: Владата избрза со одлуката за цената на лебот, компаниите ќе анализираат дали можат да го издржат тој удар