турска офанзива – Kurir.mk

Цивил убиен во турска офанзива против курдските бунтовници во Ирак

Тале Кристо — Fri, 19 Jun 2020 13:11:38 +0000

Ирачки цивил е убиен во турски воздушен напад извршен денеска против курдските бунтовници во северен Ирак, соопштија локалните власти. – Овчарот е убиен во зори. Тој е првата цивилна жртва на турската офанзива, соопштил официјален претставник кој побарал да остане анонимен. Нападот се случил во провинцијата Дохук, во близина на тромеѓето меѓу Сирија, Турција и Ирак. Турција на 17 јуни распореди специјални сили во северен Ирак како дел од копнената операција „Канџа-Тигар“ против бунтовниците на Курдската работничка партија (ПКК). Операцијата, која се спроведува со поддршка на авијацијата и артилеријата, е одговор на зачестените напади врз турските сили во близина на границата. Анкара и нејзините западни сојузници ја сметаат ПКК за терористичка организација.

Ердоган: Ембаргото на продажба на оружје нема да ја запре турската офанзива

Тале Кристо — Sun, 13 Oct 2019 18:58:46 +0000

Турскиот претседател Реџеп Тајип Ердоган денеска изјави дека ембаргото на оружје за Турција нема да биде доволно за да се стави крај на офанзивата во Сирија. – Уште откако ја започнавме операцијата, се соочивме со закана од економски санкции или ембарго за оружје. Оние кои мислат дека ќе нè принудат да се откажеме, не се во право, рече Ердоган. Турција во средата започна воена офанзива против курдските сили во североисточна Сирија затоа што ги смета за терористи. Берлин и Париз вчера објавија дека прекинуваат со испораката на оружје за Турција, особено она оружје што може да се користи во офанзивата во Сирија.

Сириските сили го зазедоа градот Сулук

Тале Кристо — Sun, 13 Oct 2019 17:21:40 +0000

Сириските сили, заедно со сојузниците денеска го зазедоа градот Сулук, на петтиот ден од турската офанзива во северна Сирија. Курдските воена сили се протерани од центарот на градот, кој се смета за стратешки крстопат, на околу 10 километри од границата со Турција, јави турската новинска агенција Анадолија. Курдските власти тврдат дека судирите во Сулук се во тек. Неколку гранати истрелани од Сирија ги погодија турските погранични градови Акчакале и Суруч, во провинцијата Санлиурфа.

ОН: Поради турската офанзива во Сирија би можеле да се раселат до 400.000 луѓе

Тале Кристо — Sun, 13 Oct 2019 16:35:38 +0000

Турската офанзива против курдските борци во североисточна Сирија веќе принуди 130.000 луѓе да ги напуштат своите домови, соопштија денеска ОН, додавајќи дека тој број може да се зголеми на 400.000. – Сметаме дека до 400.000 луѓе ќе бидат раселени во погодените области и ќе имаат потреба од помош и заштита, рече портпаролот на ОН Јенс Лерке во Женева. ОН во петокот соопштија дека 100.000 луѓе ги напуштиле своите домови од средата, кога почна турската воена офанзива во Сирија. ОН, исто така, изразија загриженост за безбедноста на 113 нејзини членови и припадници на други организации кои даваат меѓународна помош во тој сектор.