Турандот – Kurir.mk

„Турандот“ во Националната опера и балет

Ивона Петрова — Wed, 09 Feb 2022 06:53:04 +0000

Операта „Турандот“ од Џакомо Пучини вечер ќе биде изведена во Националната опера и балет. Диригент е Бисера Чадловска, а режијата, сценографијата и костимографијата се на Џанкарло дел Монако. Кореографијата е на Саша Евтимова, а концерт мајстор – Јане Бакевски. Настапува врвна домашна солистичка екипа: Весна Ѓиновска Илкова, Ѓорѓи Цуцковски, Злата Тошевска, Владимир Саздовски, Јане Дунимаглоски, Дејан Стоев, Диме Петров, Мирослав Антовски, хорот, оркестарот и балетскиот ансмбл на Националната опера и балет. „Турандот“ е опера во три чина од Џакомо Пучини. Напишана е по либретото на Џузепе Адами и Ренато Симони, а базирана на адаптацијата на Фридрих Шилер на драмата „Турандот“ од Карло Гоци. Пучини умира недовршувајќи ја операта, која што подоцна е завршена од Франко Алфано. Одликувајќи се со „невообичаен“ музички материјал, во кој предничи иновативната употреба на хорот и оркестарот, стилот на Пучини во ова оперско дело е особено препознатлив во широките, експресивни мелодии. „Турандот“ изобилува со моменти на восхитувачка мелодиска убавина, која особено доаѓа до израз во незаборавната тенорска арија, една од најубавите во оперската литература, „Никој не спие“(Nessun dorma).

„Турандот“ на Пучини во МОБ

Ивана Ефремовски — Fri, 01 Mar 2019 07:11:10 +0000

Операта „Турандот“, епската кинеска бајка на Џакомо Пучини во режија на Џанкарло дел Монако, вечер од 20 часот е повторно на сцената на Македонската опера и балет. Во насловната улога е сопранистката Весна Ѓиновска-Илкова, а во солистичката екипа се и: Ѓорѓи Цуцковски, Сандра Митровска, Владимир Саздовски, Момчил Караиванов од Бугарија, Кристијан Антовски, Дејан Стоев, Диме Петров, Марјан Николовски. Настапуваат хорот, оркестарот и балетскиот ансамбл на МОБ. Режисерот Дел Монако е и сценограф и костимограф на претставата, диригент е Иван Еминовиќ, а кореографијата е на Саша Евтимова. „Турандот“ е опера во три чина. Пучини починал и не ја недовршил и подоцна е завршена од Франко Алфано. Напишана е по либретото на Џузепе Адами и Ренато Симони, а базирана на адаптацијата што ја направил Фридрих Шилер на драмата „Турандот“ од Карло Гоци. МОБ посочува дека оваа опера на Пучини се одликува со музички материјал во кој предничи иновативната употреба на хорот и оркестарот. -„Турандот“ изобилува со моменти на восхитувачка мелодиска убавина, која особено доаѓа до израз во незаборавната тенорска арија „Никој не спие“ (Nessun dorma), една од најубавите во оперската литература, наведува МОБ. (МИА)

ВИДЕО: Маестрална изведба на Игор Дурловски на „Турандот“

Матеја Петровски — Sun, 20 May 2018 11:28:41 +0000

„Игор, Игор, Игор“ вака публиката со овации и долготрајно скандирање на неговото име вчера му се поклони на Игор Дурловски за неговата изведба на операта „Турандот“ каде тој го играше ликот на Тимур. Ова е прво враќање на Дурловски на сцената откако тој беше неколку месеци во притвор и против него беше покренато обвинение за терористичко загрозување на уставниот поредок како учесник и организатор на протестите против промена на името и Уставот кои кулминираа со настаните во Собранието лани на 27 април. Република Македонија на овој начин стана прва држава во Европа што ги прогласува своите културни работници за терористи и воедно прва држава во Европа со обвинети терористи по глава на жител. Голготата на Дурловски кој како еден од лидерите на граѓанската иницијатива „За заедничка Македонија“ беше неколку месеци во затвор и тоа во во истражниот затвор во Шутка. Откако голем број на ѕвезди, негови колеги и под притисок на јавноста мерката затвор му се замени куќен притвор, за на крај да биде и целосно ослободен од секаков притвор. Дурловски е поранешен директор на МОБ и експрофесор на Факултет за музичка уметност во Скопје. Тој заедно со неговара сопругата Ана Дурловски, која исто е сопран од светски глас, имаат исклучително успешна меѓународна кариера.

„Турандот“ на Мајските оперски вечери

Дарко Андоновски — Sat, 19 May 2018 07:58:29 +0000

Првенката на Операта Весна Ѓиновска-Илкова ќе настапи во насловната улога на „Турандот“ која вечер од 20 часот ќе биде изведена во Македонската опера и балет во рамки на 46. Мајски оперски вечери. Режијата, костимографијата и сценографијата се на Џанкарло дел Монако од Италија, од каде што гостува и диригентот на претставата - Алесандро Д’Агостини. Кореограф е Саша Евтимова. Покрај Ѓиновска-Илкова, во улогите се и: Амади Лага од Франција/Тунис, Ноема Ерба од Чешка, Игор Дурловски, Андреа Ѕаупа од Италија, Дарко Нешовски, Дејан Стоев, Драган Ампов и Јане Дунимаглоски. Настапува хорот и оркестарот на МОБ. „Турандот“ е љубовна приказна од Забранетиот град и егзотичната Кина, последно животно дело на Џакомо Пучини. Има три чина и е напишана по либретото на Џузепе Адами и Ренато Симони. Текстот се базира на адаптацијата на Фридрих Шилер на драмата „Турандот“ од Карло Гоци. Пучини починал и не ја допишал операта и подоцна е завршена од Франко Алфано. Светската премиера на „Турандот“ била во Миланската скала во 1926 година, диригирана од Артуро Тосканини. „Турандот“ е трета од трите опери на Пучини на годинашните Мајски оперски вечери, со кои МОБ одбележува 160 години од раѓањето на овој италијански композитор. На отворањето на фестивалот на 9 мај беше изведена операта „Боеми“, на 12 мај - „Тоска’, а по повод јубилејот в среда (23 мај) во МОБ ќе има и гала-оперски концерт „Пучини&Росини“. (МИА)